MN 123: Acchariyabbhuta Suttam

Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]


 

Majjhima Nikāya
III. Upari Paṇṇāsa
3. Suññata Vagga

Sutta 123

Acchariya-Bhuta-Dhamma Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][upal] Evaɱ me sutaɱ:|| ||

Ekaɱ samayaɱ Bhagavā Sāvatthīyaɱ viharati Jetavane Anāthapiṇḍikassa ārāme.

Atha kho sambahulānaɱ bhikkhūnaɱ pacchābhattaɱ piṇḍa-pāta-paṭikkantānaɱ upaṭṭhānasālāyaɱ sanni-sinnānaɱ sanni-patitānaɱ ayam antarā kathā udapādi: acchariyaɱ āvuso abbhutaɱ āvuso,||
Tathāgatassa mahiddhikatā mahānubhāvakatā1 yatra hī nāma Tathāgato atīte Buddhe parinibbute chinnapapañce chinnavaṭume pariyādinnavaṭṭe sabbadukkha vītivatte jānissati: evaɱjaccā te Bhagavanto ahesuɱ iti pi,||
evaɱnāmā te Bhagavanto ahesuɱ iti pi,||
evaɱ gottā te Bhagavanto ahesuɱ iti pi,||
evaɱsīlā te Bhagavanto ahesuɱ iti pi,||
evaɱdhammā te Bhagavanto ahesuɱ iti pi,||
evaɱ paññā te Bhagavanto ahesuɱ iti pi,||
evaɱvihāri te Bhagavanto ahesuɱ iti pi,||
evaɱvimuttā te Bhagavanto ahesuɱ iti piti.|| ||

Evaɱ vutte āyasmā Ānando te bhikkhū etad avoca: acchariyā c'eva āvuso,||
Tathāgatā acchariyadhammasamannā-gatā ca abbhutā c'eva āvuso,||
Tathāgatā abbhuta-dhammasamannā-gatā cā ti.|| ||

[119] Ayañ ca h'idaɱ tesaɱ bhikkhūnaɱ antarā kathā vippakatā hoti.

Atha kho Bhagavā sāyaṇha-samayaɱ patisallānā vuṭṭhito yenūpaṭṭhānasālā ten'upasankami.

Upasaŋkamitvā paññatte āsane nisīdi.

Nissajja kho Bhagavā bhikkhu āmantesi:|| ||

Kāya nu'ttha bhikkhave,||
etarahi kathāya sanni-sinnā,||
kā ca pana vo antarā kathā vippakatāti.|| ||

Idha bhante,||
amhākaɱ pacchābhattaɱ piṇḍa-pāta-paṭikkantānaɱ upaṭṭhānasālāyaɱ sanni-sinnānaɱ sanni-patitānaɱ ayam antarā kathā udapādi: acchariyaɱ āvuso abbhutaɱ āvuso,||
Tathāgatassa mahiddhikatā mahānubhāvakatā yatra hī nāma Tathāgato atīte Buddhe parinibbute chinnapapañce chinnavaṭume pariyādinnavaṭṭe sabbadukkha vītivatte jānissati: evaɱjaccā te Bhagavanto ahesuɱ iti pi,||
evaɱnāmā te Bhagavantato ahesuɱ iti pi,||
evaɱ gottā te Bhagavanto ahesuɱ iti pi,||
evaɱ sīlā te Bhagavanto ahesuɱ iti pi,||
evaɱdhammā te Bhagavanto ahesuɱ iti pi,||
evaɱ paññā te Bhagavanto ahesuɱ iti pi,||
evaɱvihāri te Bhagavanto ahesuɱ iti pi,||
evaɱvimuttā te Bhagavanto ahesuɱ itipīti.

Evaɱ vutte bhante,||
āyasmā Ānando amhe etad avoca: acchariyā c'eva āvuso.

Tathāgatā acchariyadhammasamannā-gatā ca,||
abbhutā c'eva āvuso,||
Tathāgatā abbhuta-dhammasamannā-gatācāti.

Ayaɱ kho no bhante,||
antarā kathā vippakatā.

