Majjhima Nikaya


[Home]  [Sutta Indexes]  [Glossology]  [Site Sub-Sections]


 

Majjhima Nikāya
III. Upari Paṇṇāsa
1. Devadaha Vagga

Sutta 107

Gaṇaka-Moggallāna Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][chlm][pts][upal][pnji] Evaɱ me sutaɱ:|| ||

Ekaɱ samayaɱ Bhagavā Sāvatthīyaɱ viharati Pubbārāme Migāra-mātu pāsāde.|| ||

Atha kho gaṇakaMoggallāno brāhmaṇo yena Bhagavā ten'upasankami,||
upasankamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ1 vīti-sāretvā eka-m-antaɱ nisīdi.|| ||

Eka-m-antaɱ nisinno kho gaṇakaMoggallāno brāhmaṇo Bhagavantaɱ etad avoca:|| ||

Seyyathā pi bho Gotama,||
imassa Migāra-mātu pāsādassa dissati anupubbasikkhā anupubbakiriyā anupubbapaṭipadā,||
yad idaɱ yā ca pacchimā sopānaka'ebarā imesampi hi bho Gotama brāhmaṇānaɱ dissati anupubbasikkhā anupubbakiriyā anupubbapaṭipadā,||
yad idaɱ ajjhene.|| ||

Imesam pi hi bho Gotama,||
issāsānaɱ dissati anupubbasikkhā anupubbakiriyā anupubbapaṭipadā yad idaɱ issatthe.|| ||

Ambhākampi hi bho Gotama,||
gaṇakānaɱ gaṇanajīvānaɱ dissati anupubbasikkhā anupubbakiriyā anupubbapaṭipadā,||
yad idaɱ saŋkhāne.|| ||

Mayaɱ hi bho Gotama,||
antevāsī labhitvā paṭhamaɱ evaɱ gaṇāpema: ekaɱ ekakaɱ,||
dve dukā,||
tīṇī tikā,||
cattāri catukkā,||
pañca pañcakā,||
cha chakkā,||
satta sattakā,||
aṭṭha aṭṭhakā,||
nava navakā,||
dasa dasakāti; satam pi mayaɱ bho Gotama,||
gaṇāpema.|| ||

Bhiyyopi gaṇāpema sakkānu kho bho Gotama,||
imasamimpi Dhamma-Vinaye evam eva anupubbasikkhā anupubbakiriyā anupubbapaṭipadā paññāpetun' ti.|| ||

[2] Sakkā brāhmaṇa,||
imasamimpi Dhamma-Vinaye anupubbasikkhā anupubbakiriyā anupubbapaṭipadā paññāpetuɱ.|| ||

Seyyathā pi brāhmaṇa,||
dakkho assadamako bhadraɱ ass-ā-jānīyaɱ labhitvā paṭhamen'eva mukhādhāne kāraṇaɱ kāreti.|| ||

Atha uttariɱ kāraṇaɱ kāreti.|| ||

Evam eva kho brāhmaṇa,||
Tathāgato purisa-dammaɱ labhitvā paṭhamaɱ evaɱ vineti: 'ehi tvaɱ bhikkhu,sīlavā hoti Pātimokkha-saŋvara-saɱvutā viharāhi ācāra-gocara-sampanno,||
aṇumattesu vajjesu bhaya-dassāvi samādāya sikkhassu sikkhā-padesu' ti.|| ||

Yato kho brāhmaṇa,||
bhikkhu sīlavā hoti,||
Pātimokkha-saŋvara-saɱvuto viharati ācāra-gocara-sampanno aṇumattesu vajjesu bhaya-dassāvi samādāya sikkhati sikkhā-padesu.|| ||

Tam enaɱ Tathāgato uttariɱ vineti: 'ehi tvaɱ bhikkhu,||
indriyesu gutta-dvāro hohi,||
cakkhunā rūpaɱ disvā mā nimitta-g-gāhī hohi mānubyañjanaggāhī yatvādhi-karaṇame taɱ cakkhu'ndriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjāhi.|| ||

