Saṃyutta Nikāya
5. Mahā-Vagga
45. Magga Saṃyutta
3. Micchatta Vagga
Sutta 25
A-Sappurisa Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh] Evam me sutaṃ:|| ||
Ekaṃ samayam Bhagavā Sāvatthiyaṃ viharati.|| ||
Tatra kho Bhagavā bhikkhū āmantesi:|| ||
"Bhikkhavo" ti.|| ||
"Bhadante" ti te bhikkhū Bhagavato paccassosuṃ.|| ||
Bhagavā etad avoca:|| ||
"Asappurisañ ca vo bhikkhave, desissāmi||
sappurisañ ca.|| ||
Taṃ suṇātha.|| ||
Katamo ca bhikkhave, a-sappuriso?|| ||
Idha bhikkhave, ekacco||
micchā-diṭṭhiko hoti||
micchā-saṅkappo||
micchā-vāco||
micchā-kammanto||
micchā-ājīvo||
micchā-vāyāmo||
micchā-sati||
micchā-samādhi.|| ||
Ayaṃ vuccati bhikkhave, a-sappuriso.|| ||
§
Katamo ca bhikkhave, sappuriso?|| ||
Idha bhikkhave, ekacco||
sammā-diṭṭhiko hoti||
sammā-saṅkappo||
sammā-vāco||
[20]||
sammā-kammanto||
sammā-ājīvo||
sammā-vāyāmo||
sammā-sati||
sammā-samādhi.|| ||
Ayaṃ vuccati bhikkhave, sappuriso" ti.
