Majjhima Nikaya


[Home]  [Sutta Indexes]  [Glossology]  [Site Sub-Sections]


 

Majjhima Nikāya
II. Majjhima-Paṇṇāsa
4. Rāja Vagga

Sutta 87

Piya-Jātika Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[100]

[1][chlm][pts][than][upal] Evaɱ me sutaɱ:|| ||

Ekaɱ samaya Bhagavā Sāvatthīyaɱ viharati Jetavane Anāthapiṇḍikassa ārāme.|| ||

2. Tena kho pana samayena aññatarassa gahapatissa eka-puttako piyo manāpo kāla-kato hoti.|| ||

Tassa kāla-kiriyāya n'eva kammantā paṭibhanti,||
na bhattaɱ paṭibhāti.|| ||

So ā'āhanaɱ gantvā gantvā kandati kahaɱ eka-puttaka,||
kahaɱ eka-puttakā' ti.|| ||

3. Atha kho so gahapati yena Bhagavā ten'upasankami,||
upasankamitvā Bhagavantaɱ abhivādetvā eka-m-antaɱ nisīdi eka-m-antaɱ nisinnaɱ kho taɱ gahapatiɱ Bhagavā etad avoca:|| ||

na kho te gahapati,||
sake citte ṭhitassa indriyāni,||
atthi te indriyānaɱ aññathattan' ti.|| ||

Kiɱ hi me bhante indriyānaɱ nāññathattaɱ bhavissati? Mayhaɱ hi bhante,||
eka-puttako piyo manāpo kāla-kato tassa kāla-kiriyāya n'eva kammantā paṭibhanti,||
na bhattaɱ paṭibhāti.|| ||

So'haɱ ā'āhanaɱ gantvā gantvā kandāmi kahaɱ eka-puttaka,||
kahaɱ eka-puttakā' ti.|| ||

Evam eva gahapati,||
piyajātikā hi gahapati,||
soka parideva dukkha domanass'upāyāsā piyappabhavikā' ti.|| ||

Kissa nu kho nāme taɱ bhante,||
evaɱ bhavissati:|| ||

Piyajātikā soka parideva dukkha domanass'upāyāsā piyappabhavikā,||
piyajātikā hi kho bhante,||
ānandasomanassā piyappabhavikāti.|| ||

Atha kho so gahapati Bhagavato bhāsitaɱ anabhinan'ditvā paṭikkositvā uṭṭhāy āsanā pakkāmi.|| ||

4. Tena kho pana samayena sambahulā akkhadhuttā Bhagavato avidūre akkhehi dibbanti.|| ||

Atha kho so gahapati yena te akkhadhūttā ten'upasankami,||
upasankamitvā te akkhadhūtte etad avoca:|| ||

Idh'āhaɱ bhonto,||
yena Samaṇo Gotamo ten'upasankamiɱ.|| ||

Upasaŋkamitvā samaṇaɱ Gotamaɱ abhivādetvā eka-m-antaɱ nisidiɱ.|| ||

Eka-m-antaɱ nisinnaɱ kho maɱ bhonto,||
Samaṇo Gotamo etad avoca:|| ||

na kho te gahapati,||
sake citte ṭhitassa indriyāni atthi.|| ||

Te indriyānaɱ aññathattan' ti.|| ||

Evaɱ vutte ahaɱ bhonto,||
samaṇaɱ Gotamaɱ etad avocaɱ:|| ||

Kiɱ hi me bhante,||
indriyānaɱ nāññathattaɱ bhavissati,||
mayhaɱ hi bhante,||
eka-puttako piyo manāpo kāla-kato,||
tassa kāla-kiriyāya n'eva kammantā paṭibhanti,||
na bhattaɱ paṭibhāti.|| ||

So'haɱ ā'āhanaɱ gantvā gantvā kandāmi:|| ||

Kahaɱ eka-puttaka,||
kahaɱ eka-puttakā' ti.|| ||

Evam etaɱ gahapati,||
evam etaɱ gahapati,||
piyajātikā hi gahapati,||
soka parideva dukkha domassupāyāsā piyappabhavikā ti.|| ||

Kissa nu kho nāme taɱ bhante,||
evaɱ bhavissati:|| ||

Piyajātikā soka parideva dukkha domanass'upāyāsā piyappabhavikā,||
piyajātikā hi kho bhante,||
ānandasomanassā piyappabhavikāti.|| ||