Atha Bhagavā anuppattoti.|| ||

Atha kho Bhagavā āyasmantaɱ Ānandaɱ āmantesi: tasmāt iha taɱ Ānanda,||
bhīyosomattāya paṭibhantu Tathāgatassa acchariyā abbhutadhammāti.|| ||

Sammukhā me taɱ bhante,||
Bhagavato sutaɱ,||
sammukhā paṭiggahitaɱ: sato sampajāno Ānanda1,||
bodhisatto tusitaɱ kāyaɱ upapajjīti yampi bhante,||
sato sampajāno bodhisatto tusitaɱ kāyaɱ upapajji.

Idamahaɱ bhante,||
Bhagavato acchariyaɱ abbhuta-dhammaɱ dhāremi.|| ||

Sammukhā me taɱ bhante,||
Bhagavato sutaɱ,||
sammukhā paṭiggahitaɱ: sato sampajāno Ānanda,||
bodhisatto tusite kāye aṭṭhāsīti.

Yampi bhante sato sampajāno bodhisatto tusite kāye aṭṭhāsi.

Idampāhaɱ bhante,||
Bhagavato acchariyaɱ abbhuta-dhammaɱ dhāremi.|| ||

Sammukhā me taɱ bhante,||
Bhagavato sutaɱ,||
sammukhā paṭiggahitaɱ: yāvatāyukaɱ Ānanda,||
bodhisatto tusite kāye aṭṭhāsīti.

Yampi bhante,||
yāvatāyukaɱ bodhisatto tusite kāye aṭṭhāsi.

Idampāhaɱ bhante,||
Bhagavato acchariyaɱ abbhuta-dhammaɱ dhāremi.|| ||

Sammukhā me taɱ bhante,||
Bhagavato sutaɱ.

Sammukhā paṭiggahitaɱ: sato sampajāno Ānanda,||
bodhisatto tusitā kāyā cavitvā mātu-kucchiɱ okkamīti.

Yampi [120] bhante,||
sato sampajāno bodhisatto tusitā kāyā cavitvā mātu-kucchiɱ okkami,||
idampāhaɱ bhante,||
Bhagavato acchariyaɱ abbhuta-dhammaɱ dhāremi.|| ||

Sammukhā me taɱ bhante,||
Bhagavato sutaɱ,||
sammukhā paṭiggahitaɱ: yadā Ānanda,||
bodhisatto tusitā kāyā cavitvā mātu-kucchiɱ okkami.

Atha sa-devake loke sa-mārake sabrahmake sassamaṇa-brāhmaṇiyā pajāya sadeva-manussāya appamāṇo uḷāro obhāso loke pātu-bhavati atikkamm'eva devānaɱ devānubhāvaɱ.

Yāpi tā lokantarikā aghā asaɱvutā andhakārā andhakāratimisā,||
yatthapime candima-suriyā evaɱmahiddhikā evaɱmahānubhāvā ābhāya nānubhonti tatthapi appamāṇo uḷāro obhāso loke pātu-bhavati atikkamm'eva devānaɱ devānubhāvaɱ.

Ye pi tattha sattā upapannā,||
tepi tenobhāsena añña-maññaɱ sañjānanti: aññe pi kira bho santi sattā idhūpapannāti.

Ayañ ca dasasahassī loka-dhātu saŋkampati sampakampati sampavedhati.

Appamāṇo ca uḷāro obhāso loke pātu-bhavati atikkamm'eva devānaɱ devānubhāvanti.

Yampi bhante,||
sato sampajāno bodhisatto tusitaɱ kāyaɱ upapajjī.

Idampāhaɱ bhante,||
Bhagavato acchariyaɱ abbhuta-dhammaɱ dhāremi.|| ||

Sammukhā me taɱ bhante,||
Bhagavato sutaɱ,||
sammukhā paṭiggahitaɱ: yadā Ānanda.

Bodhisatto mātu-kucchiɱ okkanto hoti.

Cattāro naɱ deva-puttā2 catuddisaɱ ārakkhāya upagacchanti: mā naɱ kho bodhisattaɱ vā bodhisattamātaraɱ vā manusso vā amanusso vā koci vā viheṭhesīti3.

Yampi bhante,||
sato sampajāno bodhisatto tusite kāyaɱ upapajjī.

Idampāhaɱ bhante,||
Bhagavato acchariyaɱ abbhuta-dhammaɱ dhāremi.|| ||

Sammukhā me taɱ bhante,||
Bhagavato sutaɱ sammukhā paṭiggahitaɱ: yadā Ānanda,||
bodhisatto mātu-kucchiɱ okkanto hoti.

Pakatiyā sīla-vatī bodhisattamātā hoti.

