Majjhima Nikaya


[Home]  [Sutta Indexes]  [Glossology]  [Site Sub-Sections]


 

Majjhima Nikāya
III. Upari Paṇṇāsa
2. Anupada Vagga

Sutta 117

Mahā Cattārīsaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][chlm][pts][than][ntbb][upal][olds] Evaɱ me sutaɱ:|| ||

Ekaɱ samayaɱ Bhagavā Sāvatthīyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi "Bhikkhavo" ti.|| ||

"Bhadante" ti te bhikkhu Bhagavato paccassosuɱ.|| ||

Bhagavā etad avoca:|| ||

"Ariyaɱ vo bhikkhave,||
sammā-samādhiɱ desissāmi||
sa-upanisaɱ||
sa-parikkhāraɱ.|| ||

Taɱ suṇātha,||
sādhukaɱ manasi karotha,||
bhāsissāmī" ti.|| ||

"Evaɱ bhante" ti||
kho te bhikkhū Bhagavato paccassosuɱ.|| ||

Bhagavā etad avoca:|| ||

Katamo ca bhikkhave,||
ariyo sammā-samādhi sa-upaniso sa-parikkhāro,||
seyyath'īdaɱ:|| ||

Sammā-diṭṭhi||
sammā-saŋkappo||
sammā-vācā||
sammā-kammanto||
sammā ājīvo||
sammā-vāyāmo||
sammā-sati.|| ||

Yā kho bhikkhave,||
imehi sattah'aŋgehi cittassa ek'aggatā parikkhatā ayaɱ vuccati bhikkhave,||
ariyo sammā-samādhi||
sa-upaniso iti pi,||
sa-parikkhāro iti pi.|| ||

Tatra, bhikkhave,||
sammā-diṭṭhi pubbaŋgamā hoti.|| ||

Kathañ ca bhikkhave,||
sammā-diṭṭhi pubbaŋgamā hoti?|| ||

Micchā-diṭṭhiɱ||
'Micchā-diṭṭhī' ti pajānāti.|| ||

Sammā-diṭṭhiɱ||
'Sammā-diṭṭhī' ti pajānāti.|| ||

Sāssa hoti sammā-diṭṭhi.|| ||

Katamā ca bhikkhave,||
micchā-diṭṭhi?|| ||

N'atthi dinnaɱ,||
n'atthi yiṭṭhaɱ,||
n'atthi hutaɱ,||
n'atthi sukaṭa-dukkaṭānaɱ kammānaɱ phalaɱ vipāko,||
n'atthi ayaɱ loko,||
n'atthi paro loko,||
n'atthi mātā,||
n'atthi pitā,||
n'atthi sattā opapātikā,||
[72] n'atthi loke samaṇa-brāhmaṇā samm'aggatā sammā-paṭipannā,||
ye imaɱ ca lokaɱ paraɱ ca lokaɱ sayaɱ abhiññā sacchi-katvā pavedentīti.|| ||

Ayaɱ bhikkhave, micchā-diṭṭhi.|| ||

Katamā ca bhikkhave, sammā-diṭṭhi?|| ||

Sammā-diṭṭhim p'ahaɱ bhikkhave,||
dvayaɱ vadāmi:

Atthi bhikkhave,||
sammā-diṭṭhi sāsavā puññā-bhāgiyā upadhi-vepakkā;||
atthi bhikkhave,||
sammā-diṭṭhi ariyā anāsavā lokuttarā maggaŋgā.|| ||

Katamā ca bhikkhave,||
sammā-diṭṭhi sāsavā puñña-bhāgiyā upadhi-vepakkā?|| ||

Atthi dinnaɱ,||
atthi yiṭṭhaɱ,||
atthi hutaɱ,||
atthi sukaṭa-dukkaṭānaɱ kammānaɱ phalaɱ vipāko,||
atthi ayaɱ loko,||
atthi paro loko,||
atthi mātā,||
atthi pitā,||
atthi sattā opapātikā,||
atthi loke samaṇa-brāhmaṇā samm'aggatā sammā-paṭipannā,||
ye imaɱ ca lokaɱ paraɱ ca lokaɱ sayaɱ abhiññā sacchi-katvā pavedentīti.|| ||

