Majjhima Nikaya


[Home]  [Sutta Indexes]  [Glossology]  [Site Sub-Sections]


 

Majjhima Nikāya
III. Upari Paṇṇāsa
1. Devadaha Vagga

Sutta 103

Kinti Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[238]

[1][chlm][pts][ntbb][upal][olds] Evaɱ me sutaɱ:|| ||

Ekaɱ samayaɱ Bhagavā kusiṇārāyaɱ viharati baliharaṇe vana-saṇḍe.|| ||

Tatra kho Bhagavā bhikkhū āmantesi "Bhikkhavo" ti.|| ||

"Bhadante" ti te bhikkhū Bhagavato paccassosuɱ, Bhagavā etad avoca:|| ||

"Kinti vo bhikkhave, mayi hoti:|| ||

'Cīvara-hetu vā Samaṇo Gotamo dhammaɱ deseti,||
piṇḍa-pātahetu vā Samaṇo Gotamo dhammaɱ deseti,||
sen'āsanahetu vā Samaṇo Gotamo dhammaɱ deseti,||
iti bhav-ā-bhavahetu vā Samaṇo Gotamo dhammaɱ desetī' ti.|| ||

Na kho no bhante,||
Bhagavati evaɱ hoti:|| ||

'Cīvara-hetu vā Samaṇo Gotamo dhammaɱ deseti,||
piṇḍa-pātahetu vā Samaṇo Gotamo dhammaɱ deseti,||
sen'āsanahetu vā Samaṇo Gotamo dhammaɱ deseti,||
iti bhav-ā-bhavahetu vā Samaṇo Gotamo dhammaɱ dese' ti.|| ||

Na ca kira vo bhikkhave,||
mayi evaɱ hoti:|| ||

'Cīvara-hetu vā Samaṇo Gotamo dhammaɱ deseti,||
piṇḍa-pātahetu vā Samaṇo Gotamo dhammaɱ deseti,||
sen'āsanahetu vā Samaṇo Gotamo dhammaɱ deseti,||
iti bhav-ā-bhavahetu vā Samaṇo Gotamo dhammaɱ desetī' ti.|| ||

Atha kinti carahi vo bhikkhave mayi hotī' ti.|| ||

Evaɱ kho no bhante, Bhagavati hoti:|| ||

'Anukampako Bhagavā hitesī,||
anukampaɱ upādāya dhammaɱ desetī' ti|| ||

Evañ ca kira vo bhikkhave,||
mayi hoti:|| ||

'Anukampako Bhagavā hitesī,||
anukampaɱ upādāya dhammaɱ desetī' ti.|| ||

Tasmā'ti ha bhikkhave,||
ye vo mayā dhammā abhiññā desitā,

Seyyath'īdaɱ:|| ||

'Cattāro sati-paṭṭhānā||
cattāro samma-p-padhānā||
cattāro iddhi-pādā||
pañc'indriyāni||
pañca balāni||
satta [239] bojjh'aŋgā||
Ariyo Aṭṭhaŋgiko Maggo.|| ||

Tattha sabbeh'eva samaggehi sammodamānehi avivadamānehi sikkhitabbaɱ.|| ||

Tesañca vo bhikkhave,||
samaggānaɱ sammodamānānaɱ avivadamānānaɱ sikkhataɱ,||
tattha siyuɱ dve bhikkhū abhidhamme nānāvādā.|| ||

Tatra ce tumhākaɱ evam assa:|| ||

'Imesaɱ kho āyasmantānaɱ atthato c'eva nānaɱ vyañjanato ca nānan' ti.|| ||

Tattha yaɱ bhikkhuɱ suvacataraɱ maññeyyātha so upasankamitvā evam assa vacanīyo:|| ||

'Āyasmantānaɱ kho atthato c'eva nānaɱ.|| ||

Byanañjanato ca nānaɱ.|| ||

Tadamināpetaɱ āyasmanto jānātha yathā atthato c'eva nānaɱ vyañjanato ca nānaɱ mā āyasmanto vivādaɱ āpajjitthā' ti.|| ||

Athāparesaɱ ekato pakkhikānaɱ bhikkhūnaɱ yaɱ bhikkhuɱ suvacataraɱ maññeyyātha,||
so upasankamitvā evam assa vacanīyo:|| ||

'Āyasmantānaɱ kho atthato c'eva nānaɱ vyañjanato ca nānaɱ.|| ||

Tadamināpetaɱ āyasmanto jānātha yathā atthato c'eva nānaɱ byanjanato ca nānaɱ mā āyasmanto vivādaɱ āpajjitthā' ti.|| ||

