Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saṃyutta Nikāya
3. Khandha Vagga
22. Khandha Saṃyutta
2. Dutiya Anicca Vagga

Sutta 21

Ānanda Suttaṃ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[24]

[1][pts][bodh] Evaṃ me sutaṃ.|| ||

Ekaṃ samayaṃ Bhagavā Sāvatthiyaṃ viharati.|| ||

Atha kho āyasmā Ānando yena Bhagavā ten'upasaṅkami.|| ||

Upasaṃkamitvā Bhagavantaṃ abhivādetvā eka-m-antaṃ nisīdi.|| ||

Eka-m-antaṃ nisinno kho āyasmā Ānando Bhagavantaṃ etad avoca:|| ||

"'Nirodho nirodho' ti bhante vuccati.|| ||

Katame-sānaṃ kho bhante dhammānaṃ nirodhā nirodho ti vuccatī" ti?|| ||

"Rūpaṃ Ānando aniccaṃ,||
saṅkhataṃ,||
paṭicca-samuppannaṃ,||
khaya-dhammaṃ,||
vaya-dhammaṃ,||
virāga-dhammaṃ,||
nirodha-dhammaṃ.|| ||

Tassa nirodhā 'nirodho' ti vuccati.|| ||

Vedanā aniccaṃ,||
saṅkhataṃ,||
paṭicca-samuppannaṃ,||
khaya-dhammaṃ,||
vaya-dhammaṃ,||
virāga-dhammaṃ,||
nirodha-dhammaṃ.|| ||

Tassa nirodhā 'nirodho' ti vuccati.|| ||

Saññā aniccaṃ,||
saṅkhataṃ,||
paṭicca-samuppannaṃ,||
khaya-dhammaṃ,||
vaya-dhammaṃ,||
virāga-dhammaṃ,||
nirodha-dhammaṃ.|| ||

Tassa nirodhā 'nirodho' ti vuccati.|| ||

Saṅkhārā aniccaṃ,||
saṅkhataṃ,||
paṭicca-samuppannaṃ,||
khaya-dhammaṃ,||
vaya-dhammaṃ,||
virāga-dhammaṃ,||
nirodha-dhammaṃ.|| ||

Tassa nirodhā 'nirodho' ti vuccati.|| ||

Viññāṇā aniccaṃ,||
saṅkhataṃ,||
paṭicca-samuppannaṃ,||
khaya-dhammaṃ,||
vaya-dhammaṃ,||
virāga-dhammaṃ,||
nirodha-dhammaṃ.|| ||

Tassa nirodhā 'nirodho' ti vuccati.|| ||

Imesaṃ kho Ānanda dhammānaṃ nirodhā 'nirodho' ti vuccatī" ti.|| ||

 


Contact:
E-mail
Copyright Statement