Ayaɱ bhikkhave,||
sammā-diṭṭhi sāsavā puñña-bhāgiyā upadhi-vepakkā.|| ||

Katamā ca bhikkhave,||
sammā-diṭṭhi ariyā anāsavā lokuttarā maggaŋgā?|| ||

Yā kho bhikkhave,||
ariya-cittassa an-āsava-cittassa||
Ariya-Magga-samaŋgino||
Ariya-Maggaɱ bhāvayato paññā paññ'indriyaɱ paññā-balaɱ dhamma-vicaya-sambojjh'aŋgo sammā-diṭṭhi maggaŋgaɱ.|| ||

Ayaɱ vuccati bhikkhave,||
sammā-diṭṭhi ariyā anāsavā lokuttarā maggaŋgā.|| ||

So micchā-diṭṭhiyā pahānāya vāyamati sammā-diṭṭhiyā upasampadāya.|| ||

Svāssa hoti sammā-vāyāmo.|| ||

So sato micchā-diṭṭhiɱ pajahati.|| ||

Sato sammā-diṭṭhiɱ upasampajja viharati.|| ||

Sāssa hoti sammā-sati.|| ||

Itissime tayo dhammā sammā-diṭṭhiɱ anuparidhāvanti anuparivattanti.|| ||

Seyyath'īdaɱ:|| ||

Sammā-diṭṭhi||
sammā-vāyāmo||
sammā-sati.|| ||

Tatra, bhikkhave,||
sammā-diṭṭhi pubbaŋgamā hoti.|| ||

Kathañ ca bhikkhave sammā-diṭṭhi pubbaŋgamā hoti?|| ||

Micchā-saŋkappaɱ||
'Micchā-saŋkappo' ti pajānāti||
sammā-saŋkappaɱ||
'Sammā-saŋkappo' ti pajānāti.|| ||

Sāssa [73] hoti sammā-diṭṭhi.|| ||

Katamo ca bhikkhave,||
micchā-saŋkappo?

Kāma-saŋkappo,
vyāpāda-saŋkappo,||
vihiɱsā-saŋkappo.|| ||

Ayaɱ bhikkhave, micchā-saŋkappo.|| ||

Katamo ca bhikkhave, sammā-saŋkappo?|| ||

Sammā-saŋkappampa'haɱ bhikkhave,||
dvayaɱ vadāmi.|| ||

Atthi bhikkhave,||
sammā-saŋkappo sāsavo puñña-bhāgiyo upadhi-vepakko,||
atthi bhikkhave,||
sammā-saŋkappo ariyo anāsavo lokuttaro maggaŋgo.|| ||

Katamo ca bhikkhave,||
sammā-saŋkappo sāsavo puñña-bhāgiyo upadhi-vepakko?|| ||

Nekkhamma-saŋkappo||
avyāpāda-saŋkappo||
avihiɱsā saŋkappo.|| ||

Ayaɱ bhikkhave,||
sammā-saŋkappo sāsavo puñña-bhāgiyo upadhi-vepakko.|| ||

Katamo ca bhikkhave,||
sammā-saŋkappo ariyo anāsavo lokuttaro maggaŋgo?|| ||

Yo kho bhikkhave,||
ariya-cittassa||
an-āsava-cittassa||
Ariya-Magga-samaŋgino||
Ariya-Maggaɱ bhāvayato||
takko||
vitakko saŋkappo||
appaṇā||
vyappaṇā cetaso||
abhiniropanā vacī-sankhāro||
ayaɱ bhikkhave,||
sammā-saŋkappo ariyo anāsavo lokuttaro maggaŋgo.|| ||

So micchā-saŋkappassa pahānāya||
vāyamati sammā-saŋkappassa upasampadāya.|| ||

Svāssa hoti sammā-vāyāmo.|| ||

So sato micchā-saŋkappaɱ pajahati.|| ||

Sato sammā-saŋkappaɱ upasampajja viharati.|| ||

Sā'ssa hoti sammā-sati.|| ||

Itissi'me tayo dhammā||
sammā-saŋkappaɱ||
anuparidhāvanti||
anuparivattanti.|| ||

