Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsa Catutthaɱ
3. Samudda Vagga

Sutta 193

Udāyī

Adapted from the 1995 edition of the digital version of the Sri Lanka Buddha Jayanti Tripitaka Series.

[166]


[1][pts][bodh][than][olds] Evaɱ me sutaɱ:|| ||

Ekaɱ samayaɱ āyasmā ca Ānando āyasmā ca Udāyī Kosambīyaɱ viharanti Ghositārāme.|| ||

[2][pts][bodh][than][olds] Atha kho āyasmā Udāyī sāyaṇha-samayaɱ paṭisallāṇā vuṭṭhito yen'āyasmā Ānando ten'upasankami.||
Upasaŋkamitvā [āyasmatā Ānandena saddhiɱ sammodi.||
Sammodanīyaɱ kathaɱ sārāṇīyaɱ] vīti-sāretvā eka-m-antaɱ nisīdi.|| ||

[3][pts][bodh][than][olds] Eka-m-antaɱ nisinno kho āyasmā Udāyī āyasmantaɱ Ānandaɱ etad avoca:|| ||

Yatheva nu kho āvuso Ānanda ayaɱ kāyo Bhagavatā aneka-pariyāyena akkhāto vivaṭo pakāsito:||
'Iti pi ayaɱ kāyo anattā' ti.|| ||

Sakkā evam evaɱ viññāṇam pi ācikkhituɱ desetuɱ paññāpetuɱ paṭṭhapetuɱ vivarituɱ vibhajituɱ uttānīkātuɱ:||
'Iti pidaɱ viññāṇaɱ anattā' ti.|| ||

Yatheva kho āvuso Udāyī ayaɱ kāyo Bhagavatā aneka-pariyāyena akkhāto vivaṭo pakāsito:||
'Iti pāyaɱ kāyo anattā' ti.|| ||

Sakkā evam evaɱ viññāṇam pi ācikkhituɱ desetuɱ paññāpetuɱ paṭṭhapetuɱ vivarituɱ vibhajituɱ uttānīkātuɱ:||
'Iti pidaɱ viññāṇaɱ anattā' ti.|| ||

[4][pts][bodh][than][olds] Cakkhuñc'āvuso paṭicca rūpe ca uppajjati cakkhu-viññāṇanti.|| ||

[167] Evam āvuso ti.|| ||

Yo cāvuso hetu yo ca paccayo cakkhu-viññāṇassa uppādāya so ca hetu so ca paccayo sabbena sabbaɱ sabbathā sabbaɱ aparisesā nirujjheyya, api nū kho cakkhu-viññāṇaɱ paññāyethāti.|| ||

No h'etaɱ āvuso.|| ||

Iminā pi kho etaɱ āvuso pariyāyena Bhagavatā akkhātaɱ vivaṭaɱ pakāsitaɱ: iti pidaɱ viññāṇaɱ anattā ti.|| ||

[5][pts][bodh][than][olds] Sotañc'āvuso paṭicca sadde ca uppajjati sota-viññāṇanti.|| ||

Evam āvuso ti.|| ||

Yo cāvuso hetu yo ca paccayo sota-viññāṇassa uppādāya so ca hetu so ca paccayo sabbena sabbaɱ sabbathā sabbaɱ aparisesā nirujjheyya, api nū kho sota-viññāṇaɱ paññāyethāti.|| ||

No h'etaɱ āvuso.|| ||

Iminā pi kho etaɱ āvuso pariyāyena Bhagavatā akkhātaɱ vivaṭaɱ pakāsitaɱ: iti pidaɱ viññāṇaɱ anattā ti.|| ||

[6][pts][bodh][than][olds] Ghānañc'āvuso paṭicca gandhe ca uppajjati ghāna-viññāṇanti.|| ||

