Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
4. Saḷāyatana Vagga
35. Saḷāyatana Saɱyutta
§ I: Mūla-Paññāsa
2. Yamaka Vagga

Sutta 19

Paṭhama Abhinanda Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[13]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Tatra kho bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

3. Bhagavā etad avoca:|| ||

"Yo bhikkhave cakkhuɱ abhinandati,||
dukkhaɱ so abhinandati.|| ||

'Yo dukkhaɱ abhinandati,||
aparimutto so dukkhasmā' ti vadāmi.|| ||

Yo sotaɱ abhinandati,||
dukkhaɱ so abhinandati.|| ||

'Yo dukkhaɱ abhinandati||
aparimutto so dukkhasmā' ti vadāmi.|| ||

Yo ghānaɱ abhinandati,||
dukkhaɱ so abhinandati.|| ||

'Yo dukkhaɱ abhinandati,||
aparimutto so dukkhasmā' ti vadāmi.|| ||

Yo jivhaɱ abhinandati,||
dukkhaɱ so abhinandati.|| ||

'Yo dukkhaɱ abhinandati,||
aparimutto so dukkhasmā' ti vadāmi.|| ||

Yo kāyaɱ abhinandati,||
dukkhaɱ so abhinandati.|| ||

'Yo dukkhaɱ abhinandati,||
aparimutto so dukkhasmā' ti vadāmi.|| ||

Yo manaɱ abhinandati,||
dukkhaɱ so abhinandati.|| ||

'Yo dukkhaɱ abhinandati,||
aparimutto so dukkhasmā' ti vadāmi.|| ||

 

§

 

Yo ca kho bhikkhave cakkhuɱ n'ābhinandati,||
dukkhaɱ so n'ābhinandati.|| ||

'Yo dukkhaɱ n'ābhinandati,||
parimutto so dukkhasmā' ti vadāmi.|| ||

Yo sotaɱ n'ābhinandati,||
dukkhaɱ so n'ābhinandati.|| ||

'Yo dukkhaɱ n'ābhinandati,||
parimutto so dukkhasmā' ti vadāmi.|| ||

Yo ghānaɱ n'ābhinandati,||
dukkhaɱ so n'ābhinandati.|| ||

'Yo dukkhaɱ n'ābhinandati,||
parimutto so dukkhasmā' ti vadāmi.|| ||

Yo jivhaɱ n'ābhinandati,||
dukkhaɱ so n'ābhinandati.|| ||

'Yo dukkhaɱ n'ābhinandati,||
parimutto so dukkhasmā' ti vadāmi.|| ||

Yo kāyaɱ n'ābhinandati,||
dukkhaɱ so n'ābhinandati.|| ||

'Yo dukkhaɱ n'ābhinandati,||
parimutto so dukkhasmā' ti vadāmi.|| ||

Yo manaɱ n'ābhinandati,||
dukkhaɱ so n'ābhinandati.|| ||

'Yo dukkhaɱ n'ābhinandati,||
parimutto so dukkhasmā' ti vadāmī" ti.|| ||

 


Contact:
E-mail
Copyright Statement