Majjhima Nikaya


[Home]  [Sutta Indexes]  [Glossology]  [Site Sub-Sections]


 

Majjhima Nikāya
III. Upari Paṇṇāsa
5. Saḷāyatana Vagga

Sutta 149

Mahā Saḷāyatanika Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][chlm][pts][than][ntbb][upal] Evaɱ me sutaɱ:

Evaɱ me sutaɱ: ekaɱ samayaɱ Bhagavā Sāvatthīyaɱ viharati Jetavane Anāthapiṇḍikassa ārāme. Tatra kho Bhagavā bhikkhū āmantesi bhikkhavo' ti. 'Bhadante'ti te bhikkhū Bhagavato paccassosuɱ. Bhagavā etad avoca:|| ||

2. Mahāsa'āyatanikaɱ vo bhikkhave, desissāmi. Taɱ suṇātha sādhukaɱ manasi karotha bhāsissāmīti. Evaɱ bhante' ti kho te bhikkhū Bhagavato paccassosuɱ. Bhagavā etad avoca:|| ||

3. Cakkhuɱ bhikkhave, ajānaɱ apassaɱ yathā-bhūtaɱ, rūpe ajānaɱ apassaɱ yathā-bhūtaɱ, cakkhu-viññāṇaɱ ajānaɱ apassaɱ yathā-bhūtaɱ, cakkhu-samphassaɱ ajānaɱ apassaɱ yathā-bhūtaɱ, yampidaɱ cakkhu-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā, tampi ajānaɱ apassaɱ yathā-bhūtaɱ, cakkhusmiɱ sāra-j-jati, rūpesu sāra-j-jati, cakkhu-viññāṇe sāra-j-jati, cakkhu-samphasse sāra-j-jati, yampidaɱ cakkhu-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā, tasmimpi sāra-j-jati.|| ||

Tassa sārattassa saɱyuttassa sammūḷhassa assādānupassino viharato āyatiɱ pañc'upādāna-k-khandhā upacayaɱ gacchanti. Taṇhā c'assa pono-bhavikā nandirāgasahagatā tatra tatrābhinandinī, sā c'assa pavaḍḍhati. Tassa kāyikāpi darathā pavaḍḍhanti, cetasikāpi darathā pavaḍḍhanti, kayikāpi santāpā pavaḍḍhanti, cetasikāpi santāpā pavaḍḍhanti, kāyikāpi pariḷāhā pavaḍḍhanti, cetasikāpi pariḷāhā pavaḍḍhanti, so kāyadukkhampi cetodukkhampi paṭisaŋvedeti.|| ||

4. Sotaɱ bhikkhave, ajānaɱ apassaɱ yathā-bhūtaɱ, sadde ajānaɱ apassaɱ yathā-bhūtaɱ, sota-viññāṇaɱ ajānaɱ apassaɱ yathā-bhūtaɱ, sota-samphassaɱ ajānaɱ apassaɱ yathā-bhūtaɱ, yampidaɱ sota-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā, tampi ajānaɱ apassaɱ yathā-bhūtaɱ, sotasmiɱ sāra-j-jati, saddesu sāra-j-jati, sota-viññāṇe sāra-j-jati, sota-samphasse sāra-j-jati, yampidaɱ sota-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā, tasmimpi sāra-j-jati.|| ||

5. Ghānaɱ bhikkhave, ajānaɱ apassaɱ yathā-bhūtaɱ, gandhe ajānaɱ apassaɱ yathā-bhūtaɱ, ghāna-viññāṇaɱ ajānaɱ apassaɱ yathā-bhūtaɱ, ghānasamphassaɱ ajānaɱ apassaɱ yathā-bhūtaɱ, yampidaɱ gandha-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā, tampi ajānaɱ apassaɱ yathā-bhūtaɱ, ghānasmiɱ sāra-j-jati, gandhesu sāra-j-jati, ghāna-viññāṇe sāra-j-jati, ghānasamphasse sāra-j-jati, yampidaɱ ghānasamphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā, tasmimpi sāra-j-jati.|| ||

6. Jivhaɱ bhikkhave, ajānaɱ apassaɱ yathā-bhūtaɱ, rasā ajānaɱ apassaɱ yathā-bhūtaɱ, jivhā-viññāṇaɱ ajānaɱ apassaɱ yathā-bhūtaɱ, jivhā-samphassaɱ ajānaɱ apassaɱ yathā-bhūtaɱ, yampidaɱ jivhā-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā, tampi ajānaɱ apassaɱ yathā-bhūtaɱ, jivhasmiɱ sāra-j-jati, rasesu sāra-j-jati, jivhā-viññāṇe sāra-j-jati, jivhā-samphasse sāra-j-jati, yampidaɱ jivhā-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā, tasmimpi sāra-j-jati.|| ||