Rakkhāhi cakkhu'ndriyaɱ.|| ||

Cakkhundriye saŋvaraɱ āpajjāhi.|| ||

Sotena saddaɱ sutvā mā nimitta-g-gāhī hohi mānubyāñjanaggāhī yatvādhi-karaṇamenaɱ sot'indriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjāhi.|| ||

Rakkhāhi sot'indriyaɱ.|| ||

Sotindriye saŋvaraɱ āpajjāhi.|| ||

Ghānena ghandhaɱ ghāyitvā mā nimitta-g-gāhī hohi mānubyañjanaggāhī yatvādhi-karaṇamenaɱ ghān'indriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjāhi.|| ||

Rakkhāhi ghān'indriyaɱ.|| ||

Ghānindriye saŋvaraɱ āpajjāhi.|| ||

Jīvhāya rasaɱ sāyitvā mā nimitta-g-gāhī hohi mānubyañjanaggāhī yatvādhi-karaṇamenaɱ jīvhindriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjāhi.|| ||

Rakkhāhi jīvhindriyaɱ.|| ||

Jīvhindriye saŋvaraɱ āpajjāhi.|| ||

Kāyena phoṭṭhabbaɱ phusitvā mā nimitta-g-gāhī hohi mānubyañjanaggāhī yatvādhi-karaṇamenaɱ kāy'indriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjāhi.|| ||

Rakkhāhi kāy'indriyaɱ.|| ||

Kāyindriye saŋvaraɱ āpajjāhi.|| ||

Manasā dhammaɱ viññāya mā nimitta-g-gāhī hohi mānubyañjanaggāhī.|| ||

Yatvādhi-karaṇamenaɱ man'indriyaɱ asaɱvutaɱ viharantaɱ abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjāhi.|| ||

Rakkhāhi man'indriyaɱ.|| ||

Man'indriye saŋvaraɱ āpajjihī' ti.|| ||

Yato kho brāhmaṇa,||
bhikkhu indriyesu gutta-dvāro hoti.|| ||

Tam enaɱ Tathāgato uttariɱ vineti: 'ehi tvaɱ bhikkhu,||
bhojane mattaññā hohi.|| ||

Paṭisaŋkhā yoniso āhāraɱ āhāreyyāsi.|| ||

N'eva davāya na madāya na maṇḍanāya na vibhusanāya yāva-d-eva imassa kāyassa ṭhitiyā yāpanāya vihiɱs'ūparatiyā brahma-cariyānuggahāya,||
iti purāṇañ ca vedanaɱ paṭihaŋkhāmi,||
navañ ca vedanaɱ na uppādessāmi,||
yātrā ca me bhavissati anavajjatā ca phāsu vihāro cā' ti.|| ||

Yato kho [3] brāhmaṇa,||
bhikkhu bhojane mattañuñā hoti.|| ||

Tam enaɱ Tathāgato uttariɱ vineti: 'ehi tvaɱ bhikkhu,||
jāgariyaɱ anuyutto viharāhi,||
divasaɱ caŋkamena nisajjāya āvaraṇīyehi dhammehi cittaɱ parisodhehi.|| ||

Rattiyā paṭhamaɱ yāmaɱ caŋkamena nisajjāya āvaraṇīye hi dhamme hi cittaɱ parisodhehi,||
rattiyā majjhimaɱ yāmaɱ dakkhiṇena passena sīhaseyyaɱ kappeyyāsi pāde pādaɱ accādhāya sato sampajāno uṭṭhāna-saññaɱ mana-sikaritvā,||
rattiyā pacchimaɱ yāmaɱ paccu-ṭṭhāya caŋkamena nisajjāya āvaraṇīyehi dhammehi cittaɱ parisodhehī' ti.|| ||

Yato kho brāhmaṇa,||
bhikkhu jāgariyaɱ anuyutto hoti tam enaɱ Tathāgato uttariɱ vineti 'ehi tvaɱ bhikkhu,||
sati-sampajjaññena samannāgato hohi 'abhikkante paṭikkante sampajāna-kārī,||
ālokite vilokite sampajāna-kārī,||
sammiñjite pasārite samapajānakārī,||
sanghāṭipatta-cīvaradhāraṇe sampajāna-kārī,||
asite pīte khāyite sāyite sampajāna-kārī,||
uccāra-passāvakamme sampajāna-kārī,||
gate ṭhite nisinne sutte jagārite bhāsite tuṇhīgāve sampajāna-kārī' ti.|| ||

