Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
4. Saḷāyatana Vagga
38. Jambukhādaka Saɱyutta

Sutta 14

Dukkha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[259]

[1][pts][than] Evaɱ me sutaɱ:|| ||

Ekaɱ samayaɱ āyasmā Sāriputto Magadhesu viharati Nālagāmake.|| ||

Atha kho Jambukhādako paribbājako yen'āyasmā Sāriputto ten'upasankami.|| ||

Upasaŋkamitvā āyasmatā Sāriputtena saddhiɱ sammodi.|| ||

Sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

Eka-m-antaɱ nisinno kho Jambukhādako paribbājako āyasmantaɱ Sāriputtaɱ etad avoca:|| ||

"'Dukkhaɱ dukkhan' ti āvuso Sāriputta vuccati.|| ||

Katamaɱ nu kho āvuso dukkhan" ti?|| ||

"Tisso imā āvuso dukkhatā:||
dukkha-dukkhatā||
sankhāra-dukkhatā||
vipariṇāma-dukkhatā.|| ||

Imā kho āvuso tisso dukkhatā" ti.|| ||

"Atthi pan'āvuso Maggo atthi paṭipadā etāsaɱ dukkhatānaɱ pariññāyā" ti?|| ||

"Atthi kho āvuso Maggo||
atthi paṭipadā||
etāsaɱ dukkhatānaɱ pariññāyā" ti.|| ||

"Katamo pan'āvuso Maggo||
katamā paṭipadā||
etāsaɱ dukkhatānaɱ pariññāyā" ti?|| ||

"Ayam eva kho āvuso Ariyo Aṭṭh'aŋgiko Maggo||
etāsaɱ dukkhatānaɱ pariññāyā,||
seyyath'īdaɱ:|| ||

Sammā-diṭṭhi||
sammā-saŋkappo||
sammā-vācā||
sammā-kammanto||
sammā-ājīvo||
sammā-vāyāmo||
sammā-sati||
sammā-samādhi.|| ||

Ayaɱ kho āvuso Maggo||
ayaɱ paṭipadā||
etāsaɱ dukkhatānaɱ pariññāyā" ti.|| ||

"Bhaddako āvuso Maggo||
bhaddikā paṭipadā||
etāsaɱ dukkhatānaɱ pariññāyā,||
alañ ca pan'āvuso Sāriputta appamādāyā" ti.|| ||

 


Contact:
E-mail
Copyright Statement