7. Kāyaɱ bhikkhave, ajānaɱ apassaɱ yathā-bhūtaɱ, phoṭṭhabbe ajānaɱ apassaɱ yathā-bhūtaɱ, kāya-viññāṇaɱ ajānaɱ apassaɱ yathā-bhūtaɱ, kāya-samphassaɱ ajānaɱ apassaɱ yathā-bhūtaɱ, yampidaɱ kāya-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā, tampi ajānaɱ apassaɱ yathā-bhūtaɱ, kāyasmiɱ sāra-j-jati, phoṭṭhabbesu sāra-j-jati, kāya-viññāṇe sāra-j-jati, kāya-samphasse sāra-j-jati, yampidaɱ kāya-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā, tasmimpi sāra-j-jati.|| ||

8. Manaɱ bhikkhave, ajānaɱ apassaɱ yathā-bhūtaɱ, dhamme ajānaɱ apassaɱ yathā-bhūtaɱ, mano-viññāṇaɱ ajānaɱ apassaɱ yathā-bhūtaɱ, mano-samphassaɱ ajānaɱ apassaɱ yathā-bhūtaɱ, yampidaɱ mano-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā, tampi ajānaɱ apassaɱ yathā-bhūtaɱ, manasmiɱ sāra-j-jati, dhammesu sāra-j-jati, mano-viññāṇe sāra-j-jati, mano-samphasse sāra-j-jati, yampidaɱ mano-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā, tasmimpi sāra-j-jati. Tassa sārattassa saɱyuttassa sammūḷhassa assādānupassino viharato āyatiɱ pañc'upādāna-k-khandhā upacayaɱ gacchanti. Taṇhā c'assa pono-bhavikā nandirāgasahagatā tatratatrābhinandinī, sā c'assa pavaḍḍhati. Tassa kāyikāpi darathā pavaḍḍhanti, cetasikāpi darathā pavaḍḍhanti, kāyikāpi santāpā pavaḍhanti, cetasikāpi santāpā pavaḍḍhanti, kāyikāpi pariḷāhā pavaḍḍhanti, cetasikāpi pariḷāhā pavaḍḍhanti, so kāyadukkhampi cetodukkhampi paṭisaŋvedeti.|| ||

9. Cakkhuñca kho bhikkhave, jānaɱ passaɱ yathā-bhūtaɱ, rūpe jānaɱ passaɱ yathā-bhūtaɱ, cakkhu-viññāṇaɱ jānaɱ passaɱ yathā-bhūtaɱ, cakkhu-samphassaɱ jānaɱ passaɱ yathā-bhūtaɱ, yampidaɱ cakkhu-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā, tampi jānaɱ passaɱ yathā-bhūtaɱ, cakkhusmiɱ na sāra-j-jati, rūpesu na sāra-j-jati, cakkhu-viññāṇe na sāra-j-jati, cakkhu-samphasse na sāra-j-jati, yampidaɱ cakkhu-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā, tasmimpi na sāra-j-jati.|| ||

Tassa asārattassa asaɱyuttassa asa-m-mūḷhassa ādīnavānupassino viharato āyatiɱ pañc'upādāna-k-khandhā apacayaɱ gacchanti. Taṇhā c'assa pono-bhavikā nandirāgasahagatā tatratatrābhinandinī, sā c'assa pahīyati. Tassa kāyikāpi darathā pahīyanti, cetasikāpi darathā pahīyanti, kāyikāpi santāpā pahīyanti, cetasikāpi santāpā pahīyanti, kāyikāpi pariḷāhā pahīyanti, cetasikāpi pariḷāhā pahīyanti, so kāyasukhampi cetosukhampi paṭisaŋvedeti.|| ||

10. Yā yathā-bhūtassa diṭṭhi, sā'ssa hoti sammā-diṭṭhi. Yo tathābhūtassa saŋkappo, svāssa hoti sammā-saŋkappo. Yo tathābhūtassa vāyāmo, svāssa hoti sammā-vāyāmo. Yā tathābhūtassa sati, sā'ssa hoti sammā-sati. Yo tathābhūtassa samādhi, svāssa hoti sammā-samādhi. Pubbeva kho panassa kāya-kammaɱ vacī-kammaɱ ājīvo suparisuddho hoti. Evamassāyaɱ Ariyo Aṭṭhaŋgiko Maggo bhāvanāparipūriɱ gacchati. Tassa evaɱ imaɱ ariyaɱ aṭṭhaŋgikaɱ Maggaɱ bhāvayato cattāropi sati-paṭṭhānā bhāvanā-pāripūriɱ gacchanti. Cattāropi samma-p-padhānā bhāvanā-pāripūriɱ gacchanti. Cattāropi iddhi-pādā bhāvanā-pāripūriɱ gacchanti. Pañca pi indriyāni bhāvanā-pāripūriɱ gacchanti pañca pi balāni bhāvanā-pāripūriɱ gacchanti. Sattapi bojjhaŋgā bhāvanā-pāripūriɱ gacchanti. Tass'ime dve dhammā yuganaddhā vattanti samatho ca vipassanā ca. So ye dhammā abhiññā pariññeyyā, te dhamme abhiññā parijānāti. Ye'dhammā abhiññā pahātabbā, te dhamme abhiññā pajahatī. Ye'dhammā abhiññā bhāvetabbā, te dhamme abhiññā bhāveti. Ye'dhammā abhiññā sacchi-kātabbā, te dhamme abhiññā sacchi-karoti.|| ||

