Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
II. Nidāna Vagga
19. Lakkhaṇa-Saŋuttaɱ
1. Paṭhama Vagga

Sutta 1

Aṭṭhi-Pesi (Aṭṭhi-Sankhalika) Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[254]

[1][pts]EVAṂ ME SUTAṂ:|| ||

Ekaɱ samayaɱ Bhagavā Rājagahe viharati Veḷuvane Kalandakanivāpe.|| ||

2. Tena kho pana samayen'āyasmā ca Lakkhaṇo||
āyasmā ca Mahā-Moggallāno||
Gijjhakūṭe pabbate viharanti.|| ||

3. Atha kho āyasmā Mahā-Moggallāno pubbaṇha-samayaɱ nivāsetvā patta-cīvaram ādāya||
yen'āyasmā Lakkhaṇo ten'upasankami.|| ||

4. Upasaŋkamitvā āyasmantaɱ Lakkhaṇaɱ etad avoca:|| ||

"Āyām āvuso Lakkhaṇa, Rājagahaɱ piṇḍāya pavisissāmā" ti.|| ||

"Evam āvuso" ti kho āyasmā Lakkhaṇo||
āyasmato Mahā-Moggallānassa paccassosi.|| ||

5. Atha kho āyasmā Mahā-Moggallāno Gijjhakūṭā pabbatā orohanto aññatarasmiɱ padese sitaɱ pātvākāsi.|| ||

6. Atha kho āyasmā Lakkhaṇo āyasmantaɱ Mahā-Moggallānaɱ etad avoca:|| ||

"Ko nu kho āvuso Moggallāna,||
hetu ko paccayo sitassa pātu-kammāyā" ti?|| ||

"Akālo kho āvuso Lakkhaṇa,||
etassa pañhassa,||
Bhagavato maɱ santike etaɱ paṇhaɱ pucchā" ti.|| ||

[255] 7. Atha kho āyasmā ca Lakkhaṇo||
āyasmā ca Mahā-Moggallāno||
Rājagahe piṇḍāya caritvā pacchā-bhattaɱ piṇḍa-pāta-paṭikkantā||
yena Bhagavā ten'upasankamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ nisīdiɱsu.|| ||

8. Eka-m-antaɱ nisinno kho āyasmā Lakkhaṇo||
āyasmantaɱ Mahā Moggallānaɱ etad avoca:|| ||

"Idh'āyasmā Mahā-Moggallāno Gijjhakūṭā pabbatā orohanto aññatarasmiɱ padese sitaɱ pātvākāsi.|| ||

Ko nu kho āvuso Moggallāna,||
hetu ko paccayo||
sitassa pātu-kammāyā" ti?|| ||

9. "Idh'āhaɱ āvuso, Gijjhakūṭā pabbatā orohanto addasaɱ aṭṭhika-saŋkhalikaɱ vehāsaɱ gacchantaɱ.|| ||

Tam enaɱ gijjhā pi||
kākā pi||
kulalā pi||
anupatitvā anupatitvā phāsuḷantarikāhi vitacchenti vibhajenti sāsudam aṭṭassaraɱ karoti.|| ||

10. Tassa mayhaɱ āvuso, etad ahosi:|| ||

'Acchariyaɱ vata bho,||
abbhutaɱ vata bho,||
eva-rūpo pi nāma satto bhavissati,||
eva-rūpo pi nāma yakkho bhavissati,||
eva-rūpo pi nāma atta-bhāva-paṭilābho bhavissatī'" ti.|| ||

11. Atha kho Bhagavā bhikkhū āmantesi:|| ||

"Cakkhu-bhūtā bhikkhave, sāvakā viharanti,||
ñāṇa-bhūtā vata bhikkhave, sāvakā viharanti,||
yatra hi nāma sāvako eva-rūpaɱ ñassati vā||
dakkhati vā||
sakkhiɱ vā karissati.|| ||

12. Pubbe pi me so bhikkhave,||
satto diṭṭho ahosi,||
api c'āhaɱ na vyākāsiɱ.|| ||

Ahañ cetaɱ vyākareyyaɱ,||
pare ca me na saddaheyyuɱ.|| ||

Ye me na saddaheyyuɱ,||
tesaŋ taɱ assa dīgha-rattaɱ ahitāya dukkhāya.|| ||

13. Eso bhikkhave, satto imasmiɱ yeva Rājagahe go-ghātako ahosi||
so tassa kammassa vipākena||
bahūni vassāni||
bahūni vassa-satāni||
bahūni vassa-sahassāni||
bahūni vassa-sata-sahassāni||
Niraye paccitvā tass'eva kammassa vipākā- [256] vasesena eva-rūpaɱ atta-bhāva-paṭilābhaɱ paṭisaŋvedayatī" ti.|| ||


Contact:
E-mail
Copyright Statement