Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]


 

Majjhima Nikāya
III. Upari Paṇṇāsa
4. Vibhaŋga Vagga

Sutta 141

Sacca-Vibhaŋga Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][chlm][pts][than][piya][ntbb][upal] Evaɱ me sutaɱ:

Ekaɱ samayaɱ Bhagavā Bārāṇasiyaɱ viharati Isipatane Migadāye. Tatra kho Bhagavā bhikkhū āmantesi Bhikkhavo ti. Bhadante ti te bhikkhū Bhagavato paccassosuɱ. Bhagavā etad avoca:|| ||

2. Tathāgatena bhikkhave, arahatā Sammā-SamBuddhena Bārāṇasiyaɱ Isipatane Migadāye anuttaraɱ Dhamma-cakkaɱ pavattitaɱ appavattiyaɱ samaṇena vā brāhmaṇena vā devena vā mārena vā brahmunā vā kenaci vā lokasmiɱ, yad idaɱ catunnaɱ ariya-saccānaɱ ācikkhanā desanā paññapanā paṭṭhapanā vivaraṇā vibhajanā uttānīkammaɱ. Katamesaɱ catunnaɱ:|| ||

3. Dukkhassa ariya-saccassa ācikkhanā desanā paññapanā paṭṭhapanā vivaraṇā vibhajanā uttānīkammaɱ, dukkha-samudayassa ariya-saccassa ācikkhanā desanā paññapanā paṭṭhapanā vivaraṇā vibhajanā uttānīkammaɱ. Dukkhanirodhassa ariya-saccassa ācikkhanā desanā paññapanā paṭṭhapanā vivaraṇā vibhajanā uttānīkammaɱ. Dukkhanirodha-gāmiyā paṭipadāya ariya-saccassa ācikkhanā desanā paññapanā paṭṭhapanā vivaraṇā vibhajanā uttānīkammaɱ.|| ||

4. Tathāgatena bhikkhave, arahatā Sammā-SamBuddhena Bārāṇasiyaɱ Isipatane Migadāye anuttaraɱ Dhamma-cakkaɱ pavattitaɱ appavattiyaɱ samaṇena vā brāhmaṇena vā devena vā mārena vā brahmunā vā kenaci vā lokasmiɱ, yad idaɱ imesaɱ catunnaɱ ariya-saccānaɱ ācikkhanā desanā paññapanā paṭṭhapanā vivaraṇā vibhajanā uttānīkammaɱ.|| ||

5. Sevetha bhikkhave, Sāriputta-Moggallāne. Bhajatha bhikkhave, Sāriputta-Moggallāne. Paṇḍitā bhikkhū anuggāhakā sabrahma-cārīnaɱ. Seyyathāpī bhikkhave, janetti evaɱ Sāriputto. Seyyathā pi jātassa āpādetā evaɱ kho Moggallāno. Sāriputto bhikkhave, sot'āpattiphale vineti. Moggallāno uttamatthe. Sāriputto bhikkhave, pahoti cattāri ariya-saccāni vitthārena ācikkhituɱ desetuɱ paññāpetuɱ paṭṭhapetuɱ vivarituɱ vibhajituɱ uttānīkātunti.|| ||

6. Idam avoca Bhagavā, idaɱ vatvā Sugato uṭṭhāy āsanā vihāraɱ pāvisi.|| ||

7. Tatra kho āyasmā Sāriputto acira-pakkantassa Bhagavato bhikkhū āmantesi: āvuso Bhikkhavo ti. Āvusoti kho te bhikkhū āyasmato Sāriputtassa paccassosuɱ. Āyasmā Sāriputto etad avoca:|| ||

8. Tathāgatena āvuso, arahatā Sammā-SamBuddhena Bārāṇasiyaɱ Isipatane Migadāye anuttaraɱ Dhamma-cakkaɱ pavattitaɱ appavattiyaɱ samaṇena vā brāhmaṇena vā devena vā mārena vā brahmunā vā kenaci vā lokasmiɱ, yad idaɱ catunnaɱ ariya-saccānaɱ ācikkhanā desanā paññapanā paṭṭhapanā vivaraṇā vibhajanā uttānīkammaɱ. Katamesaɱ catunnaɱ:|| ||