Atha khvāhaɱ bhonto,||
samaṇassa Gotamassa bhāsitaɱ anabhinan'ditvā paṭikkositvā uṭṭhāy āsanā pakkamin' ti.|| ||

Evam etaɱ gahapati,||
evam etaɱ gahapati,||
piyajātikā hi gahapati,||
ānanda-somanassā piyappabhavikā' ti.|| ||

Atha kho so gahapati,||
sameti me akkadhuttehīti pakkāmi.|| ||

5. Atha kho idaɱ kathā-vatthuɱ anupubbena rājantepuraɱ pāvisi.|| ||

Atha kho Pasenadi kosalo Mallikaɱ deviɱ āmantesi:|| ||

Idan te Mallike,||
samaṇena Gotamena bhāsitaɱ:|| ||

Piyajātikā soka parideva dukkha domanass'upāyāsā piyappabhavikā' ti.|| ||

Sace taɱ mahārāja,||
Bhagavatā bhāsitaɱ,||
evametanti.|| ||

Evam evaɱ panāyaɱ Mallikā yañ-yad-eva Samaṇo Gotamo bhāsati taɱtad ev'assa abbhanumodati.|| ||

Sace taɱ mahārāja,||
Bhagavatā bhāsitaɱ evametan' ti.|| ||

Seyyathā pi nāma ācariyo yañ-yad-eva antevāsissa bhāsati,||
taɱ tad ev'assa antevāsī abbhanumodati:||
evam etaɱ ācariyā evam etaɱ ācariyāti.|| ||

Evam evaɱ kho tvaɱ Mallike,||
yañ-yad-eva Samaṇo Gotamo bhāsati.|| ||

Taɱ tad ev'assa abbhanumodasi.|| ||

Sace taɱ mahārāja,||
Bhagavatā bhāsitaɱ evametan' ti.|| ||

Cara pare Mallike vinassāti.|| ||

6. Atha kho Mallikā devī nāḷijaŋghaɱ brāhmaṇaɱ āmantesi:|| ||

Ehi tvaɱ brāhmaṇa,||
yena Bhagavā ten'upasankama,||
upasankamitvā mama vacanena Bhagavato pāde sirisā vandāhi,||
appābādhaɱ appātaŋkaɱ lahuṭṭhānaɱ balaɱ phāsu-vihāraɱ puccha:|| ||

Mallikā bhante,||
devī Bhagavato pāde sirasā vandati,||
appābādhaɱ appātaŋkaɱ lahuṭṭhānaɱ balaɱ phāsu-vihāraɱ pucchatī' ti.|| ||

Evañ ca vadehi:|| ||

Bhāsitā nu kho bhante,||
Bhagavatā esā vācā:|| ||

Piyajātikā soka parideva dukkha domanass'upāyāsā piyappabhavikā' ti.|| ||

Yathā ca te Bhagavā vyākaroti,||
tathā taɱ sādhukaɱ uggahetvā mamaɱ āroceyyāsi.|| ||

Na hi Tathāgatā vitathaɱ bhaṇantī" ti.|| ||

Evaɱ bhotīti kho nāḷijaŋgho brāhmaṇo Mallikāya deviyā paṭissutvā yena Bhagavā ten'upasankami,||
upasankamitvā Bhagavatā saddhiɱ sammodi,||
sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

Eka-m-antaɱ nisinno kho nāḷijaŋgho brāhmaṇo Bhagavantaɱ etad avoca:|| ||

Mallikā bho Gotama,||
devī bhoto Gotamassa pāde sirasā vandati,||
appābādhaɱ appātaŋkaɱ lahuṭṭhānaɱ balaɱ phāsu-vihāraɱ pucchati.|| ||

Evañ ca vadeti:|| ||

Bhāsitā nu kho bhante,||
Bhagavatā esā vācā piyajātikā soka parideva dukkha domanass'upāyāsā piyappabhavikā" ti.|| ||

7. Evam etaɱ brāhmaṇa,||
evam etaɱ brāhmaṇa,||
piyajātikā hi kho brāhmaṇa,||
soka parideva dukkha domanass'upāyāsā piyappabhavikāti.|| ||

