Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
II. Nidāna Vagga
15. Anamat'agga-Saɱyuttaɱ
I. Paṭhama Vagga

Sutta 8

Gaŋgā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[183]

[1][pts][than] Evam me sutaɱ.|| ||

Ekaɱ samayaɱ Bhagavā Rājagahe viharati Veḷuvane Kalandakanivāpe.|| ||

Atha kho aññataro brāhmaṇo yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho so brāhmaṇo Bhagavantaɱ etad avoca.|| ||

"Kīɱ va bahukā nu kho bho Gotama,||
kappā abbhatītā atikkantā" ti?|| ||

"Bahukā kho brāhmaṇa,||
kappā abbhatītā atikkantā.|| ||

Te na sukarā saŋkhātuɱ||
ettakā kappā iti vā,||
ettakāni kappa-satāni iti vā,||
ettakāni kappa-sahassāni iti vā,||
ettakāni kappa-sata-sahassāni iti vā" ti.|| ||

[184] "Sakkā pana bho Gotama, upamaɱ kātun" ti?|| ||

"Sakkā brāhmaṇā" ti Bhagavā avoca.|| ||

"Seyyathā pi brāhmaṇa,||
yato cāyaɱ gaŋgānadī pahoti,||
yattha ca mahā-samuddaɱ appeti,||
yā ca tasmiɱ antare vālikā,||
esā na sukarā saŋkhātuɱ ettakā vālikā iti vā,||
ettanāni vālikāsatāni iti vā,||
ettakāni vālikā sahassāni iti vā,||
ettakāni vālikā sata-sahassāni iti vā.|| ||

Tato bahutaraɱ kho brāhmaṇa,||
kappā abbhatītā atikkantā.|| ||

Te na sukarā saŋkhātuɱ||
ettakā kappā iti vā,||
ettakāni kappa-satāni iti vā,||
ettakāni kappa-sahassāni iti vā,||
ettakāni kappa-sata-sahassāni iti vā.|| ||

Taɱ kissa hte?|| ||

Anamat'aggoyaɱ brāhmaṇa, saŋsāro.|| ||

Pubbā koṭi na paññāyati avijjā-nīvaraṇānaɱ sattānaɱ taṇhā saŋyojanānaɱ sandhāvataɱ saŋsarataɱ.|| ||

Yāvañ c'idaɱ bhikkhave,||
alameva sabba-sankhāresu nibbindituɱ,||
alaɱ virajjituɱ,||
alaɱ vimuccitun" ti.|| ||

Evaɱ vutte so brāhmaṇo Bhagavantaɱ etad avoca:|| ||

"Abhikkantaɱ bho Gotama,||
abhikkantaɱ bho Gotama.|| ||

Seyyathā pi bho Gotama, nikkujjitaɱ vā ukkujjeyya,||
paṭi-c-channaɱ vā vivareyya,||
mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya,||
cakkhu-manto 'rūpāni dakkhintī' ti.

Evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi Dhammañ ca bhikkhu Saŋghañ ca.|| ||

Upāsakaɱ maɱ bhavaɱ Gotamo dhāretu ajja-t-agge pāṇupetaɱ saraṇaɱ gatan" ti.|| ||


Contact:
E-mail
Copyright Statement