Yato kho brāhmaṇa,||
bhikkhu sati-sampajaññena samannāgato hoti.|| ||

Tam enaɱ Tathāgato uttariɱ vineti: 'ehi tvaɱ bhikkhu,||
vivittaɱ sen'āsanaɱ bhaja1 araññaɱ rukkha-mūlaɱ pabbataɱ kandaraɱ giri-guhaɱ susānaɱ vana-patthaɱ abbhokāsaɱ palālapuñjan' ti.|| ||

So vivittaɱ sen'āsanaɱ bhajati araññaɱ rukkha-mūlraɱ pabbataɱ kandaraɱ giri-guhaɱ susānaɱ vana-patthaɱ abbhokāsaɱ palālapuñjaɱ.|| ||

So pacchā-bhattaɱ piṇḍa-pāta-paṭikkanto nisīdati pallaŋkaɱ ābhujitvā ujuɱ kāyaɱ paṇidhāya parimukhaɱ satiɱ upaṭṭha-petvā,||
so abhijjhaɱ loke pahāya vigat-ā-bhijjhena cetasā viharati.|| ||

Abhijjhāya cittaɱ parisodheti,||
vyāpāda-padosaɱ pahāya avyāpanna-citto viharati sabba-pāṇa-bhūta-hitānukampī.|| ||

vyāpāda-padosā cittaɱ parisodheti thīna-middhaɱ pahāya vigata thīna-middho viharati āloka-saññī sato sampajāno,||
thīna-middhā cittaɱ parisodheti uddhacca-kukkuccaɱ pahāya anuddhato viharati ajjhattaɱ vūpasanta-citto.|| ||

Uddhacca-kukkuccā cittaɱ parisodheti.|| ||

Vici-kicchaɱ pahāya tiṇṇa-vici-kiccho viharati.|| ||

Akathaŋkathi kusalesu dhammesu.|| ||

Vicikicchāya cittaɱ parisodheti.|| ||

[4] So ime pañca nīvaraṇe pahāya cetaso upakkilese paññāya dubbalī-karaṇe civicc'eva kāmehi vivicca akusalehi dhammehi sa-vitakkaɱ sa-vicāraɱ viveka-jaɱ pīti-sukhaɱ paṭhamaɱ-jhānaɱ1 upasampajja viharati vitakka-vicārānaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhi-jaɱ pīti-sukhaɱ dutiyaɱ-jhānaɱ2 upasampajja viharati.|| ||

Pītiyā ca virāgā upekkhako ca viharati sato ca sampajāno sukhañca kāyena paṭisaŋvedeti.|| ||

Yaɱ taɱ ariyā ācikkhanti,||
'Upekkhako satimā sukha-vihārī' ti.|| ||

Taɱ tatiyaɱ-jhānaɱ upasampajja viharati.|| ||

Sukhassa ca pahānā dukkhassa ca pahānā pubbe va somanassa-domanassānaɱ atthaŋ-gamā adukkha-m-asukhaɱ upekkhā-sati-pārisuddhiɱ catutthaɱ-jhānaɱ upasasampajja viharati.|| ||

Ye kho te brāhmaṇa,||
bhikkhū sekhā appattamānasā6 anuttaraɱ yoga-k-khemaɱ patthayamānā viharanti.|| ||

Tesu me ayaɱ eva-rūpī anusāsanī hoti: 'ye pana te bhikkhu arahanto bīṇāsavā vusitavanto kata-karaṇīyā ohita-bhārā anuppatta-sadatthā parikkhīṇa-bhava-saŋyojanā samma-d-aññā vimuttā.|| ||

Tesaɱ ime dhammā diṭṭha-dhamma-sukha-vihārāya c'eva saŋvattanti sati-sampajaññāya cā' ti.|| ||

Evaɱ vutte gaṇakaMoggallāno brāhmaṇo Bhagavantaɱ etad avoca: 'kin nu kho bhoto Gotamassa sāvakā bhotā Gotamena evaɱ ovadiyamānā evaɱ anusāsiyamānā sabb'eva accantaniṭṭhaɱ Nibbānaɱ ārādhenti,||
udāhu ekacce nārādhentī' ti?|| ||