8. Tadamināpetaɱ brāhmaṇa,||
pariyāyena veditabbaɱ:|| ||

Yathā piyajātikā soka parideva dukkha domanass'upāyāsā piyappabhavikā' ti.|| ||

Bhūta-pubbaɱ brāhmaṇa,||
imissā yeva Sāvatthīyā aññatarassā itthiyā mātā kālamakāsi.|| ||

Sā tassā kāla-kiriyāya ummattikā khittacittā rathiyāya rathiyaɱ siŋghāṭakena siŋghāṭakaɱ upasankamitvā evam āha:|| ||

Api me mātaraɱ addasatha api me mātaraɱ addasathā' ti?|| ||

9. Iminā pi kho etaɱ brāhmaṇa,||
pariyāyena veditabbaɱ:|| ||

Yathā piyajātikā soka parideva dukkha domanass'upāyāsā piyappabhavikāti.|| ||

Bhūta-pubbaɱ brāhmaṇa,||
imissā yeva Sāvatthīyā aññatarassā itthiyā pitā kālamakāsi sā tassa kāla-kiriyāya ummattikā khittacittā rathiyāya rathiyaɱ siŋghāṭakena siŋgāṭakaɱ upasankamitvā evam āha:|| ||

Api me pitaraɱ assasatha api me pitaraɱ addasathā' ti?|| ||

10. Iminā pi kho etaɱ brāhmaṇa pariyāyena veditabbaɱ:|| ||

Yathā piyajātikā soka parideva dukkha domanass'upāyāsā piyappabhavikāti.|| ||

Bhūta-pubbaɱ brāhmaṇa imissā yeva Sāvatthīyā aññatarassā itthiyā bhātā kālamakāsi.|| ||

Sā tassa kāla-kiriyāya ummattikā khittacittā rathiyāya rathiyaɱ siŋghāṭakena siŋghāṭakaɱ upasankamitvā evam āha:|| ||

Api me bhātaraɱ addasatha api me bhātaraɱ addasathā' ti?|| ||

11. Iminā pi kho etaɱ brāhmaṇa pariyāyena veditabbaɱ :|| ||

Yathā piyajātikā soka parideva dukkha domanass'upāyāsā piyappabhavikā' ti.|| ||

Bhūta-pubbaɱ brāhmaṇa,||
imissā yeva Sāvatthīyā aññatarassā itthiyā bhaginī kālamakāsi.|| ||

Sā tassā kāla-kiriyāya ummattikā khittacittā rathiyāya rathiyaɱ siŋghāṭakena siŋghāṭakaɱ upasankamitvā evam āha:|| ||

Api me bhaginiɱ addasatha api me bhaginiɱ addasathā' ti?|| ||

12. Iminā pi kho etaɱ brāhmaṇa,||
pariyāyena veditabbaɱ :|| ||

Yathā piyajātikā soka parideva dukkha domanass'upāyāsā piyappabhavikā' ti.|| ||

Bhūta-pubbaɱ brāhmaṇa,||
imissā yeva Sāvatthīyā aññatarassā itthiyā putto kālamakāsi.|| ||

Sā tassā kāla-kiriyāya ummattikā khittacittā rathiyāya rathiyaɱ siŋghāṭakena siŋghāṭakaɱ upasankamitvā evam āha:|| ||

Api me puttaɱ addasatha api me puttaɱ addasathā' ti?|| ||

13. Iminā pi kho etaɱ brāhmaṇa,||
pariyāyena veditabbaɱ yathā piyajātikā soka parideva dukkha domanass'upāyāsā piyappabhavikā' ti.|| ||

Bhūta-pubbaɱ brāhmaṇa,||
imissā yeva Sāvatthīyā aññatarassā itthiyā dhītā kālamakāsi.|| ||

Sā tassā kāla-kiriyāya ummattikā khittacittā rathiyāya rathiyaɱ siŋghāṭakena siŋghāṭakaɱ upasankamitvā evam āha:|| ||

Api me dhītaraɱ addasatha api me dhītaraɱ addasathā' ti?|| ||

14. Iminā pi kho etaɱ brāhmaṇa,||
pariyāyena veditabbaɱ:|| ||

Yathā piyajātikā soka parideva dukkha domanass'upāyāsā piyappabhavikā' ti.|| ||

Bhūta-pubbaɱ brāhmaṇa,||
imissā yeva Sāvatthīyā aññatarassā itthiyā sāmiko kālamakāsi.|| ||