Iti duggahitaɱ duggahitato dhāretabbaɱ suggahitaɱ suggahitato dhāretabbaɱ duggahitaɱ duggahitato dhāretvā suggahitaɱ suggahitato dhāretvā||
yo dhammo||
yo vinayo||
so bhāsitabbo.|| ||

Tatra ce tumhākaɱ evam assa.|| ||

'Imesaɱ kho āyasmantānaɱ atthato hi kho nānaɱ,||
byanjanato sametī' ti.|| ||

Tattha yaɱ bhikkhuɱ suvacataraɱ maññeyyātha,||
so upasankamitvā evam assa vacanīyo:|| ||

'Āyasmantānaɱ atthato hi kho nānaɱ,||
vyañjanato sameti.|| ||

Tadamināpetaɱ āyasmanto jānātha yathā atthato hi kho nānaɱ,||
vyañjanato sameti.|| ||

Mā āyasmanto vivādaɱ āpajjitthā' ti.|| ||

Athāparesaɱ ekato pakkhikānaɱ bhikkhūnaɱ yaɱ bhikkhuɱ suvacataraɱ maññeyyātha,||
so upasankamitvā evam assa vacanīyo:|| ||

'Āyasmantānaɱ kho atthato hi kho nānaɱ vyañjanato sameti.|| ||

Tadamināpetaɱ āyasmanto jānātha'yathā atthato hi kho nānaɱ,||
vyañjanato sameti.|| ||

Mā āyasmanto vivādaɱ āpajjitthā' ti.|| ||

[240] Iti duggahitaɱ duggahitato dhāretabbaɱ suggahitaɱ suggahitato dhāretabbaɱ.|| ||

Duggahitaɱ duggahito dhāretvā suggahitaɱ suggahitato dhāretvā||
yo dhammo||
yo vinayo||
so bhāsitabbo.|| ||

Tatra ce tumhākaɱ evam assa:|| ||

'Imesaɱ kho āyasmantānaɱ atthato hi kho sameti.|| ||

Byanjanato nānan' ti.|| ||

Tattha yaɱ bhikkhuɱ suvacataraɱ maññeyyātha,||
so upasankamitvā evam assa vacanīyo:|| ||

'Āyasmantānaɱ kho atthato hi sameti.|| ||

Byañjanato nānaɱ.|| ||

Tadamināpetaɱ āyasmanto jānātha'yathā atthato hi kho sameti.|| ||

Byañjanato nānaɱ.|| ||

Appa-mattakaɱ kho pan'etaɱ||
yad idaɱ vyañjanaɱ mā āyasmanto appamattake vivādaɱ āpajjitthā' ti.|| ||

Athāparesaɱ ekato pakkhikānaɱ bhikkhunaɱ yaɱ bhikkhuɱ suvacataraɱ maññeyyātha,||
so upasankamitvā evam assa vacanīyo:||
āyasmantānaɱ kho atthato hi kho sameti.|| ||

Byañjanato nānaɱ.|| ||

Tadamināpetaɱ āyasmanto jānātha'yathā atthato hi kho sameti vyañjanato nānaɱ.|| ||

Appa-mattakaɱ kho pan'etaɱ||
yad idaɱ vyañjanaɱ.|| ||

Mā āyasmanto appamattake vivādaɱ āpajjitthā' ti.|| ||

Iti suggahitaɱ suggahitato dharetabbaɱ duggahitaɱ duggahitato dhāretabbaɱ.|| ||

Suggahitaɱ suggahitato dhāretvā duggahitaɱ duggahitato dhāretvā||
yo dhammo||
yo vinayo||
so bhāsitabbo.|| ||

Tatra ce tumhākaɱ evam assa:|| ||

'Imesaɱ kho āyasmantānaɱ atthato c'eva sameti.|| ||

Byañjanato ca sametī' ti.|| ||

Tattha yaɱ bhikkhuɱ suvacataraɱ maññeyyātha so upasankamitvā evam assa vacanīyo:|| ||

'Āyasmantānaɱ kho atthato c'eva sameti.|| ||

Byañjanato ca sameti.|| ||

Tadamināpetaɱ āyasmanto jānātha'yathā atthato c'eva sameti,||
vyañjanato ca sameti.|| ||

Mā āyasmanto vivādaɱ āpajjitthā' ti.|| ||

Athāparesaɱ ekato pakkhikānaɱ bhikkhūnaɱ yaɱ bhikkhuɱ suvacataraɱ maññeyyātha,||
so upasankamitvā evam assa vacanīyo:|| ||

