Saṃyutta Nikāya
II. Nidāna Vagga
12. Nidāna Saṃyutta
3. Dasa-Balā Vagga
Sutta 24
Añña-Titthiya Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh] Evaṃ me sutaṃ:|| ||
Ekaṃ samayaṃ Rājagahe Veḷuvane.|| ||
2. Atha kho āyasmā Sāriputto pubbaṇha-samayaṃ nivāsetvā patta-cīvaram ādāya Rājagahaṃ piṇḍāya pāvisi.|| ||
3. Atha kho āyasmato Sāriputtassa etad ahosi:|| ||
"Atippago kho tāva Rājagahe piṇḍāya carituṃ,||
yam nūn-ā-haṃ yena añña-titthiyānaṃ paribbājakānaṃ ārāmo ten'upasaṅkameyyan" ti.|| ||
4. Atha kho āyasmā Sāriputto yena añña-titthiyānaṃ [33] paribbājakānaṃ ārāmo tesupasaṅkami.|| ||
Upasaṅkamitvā tehi añña-titthiyehi paribbājakehi saddhiṃ sammodi.|| ||
Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdi.|| ||
Eka-m-antaṃ nisinnaṃ kho āyasmantaṃ Sāriputtaṃ te añña-titthiyā paribbājakā etad avocuṃ:|| ||
5. "Santāvuso Sāriputta,||
eke samaṇa-brāhmaṇā kamma-vādā sayaṃ-kataṃ dukkhaṃ paññāpenti.|| ||
Santi pan'āvuso Sāriputta,||
eke samaṇa-brāhmaṇā kamma-vādā paraṃ-kataṃ dukkhaṃ paññāpenti.|| ||
Santāvuso Sāriputta,||
eke samaṇa-brāhmaṇā kamma-vādā sayaṃ-katañ ca paraṃ-katañ ca dukkhaṃ paññāpenti.|| ||
Santi pan'āvuso Sāriputta,||
eke samaṇa-brāhmaṇā kamma-vādā asayaṃ-kāraṃ aparaṃ-kāraṃ adhicca-samuppannaṃ dukkhaṃ paññāpenti.|| ||
6. Idha pan'āvuso Sāriputta,||
Samaṇo Gotamo kiṃ vādī,||
kim akkhāyī?|| ||
Kathaṃ vyākaramānā ca mayaṃ vutta-vādino c'eva Samaṇassa Gotamassa assāma||
na ca Samaṇaṃ Gotamaṃ abhūtena abbh'ācikkheyyāma?|| ||
Dhammassa c'ānudhammaṃ vyākareyyāma||
na ca koci saha-dhammiko vād-ā-nupāto gārayhaṃ ṭhānaṃ āgaccheyyā" ti?|| ||
■
7. "Paṭicca-samuppannaṃ kho āvuso dukkhaṃ vuttaṃ Bhagavatā.
