Saṃyutta Nikāya
3. Khandha Vagga
22. Khandha Saṃyutta
7. Arahatta Vagga

Sutta 64

Maññamāna Suttaṃ

 

---

[74]

[1][pts][bodh] Evaṃ me sutaṃ.|| ||

Ekaṃ samayaṃ Bhagavā Sāvatthiyaṃ viharati.|| ||

Atha kho aññataro bhikkhu yena Bhagavā ten'upasaṇkami.|| ||

Upasaṃkamitvā Bhagavantaṃ abhivādetvā eka-m-antaṃ nisīdi.|| ||

Eka-m-antaṃ nisinno kho so bhikkhu Bhagavantaṃ [75] etad avoca:|| ||

"Sādhu me bhante Bhagavā saṃkhittena dhammaṃ desetu,||
yam ahaṃ Bhagavato dhammaṃ sutvā eko vūpakaṭṭho appamatto ātāpi pahit'atto vihareyyan" ti.|| ||

"Maññamāno kho bhikkhu, baddho Mārassa,||
anmañña-māno mutto pāpimato" ti.|| ||

Aññātaṃ Bhagavā!|| ||

Aññātaṃ sugatā!" ti.|| ||

"Yathā kathaṃ pana tvaṃ bhikkhu,||
mayā saṃkhittena bhāsitassa vitthārena atthaṃ ājānāsī" ti?|| ||

"Rūpaṃ kho bhante, mañña-māno baddho Mārassa,||
anmañña-māno mutto pāpimato.|| ||

Vedanaṃ mañña-māno baddho Mārassa,||
anmañña-māno mutto pāpimato.|| ||

Saññaṃ mañña-māno baddho Mārassa,||
anmañña-māno mutto pāpimato.|| ||

Saṇkhāra mañña-māno baddho Mārassa,||
anmañña-māno mutto pāpimato.|| ||

Viññāṇaṃ mañña-māno baddho Mārassa,||
anmañña-māno mutto pāpimato.|| ||

Imssa khv'āhaṃ bhante, Bhagavatā||
saṃkhittena bhāsitassa evaṃ vitthārena atthaṃ ājānāmī" ti.|| ||

"Sādhu sādhu bhikkhu!|| ||

Sādhu kho tvaṃ bhikkhu,||
mayā saṃkhittena bhāsitassa vitthārena atthaṃ ājānāsi.|| ||

Rūpaṃ kho bhikkhu, mañña-māno baddho Mārassa,||
anmañña-māno mutto pāpimato.|| ||

Vedanaṃ mañña-māno baddho Mārassa,||
anmañña-māno mutto pāpimato.|| ||

Saññaṃ mañña-māno baddho Mārassa,||
anmañña-māno mutto pāpimato.|| ||

Saṇkhāre mañña-māno baddho Mārassa,||
anmañña-māno mutto pāpimato.|| ||

Viññāṇaṃ mañña-māno baddho Mārassa,||
anmañña-māno mutto pāpimato.|| ||

Imassa kho bhikkhu,||
mayā saṇkhittena bhāsitassa evaṃ vitthārena attho daṭṭhabbo" ti.|| ||

Atha kho so bhikkhu Bhagavato bhāsitaṃ abhinan'ditvā anumo-ditvā uṭṭhāy āsanā Bhagavantaṃ abhivādetvā padakkhiṇaṃ katvā pakkāmi.|| ||

Atha kho so bhikkhu eko vūpakaṭṭho||
appamatto||
ātāpī||
pahit'atto viharanto||
na cirass'eva yass'atthāya kula-puttā samma-d-eva agārasmā anagāriyaṃ pabbajanti,||
tad anuttaraṃ Brahma-cariya pariyosānaṃ diṭṭhe'va dhamme sayaṃ abhiññā sacchi-katvā upasampajja vihāsi:|| ||

'Khīṇā jāti,||
vusitaṃ Brahma-cariyaṃ||
kataṃ karaṇīyaṃ||
nāparaṃ itthattāyā' ti abbhaññāsi.|| ||

Aññataro ca pana so bhikkhu arahataṃ ahosīti.|| ||