Seyyath'īdaɱ:|| ||

Sammā-diṭṭhi||
sammā-vāyāmo||
sammā-sati.|| ||

Tatra, bhikkhave, sammā-diṭṭhi pubbaŋgamā hoti.|| ||

Kathañ ca bhikkhave, sammā-diṭṭhi pubbaŋgamā hoti?|| ||

Micchā-vācaɱ||
micchā-vācā ti pajānāti.|| ||

Sammā-vācaɱ||
sammā-vācā ti pajānāti.|| ||

Sāssa hoti sammā-diṭṭhi.|| ||

Katamā ca bhikkhave, micchā-vācā?|| ||

Musā-vādo||
pisunā-vācā||
pharusā-vācā||
sampha-p-palāpo.|| ||

Ayaɱ bhikkhave micchā-vācā.|| ||

Katamā ca bhikkhave sammā-vācā?|| ||

Sammā-vācam pa'haɱ bhikkhave,||
dvayaɱ vadāmi.|| ||

Atthi bhikkhave,||
sammā-vācā sāsavā puñña-bhāgiyā upadhi-vepakkā,||
atthi [74] bhikkhave, sammā-vācā ariyā anāsavā lokuttarā maggaŋgā.|| ||

Katamā ca bhikkhave,||
sammā-vācā sāsavā puñña-bhāgiyā upadhi-vepakkā?|| ||

Musā-vādā veramaṇī,||
pisunāya vācāya veramaṇī||
pharusāya vācāya veramaṇī,||
sampha-p-palāpā veramaṇī.|| ||

Ayaɱ bhikkhave,||
sammā-vācā sāsavā puñña-bhāgiyā upadhi-vepakkā.|| ||

Katamā ca bhikkhave,||
sammā-vācā ariyā anāsavā lokuttarā maggaŋgā?|| ||

Yā kho bhikkhave,||
ariya-cittassa||
an-āsava-cittassa||
Ariya-Maggasamaŋgīno||
Ariya-Maggaɱ bhāvayato||
catūhi pi vacī-du-c-caritehi||
ārati||
virati||
paṭivirati veramaṇī.|| ||

Ayaɱ bhikkhave,||
sammā-vācā ariyā anāsavā lokuttarā maggaŋgā.|| ||

So micchā-vācāya pahānāya vāyamatī,||
sammā vācāya upasampadāya.|| ||

Svāssa hoti sammā-vāyāmo.|| ||

So sato micchā-vācaɱ pajahati.|| ||

Sato sammā-vācaɱ upasammajja viharati.|| ||

Sāssa hoti sammā-sati.|| ||

Itissime tayo dhammā sammā-vācaɱ anuparidhāvanti anuparivattanti.|| ||

Seyyath'īdaɱ:||
sammā-diṭṭhi,||
sammā-vāyāmo,||
sammā-sati.|| ||

Tatra, bhikkhave,||
sammā-diṭṭhi pubbaŋgamā hoti.|| ||

Kathañ ca bhikkhave,||
sammā-diṭṭhi pubbaŋgamā hoti?|| ||

Micchā-kammantaɱ||
micchā-kammanto ti pajānāti||
sammā-kammantaɱ||
sammā-kammanto ti pajānāti.|| ||

Sāssa hoti sammā-diṭṭhi.|| ||

Katamo ca bhikkhave,||
micchā-kammanto?|| ||

Pāṇ-ā-tipāto,||
adinn'ādānaɱ,||
kāmesu micchā-cāro.|| ||

Ayaɱ bhikkhave, micchā-kammanto.|| ||

Katamo ca bhikkhave, sammā-kammanto?|| ||

Sammā-kammantamp'ahaɱ bhikkhave,||
dvayaɱ vadāmi.|| ||

Atthi bhikkhave,||
sammā-kammanto sāsavo puñña-bhāgiyo upadhi-vepakko.|| ||

Atthi bhikkhave sammā-kammanto ariyo anāsavo lokuttaro maggaŋgo.|| ||

Katamo ca bhikkhave,||
sammā-kammanto sāsavo puñña-bhāgiyo upadhi-vepakko?|| ||

Pāṇ-ā-tipātā veramaṇī,||
adinn'ādānā veramaṇī,||
kāmesu micchā-cārā veramaṇī.|| ||

Ayaɱ bhikkhave,||
sammā-kammanto sāsavo puñña-bhāgiyo upadhi-vepakko.|| ||

Katamo ca bhikkhave,||
sammā-kammanto ariyo anāsavo lokuttaro maggaŋgo?|| ||

Yā kho bhikkhave,||
ariya-cittassa||
an-āsava-cittassa||
Ariya-Maggasamaŋgīno||
Ariya-Maggaɱ bhāvayato||
tīhi pi kāya-du-c-caritehi||
ārati||
virati||
paṭivirati veramaṇī.|| ||