9. Dukkhassa ariya-saccassa ācikkhanā desanā paññapanā paṭṭhapanā vivaraṇā vibhajanā uttānīkammaɱ. Dukkhasamudayassa ariya-saccassa ācikkhanā desanā paññapanā paṭṭhapanā vivaraṇā vibhajanā uttānīkammaɱ. Dukkhanirodhassa ariya-saccassa ācikkhanā desanā paññapanā paṭṭhapanā vivaraṇā vibhajanā uttānīkammaɱ. Dukkhanirodha-gāminiyā paṭipadāya ariya-saccassa ācikkhanā desanā paññapanā paṭṭhapanā vivaraṇā vibhajanā uttānīkammaɱ.|| ||

10. Katamañcāvuso dukkhaɱ ariya-saccaɱ: jātipi dukkhā, jarāpi dukkhā, maraṇampi dukkhaɱ, [soka parideva dukkha domanass'upāyāsāpi] dukkhā, yamp'icchaɱ na labhati tampi dukkhaɱ, saŋkhittena pañc'upādāna-k-khandhā dukkhā.|| ||

11. Katamācāvuso jāti: yā tesaɱ tesaɱ sattānaɱ tamhi tamhi sattanikāye jāti sañjāti okkanti abhinibbatti khandhānaɱ pātu-bhāvo āyatanānaɱ paṭilābho, ayaɱ vuccat'āvuso jāti.|| ||

12. Katamācāvuso jarā: yā tesaɱ tesaɱ sattānaɱ tamhi tamhi sattanikāye jarā jīraṇatā khaṇḍiccaɱ pāliccaɱ valittacatā āyuno saɱhāni indriyānaɱ paripāko, ayaɱ vuccat'āvuso jarā.|| ||

13. Katamañcāvuso maraṇaɱ: yaɱ tesaɱ tesaɱ3 sattānaɱ tamhā tamhā sattanikāyā cuti cavanatā bhedo antara-dhānaɱ maccu maraṇaɱ kāla-kiriyā khandhānaɱ bhedo kalebarassa nikkhepo, jīvitindriyassa upacchedo idaɱ vuccat'āvuso maraṇaɱ.|| ||

14. Katamo cāvuso soko: yo kho āvuso aññataraññatarena vyasanena samannāgatassa aññataraññatarena dukkha-dhammena phuṭṭhassa soko socanā socittaɱ anto soko anto parisoko, ayaɱ vuttāvuso soko.|| ||

15. Katamo cāvuso paridevo: yo kho āvuso aññataraññatarena vyasanena samannāgatassa aññataraññatarena dukkha-dhammena phuṭṭhassa ādevo paridevo ādevanā paridevanā ādevitattaɱ paridevitattaɱ, ayaɱ vuccat'āvuso paridevo.|| ||

16. Katamaɱ cāvuso dukkhaɱ: yaɱ kho āvuso kāyikaɱ dukkhaɱ kāyikaɱ asātaɱ kāya-samphassajaɱ dukkhaɱ asātaɱ vedayitaɱ, idaɱ vuccat'āvuso dukkhaɱ.|| ||

17. Katamaɱ cāvuso domanassaɱ: yaɱ kho āvuso ceta-sikaɱ dukkhaɱ ceta-sikaɱ asātaɱ vedayitaɱ mano-samphassajaɱ dukkhaɱ asātaɱ vedayitaɱ, idaɱ vuccat'āvuso domanassaɱ.|| ||

18. Katamo cāvuso upāyāso: yo kho āvuso aññataraññatarena vyasanena samannāgatassa aññataraññatarena dukkha-dhammena phuṭṭhassa āyāso upāyāso āyāsitattaɱ upāyāsitattaɱ, ayaɱ vuccat'āvuso upāyāso.|| ||

19. Katamaɱ cāvuso yamp'icchaɱ na labhati tampi dukkhaɱ:
jāti-dhammānaɱ āvuso, sattānaɱ evaɱ icchā uppajjati: aho vata mayaɱ na jāti-dhammā assāma, na ca vata no jāti āgaccheyyāti.|| ||