'Āyasmantānaɱ kho attato c'eva sameti.|| ||

Byañjanato ca sameti.|| ||

Tadamināpetaɱ āyasmanto jānātha'yathā atthato c'eva sameti,||
vyañjanato ca sameti.|| ||

Mā āyasmanto [241] vivādaɱ āpajjitthā' ti.|| ||

Iti suggahitaɱ suggahitato dhāretabbaɱ suggahitaɱ suggahitato dhāretvā||
yo dhammo||
yo vinayo||
so bhāsitabbo.|| ||

Tesañca vo bhikkhave, samaggānaɱ sammodamānānaɱ avivadamānānaɱ sikkhataɱ,||
siyā aññatarassa bhikkhuno āpatti siyā vītikkamo tatra bhikkhave,||
na codanāya taritabbaɱ,||
puggalo upapari-k-khitabbo,||
iti mayhañ ca avihesā bhavissati.|| ||

Parassa ca puggalassa anupaghāto,||
paro hi puggalo akkodhano anupanāhī adandhadiṭṭhī suppaṭi-nissaggī,||
Sakkomi cā'haɱ etaɱ puggalaɱ akusalā vuṭṭhāpetvā kusale patiṭṭhāpetun' ti.|| ||

Sace bhikkhave,||
evam assa kallaɱ vacanāya.|| ||

Sace pana bhikkhave, evam assa:|| ||

'Mayhaɱ kho avihesā bhavissati.|| ||

Parassa ca puggalassa upaghāto,||
paro hi puggalo kodhano upanāhī adandhadiṭṭhī suppaṭi-nissaggī,||
Sakkomi c'āhaɱ etaɱ puggalaɱ akusalā vuṭṭhāpetvā kusale patiṭṭhāpetuɱ.|| ||

Appa-mattakaɱ kho pan'etaɱ||
yad idaɱ parassa puggalassa upaghāto.|| ||

Atha kho etad eva bahutaraɱ,||
'sohaɱ Sakkomi etaɱ puggalaɱ akusalā vuṭṭhāpetvā kusale patiṭṭhāpetun' ti.|| ||

Sace bhikkhave,||
evam assa kallaɱ vacanāya.|| ||

Sace pana bhikkhave,||
evam assa:|| ||

'Mayhaɱ kho vihesā bhavissati.|| ||

Parassa ca puggalassa

Anupaghāto, paro hi puggalo akkodhano anupanāhī adandhadiṭṭhī du-p-paṭi-nissaggī.|| ||

Sakkomi c'āhaɱ etaɱ puggalaɱ akusalā vuṭṭhāpetvā kusale patiṭṭhāpetuɱ.|| ||

Appa-mattakaɱ kho pan'etaɱ||
'yad idaɱ mayhaɱ vihesā.|| ||

Atha kho etad eva bahutaraɱ, sohaɱ

Sakkomi etaɱ puggalaɱ akusalā vuṭṭhāpetvā kusale patiṭṭhāpetun' ti.|| ||

Sace bhikkhave,||
evam assa kallaɱ vacanāya.|| ||

Sace pana bhikkhave,||
evam assa: mayhañca kho vihesā bhavissati.|| ||

Parassa ca puggalassa||
Upaghāto, paro hi puggalo kodhano upanāhī adandhadiṭṭhī du-p-paṭi-nissaggī.|| ||

Sakkomi c'āhaɱ etaɱ puggalaɱ akusalā vuṭṭhāpetvā kusale patiṭṭhāpetuɱ.|| ||

Appa-mattakaɱ kho pan'etaɱ||
'yad idaɱ mayhañ ca||
vihesā parassa ca puggalassa upaghāto.|| ||

Atha kho etad eva bahutaraɱ,||
sohaɱ Sakkomi etaɱ puggalaɱ akusalā.|| ||

Vuṭṭhāpetvā kusale patiṭṭhāpetun' ti.|| ||

Sace bhikkhave,||
evam assa kallaɱ vacanāya.|| ||

Sace pana bhikkhave,||
evam assa:|| ||

'Mayhañ ca kho vihesā bhavissati.|| ||

Parassa ca puggalassa upaghāto,||
paro [242] hi puggalo kodhano upanāhī dandha-diṭṭhī du-p-paṭi-nissaggī.|| ||

Na c'āhaɱ Sakkomi etaɱ puggalaɱ akusalā vuṭṭhāpetvā kusale patiṭṭhāpetun' ti.|| ||