App'ekacce kho brāhmaṇa,||
mama sāvakā mayā evaɱ ovadiyamānā evaɱ anusāsiyamānā accantaniṭṭhaɱ Nibbānaɱ ārādhenti,||
ekacce nārādhentī' ti.|| ||

Ko nu kho bhante,||
hetu,||
ko paccayo,||
yaɱ tiṭṭhateva Nibbānaɱ,||
tiṭṭhati Nibbāna-gāmiMaggo,||
tiṭṭhati bhavaɱ Gotamo sam-ā-dapetā,||
atha ca pana bhoto Gotamassa sāvakā bhotā Gotamena evaɱ ovadiyamānā evaɱ anusāsiyamānā app'ekacce accantaniṭṭhaɱ Nibbānaɱ ārādhenti,||
ekac'eva nārādhentī' ti.|| ||

Tena hi brāhmaṇa,||
taɱ yeva ettha paṭipucchissāmi. Yathā te khameyya,||
tathā naɱ vyākareyyāsi.|| ||

'Taɱ kiɱ [5] maññasi brāhmaṇa,||
kusalo tvaɱ Rājagahagāmissa Maggassā' ti?|| ||

Evaɱ bho,||
kusalo ahaɱ Rājagahagāmissa Maggassā' ti.|| ||

Evaɱ bho,||
kusalo ahaɱ Rājagahagāmissa Maggassā' ti.|| ||

Taɱ kiɱ maññasi brāhmaṇa,||
idha puriso āgaccheyya Rājagahaɱ gantukāmo,||
so taɱ upasankamitvā evaɱ vadeyya: 'icchām'ahaɱ bhante,||
Rājagahaɱ gantuɱ,||
tassa me Rājagahassa Maggaɱ upadisāti.|| ||

Tam enaɱ tvaɱ evaɱ vadeyyāsi: 'ehambho purisa,||
ayaɱ Maggo Rājagahaɱ gacchati,||
tena muhuttaɱ gaccha,||
tena muhuttaɱ ganatvā dakkhi'ssasi amukaɱ nāma gāmaɱ,||
tena muhuttaɱ gaccha,||
tena muhuttaɱ ganatvā dakkhi'ssasi amukaɱ nāma nigamaɱ,||
tena muhuttaɱ gaccha,||
tena muhuttaɱ gantvā dakkhi'ssasi Rājagahassa ārāma-rāmaṇeyyakaɱ vana-rāmaṇeyyakaɱ bhūmi-rāmaṇeyyakaɱ pokkharaṇīrāmaṇeyyakan' ti.|| ||

So tayā evaɱ ovadiyamāno evaɱ anusāsiyamāno ummaggaɱ gahetvā pacchāmukho gaccheyya.|| ||

Atha dutiyo puriso āgaccheyyaRājagahaɱ gantukāmo.|| ||

So taɱ upasankamitvā evaɱ vadeyya: 'icchām'ahaɱ bhante,||
Rājagahaɱ gantuɱ.|| ||

Tassa me Rājagahassa Maggaɱ upadisā' ti.|| ||

Tam enaɱ tvaɱ evaɱ vadeyyāsi: ehambho purisa,||
ayaɱ Maggo Rājagahaɱ gacchati,||
tena muhuttaɱ gaccha,||
tena muhuttaɱ gantavā dakkhi'ssasi amukaɱ nāma gāmaɱ,||
tena muhuttaɱ gaccha,||
tena muhuttaɱ gantvā dakkhi'ssasi amukaɱ nāma nigamaɱ,||
tena muhuttaɱ gaccha,||
tena muhuttaɱ gantvā dakkhi'ssasi Rājagahassa ārāma-rāmaṇeyyakaɱ vana-rāmaṇeyyakaɱ bhūmi-rāmaṇeyyakaɱ pokkharaṇīrāmaṇeyyakan' ti.|| ||