Ayaɱ bhikkhave,||
sammā-kammanto [75] ariyo anāsavo lokuttaro maggaŋgo.|| ||

So micchā-kammantassa pahānāya vāyamati,||
sammā-kammantassa upasampadāya.|| ||

Svā'ssa hoti sammā-vāyāmo.|| ||

So sato micchā-kammantaɱ pajahati.|| ||

Sato sammā-kammantaɱ upasampajja viharati.|| ||

Sā'ssa hoti sammā-sati.|| ||

Iti si me tayo dhammā sammā-kammantaɱ anuparidhāvanti anuparivattanti.|| ||

Seyyath'īdaɱ:||
sammā-diṭṭhi,||
sammā-vāyāmo||
sammā-sati.|| ||

 

§

 

Tatra, bhikkhave,||
sammā-diṭṭhi pubbaŋgamā hoti.|| ||

Kathañ ca bhikkhave,||
sammā-diṭṭhi pubbaŋgamā hoti?|| ||

Micchā ājīvaɱ||
micchā ājīvo ti pajānāti.|| ||

Sammā ājīvaɱ||
sammā ājīvo ti pajānāti.|| ||

Sāssa hoti sammā-diṭṭhi.|| ||

Katamo ca bhikkhave, micchā ājīvo?|| ||

Kuhanā lapanā||
nemittikatā||
nippesikatā||
lābhena lābhaɱ nijigiɱsanātā.|| ||

Ayaɱ bhikkhave, micchā ājīvo.|| ||

Katamo ca bhikkhave, sammā ājīvo?|| ||

Sammā ājīvam p'ahaɱ bhikkhave,||
dvayaɱ vadāmi.|| ||

Atthi bhikkhave,||
sammā ājīvo sāsavo puñña-bhāgiyo upadhi-vepakko,||
atthi bhikkhave,||
sammā ājīvo ariyo anāsavo lokuttaro maggaŋgo.|| ||

Katamo ca bhikkhave,||
sammā ājīvo sāsavo puñña-bhāgiyo upadhi-vepakko?|| ||

Idha bhikkhave,||
ariya-sāvako micchā ājīvaɱ pahāya sammā ājīvena jīvakaɱ kappeti.|| ||

Ayaɱ bhikkhave,||
sammā ājīvo sāsavo puñña-bhāgiyo upadhi-vepakko.|| ||

Katamo ca bhikkhave,||
sammā ājīvo ariyo anāsavo lokuttaro maggaŋgo?|| ||

Yā kho bhikkhave,||
ariya-cittassa||
an-āsava-cittassa||
Ariya-Magga-samaŋgino||
Ariya-Maggaɱ bhāvayato micchā ājīvā ārati virati paṭivirati veramaṇī.|| ||

Ayaɱ bhikkhave,||
sammā ājīvo ariyo anāsavo lokuttaro maggaŋgo.|| ||

So micchā ajīvassa pahānāya vāyamati.|| ||

Sammā ājīvassa upasampadāya.|| ||

Svāssa hoti sammā-vāyāmo.|| ||

So sato micchā ājīvaɱ pajahati.|| ||

Sato sammā ājīvaɱ upasampajja viharati.|| ||

Sāssa hoti sammā-sati.|| ||

Tass'ime tayo dhammā sammā ājīvaɱ anuparidhāvanti anuparivattanti.|| ||

Seyyath'īdaɱ:||
sammā-diṭṭhi,||
sammā-vāyāmo,||
sammā-sati.|| ||

 

§

 

Tatra, bhikkhave,||
sammā-diṭṭhi pubbaŋgamā hoti.|| ||

Kathañ ca bhikkhave,||
sammā-diṭṭhi pubbaŋgamā hoti?|| ||

[76] Sammā-diṭṭhissa bhikkhave,||
sammā-saŋkappo pahoti.|| ||

Sammā-saŋkappassa||
sammā-vācā pahoti.|| ||

Sammā-vācassa||
sammā-kammanto pahoti.|| ||

Sammā-kammantassa||
sammā ājīvo pahoti.|| ||

Sammā ājīvassa||
sammā-vāyāmo pahoti.|| ||

Sammā vāyamassa||
sammā-sati pahoti.|| ||

Sammā-satissa||
sammā-samādhi pahoti.|| ||

Sammā-samādhissa||
sammā-ñāṇaɱ pahoti.|| ||

Sammā-ñāṇassa||
sammā-vimutti pahoti.|| ||

Iti kho bhikkhave,||
aṭṭh'aŋga-samannāgato sekho||
das'aŋga-samannāgato arahā hoti.|| ||