Sā tassa kāla-kiriyāya ummattikā khittacittā rathiyāya rathiyaɱ siŋghāṭakena siŋghāṭakaɱ upasankamitvā evam āha:|| ||

Api me sāmikaɱ addasatha api me sāmikaɱ addasathā' ti?|| ||

15. Iminā pi kho etaɱ brāhmaṇa,||
pariyāyena veditabbaɱ:|| ||

'yathā piyajātikā soka parideva dukkha domanass'upāyāsā piyappabhavikā' ti.|| ||

Bhūta-pubbaɱ brāhmaṇa,||
imissā yeva Sāvatthīyā aññatarassa purisassa mātā kālamakāsi.|| ||

So tassā kāla-kiriyāya ummattako khittacitto rathiyāya rathiyaɱ siŋghāṭakena siŋghāṭakaɱ upasankamitvā evam āha:|| ||

Api me mātaraɱ addasatha,||
api me mātaraɱ addasathā' ti?|| ||

16. Iminā pi kho etaɱ brāhmaṇa,||
pariyāyena veditabbaɱ:|| ||

'yathā piyajātikā soka parideva dukkha domanass'upāyāsā piyappabhavikā' ti.|| ||

Bhūta-pubbaɱ brāhmaṇa,||
imissā yeva Sāvatthīyā aññatarassa purisassa pitā kālamakāsi.|| ||

So tassa kāla-kiriyāya ummattako khittacitto rathiyāya rathiyaɱ siŋghāṭakena siŋghāṭakaɱ upasankamitvā evam āha:|| ||

Api me pitaraɱ addasatha api me pitaraɱ addasathā' ti?|| ||

17. Iminā pi kho etaɱ brāhmaṇa,||
pariyāyena veditabbaɱ:|| ||

Yathā piyajātikā soka parideva dukkha domanass'upāyāsā piyappabhavikā' ti.|| ||

Bhūta-pubbaɱ brāhmaṇa,||
imissā yeva Sāvatthīyā aññatarassa purisassa bhātā kālamakāsi.|| ||

So tassa kāla-kiriyāya ummattako khittacitto rathiyāya rathiyaɱ siŋghāṭakena siŋghāṭakaɱ upasankamitvā evam āha:|| ||

Api me bhātaraɱ addasathā api me bhātaraɱ addasathā' ti?|| ||

18. Iminā pi kho etaɱ brāhmaṇa,||
pariyāyena veditabbaɱ:|| ||

Yathā piyajātikā soka parideva dukkha domanass'upāyāsā piyappabhavikā' ti.|| ||

Bhūta-pubbaɱ brāhmaṇa,||
imissā yeva Sāvatthīyā aññatarassa purisassa bhaginī kālamakāsi.|| ||

So tassā kāla-kiriyāya ummattako khittacitto rathiyāya rathiyaɱ siŋghāṭakena siŋghāṭakaɱ upasankamitvā evam āha:|| ||

Api me bhaginiɱ addasatha api me bhaginiɱ addasathā' ti?|| ||

19. Iminā pi kho etaɱ brāhmaṇa,||
pariyāyena veditabbaɱ:|| ||

Yathā piyajātikā soka parideva dukkha domanass'upāyāsā piyappabhavikā' ti.|| ||

Bhūta-pubbaɱ brāhmaṇa,||
imissā yeva Sāvatthīyā aññatarassa purisassa addasathā'ti? Putto kālamakāsi.|| ||

So tassa kāla-kiriyāya ummattako khittacitto rathiyāya rathiyaɱ siŋghāṭakena siŋghāṭakaɱ upasankamitvā evam āha:|| ||

Api me puttaɱ addasatha api me puttaɱ addasathā' ti?|| ||

20. Iminā pi kho etaɱ brāhmaṇa,||
pariyāyena veditabbaɱ yathā piyajātikā soka parideva dukkha domanass'upāyāsā piyappabhavikā' ti.|| ||

Bhūta-pubbaɱ brāhmaṇa,||
imissā yeva Sāvatthīyā aññatarassa purisassa dhītā kālamakāsi.|| ||

So tassā kāla-kiriyāya ummattako khittacitto rathiyāya rathiyaɱ siŋghāṭakena siŋghāṭakaɱ upasankamitvā evam āha:|| ||