Na kho pan'etaɱ icchāya pattabbaɱ idam pi yamp'icchaɱ na labhati tampi dukkhaɱ.|| ||

Jarā-dhammānaɱ āvuso sattānaɱ evaɱ icchā uppajjati: aho vata mayaɱ na jarā-dhammā assāma, na ca vata no jarā āgaccheyyāti.|| ||

Na kho pan'etaɱ icchāya pattabbaɱ idam pi yamp'icchaɱ na labhati tampi dukkhaɱ.|| ||

Byādhidhammānaɱ āvuso, sattānaɱ evaɱ icchā uppajjati: aho vata mayaɱ na vyādhi-dhammā assāma, na ca vata no byādhi āgaccheyyāti.|| ||

Na kho pan'etaɱ icchāya pattabbaɱ idam pi yamp'icchaɱ na labhati tampi dukkhaɱ.|| ||

Maraṇa-dhammānaɱ āvuso, sattānaɱ evaɱ icchā uppajjati: aho vata mayaɱ na maraṇa-dhammā assāma, na ca vata no maraṇaɱ āgaccheyyāti.|| ||

Na kho pan'etaɱ icchāya pattabbaɱ idam pi yamp'icchaɱ na labhati tampi dukkhaɱ.|| ||

Soka parideva dukkha domanass'upāyāsa dhammānaɱ] āvuso, sattānaɱ evaɱ icchā uppajjati: aho vata mayaɱ na [soka parideva dukkha domanass'upāyāsa dhammā] assāma, na ca vata no soka parideva dukkha domanass'upāyāsā āgaccheyyunti.|| ||

Na kho pan'etaɱ icchāya pattabbaɱ, idam pi yamp'icchaɱ na labhati tampi dukkhaɱ.|| ||

20. Katame cāvuso saŋkhittena pañc'upādāna-k-khandhā dukkhā: seyyath'īdaɱ: rūp'ūpādāna-k-khandho vedan'ūpādāna-k-khandho saññ'ūpādāna-k-khandho sankhār'ūpādāna-k-khandho viññāṇ'ūpādāna-k-khandho. Ime vuccantāvuso saŋkhittena pañcūpādāna-k-khandhā dukkhā.|| ||

Idaɱ vuccat'āvuso dukkhaɱ ariya-saccaɱ.|| ||

21. Katamañcāvuso, dukkha-samudayo ariya-saccaɱ: yā'yaɱ taṇhā ponobhavikā nandirāgasahagatā tatra tatrābhinandinī, seyyath'īdaɱ: kāma-taṇhā bhavataṇhā vibhavataṇhā.|| ||

Idaɱ vuccat'āvuso dukkha-samudayo ariya-saccaɱ.|| ||

22. Katamañcāvuso dukkha-nirodho ariya-saccaɱ: yo tassāyeva taṇhāya asesa-virāga-nirodho cāgo paṭinissaggo mutti anālayo. Idaɱ vuccat'āvuso dukkha-nirodho ariya-saccaɱ.|| ||

23. Katamañcāvuso dukkha-nirodha-gāminī paṭipadā ariya-saccaɱ: ayameva Ariyo Aṭṭhaŋgiko Maggo, seyyath'īdaɱ: sammā-diṭṭhi sammā-saŋkappo sammā-vācā sammā-kammanto sammā ājīvo sammā-vāyāmo sammā-sati sammā-samādhi.|| ||

24. Katamā cāvuso sammā-diṭṭhi: yaɱ kho āvuso dukkhe ñāṇaɱ dukkha-samudaye ñāṇaɱ dukkha-nirodhe ñāṇaɱ dukkha-nirodha-gāminiyā paṭipadāya ñāṇaɱ. Ayaɱ vuccat'āvuso sammā-diṭṭhi.|| ||

25. Katamo cāvuso sammā-saŋkappo: nekkhammasaŋkappo avyāpādasaŋkappo avihiɱsāsaŋkappo. Ayaɱ vuccat'āvuso sammā-saŋkappo.|| ||