So tayā evaɱ ovadiyamāno evaɱ anusāsiyamāno sotthinā Rājagahaɱ gaccheyya.|| ||

[6] Ko nu kho brāhmaṇa,||
hetu,||
ko paccayo,||
yaɱ tiṭṭhateva Rājagahaɱ tiṭṭhati Rājagahagāmī Maggo,||
tiṭṭhati tvaɱ sam-ā-dapetā.|| ||

Atha ca pana tayā evaɱ ovadiyamāno evaɱ anusāsiyamāno eko puriso ummaggaɱ gahetvā pacchāmukho gaccheyya.|| ||

Eko sotthinā Rājagahaɱ gaccheyyā' ti?|| ||

Ettha kyāhaɱ bho Gotama karomi,||
Maggakkhāyīhaɱ bho Gotamā' ti.|| ||

Evam eva kho brāhmaṇa,||
tiṭṭhateva Nibbānaɱ,||
tiṭṭhati Nibbāna-gāmiMaggo,||
tiṭṭhāmahaɱ sam-ā-dapetā,||
atha ca pana mama sāvakā mayā evaɱ ovadiyamānā evaɱ anusāsiyamānā app'ekacce accantaniṭṭhaɱ Nibbānaɱ ārādhenti,||
ekacce nārādhenti.|| ||

Ettha kyāhaɱ brāhmaṇa,||
karomi?|| ||

Maggakkhāyīhaɱ,||
brāhmaṇa,||
Tathāgato' ti.|| ||

Evaɱ vutte gaṇakaMoggallāno brāhmaṇo Bhagavantaɱ etad avoca: 'yeme bho Gotama,||
puggalā assaddhā jīvikatthā agārasmā anagāriyaɱ pabba-jitā saṭhā māyāvino keṭubhino uddhatā uṇṇaḷā capalā mukharā vikiṇṇa-vācā indriyesu agutta-dvārā bhojane amattaññuno jāgariyaɱ ananuyuttā sāmaññe anapekkhavanto sikkhāya na tibba-gāravā bāhulikā sāthalikā okkamane pubbaŋ-gamā paviveke nikkhitta-dhurā kusītā hīna-viriyā muṭṭha-s-satino asampajānā asamāhitā vibbhanta-cittā duppaññā eḷa-mugā,||
na tehi bhavaɱ Gotamo saddhiɱ saɱvasati.|| ||

Ye paname kula-puttā saddhā agārasmā anagāriyaɱ pabba-jitā asaṭhā amāyāvino akeṭubhino anuddhatā anuṇṇaḷā acapalā amukharā avikiṇṇa-vācā indriyesu gutta-dvārā bhojane mattaññuno jāgariyaɱ anuyuttā sāmaññe apekkhavanto sikkhāya tibba-gāravā na bāhulikā na sāthalikā okkamane nikkhitta-dhurā paviveke pubbaŋ-gamā āraddha-viriyā pahit'attā upaṭṭhita-satino sampajānā samāhitā ek'agga-cittā paññavanto aneḷa-mūgā,||
tehi bhavaɱ Gotamo saddhiɱ saɱvasati.|| ||

Seyyathā pi bho Gotama,||
ye keci mūla-gandhā,||
kālānusārikaɱ1 tesaɱ aggam akkhāyati.|| ||

Ye keci sāra-gandhā,||
lohita-candanaɱ tesaɱ aggam akkhāyati.|| ||

Ye keci puppha-gandhā,||
[7] vassikaɱ tesaɱ aggam akkhāyati.|| ||

Evam eva kho bhoto Gotamassa ovādo paramajjadhammesu.|| ||

'Abhikkantaɱ bho Gotama,||
abhikkantaɱ bho Gotama,||
seyyathā pi bho Gotama,||
nikkujjitaɱ vā ukkujjeyya,||
paṭi-c-channaɱ vā vivareyya,||
mū'ahassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto rūpāni dakkhintī'ti evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi Dhammañ ca bhikkhu-sanghañ ca.|| ||

Upāsakaɱ maɱ bhavaɱ Gotamo dhāretu ajja-t-agge pāṇupetaɱ saraṇaɱ gatanti.|| ||

Gaṇaka Moggallāna suttaɱ sattamaɱ


 

Contact:
E-mail
Copyright Statement