Viratā pāṇātipātā,||
viratā adinnādānā.

Viratā kāmesu micchā-cārā,||
viratā musā-vādā,||
viratā surā-mera-yamajja-pamā-daṭṭhānāti.

Yampi bhante,||
yāvatāyukaɱ bodhisatto tusite kāye aṭṭhāsi.

Idampāhaɱ bhante,||
Bhagavato acchariyaɱ abbhuta-dhammaɱ dhāremi.|| ||

[121] Sammukhā me taɱ bhante,||
Bhagavato sutaɱ,||
sammukhā paṭiggahitaɱ: yadā Ānanda,||
bodhisatto mātu-kucchiɱ okkanto hoti.

Na bodhisattamātu purisesu mānasaɱ uppajjati kāmaguṇūpasaɱhitaɱ.

Anatikkamanīyā ca bodhisattamātā hoti kenaci purisena rattacittenāti.

Yampi bhante,||
sato sampajāno bodhisatto tusitā kāyā cavitvā mātu-kucchiɱ okkami,||
idampāhaɱ bhante,||
Bhagavato acchariyaɱ abbhuta-dhammaɱ dhāremi.|| ||

Sammukhā me taɱ bhante.

Bhagavato sutaɱ,||
sammukhā paṭiggahitaɱ: yadā Ānanda,||
bodhisatto mātu-kucchiɱ okkanto hoti.

Lābhinī bodhisattamātā hoti pañcannaɱ kāma-guṇānaɱ.

Sā pañcahi kāma-guṇehi samappitā samaŋgībhūtā paricāretī' ti.

Yampi bhante,||
sato sampajāno bodhisatto tusitā kāyā cavitvā mātu-kucchiɱ okkami,||
idampāhaɱ bhante,||
Bhagavato acchariyaɱ abbhūtadhammaɱ dhāremi.|| ||

Sammukhā me taɱ bhante,||
Bhagavato sutaɱ,||
sammukhā paṭiggahitaɱ: yadā Ānanda,||
bodhisatto mātu-kucchiɱ okkanto hoti.

Na bodhisattamātu kocid-eva ābādho uppajjati.

Sukhinī bodhisattamātā hoti akilanta-kāyā.

Bodhisattañ ca bodhisattamātā tirokucchigataɱ passati sabbaŋgapaccaŋgaɱ ahīnindriyaɱ.

Seyyathā pi Ānanda,||
maṇi veeriyo subho jātimā aṭṭhaɱso suparikammakato.

Tatrāssa suttaɱ āvutaɱ nīlaɱ vā pītaɱ vā lohitaɱ vā odātaɱ vā paṇḍusuttaɱ vā.

Tam enaɱ cakkhumā puriso hatthe karitvā pacca-vekkheyya: ayaɱ kho maṇi veeriyo subho jātimā aṭṭhaɱso suparikammakato.

Tatiradaɱ suttaɱ āvutaɱ nīlaɱ vā pītaɱ vā lohitaɱ vā odātaɱ vā paṇḍusuttaɱ vāti.

Evam eva kho Ānanda,||
yadā bodhisatto mātu-kucchiɱ okkanto hoti.

Na bodhisattamātu kocid-eva ābādho uppajjati.

Sukhīnī bodhisattamātā hoti akilanta-kāyā.|| ||

Bodhisattañ ca bodhisattamātā tirokucchigataɱ passati sabbaŋgapaccaŋgaɱ ahīnindriyanti.|| ||

Yampi bhante,||
sato sampajāno Ānanda,||
bodhisatto tusitā kāyā cavitvā mātu-kucchiɱ okkami,||
idampāhaɱ bhante,||
Bhagavato acchariyaɱ abbhuta-dhammaɱ dhāremi.|| ||

[122] Sammukhā me taɱ bhante.

Bhagavato sutaɱ,||
sammukhā paṭaggahitaɱ: sattāhajāte Ānanda,||
bodhisatte bodhisattamātā kālaɱ karoti.

Tusitaɱ kāyaɱ upapajjatī' ti.

Yampi bhante,||
sato sampajāno Ānanda,||
bodhisatto tusitā kāyā cavitvā mātu-kucchiɱ okkami,||
idampāhaɱ bhante,||
Bhagavato acchariyaɱ abbhuta-dhammaɱ dhāremi.|| ||

Sammukhā me taɱ bhante,||
Bhagavato sutaɱ,||
sammukhā paṭiggahitaɱ: yathā kho panĀnanda aññā itthikā nava vā dasa vā māse gabbhaɱ kucchinā pariharitvā vijāyanti.