Tatra, bhikkhave,||
sammā-diṭṭhi pubbaŋgamā hoti.|| ||

Kathañ ca bhikkhave,||
sammā-diṭṭhi pubbaŋgamā hoti?|| ||

Sammā-diṭṭhissa bhikkhave,||
mcchā diṭṭhi nijjiṇṇā hoti.|| ||

Ye ca micchā-diṭṭhi-paccayā aneka pāpakā akusalā dhammā sambhavanti,||
te c'assa nijjiṇṇā honti.|| ||

Sammā-diṭṭhi-paccayā ca aneke kusalā dhammā bhāvanā pārīpūriɱ gacchanti.|| ||

Sammā-saŋkappassa bhikkhave,||
micchā-saŋkappo nijjiṇṇo hoti,||
ye ca micchā-saŋkappa-paccayā aneke pāpakā akusalā dhammā sambhavanti,||
te c'assa nijjiṇṇā honti.|| ||

Sammā-saŋkappa-paccayā ca aneke kusalā dhammā bhāvanā-pāripūriɱ gacchanti.|| ||

Sammā-vācassa bhikkhave,||
micchā-vācā nijjiṇṇā hoti.|| ||

Ye ca micchā-vācā-paccayā aneke [77] pāpakā akusalā dhammā sambhavanti,||
te c'assa nijjiṇṇā honti.|| ||

Sammā-vācā-paccayā ca aneke kusalā dhammā bhāvanā-pāripūriɱ gacchanti.|| ||

Sammā-kammantassa bhikkhave,||
micchā-kammanto nijjiṇṇo hoti.|| ||

Ye ca micchā-kammanta-paccayā aneke pāpakā akusalā dhammā sambhavanti,||
te c'assa nijjiṇṇā honti.|| ||

Sammā-kammanta-paccayā ca aneke kusalā dhammā bhāvanā-pāripūriɱ gacchanti.|| ||

Sammā ājīvassa bhikkhave,||
micchā ājīvo nijjiṇṇo hoti.|| ||

Ye ca micchā ājīva-paccayā aneke pāpakā akusalā dhammā sambhavanti,||
te c'assa nijjiṇṇā honti.|| ||

Sammā ājīva-paccayā ca aneke kusalā dhammā bhāvanā-pāripūriɱ gacchanti.|| ||

Sammā-vāyāmassa bhikkhave,||
micchā-vāyāmo nijjiṇṇo hoti.|| ||

Ye ca micchā-vāyāma-paccayā aneke pāpakā akusalā dhammā sambhavanti,||
te c'assa nijjiṇṇā honti.|| ||

Sammā-vāyāma-paccayā ca aneke kusalā dhammā bhāvanā pārīpūriɱ gacchanti.|| ||

Sammā-satissa bhikkhave,||
micchā-sati nijjiṇṇā hoti.|| ||

Ye ca micchā-sati-paccayā aneke pāpakā akusalā dhammā sambhavanti,||
te c'assa nijjiṇṇā honti.|| ||

Sammā-sati-paccayā ca aneke kusalā dhammā bhāvanā-pāripūriɱ gacchanti.|| ||

Sammā-samādhissa bhikkhave,||
micchā-samādhi nijjiṇṇo hoti.|| ||

Ye ca micchā-samādhi-paccayā aneke pāpakā akusalā dhammā sambhavanti,||
te c'assa nijjiṇṇā honti.|| ||

Sammā-samādhi-paccayā ca aneke kusalā dhammā bhāvanā-pāripūriɱ gacchanti.|| ||

Sammā-ñāṇassa bhikkhave,||
micchā-ñāṇaɱ nijjiṇṇaɱ hoti.|| ||

Ye ca micchā-ñāṇa-paccayā aneke pāpakā akusalā dhammā samabhavanti,||
te c'assa nijjiṇṇā honti.|| ||

Sammā-ñāṇa-paccayā ca aneke kusalā dhammā bhāvanā-pāripūriɱ gacchanti.|| ||

Sammā-vimuttassa bhikkhave,||
micchā-vimutti nijjiṇṇā hoti.|| ||

Ye ca micchā-vimutti-paccayā aneke pāpakā akusalā dhammā sambhavanti,||
te c'assa nijjiṇṇā honti.|| ||