Kim paṭicca?|| ||
Phassaṅ paṭicca.|| ||
Iti vadaṃ vuttavādī c'eva Bhagavato assa||
na ca Bhagavantaṃ abhūtena abbh'ācikkheyya||
dhammassa c'ānudhammaṃ vyākareyya||
na ca koci saha-dhammiko vād-ā-nupāto gārayhaṃ ṭhānaṃ āgaccheyya.|| ||
8. Tatra āvuso ye te samaṇa-brāhmaṇā kamma-vādā sayaṃ-kataṃ dukkhaṃ paññāpenti,||
tad api phassa-pacacayā.|| ||
Ye pi te samaṇa-brāhmaṇā kamma-vādā paraṃ-kataṃ dukkhaṃ paññāpenti||
tad api phassa-paccayā.|| ||
Ye pi te samaṇa-brāhmaṇā kamma-vādā sayaṃ-katañ ca paraṃ-katañ ca dukkhaṃ paññāpenti,||
tad api phassa-paccayā.|| ||
Ye pi [34] te samaṇa-brāhmaṇā kamma-vādā asayaṃ-kāraṃ aparaṃ-kāraṃ adhicca-samuppannaṃ dukkhaṃ paññāpenti,||
tad api phassa-paccayā.|| ||
9. Tatra āvuso ye te samaṇa-brāhmaṇā kamma-vādā sayaṃ-kataṃ dukkhaṃ paññāpenti,||
te vata aññatra phassā paṭisaṃvedissantī' ti||
n'etaṃ ṭhānaṃ vijjati.|| ||
Ye pi te samaṇa-brāhmaṇā kamma-vādā paraṃ-kataṃ dukkhaṃ paññāpenti,||
te vata aññatra phassā paṭisaṃvedissantī' ti||
n'etaṃ ṭhānaṃ vijjati.|| ||
Ye pi te samaṇa-brāhmaṇā kamma-vādā sayaṃ-katañ ca paraṃ-katañ ca dukkhaṃ paññāpenti,||
te vata aññatra phassā paṭisaṃvedissantī' ti||
n'etaṃ ṭhānaṃ vijjati.|| ||
Ye pi te samaṇa-brāhmaṇā kamma-vādā asayaṃ-kāraṃ aparaṃ-kāraṃ adhicca-samuppannaṃ dukkhaṃ paññāpenti,||
te vata aññatra phassā paṭisaṃvedissantī' ti||
n'etaṃ ṭhānaṃ vijjatī" ti.|| ||
§
10. Assosi kho āyasmā Ānando āyasmato Sāriputtassa tehi añña-titthiyehi paribbājakehi saddhiṃ kathā-sallāpaṃ.|| ||
11. Atha kho āyasmā Ānando Rājagahe piṇḍāya caritvā pacchā-bhattaṃ piṇḍa-pāta-paṭikkanto yena Bhagavā ten'upasaṅkami.|| ||
Upasaṅkamitvā Bhagavantaṃ abhivādetvā eka-m-antaṃ nisīdi.|| ||
Eka-m-antaṃ nisinno kho āyasmā Ānando yāvatako āyasmato Sāriputtassa tehi añña-titthiyehi paribbājakehi saddhiṃ ahosi kathā-sallāpo,||
taṃ sabbaṃ Bhagavato ārocesi."|| ||
12. "Sādhu sādhu Ānanda,||
yathā taṃ Sāriputto ca sammā vyākaramāno vyākareyya,||
paṭicca-samuppannaṃ kho Ānanda dukkhaṃ vuttaṃ mayā.|| ||
Kiṃ paṭicca?|| ||
Phassaṅ paṭicca.|| ||
Iti vadaṃ vuttavādī c'eva me assa||
na ca maṃ abhūtena abbh'ācikkheyya,||
dhammassa c'ānudhammaṃ vyākareyya,||
na ca ko ci saha-dhammiko vād-ā-nupāto gārayhaṃ ṭhānaṃ āgaccheyya.|| ||
13. Tatr'Ānanda, ye te samaṇa-brāhmaṇā kamma-vādā sayaṃ-kataṃ dukkhaṃ paññāpenti,||