Evam āvuso ti.|| ||

Yo cāvuso hetu yo ca paccayo ghāna-viññāṇassa uppādāya so ca hetu so ca paccayo sabbena sabbaɱ sabbathā sabbaɱ aparisesā nirujjheyya, api nu kho ghāna-viññāṇaɱ paññāyethāti.|| ||

No h'etaɱ āvuso.|| ||

Iminā pi kho etaɱ āvuso pariyāyena Bhagavatā akkhātaɱ vivaṭaɱ pakāsitaɱ: iti pidaɱ viññāṇaɱ anattā ti.|| ||

[7][pts][bodh][than][olds] Jivhañc'āvuso paṭicca rase ca uppajjati jivhā-viññāṇanti.|| ||

Evam āvuso ti.|| ||

Yo cāvuso hetu yo ca paccayo jivhā-viññāṇassa uppādāya so ca hetu so ca paccayo sabbena sabbaɱ sabbathā sabbaɱ aparisesā nirujjheyya, api nū kho jivhā-viññāṇaɱ paññāyethāti.|| ||

No h'etaɱ āvuso.|| ||

Iminā pi kho etaɱ āvuso pariyāyena Bhagavatā akkhātaɱ vivaṭaɱ pakāsitaɱ: iti pidaɱ viññāṇaɱ anattā ti.|| ||

[8][pts][bodh][than][olds] Kāyañc'āvuso paṭicca phoṭṭhabbe ca uppajjati kāya-viññāṇanti.|| ||

Evam āvuso ti.|| ||

Yo cāvuso hetu yo ca paccayo kāya-viññāṇassa uppādāya so ca hetu so ca paccayo sabbena sabbaɱ sabbathā sabbaɱ aparisesā nirujjheyya, api nū kho kāya-viññāṇaɱ paññāyethāti.|| ||

No h'etaɱ āvuso.|| ||

Iminā pi kho etaɱ āvuso pariyāyena Bhagavatā akkhātaɱ vivaṭaɱ pakāsitaɱ: iti pidaɱ viññāṇaɱ anattā ti.|| ||

[9][pts][bodh][than][olds] Manañc'āvuso paṭicca dhamme ca uppajjati mano-viññāṇanti.|| ||

Evam āvuso ti.|| ||

Yo cāvuso hetu yo ca paccayo mano-viññāṇassa uppādāya so ca hetu so ca paccayo sabbena sabbaɱ sabbathā sabbaɱ aparisesā nirujjheyya, api nū kho mano-viññāṇaɱ paññāyethāti.|| ||

No h'etaɱ āvuso.|| ||

Iminā pi kho etaɱ āvuso pariyāyena Bhagavatā akkhātaɱ vivaṭaɱ pakāsitaɱ: iti pidaɱ viññāṇaɱ anattāti.|| ||

[10][pts][bodh][than][olds] seyyathā pi āvuso puriso sāratthiko sāragavesī sārapariyesanaɱ cara-māno tiṇhaɱ kuṭhāriɱ ādāya vanaɱ paviseyya,||
so tattha passeyya mahantaɱ kadali-k-khandhaɱ ujuɱ navakaɱ akukkukajātaɱ.||
Tam enaɱ mūle [168] chindeyya||
mūle chetvā agge chindeyya||
agge chetvā pattavaṭṭiɱ vinibbhujjeyye.|| ||

So tattha pheggum nādhigaccheyya. Kuto sāraɱ.|| ||

[11][pts][bodh][than][olds] Evam eva kho āvuso bhikkhu chasu phassāyatanesu n'evaattānaɱ na ataniyaɱ samanupassati,||
so evaɱ asamanupassanto na kiñci loke upādiyati,||
anupādiyaɱ na paritassati,||
aparitassaɱ paccattaɱ n'eva parinibkhāyati.||
Khīṇā jāti,||
vusitaɱ Brahma-cariyaɱ,||
kataɱ karaṇīyaɱ||
nāparaɱ||
itthattāyāti pajānātī ti.|| ||

 


Contact:
E-mail
Copyright Statement