Api me dhītaraɱ addasatha api me dhītaraɱ addasathā' ti?|| ||

21. Iminā pi kho etaɱ brāhmaṇa,||
pariyāyena veditabbaɱ:|| ||

Yathā piyajātikā soka parideva dukkha domanass'upāyāsā piyappabhavikā' ti.|| ||

Bhūta-pubbaɱ brāhmaṇa,||
imissā yeva Sāvatthīyā aññatarassa purisassa pajāpati kālamakāsi.|| ||

So tassā kāla-kiriyāya ummattako khittacitto rathiyāya rathiyaɱ siŋghāṭakena siŋghāṭakaɱ upasankamitvā evam āha:|| ||

Api me pajāpatiɱ addasatha api me pajāpatiɱ addasathā' ti?|| ||

22. Iminā pi kho etaɱ brāhmaṇa,||
pariyāyena veditabbaɱ:|| ||

Yathā piyajātikā soka parideva dukkha domanass'upāyāsā piyappabhavikā' ti.|| ||

Bhūta-pubbaɱ brāhmaṇa,||
imissā yeva Sāvatthīyā aññatarā itthi ñātikulaɱ āgamāsi.|| ||

Tassā te ñātakā sāmikā acchinditvā aññassa dātu-kāmā,||
sā ca taɱ na icchati.|| ||

Atha kho sā itthi sāmikaɱ etad avoca:|| ||

Ime maɱ ayya-putta,||
ñātakā tayā acchinditvā aññassa dātu-kāmā ahañca.|| ||

Taɱ na icchāmi' ti.|| ||

Atha kho so puriso taɱ itthiɱ dvidhā chetvā attānaɱ opādesi,||
ubho pecca bhavissāmā' ti.|| ||

Iminā pi kho etaɱ brāhmaṇa,||
pariyāyena veditabbaɱ:|| ||

Yathā piyajātikā soka parideva dukkha domanass'upāyāsā,||
piyappabhavikā' ti.|| ||

23. Atha kho nāḷijaŋgho brāhmaṇo Bhagavato bhāsitaɱ abhinan'ditvā anumo-ditvā uṭṭhāy āsanā yena Mallikā devī ten'upasankami,||
upasankamitvā yāvatako ahosi Bhagavatā saddhiɱ kathā-sallāpo,||
taɱ sabbaɱ Mallikāya deviyā ārocesi.|| ||

24. Atha kho Mallikā devī yena rājā Pasenadi kosalo ten'upasankami,||
upasankamitvā rājānaɱ Pasenadiɱ Kosalaɱ etad avoca:|| ||

Taɱ kiɱ maññasi mahārāja?|| ||

Piyā te vajirī kumārīti.|| ||

Evaɱ Mallike piyā me vajirī kumārīti.|| ||

Taɱ kiɱ maññasi mahārāja?|| ||

vajiriyā te kumāriyā vipariṇām-aññathā-bhāvā uppajjeyyuɱ soka parideva dukkha domanass'upāyāsā'ti.|| ||

Vajiriyā me Mallike,||
kumāriyā vipariṇām-aññathā-bhāvā jīvitassapi siyā aññathattaɱ,||
kimpana me na uppajjissanti soka parideva dukkha domanass'upāyāsā'ti.|| ||

Idaɱ kho taɱ mahārāja,||
tena Bhagavatā jānatā passatā arahatā Sammā-SamBuddhena sandhāya bhāsitaɱ:|| ||

Piyajātikā soka parideva dukkha domanass'upāyāsā piyappabhavikā' ti.|| ||

25. Taɱ kiɱ maññasi mahārāja?|| ||

Piyā te vāsabhā khattiyāti.
Evaɱ Mallike,||
piyā me vāsabhā khattiyāti.|| ||

Taɱ kiɱ maññasi mahārāja?|| ||

vāsabhāya te khattiyāya viparinā-maññathā-bhāvā uppajjeyyuɱ soka parideva dukkha domanass'upāyāsāti.|| ||

Vāsabhāya me Mallike,||
khattiyāya vipariṇām-aññathā-bhāvā jīvitassapi siyā aññathattaɱ,||
kiɱ pana me na uppajjissanti soka parideva dukkha domanass'upāyāsā' ti.|| ||

