Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
4. Saḷāyatana Vagga
35. Saḷāyatana Saɱyutta
§ II: Paññāsaka Dutiya
4. Channa Vagga

Sutta 93

Dutiya Dvaya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[67]

[1][pts][than][olds][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Tatra kho bhagavā bhikkhū āmantesi|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

3. Bhagavā etad avoca:|| ||

"Dvayaɱ bhikkhave,||
paṭicca viññāṇaɱ sambhoti.|| ||

Kathañ ca bhikkhave,||
dvayaɱ paṭicca viññāṇaɱ sambhoti?|| ||

Cakkhuñ ca paṭicca rūpe uppajjati cakkhu-viññāṇaɱ.|| ||

Cakkhuɱ aniccaɱ vipariṇāmī aññathā-bhāvi.|| ||

[68] Rūpā aniccā vipariṇāmino aññathā-bhāvino.|| ||

Itth'etaɱ dvayaɱ calañ c'eva vyayañ ca aniccaɱ vipariṇāmi aññathā-bhāvi||
cakkhu-viññāṇaɱ aniccaɱ vipariṇāmī aññathā-bhāvi.|| ||

Yo pi hetu yo pi paccayo cakkhu-viññāṇassa uppādāya,||
so pi hetu so pi paccayo anicco vipariṇāmī aññathā-bhāvi.|| ||

Aniccaɱ kho pana bhikkhave paccayaɱ||
paṭicca samuppannaɱ||
cakkhu-viññāṇaɱ kuto niccaɱ bhavissati?|| ||

Yā kho bhikkhave,||
imesaɱ tiṇṇaɱ dhammānaɱ||
saŋgati||
sannipāto||
samavāyo||
ayaɱ vuccati bhikkhave cakkhu-samphasso.|| ||

Cakkhu-samphasso pi anicco vipariṇāmī aññathā-bhāvī|| ||

Yo pi hetu yo pi paccayo cakkhu-samphassassa uppādāya,||
so pi hetu so pi paccayo anicco vipariṇāmī aññathā-bhāvī,||
aniccaɱ kho pana bhikkhave paccayaɱ paṭicca uppanno cakkhu-samphasso||
kuto nicco bhavissati.|| ||

Phuṭṭho bhikkhave vedeti,||
phuṭṭho ceteti,||
phuṭṭho sañjānāti,||
itthete pi dhammā calā c'eva vyayā ca aniccā vipariṇāmino aññathā-bhāvino.|| ||

Sotañ ca paṭicca sadde uppajjati sota-viññāṇaɱ,||
sotaɱ aniccaɱ vipariṇāmī aññathā-bhāvi.|| ||

Saddā aniccā vipariṇāmino aññathā-bhāvino,||
itth'etaɱ dvayaɱ calañc'eva vyayañ ca aniccaɱ vipariṇāmī aññathā-bhāvi.|| ||

Sota-viññāṇaɱ aniccaɱ vipariṇāmī aññathā-bhāvi,||
yo pi hetu yo pi paccayo sota-viññāṇassa aññathā-bhāvi uppādāya,||
so pi hetu so pi paccayo anicco vipariṇāmī aññathā-bhāvi.|| ||

Aniccaɱ kho pana bhikkhave paccayaɱ paṭicca samuppannaɱ sota-viññāṇaɱ kuto niccaɱ bhavissati.|| ||

Yā kho bhikkhave,||
imesaɱ tiṇṇaɱ dhammānaɱ saŋgati sannipāto samavāyo,||
ayaɱ vuccati bhikkhave sota-samphasso sota-samphasso pi anicco vipariṇāmī aññathā-bhāvī.|| ||

Yo pi hetu yo pi paccayo sota-samphassassa uppādāya,||
so pi hetu so pi paccayo anicco vipariṇāmī aññathā-bhāvī|| ||

Aniccaɱ kho pana bhikkhave paccayaɱ paṭicca uppanno sota-samphasso kuto nicco bhavissati.|| ||

Phuṭṭho bhikkhave vedeti,||
phuṭṭho sañjānāti,||
phuṭṭho ceteti,||
itthete pi dhammā calā c'eva vyayā ca aniccā vipariṇāmino aññathā-bhāvino.|| ||

Ghānañ ca paṭicca gandhe uppajjati ghāna-viññāṇaɱ,||
ghānaɱ aniccaɱ vipariṇāmī aññathā-bhāvi.|| ||

Gandhā aniccā vipariṇāmino aññathā-bhāvino,||
itth'etaɱ dvayaɱ calañc'eva vyayañ ca aniccaɱ vipariṇāmi aññathā-bhāvi.|| ||

Ghāna-viññāṇaɱ aniccaɱ vipariṇāmī aññathā-bhāvi,||
yo pi hetu yo pi paccayo ghāna-viññāṇassa aññathā-bhāvi uppādāya,||
so pi hetu so pi paccayo anicco vipariṇāmī aññathā-bhāvi.|| ||

Aniccaɱ kho pana bhikkhave paccayaɱ paṭicca samuppannaɱ ghāna-viññāṇaɱ kuto niccaɱ bhavissati.|| ||

Yā kho bhikkhave,||
imesaɱ tiṇṇaɱ dhammānaɱ saŋgati sannipāto samavāyo ayaɱ vuccati bhikkhave ghāna-samphasso ghāna-samphasso pi anicco vipariṇāmī aññathā-bhāvī.|| ||

Yo pi hetu yo pi paccayo ghāna-samphassassa uppādāya,||
so pi hetu so pi paccayo anicco vipariṇāmī aññathā-bhāvī|| ||

[69] Aniccaɱ kho pana bhikkhave paccayaɱ paṭicca uppanno ghāna-samphasso kuto nicco bhavissati.|| ||

