Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya:
IV. Saḷāyatana Vagga:
42: Gāmani Saɱyuttaɱ

Sutta 1

Caṇḍa-Gāmaṇī Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthi yaɱ viharati Jetavane Anāthapiṇḍikassa ārāme.|| ||

Atha kho caṇḍo gāmaṇī yena Bhagavā ten'upasankami.|| ||

upasankamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Caṇḍo gāmaṇī Bhagavantaɱ etad avoca:|| ||

"Ko nu kho bhante hetu||
ko paccayo||
yena midh'ekacco 'caṇḍo'||
teva saŋkhaɱ gacchati?|| ||

Ko pana bhante hetu||
ko paccayo||
yena midh'ekacco 'sorato'||
teva saŋkhaɱ gacchatī ti?|| ||

Idha gāmaṇī ekaccassa rāgo appahīno hoti,||
rāgassa appahīnattā pare kopenti,||
parehi kopiyamāno kopaɱ pātu-karoti,||
so 'caṇḍo' teva saŋkhaɱ gacchati;|| ||

doso appahīno hoti,||
dosassa appahīnattā pare kopenti,||
parehi kopiyamāno kopaɱ pātu-karoti,||
so 'caṇḍo' teva saŋkhaɱ gacchati;|| ||

moho appahīno hoti,||
mohassa appahīnattā pare kopenti,||
parehi kopiyamāno kopaɱ pātu-karoti,||
so 'caṇḍo' teva saŋkhaɱ gacchati.

Ayaɱ kho gāmaṇī hetu||
ayaɱ paccayo||
yena midh'ekacco 'caṇḍo'||
teva saŋkhaɱ gacchati.|| ||

 


 

Idha pana gāmaṇī ekaccassa||
rāgo pahīno hoti,||
rāgassa pahīnattā pare na kopenti,||
parehi kopiyamāno kopaɱ na pātu-karoti,||
so 'sorato' teva saŋkhaɱ gacchati;|| ||

doso pahīno hoti,||
dosassa pahīnattā pare na kopenti,||
parehi kopiyamāno kopaɱ na pātu-karoti,||
so 'sorato' teva saŋkhaɱ gacchati;|| ||

moho pahīno hoti,||
mohassa pahīnattā pare na kopenti,||
parehi kopiyamāno kopaɱ na pātu-karoti,||
so 'sorato' teva saŋkhaɱ gacchati.|| ||

Ayaɱ kho gāmaṇī hetu||
ayaɱ paccayo||
yena midh'ekacco 'sorato' teva saŋkhaɱ gacchati.|| ||

[306] Evaɱ vutte caṇḍo gāmaṇī Bhagavantaɱ etad avoca:|| ||

"Abhikkantaɱ bhante||
abhikkantaɱ bhante!|| ||

Seyyathā pi bhante nikkujjitaɱ vā ukkujjeyya,||
paṭicchantaɱ vā vivareyya,||
mūḷahassa vā Maggaɱ ācikkheyya andha-kāre vā tela pajjotaɱ dhāreyya cakkhu-manto rūpāni dakkhintīti,||
evam evaɱ Bhagavatā aneka-pariyāyena dhammo pakāsito,||
es'āhaɱ bhante Bhagavantaɱ saraṇaɱ gacchāmi||
Dhammañ ca||
bhikkhu-sanghañ ca,||
upāsakaɱ maɱ Bhagavā dhāretu ajja-t-agge pāṇupetaɱ saraṇaɱ gatanti.|| ||

 


Contact:
E-mail
Copyright Statement