26. Katamā cāvuso sammā-vācā: musā-vādā veramaṇī, pisuṇāya vācāya veramaṇī, pharusāya vācāya veramaṇī, samphappalāpā veramaṇī.|| ||

Ayaɱ vuccat'āvuso sammā-vācā.|| ||

27. Katamo cāvuso sammā-kammanto: pāṇāti-pātā veramaṇī, adinn'ādānā veramaṇī kāmesu micchā-cārā veramaṇī.|| ||

Ayaɱ vuttāvuso sammā-kammanto.|| ||

28. Katamo cāvuso sammā ājīvo: idh'āvuso ariya-sāvako micchā ājīvaɱ pahāya sammā ājīvena jīvikaɱ kappeti.|| ||

Ayaɱ vuccat'āvuso sammā ājīvo.|| ||

29. Katamo cāvuso sammā-vāyāmo:||
idh'āvuso, bhikkhu anuppannānaɱ pāpakānaɱ akusalānaɱ dhammānaɱ anuppādāya chandaɱ janeti vāyāmati viriyaɱ arabhati cittaɱ paggaṇhāti padahati.|| ||

Uppannānaɱ pāpakānaɱ akusalānaɱ dhammānaɱ pahānāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Anuppannānaɱ kusalānaɱ dhammānaɱ uppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ kusalānaɱ dhammānaɱ ṭhitiyā asammosāya bhiyyo bhāvāya vepullāya bhāvanāya pāripūriyā chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Ayaɱ vuccat'āvuso sammā-vāyāmo.|| ||

30. Katamā cāvuso sammā-sati:||
idh'āvuso bhikkhu kāye kāy'ānupassī viharati ātāpī sampajāno satimā vineyya loke abhijjhā domanassaɱ.||
Vedanāsu vedan'ānupassī viharati ātāpī sampajāno satimā vineyya loke abhijjhā domanassaɱ.||
Citte citt'ānupassī viharati ātāpī sampajāno satimā vineyya loke abhijjhā domanassaɱ.||
Dhammesu Dhamm'ānupassī viharati ātāpī sampajāno satimā vineyya loke abhijjhā domanassaɱ.||
Ayaɱ vuccat'āvuso sammā-sati.|| ||

31. Katamo cāvuso, sammā-samādhi:||
idh'āvuso, bhikkhu vivicc'eva kāmehi vivicca akusalehi dhammehi sa-vitakkaɱ sa-vicāraɱ viveka-jaɱ pitisukhaɱ paṭhamaɱ-jhānaɱ upasampajja viharati.||
Vitakka-vicāranaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhi-jaɱ pitisukhaɱ dutiyaɱ-jhānaɱ upasampajja viharati.||
Pītiyā ca virāgā upekkhako ca viharati. Sato ca sampajāno sukhaɱ ca kāyena paṭisaɱvesedeti. Yantaɱ ariyā ācikkhanti 'Upekkhako satimā sukha-vihārī' ti tatiyaɱ dhānaɱ upasampajja viharati.||
Sukhassa ca pahānā dukkhassa ca pahānā pubbe va somanassa domanassānaɱ atthaɱgamā adukkha-ɱ-asukhaɱ upekkhā sati pārisuddhiɱ catutthaɱ dhānaɱ upasampajja viharati.|| ||

Ayaɱ vuccat'āvuso sammā-samādhi.|| ||

Idaɱ vuccat'āvuso dukkha-nirodha-gāminī paṭipadā ariya-saccaɱ.|| ||

32. Tathāgatenāvuso, arahatā Sammā-SamBuddhena Bārāṇasiyaɱ Isipatane Migadāye anuttaraɱ Dhamma-cakkaɱ pavattitaɱ appavattiyaɱ samaṇena vā brāhmaṇena vā devena vā mārena vā brahmunā vā kenaci vā lokasmiɱ, yad idaɱ imesaɱ catunnaɱ ariya-saccānaɱ ācikkhanā desanā paññapanā paṭṭhapanā vivaraṇā vibhajanā uttānīkammanti.|| ||

Idamavoc'āyasmā Sāriputto, attamanā te bhikkhu āyasmato Sāriputtassa bhāsitaɱ abhinandunti.


 

Contact:
E-mail
Copyright Statement