tad api phassa-paccayā.|| ||
[35] Ye pi te samaṇa-brāhmaṇā kamma-vādā paraṃ-kataṃ dukkhaṃ paññāpenti,||
tad api phassa-paccayā.|| ||
Ye pi te samaṇa-brāhmaṇā kamma-vādā sayaṃ-katañ ca paraṃ-katañ ca dukkhaṃ paññāpenti,||
tad api phassa-paccayā.|| ||
Ye pi te samaṇa-brāhmaṇā kamma-vādā asayaṃ-kāraṃ aparaṃ-kāraṃ adhicca-samuppannaṃ dukkhaṃ paññāpenti,||
tad api phassa-paccayā.|| ||
14. Tatr'Ānanda ye pi te samaṇa-brāhmaṇā kamma-vādā sayaṃ-kataṃ dukkhaṃ paññāpenti,||
te vata aññatra phassā paṭisaṃvedissantī' ti||
n'etaṃ ṭhānaṃ vijjati.|| ||
Ye pi te samaṇa-brāhmaṇā kamma-vādā paraṃ-kataṃ dukkhaṃ paññāpenti, te vata aññatra phassā paṭisaṃvedissantī' ti||
n'etaṃ ṭhānaṃ vijjati.|| ||
Ye pi te samaṇa-brāhmaṇā kamma-vādā sayaṃ-katañ ca paraṃ-katañ ca dukkhaṃ paññāpenti, te vata aññatra phassā paṭisaṃvedissantī' ti||
n'etaṃ ṭhānaṃ vijjati.|| ||
Ye pi te samaṇa-brāhmaṇā kamma-vādā asayaṃ-kāraṃ aparaṃ-kāraṃ adhicca-samuppannaṃ dukkhaṃ paññāpenti, te vata aññatra phassā paṭisaṃvedissantī' ti||
n'etaṃ ṭhānaṃ vijjati.|| ||
§
15. Ekam idhāhaṃ Ānanda samayaṃ idh'eva Rājagahe viharāmi Veḷuvane Kalandakanivāpe.|| ||
16. Atha khv'āhaṃ Ānanda, pubbaṇha-samayaṃ nivāsetvā patta-cīvaram ādāya Rājagahaṃ piṇḍāya pāvisiṃ.|| ||
17. Tassa mayhaṃ Ānanda etad ahosi:|| ||
'Atippago kho tāva Rājagahe piṇḍāya carituṃ yam nūn-ā-haṃ yena añña-titthiyānaṃ paribbājakānaṃ ārāmo ten'upasaṅkameyyan' ti.|| ||
18. Atha khv'āhaṃ Ānanda, yena añña-titthiyānaṃ paribbājakānaṃ ārāmo ten'upasaṅkamiṃ.|| ||
Upasaṅkamitvā tehi añña-titthiyehi paribbājakehi saddhiṃ sammodiṃ.|| ||
Sammodanīyaṃ kathaṃ sārāṇīyaṃ vīti-sāretvā eka-m-antaṃ nisīdiṃ.|| ||
Eka-m-antaṃ nisinnaṃ kho maṃ Ānanda,||
te añña-titthiyā paribbājakā etad avocuṃ:|| ||
19. 'Santāvuso Gotama, eke samaṇa-brāhmaṇā kamma-vādā sayaṃ-kataṃ dukkhaṃ paññāpenti.|| ||
Santi pan'āvuso Gotama, eke samaṇa-brāhmaṇā kamma-vādā,||
paraṃ-kataṃ dukkhaṃ paññāpenti|| ||
Santāvuso Gotama, eke samaṇa-brāhmaṇā kamma-vādā sayaṃ-katañ ca paraṃ-katañ ca dukkhaṃ paññāpenti.|| ||
Santi pan'āvuso Gotama, eke samaṇa-brāhmaṇā kamma-vādā asayaṃ-kāraṃ aparaṃ-kāraṃ adhicca-samuppannaṃ dukkhaṃ paññāpenti.|| ||
20. Idha no āyasmā Gotamo kiṃ vādī?|| ||
Kim akkhāyī?|| ||
Kathaṃ vyākaramānā ca mayaṃ vutta-vādino c'eva āyasmato Gotamassa assāma||