Phuṭṭho bhikkhave vedeti,||
phuṭṭho sañjānāti,||
phuṭṭho ceteti,||
itthete pi dhammā calā c'eva vyayā ca aniccā vipariṇāmino aññathā-bhāvino.|| ||

Jivhañ ca paṭicca rase uppajjati jivhā-viññāṇaɱ,||
jivhā aniccā vipariṇāmī aññathā-bhāvi rasā aniccā vipariṇāmino aññathā-bhāvino,||
itth'etaɱ dvayaɱ calañc'eva vyayañ ca aniccaɱ vipariṇāmī aññathā-bhāvi.|| ||

Jivhā-viññāṇaɱ aniccaɱ vipariṇāmi aññathā-bhāvī,||
yo pi hetu yo pi paccayo jivhā-viññāṇassa uppādāya,||
so pi hetu so pi paccayo anicco vipariṇāmī aññathā-bhāvī.|| ||

Aniccaɱ kho pana bhikkhave paccayaɱ paṭicca samuppannaɱ jivhā-viññāṇaɱ kuto niccaɱ bhavissati.|| ||

Yā kho bhikkhave,||
imesaɱ tiṇṇaɱ dhammānaɱ saŋgati sannipāto samavāyo ayaɱ vuccati bhikkhave jivhā-samphasso jivhā-samphasso pi anicco vipariṇāmī aññathā-bhāvī.|| ||

Yo pi hetu yo pi paccayo jivhā-samphassassa uppādāya,||
so pi hetu so pi paccayo anicco vipariṇāmī aññathā-bhāvī.|| ||

Aniccaɱ kho pana bhikkhave paccayaɱ paṭicca uppanno jivhā-samphasso kuto nicco bhavissati.|| ||

Phuṭṭho bhikkhave vedeti,||
phuṭṭho sañjānāti,||
phuṭṭho ceteti,||
itthete pi dhammā calā c'eva vyayā ca aniccā vipariṇāmino aññathā-bhāvino.|| ||

Kāya-khuñ ca paṭicca phoṭṭhabbe uppajjati kāya-viññāṇaɱ,||
kāyaɱ aniccaɱ vipariṇāmi aññathā-bhāvi.|| ||

Phoṭṭhabbā aniccā vipariṇāmino aññathā-bhāvino,||
itth'etaɱ dvayaɱ calañc'eva vyayañ ca aniccaɱ vipariṇāmī aññathā-bhāvī.|| ||

Kāya-viññāṇaɱ aniccaɱ vipariṇāmī aññathā-bhāvī,||
yo pi hetu yo pi paccayo kāya-viññāṇassa aññathā-bhāvī uppādāya,||
so pi hetu so pi paccayo anicco vipariṇāmī aññathā-bhāvī.|| ||

Aniccaɱ kho pana bhikkhave paccayaɱ paṭicca samuppannaɱ kāya-viññāṇaɱ kuto niccaɱ bhavissati.|| ||

Yā kho bhikkhave,||
imesaɱ tiṇṇaɱ dhammānaɱ saŋgati sannipāto samavāyo ayaɱ vuccati bhikkhave kāya-samphasso kāya-samphasso pi anicco vipariṇāmī aññathā-bhāvī.|| ||

Yo pi hetu yo pi paccayo kāya-samphassassa uppādāya,||
so pi hetu so pi paccayo anicco vipariṇāmī aññathā-bhāvī.|| ||

Aniccaɱ kho pana bhikkhave paccayaɱ paṭicca uppanno kāya-samphasso kuto nicco bhavissati.|| ||

Phuṭṭho bhikkhave vedeti,||
phuṭṭho sañjānāti,||
phuṭṭho ceteti,||
itthete pi dhammā calā c'eva vyayā ca aniccā vipariṇāmino aññathā-bhāvino.|| ||

Manañ ca paṭicca dhamme uppajjati mano-viññāṇaɱ,||
mano anicco vipariṇāmī aññathā-bhāvī.|| ||

Dhammā aniccā vipariṇāmino aññathā-bhāvino,||
itth'etaɱ dvayaɱ calañc'eva vyayañ ca aniccaɱ vipariṇāmī aññathā-bhāvī.|| ||

Mano-viññāṇaɱ aniccaɱ vipariṇāmī aññathā-bhāvī,||
yo pi hetu yo pi paccayo mano-viññāṇassa aññathā-bhāvī uppādāya,||
so pi hetu so pi paccayo anicco vipariṇāmī aññathā-bhāvī.|| ||

Aniccaɱ kho pana bhikkhave paccayaɱ paṭicca samuppannaɱ mano-viññāṇaɱ kuto niccaɱ bhavissati.|| ||

Yā kho bhikkhave,||
imesaɱ tiṇṇaɱ dhammānaɱ saŋgati sannipāto samavāyo ayaɱ vuccati bhikkhave mano-samphasso mano-samphasso pi anicco vipariṇāmī aññathā-bhāvī.|| ||

Yo pi hetu yo pi paccayo mano-samphassassa uppādāya,||
so pi hetu so pi paccayo anicco vipariṇāmī aññathā-bhāvī.|| ||

Aniccaɱ kho pana bhikkhave paccayaɱ paṭicca uppanno mano-samphasso kuto nicco bhavissati.|| ||

Phuṭṭho bhikkhave vedeti,||
phuṭṭho sañjānāti,||
phuṭṭho ceteti,||
itthete pi dhammā valā c'eva vyayā ca aniccā vipariṇāmino aññathā-bhāvino.|| ||

Evaɱ kho bhikkhave dvayaɱ paṭicca viññāṇaɱ sambhotī" ti.|| ||

 


Contact:
E-mail
Copyright Statement