Sammā-vimutti-paccayā ca aneke kusalā dhammā bhāvanā-pāripūriɱ gacchanti.|| ||

Iti kho bhikkhave,||
vīsati kusala-pakkhā||
vīsati akusala-pakkhā|| ||

 

§

 

'Mahā-cattārisako dhamma-pariyāyo pavattito appati-vattiyo||
samaṇena vā||
brāhmaṇena vā||
devena vā||
mārena vā||
brahmunā vā||
kenaci vā lokasmin' ti.|| ||

Yo hi koci bhikkhave,||
samaṇo vā||
brāhmaṇo vā||
imaɱ mahā-cattārīsakaɱ dhamma-pariyā'yaɱ||
garahitabbaɱ||
paṭikkositabbaɱ maññeyya,||
tassa diṭṭhe'va dhamme dasa saha-dhammikā vād'ānuvādā gārayhaɱ ṭhānaɱ āga-c-chanti.|| ||

Samamā diṭṭhiɱ ce bhavaɱ garahati||
ye ca micchā-diṭṭhi samaṇa-brāhmaṇā,||
te bhoto pujjā||
te bhoto pāsaŋsā.|| ||

Sammā-saŋkappaɱ ce bhavaɱ [78] garahati||
ye ca micchā-saŋkappa samaṇa-brāhmaṇā,||
te bhoto pujjā||
te bhoto pāsaŋsā.|| ||

Sammā-vācaɱ ce bhavaɱ garahati||
ye ca micchā-vāca samaṇa-brāhmaṇā,||
te bhoto pujjā||
te bhoto pāsaŋsā.|| ||

Sammā-kammantaɱ ce bhavaɱ garahati||
ye ca micchā-kammanta samaṇa-brāhmaṇā,||
te bhoto pujjā||
te bhoto pāsaŋsā.|| ||

Sammā-ajīvaɱ ce bhavaɱ garahati||
ye ca micchā-ajīva samaṇa-brāhmaṇā,||
te bhoto pujjā||
te bhoto pāsaŋsā.|| ||

Sammā-vāyāmaɱ ce bhavaɱ garahati||
ye ca micchā-ajīva samaṇa-brāhmaṇā,||
te bhoto pujjā||
te bhoto pāsaŋsā.|| ||

Sammā-satiɱ ce bhavaɱ garahati||
ye ca micchā-sati samaṇa-brāhmaṇā,||
te bhoto pujjā||
te bhoto pāsaŋsā.|| ||

Sammā-samādhiñce bhavaɱ garahati||
ye ca micchā-samādhi samaṇa-brāhmaṇā,||
te bhoto pujjā||
te bhoto pāsaŋsā.|| ||

Sammā-ñāṇaɱ ce bhavaɱ garahati||
ye ca micchā-ñāṇa samaṇa-brāhmaṇā,||
te bhoto pujjā||
te bhoto pāsaŋsā.|| ||

Sammā-vimuttiɱ ce bhavaɱ garahati||
ye ca micchā-vimutti samaṇa-brāhmaṇā,||
te bhoto pujjā||
te bhoto pāsaŋsā.|| ||

Yo hi koci bhikkhave,||
samaṇo vā||
brāhmaṇo vā||
imaɱ mahā-cattārīsakaɱ dhamma-pariyā'yaɱ||
garahitabbaɱ||
paṭikkositabbaɱ maññeyya,||
tassa diṭṭhe'va dhamme dasa saha-dhammikā vād'ānuvādā gārayhaɱ ṭhānaɱ āga-c-chanti.|| ||

 

§

 

Ye pi te bhikkhave,||
ahesuɱ Ukkalā||
Vassa||
Bhaññā||
ahetu-vādā akiriya-vādā n'atthi-vādā,||
te pi mahā-cattārīsakaɱ dhamma-pariyā'yaɱ na garahitabbaɱ,||
na paṭikkositabbaɱ maññiɱsu.|| ||

Taɱ kissa hetu?|| ||

Nindā-vyārosa-upārambha-bhayā" ti.|| ||

Idam avoca Bhagavā.|| ||

Attamanā te bhikkhū Bhagavato bhāsitaɱ:|| ||

"Abhinandun" ti!|| ||

Mahā Cattārīsaka Suttaɱ


 

Contact:
E-mail
Copyright Statement