na ca āyasmantaṃ Gotamaṃ abhūtena [36] abbh'ācikkheyyāma,||
Dhammassa c'ānudhammaṃ vyākareyyāma,||
na ca koci saha-dhammiko vād-ā-nupāto gārayhaṃ ṭhānaṃ āgaccheyyā' ti?|| ||
21. Evaṃ vuttāhaṃ Ānanda,||
te añña-titthiye paribbājake etad avocaṃ:|| ||
'Paṭicca-samuppannaṃ kho āvuso dukkhaṃ vuttaṃ mayā.|| ||
Kiṃ paṭicca?|| ||
Phassaṅ paṭicca.|| ||
Iti vadaṃ vuttavādī c'eva me assa,||
na ca maṃ abhūtena abbh'ācikkheyya,||
Dhammassa c'ānudhammaṃ vyākareyya,||
na ca koci saha-dhammiko vād-ā-nupāto gārayhaṃ ṭhānaṃ āgaccheyya.|| ||
22. Tatrā'vuso ye te samaṇa-brāhmaṇā kamma-vādā sayaṃ-kataṃ dukkhaṃ paññāpenti,||
tad api phassa-paccayā.|| ||
Ye pi te samaṇa-brāhmaṇā kamma-vādā paraṃ-kataṃ dukkhaṃ paññāpenti,||
tad api phassa-paccayā.|| ||
Ye pi te samaṇa-brāhmaṇā kamma-vādā sayaṃ-katañ ca paraṃ-katañ ca dukkhaṃ paññāpenti,||
tad api phassa-paccayā.|| ||
Ye pi te samaṇa-brāhmaṇā kamma-vādā asayaṃ-kāraṃ aparaṃ-kāraṃ adhicca-samuppannaṃ dukkhaṃ paññāpenti,||
tad api phassa-paccayā.|| ||
23. Tatrā'vuso ye te samaṇa-brāhmaṇā kamma-vādā sayaṃ-kataṃ dukkhaṃ paññāpenti,||
te vata aññatra phassā paṭisaṃvedissantī' ti||
n'etaṃ ṭhānaṃ vijjati.|| ||
Ye pi te samaṇa-brāhmaṇā kamma-vādā paraṃ-kataṃ dukkhaṃ paññāpenti, te vata aññatra phassā paṭisaṃvedissantī' ti||
n'etaṃ ṭhānaṃ vijjati.|| ||
Ye pi te samaṇa-brāhmaṇā kamma-vādā sayaṃ-katañ ca paraṃ-katañ ca dukkhaṃ paññāpenti,||
te vata aññatra phassā paṭisaṃvedissantī' ti||
n'etaṃ ṭhānaṃ vijjati.|| ||
Ye pi te samaṇa-brāhmaṇā kamma-vādā asayaṃ-kāraṃ aparaṃ-kāraṃ adhicca-samuppannaṃ dukkhaṃ paññāpenti,||
te vata aññatra phassā paṭisaṃvedissantī' ti||
n'etaṃ ṭhānaṃ vijjatī'" ti.|| ||
24. "Acchariyaṃ bhante,||
abbhutaṃ bhante,||
yatra hi nāma etena padena sabbo attho vutto bhavissati.|| ||
Siyā nu kho bhante esevattho vitthārena vuccamāno gambhīro c'eva assa,||
gambhīrāvabhāso cā" ti.|| ||
25. "Tena h'Ānanda, taññevettha paṭibhātū" ti.|| ||
§
26. "Sace maṃ bhante evaṃ puccheyyuṃ:|| ||
'Jarā-māraṇaṃ āvuso Ānanda,||
kiṃ nidānaṃ||
kiṃ samudayaṃ||
kiṃ jātikaṃ||
kim pabhavan' ti?|| ||
Evaṃ puṭṭhohaṃ bhante evaṃ vyākareyyaṃ:|| ||
'Jarā-māraṇaṃ kho āvuso jāti-nidānaṃ,||
jāti-samudayaṃ,||
jāti-jātikaṃ,||
jāti-ppabhavan' ti|| ||
Evaṃ puṭṭhoāhaṃ bhante evaṃ vyākareyyaṃ.|| ||
■
Sace maṃ bhante evaṃ puccheyyuṃ:|| ||
'Jāti pan'āvuso Ānanda,||
kiṃ nidānā||
