Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
4. Saḷāyatana Vagga
35. Saḷāyatana Saɱyutta
§ IV: Paññāsaka Catuttha
4. Āsīvisa Vagga

Sutta 201

Dutiya Dāru-k-Khandh'Opama Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[181]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Kimbilāyaɱ viharati Gaṇgāya nadiyā tīre.|| ||

Addasā kho Bhagavā mahantaɱ dāru-k-khandhaɱ Gaŋgāya nadiyā sotena vuyhamānaɱ,||
disvāna bhikkhū āmantesi:|| ||

"Passatha no tumhe bhikkhave amuɱ ma- [182] hantaɱ dāru-k-khandhaɱ Gaŋgāya nadiyā sotena vuyhamānan" ti?|| ||

"Evaɱ bhante" ti.|| ||

"Sace kho bhikkhave dāru-k-khandho na orimaɱ tīraɱ upagacchati,||
na pārimaɱ tīraɱ upagacchati,||
na majjhe saɱsīdissati,||
na thale ussīdissati||
na manussa-g-gāho bhavissati,||
na amanussa-g-gāho bhavissati,||
na āvaṭṭa-g-gāho bhavissati,||
na antopūti bhavissati:||
evaɱ hi so bhikkhave dāru-k-khandho||
samudda-ninno bhavissati,||
samudda-poṇo||
samudda-pabhāro.|| ||

Taɱ kissa hetu?|| ||

Samudda-ninno bhikkhave, Gaŋgāya nadiyā soto,||
samudda-poṇo,||
samudda-pabbhāro.|| ||

Evam eva kho bhikkhave sace tumhe pi||
na orimaɱ tīraɱ upagacchatha||
na pārimaɱ tīraɱ upagacchatha||
na majjhe saɱsīdissatha,||
na thale ussīdissatha,||
na manussa-g-gāhā hessatha||
na amanussa-g-gāhā hessatha,||
na āvaṭṭa-g-gāhā hessatha,||
na antopūti bhavissatha.|| ||

Evaɱ tumhe bhikkhave Nibbāna-ninnā bhavissatha,||
Nibbāna-poṇā||
Nibbāna-pabbhārā.|| ||

Taɱ kissa hetu?|| ||

Nibbāna-ninnā bhikkhave sammā-diṭṭhi,||
Nibbāna-poṇā,||
Nibbāna-pabbhārā" ti.|| ||

 

§

 

Evaɱ vutte āyāsma Kimbilo Bhagavantaɱ etad avoca:|| ||

"Kiɱ nu kho bhante orimaɱ-tīraɱ?|| ||

Kiɱ pārimaɱ-tīraɱ?|| ||

Ko majjhe saɱsādo?|| ||

Ko thale ussādo?|| ||

Ko manussa-g-gāho?|| ||

Ko amanussa-g-gāho?|| ||

Ko āvaṭṭa-g-gāho?|| ||

Ko antopūti-bhāvo" ti?|| ||

"'Orimaɱtīran' ti kho Kimbila,||
chann'etaɱ ajjhattikānaɱ āyatanānaɱ adhivacanaɱ.|| ||

'Pārimaɱ-tīran' ti kho Kimbila||
chann'etaɱ bāhirānaɱ āyatanānaɱ adhivacanaɱ.|| ||

'Majjhe saɱsādo' ti kho Kimbila,||
nandi-rāgassetaɱ adhivacanaɱ.|| ||

'Thale ussādo' ti kho Kimbila||
asmimānassetaɱ adhivacanaɱ.|| ||

Katamo ca Kimbila manussa-g-gāho?|| ||

Idha Kimbila bhikkhu gihīhi saɱsaṭṭho viharati||
sahanandi||
saha-sokī||
sukhitesu||
sukhito||
dukkhitesu||
dukkhito uppannesu||
kicca karaṇīyesu||
attanā tesu yogaɱ āpajjati,||
ayaɱ vuccati bhikkhu,||
manussa-g-gāho.|| ||

Katamo ca Kimbila, amanussa-g-gāho?|| ||

Idha Kimbila bhikkhu ekacco aññataraɱ deva-nikāyaɱ paṇidhāya Brahma-cariyaɱ carati:|| ||

'Imināhaɱ sīlena vā||
vatena vā||
tapena vā||
brahma-cariyena vā||
devo vā||
bhavissāmī deva-ñ-ñataro vā' ti.|| ||

Ayaɱ vuccati Kimbila amanussa-g-gāho.|| ||

Āvaṭṭagāho ti kho bhikkhu,||
pañcann'etaɱ kāma-guṇānaɱ adhivacanaɱ.|| ||

Katamo ca Kimbila antopūti-bhāvo?|| ||

Idha Kimbila bhikkhu aññataraɱ saŋkiliṭṭham āpanno hoti yathā-rūpāya āpattiyā vuṭṭhānam paññāyati|| ||

Ayaɱ vuccati Kimbila, antopūti-bhāvo" ti.|| ||

 


Contact:
E-mail
Copyright Statement