Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
4. Saḷāyatana Vagga
35. Saḷāyatana Saɱyutta
§ IV: Paññāsaka Catuttha
4. Āsīvisa Vagga

Sutta 207

Yava-Kalāpī Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[201]

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Tatra kho bhagavā bhikkhū āmantesi:|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

3. Bhagavā etad avoca:|| ||

"Seyyathā pi bhikkhave yava-kalāpī cātu-m-mahā-pathe nikkhittā assa,||
atha cha purisā āgaccheyyuɱ vyābhaŋgi-hatthā,||
ne taɱ yava-kalāpiɱ chahi vyābhaŋgīhi haneyyuɱ,||
evaɱ hi sā bhikkhave yava-kalāpī suhatā assa chahi vyābhaŋgīhi bhaññamānā.|| ||

Atha sattamo puriso āgaccyeyya vyābhaŋgi-hattho,||
so taɱ yava-kalāpiɱ sattamāya vyabhaŋgiyā haneyya,||
evaɱ hi sā bhikkhave yava-kalāpi suhatatarā assa sattamāya vyābhaŋgiyā bhaññamānā.|| ||

Evam eva kho bhikkhave a-s-sutavā puthujjano cakkhusmiɱ haññati manāpāmanāpehi rūpehi,||
sotasmiɱ haññati manāpāmanāpehi saddehi,||
ghānasmiɱ haññati manāpāmanāpehi gandhehi,||
jivhāya haññati manāpāmanāpehi rasehi,||
kāyasmiɱ haññati manāpāmanāpehi phoṭṭhabbehi,||
manasmiɱ haññati manāpāmanāpehi dhammehi.|| ||

Sace so bhikkhave a-s-sutavā puthujjano āyatiɱ puna-b-bhavāya ceteti||
evaɱ hi so bhikkhave mogha-puriso suhatataro hoti,||
seyyathā pi bhikkhave sā yava-kalāpī sattamāya vyābhaŋgiyā haññamānā.|| ||

Bhuta-pubbaɱ bhikkhave, dev-ā-sura-saŋgāmo samūp'abbuḷho ahosi.|| ||

Atha kho bhikkhave Vepacitti asurindo asure āmantesi:|| ||

'Sace mārisā, dev-ā-sura-saŋgāme samūpabbūḷhe,||
Asurā jineyyuɱ||
devā parājineyyuɱ,||
yena naɱ Sakkaɱ devānam indaɱ kaṇṭhe pañcamehi bandhanehi bandhitvā mama santike āneyyātha Asurapuran' ti.|| ||

Sakko pi kho bhikkhave devānaɱ Indo deve Tāvatiɱse āmantesi:|| ||

'Sace mārisā dev-ā-sura-saŋgāme samūp'abbuḷhe,||
devā jineyyuɱ,||
Asurā parājineyyuɱ||
yena naɱ Vepacittiɱ asur indaɱ kaṇṭe pañcamehi bandhanehi bandhitvā mama santike āneyyātha Sudhamma devasabhan' ti.|| ||

Tasmiɱ kho pana bhikkhave saŋgāme devā jiniɱsu||
Asurā parāji- [202] niɱsu.|| ||

Atha kho bhikkhave devā Tāvatiɱsā Vepacittiɱ asurindaɱ kaṇṭhe pañcamehi bandhanehi bandhitvā Sakkassa devānam indassa santike ānesuɱ Sudhammaɱ devasabhaɱ.|| ||

Tatra sudaɱ bhikkhave Vepacitti asurindo kaṇṭhe pañcamehi bandhanehi baddho hoti.|| ||

Yadā ca kho bhikkhave Vepacittissa asurindassa evaɱ hoti:|| ||

'Dhammikā kho devā,||
adhammikā Asurā,||
idh'eva dān'āhaɱ||
devapuraɱ gacchāmī' ti.|| ||

Atha kaṇṭhe pañcamehi bandhanehi muttaɱ attānaɱ samanupassati.|| ||

Dibbehi ca pañcahi kāma-guṇehi samappito samaŋgībhuto paricāreti.|| ||

Yadā ca kho bhikkhave Vepacittissa asurindassa evaɱ hoti:|| ||

'Dhammikā kho Asurā,||
adhammikā devā,||
tatth'eva dān'āhaɱ Asurapuraɱ gamissāmī' ti.|| ||

Atha kaṇṭhe pañcamehi bandhanehi baddhaɱ||
attānaɱ samanupassati.|| ||

Dibbehi ca pañcahi kāma-guṇehi parihāyati.|| ||

Evaɱ sukhumaɱ kho bhikkhave Vepacitti-bandhanaɱ,||
tato sukhumataraɱ Māra-bandhanaɱ,||
mañña-māno kho bhikkhave baddho Mārassa,||
amañña-māno mutto pāpimato.|| ||