Idaɱ kho taɱ mahārāja,||
tena Bhagavatā jānatā passatā arahatā Sammā-SamBuddhena sandhāya bhāsitaɱ:'piyajātikā soka parideva dukkha domanass'upāyāsā piyappabhavikā' ti.|| ||

26. Taɱ kiɱ maññasi mahārāja?|| ||

Piyo te viḍūḍabho senāpatī'ti.|| ||

Evaɱ Mallike,||
piyo me viḍūḍabho senāpatī' ti.|| ||

Taɱ kiɱ maññasi mahārāja?|| ||

viḍūḍabhassa te senāpatissa viparinā-maññathā-bhāvā uppajjeyyuɱ soka parideva dukkha domanass'upāyāsāti.|| ||

Viḍūḍabhassa me Mallike,||
senāpatissa vipariṇām-aññathā-bhāvā jīvitassapi siyā aññathattaɱ.|| ||

Kiɱ pana me na uppajjissanti soka parideva dukkha domanass'upāyāsāti.|| ||

Idaɱ kho taɱ mahārāja'Tena Bhagavatā jānatā passatā arahatā Sammā-SamBuddhena sandhāya bhāsitaɱ:|| ||

'piyajātikā soka parideva dukkha domanass'upāyāsā piyappabhavikā' ti.|| ||

27. Taɱ kiɱ maññasi mahārāja?|| ||

Piyā te ahanti.|| ||

Evaɱ Mallike,||
piyā mesi tvanti.|| ||

Taɱ kiɱ maññasi mahārāja?|| ||

Mayhaɱ te vipariṇām-aññathā-bhāvā uppajjeyyuɱ soka parideva dukkha domanass'upāyāsā'ti.|| ||

Tuyhaɱ hi me Mallike,||
vipariṇām-aññathā-bhāvā jīvitassapi siyā aññathattaɱ.|| ||

Kiɱ pana me na uppajjissanti soka parideva dukkha domanass'upāyāsā' ti.|| ||

Idaɱ kho taɱ mahārāja'Tena Bhagavatā jānatā passatā arahatā Sammā-SamBuddhena sandhāya bhāsitaɱ:|| ||

'piyajātikā soka parideva dukkha domanass'upāyāsā piyappabhavikā' ti.|| ||

28. Taɱ kiɱ maññasi mahārāja?|| ||

Piyā te kāsikosalāti.|| ||

Evaɱ Mallike,||
piyā me kāsikosalā.|| ||

Kāsikosalānaɱ Mallike,||
anubhāvena kāsiKosalaɱ kāsika-candanaɱ pacc'anubhoma,||
mālā-gandha-vilepanaɱ dhāremā' ti.|| ||

Taɱ kiɱ maññasi mahārāja?|| ||

Kāsikosalānaɱ te vipariṇām-aññathā-bhāvā uppajjeyyuɱ soka parideva dukkha domanass'upāyāsā'ti.|| ||

Kāsikosalānaɱ hi me Mallike,||
vipariṇām-aññathā-bhāvā jīvitassapi siyā aññathattaɱ.|| ||

Kiɱ pana me na uppajjissanti soka parideva dukkha domanass'upāyāsā' ti.|| ||

Idaɱ kho taɱ mahārāja'Tena Bhagavatā jānatā passatā arahatā Sammā-SamBuddhena sandhāya bhāsitaɱ:|| ||

'piyajātikā soka parideva dukkha domanass'upāyāsā piyappabhavikā' ti.|| ||

29. Acchariyaɱ Mallike,||
abbhūtaɱ Mallike,||
yāvañca so Bhagavā paññāya ativijjha maññe passati.|| ||

Ehi Mallike,||
ācāmehīti.|| ||

Atha kho rājā Pasenadi kosalo uṭṭhāy āsanā ekaɱsaɱ uttarā-saŋgaɱ karitvā yena Bhagavā tenañchaliɱ paṇāmetvā ti-k-khattuɱ udānaɱ udānesi:|| ||

namo tassa Bhagavato arahato Sammā-Sam-Buddhassa,||
namo tassa Bhagavato arahato Sammā-Sam-Buddhassa,||
namo tassa Bhagavato arahato Sammā-Sam-Buddhassā' ti.|| ||

Piyajātikasuttaɱ sattamaɱ


 

Contact:
E-mail
Copyright Statement