Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
4. Saḷāyatana Vagga
35. Saḷāyatana Saɱyutta
§ III: Paññāsaka Tatiya
2. Loka-Kāma-Guṇa Vagga

Sutta 120

Sāriputta-Saddhi-Vihārika Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[103]

[1][pts][bodh] Evaɱ me sutaɱ:|| ||

Ekaɱ samayaɱ āyasmā Sāriputto Sāvatthiyaɱ viharati Jetavane Anāthapiṇḍikassa ārāme.|| ||

Atha kho aññataro bhikkhu yen'āyasmā Sāriputto ten'upasaŋkami.|| ||

Upasan-kamitvā āyasmatā Sāriputtena saddhiɱ sammodi.|| ||

Sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

Eka-m-antaɱ nisinno kho so bhikkhu āyasmantaɱ Sāriputtaɱ etad avoca:|| ||

"Saddhi-vihāriko āvuso Sāriputta bhikkhu sikkhaɱ pacca-k-khāya hīnāy-āvatto" ti.|| ||

"Evaɱ etaɱ āvuso hoti indriyesu agutta-dvārassa bhojane amatt'aññūno jāgariyaɱ ananuyuttassa.|| ||

So vat'āvuso bhikkhu indriyesu agutta-dvāro bhojane amatt'aññū [104] jāgariyaɱ ananuyutto yāva-jīvaɱ paripuṇṇaɱ parisuddhaɱ Brahma-cariyaɱ santānessat-ī-ti n'etaɱ ṭhānaɱ vijjati.|| ||

So vat'āvuso bhikkhu indriyesu gutta-dvāro bhojane matt'aññū jāgariyaɱ anuyutto yāva-jīvaɱ paripuṇṇaɱ parisuddhaɱ Brahma-cariyaɱ santānessat-ī-ti ṭhānam etaɱ vijjati.|| ||

 

§

 

Kathañ c'āvuso indriyesu gutta-dvāro hoti?|| ||

Idh'āvuso, bhikkhu cakkhunā rūpaɱ disvā||
na nimitta-g-gāhī hoti||
n-ā-nuvyañjana-g-gāhī,||
yato'dhikaraṇam etaɱ cakkhu'ndriyaɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati cakkhu'ndriyaɱ,||
cakkhu'ndriye saŋvaraɱ āpajjati.|| ||

Sotena saddaɱ sutvā||
na nimitta-g-gāhī hoti||
n-ā-nuvyañjana-g-gāhī,||
yato'dhikaraṇam etaɱ sot'endriyaɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati sot'indriyaɱ,||
sot'indriye saŋvaraɱ āpajjati.|| ||

Ghānena gandhaɱ ghāyitvā||
na nimitta-g-gāhī hoti||
n-ā-nuvyañjana-g-gāhī,||
yato'dhikaraṇam etaɱ ghān'driyeɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati ghān'driyeɱ,||
ghān'driye saŋvaraɱ āpajjati.|| ||

Jivhāya rasaɱ sāyitvā||
na nimitta-g-gāhī hoti||
n-ā-nuvyañjana-g-gāhī,||
yato'dhikaraṇam etaɱ jivh'endriyaɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati jivh'endriyaɱ,||
jivh'endriye saŋvaraɱ āpajjati.|| ||

Kāyena phoṭṭhabbaɱ phusitvā||
na nimitta-g-gāhī hoti||
n-ā-nuvyañjana-g-gāhī,||
yato'dhikaraṇam etaɱ kāy'endriyaɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati kāy'endriyaɱ,||
kāy'endriye saŋvaraɱ āpajjati.|| ||

Manasā dhammaɱ viññāya||
na nimitta-g-gāhī hoti||
n-ā-nuvyañjana-g-gāhī,||
yato'dhikaraṇam etaɱ man'indriyaɱ asaɱvutaɱ viharantaɱ||
abhijjhā domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati man'indriyaɱ,||
man'indriye saŋvaraɱ āpajjati.|| ||

 

§

 

Kathañ c'āvuso bhojane matt'aññū hoti?|| ||

Idh'āvuso bhikkhu paṭisaŋkhā yoniso āhāraɱ āhāreti,||
n'eva davāya na madāya||
na maṇḍanāya||
na vibhusanāya||
yāva-d-eva imassa kāyassa ṭhitiyā yāpanāya vihiɱs'ūparatiyā brahma-cariyā-nuggāhāya:|| ||

'Iti purāṇañ ca vedanaɱ paṭihaŋkhāmi||
navañ ca vedanaɱ na uppādessāmi||
yātrā ca me bhavissati||
anavajjatā ca||
phāsu-vihāro cā' ti.|| ||

Evaɱ kho āvuso bhojane matt'aññū hoti.|| ||

 

§

 

Kathañ c'āvuso jāgariyaɱ anuyutto hoti?|| ||

Idh'āvuso bhikkhu divasaɱ||
cankamena||
nisajjāya||
āvaraṇīyehi dhammehi cittaɱ parisodheti;|| ||

rattiyā paṭhamaɱ yāmaɱ||
cankamena||
nisajjāya||
āvaraṇiyehi dhammehi cittaɱ pariso- [105] dheti|| ||

rattiyā majjhamaɱ yāmaɱ dakkhiṇena passena sīhaseyyaɱ kappeti||
pāde pādaɱ||
accādhāya sato sampajāno uṭṭhāna-saññaɱ mana-sikaritvā|| ||

rattiyā pacchimaɱ yāmaɱ paccu-ṭṭhāya||
cankamena||
nisajjāya||
āvaraṇiyehi dhammehi cittaɱ parisodheti.|| ||

Evaɱ kho āvuso jāgariyaɱ anuyutto hoti.|| ||

Tasmā ti āvuso evaɱ sikkhitabbaɱ:|| ||

'Indriyesu gutta-dvārā bhavissāma bhojane mattaññuno jāgariyaɱ anuyuttā' ti.|| ||

Evaɱ hi vo āvuso sikkhitabban" ti.|| ||

 


Contact:
E-mail
Copyright Statement