Eva-rūpe bhikkhave,||
puggale upekkhā nātimaññitabbā|| ||

Tesañca vo bhikkhave,||
samaggānaɱ sammodamānānaɱ avivadamānānaɱ sikkhataɱ añña-maññassa vacīsaɱsāro uppajjeyya diṭṭhipalāso cetaso āghāto appaccayo anabhiraddhi.|| ||

Tattha ekato pakkhikānaɱ bhikkhūnaɱ||
yaɱ bhikkhuɱ suvacataraɱ maññeyyātha,||
so upasankamitvā evam assa vacanīyo:|| ||

'Yaɱ no āvuso,||
amhākaɱ samaggānaɱ sammodamānānaɱ avivadamānānaɱ sikkhataɱ añña-maññassa vacīsaɱsāro uppanno diṭṭhipalāso cetaso āghāto appaccayo anabhiraddhi.|| ||

Taɱ jānamāno samāno garaheyyāti.|| ||

Sammā vyākaramāno [243] bhikkhave,||
bhikkhu evaɱ vyākareyya:|| ||

Yaɱ no āvuso amhākaɱ samaggānaɱ sammodamānānaɱ avivadamānānaɱ sikkhataɱ añña-maññassa vacīsaɱsāro uppanno diṭṭhipalāso cetaso āghāto appaccayo anabhiraddhi.|| ||

Taɱ jānamāno samāno garaheyyāti.|| ||

Etaɱ pan'āvuso dhammaɱ a-p-pahāya Nibbānaɱ sacchi-kareyyāti.|| ||

Sammā vyākaramāno bhikkhave,||
evaɱ vyākareyya: etaɱ kho āvuso,||
dhammaɱ a-p-pahāya na Nibbānaɱ sacchi-kareyyāti.|| ||

Athāparesaɱ ekato pakkhikānaɱ bhikkhūnaɱ yaɱ bhikkhuɱ suvacatarā maññeyyātha,||
so upasankamitvā evam assa vacanīyo:|| ||

Yaɱ no āvuso amhākaɱ samaggānaɱ sammodamānānaɱ avivadamānānaɱ sikkhataɱ añña-maññassa vacīsaɱsaro uppanno diṭṭhipalāso cetaso āghāto appaccayo anabhiraddhi.|| ||

Taɱ jānamāno samāno garaheyyāti.|| ||

Sammā vyākaramāno bhikkhave,||
bhikkhu evaɱ vyākareyya:|| ||

Yaɱ no āvuso amhākaɱ samaggānaɱ sammodamānānaɱ avivadamānānaɱ sikkhataɱ añña-maññassa vacīsaɱsāro uppanno diṭṭhipalāso cetaso āghāto appaccayo anabhiraddhi.|| ||

Taɱ jānamāno samāno garaheyyāti.|| ||

Etaɱ pan'āvuso dhammaɱ a-p-pahāya na Nibbānaɱ sacchi-kareyyāti.|| ||

Sammā vyākaramāno bhikkhave,||
bhikkhu evaɱ vyākareyya:||
etaɱ kho āvuso,||
dhammaɱ a-p-pahāya na Nibbānaɱ sacchi-kareyyā' ti.|| ||

Tañ ce bhikkhave,||
bhikkhuɱ pare evaɱ puccheyyuɱ:|| ||

Āyasmatā no ete bhikkhū akusalā vuṭṭhāpetvā kusale patiṭṭhāpitāti.|| ||

Sammā vyākaramāno bhikkhave,||
bhikkhu evaɱ vyākareyya:|| ||

Idhāhaɱ āvuso,||
yena Bhagavā ten'upasankamiɱ,||
tassa me Bhagavā dhammaɱ desesi,||
tāhaɱ dhammaɱ sutvā tesaɱ bhikkhūnaɱ abhāsiɱ:|| ||

Taɱ te bhikkhū dhammaɱ sutvā akusalā vuṭṭhahiɱsu.|| ||

Kusale patiṭṭhahiɱsū' ti.|| ||

Evaɱ vyākaramāno kho bhikkhave,||
bhikkhu na c'eva attānaɱ ukkaɱseti,||
na paraɱ vambheti,||
Dhammassa c'ānudhammaɱ vyākaroti,||
na ca koci saha-dhammiko vād'ānuvādo gārayhaɱ ṭhānaɱ āga-c-chatī' ti.|| ||

Idam avoca Bhagavā||
atta-manā te bhikkhū Bhagavato bhāsitaɱ abhinandunti.|| ||

Kinti Suttaɱ


 

Contact:
E-mail
Copyright Statement