kiṃ samudayā||
kiṃ jātikā||
kim pabhavā' ti?|| ||
Evaṃ puṭṭhohaṃ bhante evaṃ vyākareyyaṃ:|| ||
'Jāti kho āvuso bhava-nidānā,||
bhava-samudayā,||
bhava-jātikā,||
bhava-ppabhavā' ti.|| ||
Evaṃ puṭṭhoāhaṃ bhante evaṃ vyākareyyaṃ.|| ||
■
Sace maṃ bhante evaṃ puccheyyuṃ:|| ||
'Bhavo pan'āvuso Ānanda,||
kiṃ nidāno,||
kiṃ samudayo,||
kiṃ jātiko,||
kim pabhavo' ti?|| ||
Evaṃ puṭṭhohaṃ bhante evaṃ vyākareyyaṃ:|| ||
'Bhavo kho āvuso upādāna-nidāno||
upādāna-samudayo||
upādāna-jātiko||
upādāna-ppabhavo' ti.|| ||
Evaṃ puṭṭhoāhaṃ bhante evaṃ vyākareyyaṃ.|| ||
■
Sace maṃ bhante evaṃ puccheyyuṃ:|| ||
'Upādāna pan'āvuso Ānanda,||
kiṃ nidāno,||
kiṃ samudayo,||
kiṃ jātiko,||
kim pabhavo' ti?|| ||
Evaṃ puṭṭhohaṃ bhante evaṃ vyākareyyaṃ:|| ||
'Upādānaṃ kho āvuso||
taṇhā-nidānaṃ,||
taṇhā-samudayaṃ,||
taṇhā-jātikaṃ,||
taṇhā-ppabhavo' ti.|| ||
Evaṃ puṭṭhoāhaṃ bhante evaṃ vyākareyyaṃ.|| ||
■
Sace maṃ bhante evaṃ puccheyyuṃ:|| ||
'Taṇhā pan'āvuso Ānanda,||
kiṃ nidānā,||
kiṃ samudayā,||
kiṃ jātikā||
kim pabhavā' ti?|| ||
Evaṃ puṭṭhohaṃ bhante evaṃ vyākareyyaṃ:|| ||
'Taṇhā kho āvuso vedanā-nidānā,||
vedanā-samudayā,||
vedanā-jātikā,||
vedanā-ppabhavā' ti.|| ||
Evaṃ puṭṭhoāhaṃ bhante evaṃ vyākareyyaṃ.|| ||
■
Sace maṃ bhante evaṃ puccheyyuṃ:|| ||
'Vedanā pan'āvuso Ānanda,||
kiṃ nidānā,||
kiṃ samudayā,||
kiṃ jātikā||
kim pabhavā' ti?|| ||
Evaṃ puṭṭhoāhaṃ bhante evaṃ vyākareyyaṃ.|| ||
'Vedanā kho āvuso||
phassa-nidānā,||
phassa-samudayā,||
phassa-jātikā,||
phassa-ppabhavo' ti.|| ||
Evaṃ puṭṭhoāhaṃ bhante evaṃ vyākareyyaṃ.|| ||
■
Sace maṃ bhante evaṃ puccheyyuṃ:|| ||
'Phasso pan'āvuso Ānanda,||
kiṃ nidāno,||
kiṃ samudayo,||
kiṃ jātiko,||
kim pabhavo' ti?|| ||
Evaṃ puṭṭhoāhaṃ bhante evaṃ vyākareyyaṃ:|| ||
'Phasso kho āvuso||
saḷāyatana-nidāno,||
saḷāyatana-samudayo,||
saḷāyatana-jātiko,||
saḷāyatana-pabhavo.|| ||
Channaṃ tv'eva āvuso,||
phass'āyatanānaṃ asesa-virāga-nirodhā||
phassa-nirodho.|| ||
Phassa-nirodhā vedanā-nirodho.|| ||
Vedanā-nirodhā taṇhā-nirodho.|| ||
Taṇhā-nirodhā upādāna-nirodho.|| ||
Upādāna-nirodhā bhava-nirodho.|| ||
Bhava-nirodhā jāti-nirodho.|| ||
Jāti-nirodhā jarā-māraṇaṃ||
soka-parideva-dukkha-domanass-upāyāsā nirujjhanti.|| ||
Evam etassa kevalassa dukkha-k-khandhassa nirodho hotī' ti.|| ||
Evaṃ puṭṭhoāhaṃ bhante evaṃ vyākareyyan" ti.|| ||