11. Katame ca bhikkhave, dhammā abhiññā pariññeyyā: pañc'upādāna-k-khandhātissa vacanīyaɱ. Seyyath'īdaɱ: rūp'ūpādāna-k-khandho vedan'ūpādāna-k-khandho saññ'ūpādāna-k-khandho sankhār'ūpādāna-k-khandho viññāṇ'ūpādāna-k-khandho. Ime dhammā abhiññā pariññeyyā. Katame ca bhikkhave, dhammā abhiññā pahātabbā: avijjā ca bhava-taṇhā ca. Ime dhammā abhiññā pahātabbā. Katame ca bhikkhave, dhammā abhiññā bhāvetabbā: samatho ca vipassanā ca. Ime dhammā abhiññā bhāvetabbā. Katame ca bhikkhave, dhammā abhiññā sacchi-kātabbā: vijjā ca vimutti ca. Ime dhammā abhiññā sacchi-kātabbā.|| ||

12. Sotaɱ bhikkhave, jānaɱ passaɱ yathā-bhūtaɱ, sadde jānaɱ passaɱ yathā-bhūtaɱ, sota-viññāṇaɱ jānaɱ passaɱ yathā-bhūtaɱ, sota-samphassaɱ jānaɱ passaɱ yathā-bhūtaɱ, yampidaɱ sota-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā, tampi jānaɱ passaɱ yathā-bhūtaɱ, sotasmiɱ na sāra-j-jati. Saddesu na sājjati. Sota-viññāṇe na sāra-j-jati. Sotasamphasse na sāra-j-jati. Yam p'idaɱ mano-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā. Tasmimpi na sāra-j-jati.|| ||

13. Ghānaɱ bhikkhave, jānaɱ passaɱ yathā-bhūtaɱ, gandhe jānaɱ passaɱ yathā-bhūtaɱ, ghāna-viññāṇaɱ jānaɱ passaɱ yathā-bhūtaɱ, ghānasamphassaɱ jānaɱ passaɱ yathā-bhūtaɱ, yampidaɱ ghānasamphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā, tampi jānaɱ passaɱ yathā-bhūtaɱ, ghānasmiɱ na sāra-j-jati. Gandhesu na sājjati. Ghāna-viññāṇena sāra-j-jati. Ghānasamphasse na sāra-j-jati. Yam p'idaɱ ghānasamphassa-paccayā uppajjati vedayitaɱ sukhaɱ vā dukkhaɱ vā a dukkhamasukhaɱ vā. Tasmimpi na sāra-j-jati.|| ||

14. Jivhaɱ bhikkhave, jānaɱ passaɱ yathā-bhūtaɱ, rasā jānaɱ passaɱ yathā-bhūtaɱ, jivhā-viññāṇaɱ jānaɱ passaɱ yathā-bhūtaɱ, jivhā-samphassaɱ jānaɱ passaɱ yathā-bhūtaɱ, yampidaɱ jivhā-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā, tampi jānaɱ passaɱ yathā-bhūtaɱ, jivhasmiɱ na sāra-j-jati. Rasesu na sāra-j-jati. Jivhā-viññāṇe na sāra-j-jati. Jivhāsamphasse na sāra-j-jati. Yam p'idaɱ jivhā-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā. Tasmimpi na sāra-j-jati.|| ||

15. Kāyaɱ bhikkhave, jānaɱ passaɱ yathā-bhūtaɱ, poṭṭhabbe jānaɱ passaɱ yathā-bhūtaɱ, kāya-viññāṇaɱ jānaɱ passaɱ yathā-bhūtaɱ, kāya-samphassaɱ jānaɱ passaɱ yathā-bhūtaɱ, yampidaɱ kāya-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā, tampi jānaɱ passaɱ yathā-bhūtaɱ, kāyasmiɱ na sāra-j-jati. Poṭṭhabbesu na sājjati. Kāya-viññāṇe na sāra-j-jati. Kāyasamphasse na sāra-j-jati. Yam p'idaɱ kayesamphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā. Tasmimpi na sāra-j-jati.|| ||

