Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
4. Saḷāyatana Vagga
35. Saḷāyatana Saɱyutta
§ II: Paññāsaka Dutiya
3. Gilāna Vagga

Sutta 81

Sambahula-Bhikkhu Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[50]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthi yaɱ viharati Jetavane Anāthapiṇḍikassa ārāme.|| ||

Atha kho sambahulā bhikkhū yena bhagavā ten'upasankamiɱsu.|| ||

Upasaɱkamitvā Bhagavantaɱ abhivādetvā eka-m-antaɱ nisīdiɱsu.|| ||

Eka-m-antaɱ nisinno kho te bhikkhū Bhagavantaɱ [51] etad avocuɱ:|| ||

"Idha no bhante, añña-titthiyā paribbājakā amhe evaɱ pucchanti:|| ||

'Kim atthi yaɱ āvuso samaṇe Gotame Brahma-cariyaɱ vussatī' ti?|| ||

Evaɱ puṭṭhā mayaɱ bhante,||
tesaɱ añña-titthiyānaɱ paribbājakānaɱ evaɱ vyākaroma:|| ||

'Dukkhassa kho āvuso pariññatthaɱ Bhagavati Brahma-cariyaɱ vussatī' ti.|| ||

Kacci mayaɱ bhante,||
evaɱ puṭṭhā evaɱ vyākaramānā vutta-vādino||
ve Bhagavato homa||
na ca Bhagavantaɱ abhūtena abbh'ācikkhāma,||
dhammassa c'ānudhammaɱ vyākaroma,||
na ca koci saha-dhammiko vād'ānuvādo gārayhaɱ ṭhānaɱ āga-c-chatī" ti?|| ||

"Taggha tumhe bhikkhave, evaɱ puṭṭhā||
evaɱ vyākaramānā||
vutta-vādino c'eva me hotha||
na ca maɱ abhūtena abbh'ācikkhatha,||
dhammassa c'ānudhammaɱ vyākarotha,||
na ca koci saha-dhammiko vād'ānuvādo gārayhaɱ ṭhānaɱ āgacchati,||
dukkhassa hi bhikkhave,||
pariññatthaɱ mayi Brahma-cariyaɱ vussati.|| ||

Sace vo bhikkhave, añña-titthiyā paribbājakā||
evaɱ puccheyyuɱ:|| ||

'Katamaɱ pana taɱ āvuso dukkhaɱ yassa pariññāya samaṇe Gotame Brahma-cariyaɱ vussatī' ti?|| ||

Evaɱ puṭṭhā tumhe bhikkhave,||
tesaɱ añña-titthiyānaɱ paribbājakānaɱ||
evaɱ vyākareyyātha:|| ||

'Cakkhuɱ kho āvuso dukkhaɱ||
tassa pariññāya Bhagavati Brahma-cariyaɱ vussati,||
rūpaɱ dukkhaɱ||
tassa pariññāya Bhagavati Brahma-cariyaɱ vussati,||
cakkhu-viññāṇaɱ dukkhaɱ tassa pariññāya Bhagavati Brahma-cariyaɱ vussati,||
cakkhu-samphasso dukkho||
tassa pariññāya Bhagavati Brahma-cariyaɱ vussati,||
yampidaɱ cakkhu-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi dukkhaɱ,||
tassa pariññāya Bhagavati Brahma-cariyaɱ vussati.|| ||

Sotaɱ dukkhaɱ||
tassa pariññāya Bhagavati Brahma-cariyaɱ vussati,||
saddaɱ dukkhaɱ||
tassa pariññāya Bhagavati Brahma-cariyaɱ vussati,||
sota-viññāṇaɱ dukkhaɱ||
tassa pariññāya Bhagavati Brahma-cariyaɱ vussati,||
sota-samphasso dukkho||
tassa pariññāya Bhagavati Brahma-cariyaɱ vussati,||
yampidaɱ sota-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi dukkhaɱ,||
tassa pariññāya Bhagavati Brahma-cariyaɱ vussati.|| ||

Jivhā dukkhā||
tassa pariññāya Bhagavati Brahma-cariyaɱ vussati,||
rasaɱ dukkhaɱ tassa pariññāya Bhagavati Brahma-cariyaɱ vussati,||
jivhā-viññāṇaɱ dukkhaɱ||
tassa pariññāya Bhagavati Brahma-cariyaɱ vussati,||
jivhā-samphasso dukkho||
tassa pariññāya Bhagavati Brahma-cariyaɱ vussati,||
yampidaɱ jivhā-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi dukkhaɱ,||
tassa pariññāya Bhagavati Brahma-cariyaɱ vussati.|| ||

Kāyo dukkho||
tassa pariññāya Bhagavati Brahma-cariyaɱ vussati,||
phoṭṭhabbā dukkhā||
tassa pariññāya Bhagavati Brahma-cariyaɱ vussati,||
kāya-viññāṇaɱ dukkhaɱ||
tassa pariññāya Bhagavati Brahma-cariyaɱ vussati,||
kāya-samphasso dukkho||
tassa pariññāya Bhagavati Brahma-cariyaɱ vussati,||
yampidaɱ kāya-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi dukkhaɱ,||
tassa pariññāya Bhagavati Brahma-cariyaɱ vussati.|| ||

Mano dukkho||
tasasa pariññāya Bhagavati Brahma-cariyaɱ vussati,||
dhammā dukkhā||
tassa pariññāya Bhagavati Brahma-cariyaɱ vussati,||
mano-viññāṇaɱ dukkhaɱ||
tassa pariññāya Bhagavati Brahma-cariyaɱ vussati,||
mano-samphasso dukkho||
tassa pariññāya Bhagavati Brahma-cariyaɱ vussati,||
yampidaɱ mano-samphassa-paccayā uppajjati vedayitaɱ||
sukhaɱ vā||
dukkhaɱ vā||
adukkha-m-asukhaɱ vā||
tam pi dukkhaɱ,||
tassa pariññāya Bhagavati Brahma-cariyaɱ vussati.|| ||

[52] Evaɱ puṭṭhā tumhe bhikkhave, tesaɱ añña-titthiyānaɱ paribbājakānaɱ evaɱ vyākareyyāthā" ti.|| ||

 


Contact:
E-mail
Copyright Statement