'Asmī' ti bhikkhave maññitame taɱ||
'ayamahamasmī' ti maññitame taɱ,||
'bhavissan' ti maññitame taɱ,||
'na bhavissan' ti maññitame taɱ,||
'rūpi bhavissan' ti maññitame taɱ,||
'arūpī bhavissan' ti maññitame taɱ,||
'saññī bhavissan' ti maññitame taɱ,||
'asaññī bhavissan' ti maññitame taɱ,||
'n'eva-saññi-n-ā-saññi bhavissan' ti maññitame taɱ;||
maññitaɱ bhikkhave rogo,||
maññitaɱ gaṇḍo,||
maññitaɱ sallaɱ.|| ||

Tasmā'ti ha bhikkhave||
'Amañña-mānena cetasā viharissāmā' ti,||
evaɱ hi vo bhikkhave sikkhitabbaɱ.|| ||

'Asmī' ti bhikkhave iñjitame taɱ||
'ayamahamasmī' ti iñjitame taɱ,||
'bhavissan' ti iñjitame taɱ,||
'na bhavissan' ti iñjitame taɱ,||
'rūpi bhavissan' ti iñjitame taɱ,||
'arūpī bhavissan' ti iñjitame taɱ,||
'saññī bhavissan' ti iñjitame taɱ,||
'asaññī bhavissan' ti iñjitame taɱ,||
'n'eva-saññi-n-ā-saññi bhavissan' ti iñjitame taɱ;||
iñjitaɱ [203] bhikkhave rogo,||
iñjitaɱ gaṇḍo,||
iñjitaɱ sallaɱ.|| ||

Tasmā'ti ha bhikkhave||
'Aniñjamānena cetasā viharissāmā' ti,||
evaɱ hi vo bhikkhave sikkhitabbaɱ.|| ||

'Asmī' ti bhikkhave phanditame taɱ||
'ayamahamasmī' ti phanditame taɱ,||
'bhavissan' ti phanditame taɱ,||
'na bhavissan' ti phanditame taɱ,||
'rūpi bhavissan' ti phanditame taɱ,||
'arūpī bhavissan' ti phanditame taɱ,||
'saññī bhavissan' ti phanditame taɱ,||
'asaññī bhavissan' ti phanditame taɱ,||
'n'eva-saññi-n-ā-saññi bhavissan' ti phanditame taɱ;||
phanditaɱ bhikkhave rogo,||
phanditaɱ gaṇḍo,||
phanditaɱ sallaɱ.|| ||

Tasmā'ti ha bhikkhave||
'Aphandamānena cetasā viharissāmā' ti,||
evaɱ hi vo bhikkhave sikkhitabbaɱ.|| ||

'Asmī' ti bhikkhave papañcitame taɱ||
'ayamahamasmī' ti papañcitame taɱ,||
'bhavissan' ti papañcitame taɱ,||
'na bhavissan' ti papañcitame taɱ,||
'rūpi bhavissan' ti papañcitame taɱ,||
'arūpī bhavissan' ti papañcitame taɱ,||
'saññī bhavissan' ti papañcitame taɱ,||
'asaññī bhavissan' ti papañcitame taɱ,||
'n'eva-saññi-n-ā-saññi bhavissan' ti papañcitame taɱ;||
papañcitaɱ bhikkhave rogo,||
papañcitaɱ gaṇḍo,||
papañcitaɱ sallaɱ.|| ||

Tasmā'ti ha bhikkhave||
'Nippapañc'ārāmena cetasā viharissāmā' ti,||
evaɱ hi vo bhikkhave sikkhitabbaɱ.|| ||

'Asmī' ti bhikkhave mānagatame taɱ||
'ayamahamasmī' ti mānagatame taɱ,||
'bhavissan' ti mānagatame taɱ,||
'na bhavissan' ti mānagatame taɱ,||
'rūpi bhavissan' ti mānagatame taɱ,||
'arūpī bhavissan' ti mānagatame taɱ,||
'saññī bhavissan' ti mānagatame taɱ,||
'asaññī bhavissan' ti mānagatame taɱ,||
'n'eva-saññi-n-ā-saññi bhavissan' ti mānagatame taɱ;||
mānagatame taɱ bhikkhave rogo,||
mānagatame taɱ gaṇḍo,||
mānagatame taɱ sallaɱ.|| ||

Tasmā'ti ha bhikkhave||
'Nihatmānena cetasā viharissāmā' ti,||
evaɱ hi vo bhikkhave sikkhitabbaɱ.|| ||

 


Contact:
E-mail
Copyright Statement