Na hevaɱ bodhisattaɱ bodhisattamātā vijāyati.

Daseva māsāni bodhisattaɱ bodhisattamātā kucchinā pariharitvā vijāyatī' ti.

Yampi bhante,||
sato sampajāno Ānanda,||
bodhisatto tusitā kāyā cavitvā mātu-kucchiɱ okkami,||
idampāhaɱ bhante,||
Bhagavato acchariyaɱ abbhuta-dhammaɱ dhāremi.|| ||

Sammukhā me taɱ bhante,||
Bhagavato sutaɱ,||
sammukhā paṭiggahitaɱ: yathā kho panĀnanda,||
aññā itthikā nisinnā vā nipannā vā vijāyanti.

Na hevaɱ bodhisattaɱ bodhisattamātā vijāyati.

Ṭhitāva kho bodhisattaɱ bodhisattamātā vijāyatīti.

Yampi bhante,||
sato sampajāno Ānanda,||
bodhisatto tusitā kāyā cavitvā mātu-kucchiɱ okkami,||
idampāhaɱ bhante,||
Bhagavato acchariyaɱ abbhuta-dhammaɱ dhāremi.|| ||

Sammukhā me taɱ bhante,||
Bhagavato sutaɱ.

Sammukhā paṭiggahitaɱ: yadā Ānanda,||
bodhisatto mātu-kucchimhā nikkhamati,||
devā naɱ paṭhamaɱ paṭiggaṇhanti,||
pacchā manussāti.

Yampi bhante,||
sato sampajāno Ānanda,||
bodhisatto tusitā kāyā cavitvā mātu-kucchiɱ okkami,||
idampāhaɱ bhante,||
Bhagavato acchariyaɱ abbhuta-dhammaɱ dhāremi.|| ||

Sammukhā me taɱ bhante,||
Bhagavato sutaɱ,||
sammukhā paṭiggahitaɱ: yadā Ānanda,||
bodhisatto mātu-kucchimhā nikkhamati appattova bodhisatto paṭhaviɱ hoti.

Cattāro naɱ deva-puttā paṭiggahetvā mātu purato ṭhapenti: 'attamanā devi hohi,||
mahesakkho te putto uppanno' ti.

Yampi bhante,||
sato sampajāno Ānanda,||
bodhisatto tusitā kāyā cavitvā mātu-kucchiɱ okkami,||
idampāhaɱ bhante,||
Bhagavato acchariyaɱ abbhuta-dhammaɱ dhāremi.|| ||

Sammukhā me taɱ bhante,||
Bhagavato sutaɱ,||
sammukhā paṭiggahitaɱ: yadā Ānanda,||
bodhisatto mātu-kucchimhā nikkhamati,||
visadova nikkhamati amakkhito uddena1 amakkhito semhena,||
amakkhito ruhirena,||
amakkhito [123] kenaci asucinā suddho visado.

Seyyathā pi Ānanda,||
maṇiratanaɱ kāsike vatthe nikkhittaɱ,||
n'eva maṇiratanaɱ kāsikaɱ vatthaɱ makkheti.

Nāpi kāsikaɱ vatthaɱ maṇiratanaɱ makkheti.

Taɱ kissa hetu? ubhinnaɱ suddhattā.

Evam eva kho Ānanda,||
yadā bodhisatto mātu-kucchimhā nikkhamati,||
visadova nikkhamati amakkhito uddena amakkhito semhena amakkhito ruhirena amakkhito kenaci asucīnā suddho visadoti.

Yampi bhante,||
sato sampajāno Ānanda,||
bodhisatto tusitā kāyā cavitvā mātu-kucchiɱ okkami,||
idampāhaɱ bhante,||
Bhagavato acchariyaɱ abbhuta-dhammaɱ dhāremi.|| ||

Sammukhā me taɱ bhante,||
Bhagavato sutaɱ,||
sammukhā paṭiggahitaɱ: yadā Ānanda,||
bodhisatto mātu-kucchimhā nikkhamati.

Dve udakassa dhārā antalikkhā pātu-bhavanti ekā sītassa ekā uṇhassa,||
yena bodhisattassa udakakiccaɱ karonti2 mātu cāti.