16. Manaɱ bhikkhave, jānaɱ passaɱ yathā-bhūtaɱ, dhamme jānaɱ passaɱ yathā-bhūtaɱ, mano-viññāṇaɱ jānaɱ passaɱ yathā-bhūtaɱ, mano-samphassaɱ jānaɱ passaɱ yathā-bhūtaɱ, yampidaɱ mano-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā, tampi jānaɱ passaɱ yathā-bhūtaɱ, manasmiɱ na sāra-j-jati. Dhammesu na sājjati. Manoviññāṇe na sāra-j-jati. Manosamphasse na sāra-j-jati. Yam p'idaɱ mano-samphassa-paccayā uppajjati vedayitaɱ sukhaɱ vā dukkhaɱ vā adukkha-m-asukhaɱ vā. Tasmimpi na sāra-j-jati.|| ||

Tassa asāratassa asaɱyuttassa asa-m-mūḷhassa ādīnavānupassino viharato āyatiɱ pañc'upādāna-k-khandhā apacayaɱ gacchanti. Taṇhā c'assa pono-bhavikā nandirāgasahagatā tatra tatrābhinandīnī, sā c'assa pahīyati. Tassa kāyikāpi darathā pahīyanti kāyikāpi santāpā pahīyanti. Cetasikāpi santāpā pahīyanti. Kāyikāpi pariḷāhā pahīyanti. Cetasikāpi pariḷāhā pahīyanti. So kāyasukhampi cetosukhampi paṭisaŋvedeti.|| ||

17. Yā tathābhūtassa diṭṭhi, sā'ssa hoti sammā-diṭṭhi. Yo tathābhūtassa saŋkappo, svāssa hoti sammā-saŋkappo. Yo tathābhūtassa vāyāmo, svāssa hoti sammā-vāyāmo. Yā tathābhūtassa sati, sā'ssa hoti sammā-sati. Yo tathābhūtassa samādhi. Svāssa hoti sammā-samādhi. Pubbeva kho panassa kāya-kammaɱ vacikammaɱ ājīvo suparisuddho hoti. Evamassāyaɱ Ariyo Aṭṭhaŋgiko Maggo bhāvanāpāripūriɱ gacchati.|| ||

Tassa evaɱ imaɱ ariyaɱ aṭṭhaŋgikaɱ Maggaɱ bhāvayato cattāropi sati-paṭṭhānā bhāvanāpāripūriɱ gacchanti. Cattāropi samma-p-padhānā bhāvanāpāripūriɱ gacchanti. Cattāropi iddhi-pādā bhāvanāpāripūriɱ gacchanti. Pañca pi indriyāni bhāvanāpāripūriɱ gacchanti. Pañca pi balāni bhāvanāpāripūriɱ gacchanti. Sattapi bojjhaŋgā bhāvanā-pāripūriɱ gacchanti. Tass'ime dve dhammā yuganaddhā vattanti samatho ca vipassanā ca. So ye dhammā abhiññā pariññeyyā, te dhamme abhiññā parijānāti. Ye'dhammā abhiññā pahātabbā. Te dhammā abhiññā pajahati. Ye'dhammā abhiññā bhāvetabbā, te dhamme abhiññā bhāveti. Ye'dhammā abhiññā sacchi-kātabbā, te dhamme abhiññā sacchi-karoti.|| ||

18. Katame ca bhikkhave, dhammā abhiññā pariññeyyā: pañc'upādāna-k-khandho'tissa vacanīyaɱ seyyath'īdaɱ: rūp'ūpādāna-k-khandho vedan'ūpādāna-k-khandho saññ'ūpādāna-k-khandho sankhār'ūpādāna-k-khandho viññāṇ'ūpādāna-k-khandho. Ime dhammā abhiññā pariññeyyā.|| ||

Katame ca bhikkhave, dhammā abhiññā pahātabbā: avijjā ca bhava-taṇhā ca. Ime dhammā abhiññā pahātabbā. Katame ca bhikkhave, dhammā abhiññā bhāvetabbā: samatho ca vipassanā ca. Ime dhammā abhiññā bhāvetabbā. Katame ca bhikkhave, dhammā abhiññā sacchi-kātabbā: vijjā ca vimutti ca. Ime dhammā abhiññā sacchi-kātabbāti. Idamo ca Bhagavā. Attamanā te bhikkhū Bhagavato bhāsitaɱ abhinandunti.|| ||

Mahāsa'āyatanikasuttaɱ sattamaɱ


 

Contact:
E-mail
Copyright Statement