Yampi bhante,||
sato sampajāno Ānanda,||
bodhisatto tusitā kāyā cavitvā mātu-kucchiɱ okkami,||
idampāhaɱ bhante,||
Bhagavato acchariyaɱ abbhuta-dhammaɱ dhāremi.|| ||

Sammukhā me taɱ bhante,||
Bhagavato sutaɱ,||
sammukhā paṭiggahitaɱ: sampati jāto Ānanda,||
bodhisatto samehi pādehi paṭhaviyaɱ patiṭṭhahitvā uttarābhimukho sattapadavītihārena gacchati.

Setamhi chatte anuhīramāne3 sabbā ca disā viloketi āsabhiɱ ca vācaɱ bhāsati: 'aggohamasmi lokassa,||
seṭṭhohamasmi lokassa,||
jeṭṭhohamasmi lokassa,||
ayamantimājāti,||
n'atthidāni punabbhavo' ti.

Yampi bhante,||
sato sampajāno Ānanda,||
bodhisatto tusitā kāyā cavitvā mātu-kucchiɱ okkami,||
idampāhaɱ bhante,||
Bhagavato acchariyaɱ abbhuta-dhammaɱ dhāremi.|| ||

Sammukhā me taɱ bhante,||
Bhagavato sutaɱ,||
sammukhā paṭiggahitaɱ: yadā Ānanda,||
bodhisatto mātu-kucchimhā nikkhamati.

Atha sa-devake loke sa-mārake sabrahmake sassamaṇa-brāhmaṇiyā pajāya sadeva-manussāya appamāṇo uḷāro obhāso loke pātu-bhavati atikkamm'eva devānaɱ devānubhāvaɱ.

Yāpi tā lokantarikā aghā asaɱvutā andhakārā andhakāratimisā,||
yatthapime candima-suriyā evaɱ mahiddhikā evaɱ mahānubhāvā ābhāya nānubhonti.

Tatthapi [124] appamāṇo uḷāro obhāso loke pātu-bhavati atikkamm'eva devānaɱ devānubhāvaɱ,||
yepi tattha sattā upapannā,||
tepi tenobhāsena añña-maññaɱ sañjānanti: aññe pi kira bho santi sattā idhūpapannāti.

Ayañ ca dasasahassī loka-dhātu saŋkampati,||
sampakampati,||
sampavedhati.

Appamāṇo ca uḷāro obhāso loke pātu-bhavati atikkamme va devānaɱ devānubhāvanti.

Yampi bhante,||
sato sampajāno Ānanda,||
bodhisatto tusitā kāyā cavitvā mātu-kucchiɱ okkami,||
idampāhaɱ bhante,||
Bhagavato acchariyaɱ abbhuta-dhammaɱ dhāremīti.|| ||

Tasmāt iha tvaɱ Ānanda,||
idam pi Tathāgatassa acchariyaɱ abbhuta-dhammaɱ dhārehi.

Idh'Ānanda,||
Tathāgatassa viditā vedanā uppajjanti.

Viditā upaṭṭhahanti.

Viditā abbhatthaɱ gacchanti.

Viditā saññā uppajjanti viditā upaṭṭhahanti.

Viditā abbhatthaɱ gacchanti.

Viditā vitakkā uppajjanti.

Viditā upaṭṭhahanti.

Viditā abbhatthaɱ gacchanti.

Idam pi kho tvaɱ Ānanda,||
Tathāgatassa acchariyaɱ abbhuta-dhammaɱ dhāremi.|| ||

Yampi bhante,||
Bhagavato viditā vedanā uppajjanti,||
viditā upaṭṭhahanti,||
viditā abbhanthaɱ gacchanti,||
viditā saññā uppajjanti,||
viditā upaṭṭhahanti,||
viditā abbhatthaɱ gacchanti.

Viditā vitakkā uppajjanti,||
viditā upaṭṭhahanti,||
viditā abbhatthaɱ gacchanti.

Idampāhaɱ bhante Bhagavato acchariyaɱ abbhuta-dhammaɱ dhāremīti.|| ||

Idam avoca āyasmā Ānando,||
samanuñño Satthā ahosi.

Attamanā ca te bhikkhu āyasmato Ānandassa bhāsitaɱ abhinandunti.|| ||

Acchariyabbhuta suttaɱ tatiyaɱ


 

Contact:
E-mail
Copyright Statement