Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya,
V: Mahā-Vagga
47. Satipaṭṭhana Saɱyutta
2. Nālandā Vagga

Sutta 14

Cela Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh][nypo] Evam me sutaɱ:|| ||

Ekaɱ samayaɱ Bhagavā Vajjīsu viharati||
Ukkacelāyaɱ Gaŋgāya nadiyā tīre mahatā bhikkhu-saŋghena saddhiɱ||
aciraparinibbutesu Sāriputta-Moggallānesu.|| ||

Tena kho pana samayena Bhagavā bhikkhu-Saŋgha-parivuto ajjhokāse nisinno hoti.|| ||

Atha kho Bhagavā tuṇbhībhūtaɱ bhikkhu-Saŋghaɱ anuviloketvā bhikkhū āmantesi:|| ||

[164] "Api myāyaɱ bhikkhave, parisā suññā viya khāyati.|| ||

Parinibbutesu Sāriputta-Moggallānesu||
suññā me sā bhikkhave, parisā hoti.|| ||

Anapekkhā tassaɱ disāyaɱ hoti,||
yassaɱ disāyaɱ Sāriputta-Moggallānā viharanti.|| ||

 

BJT Pali:

Api ca khvāyaɱ bhikkhave, parisā suññā viya khāyati parinibbutesu Sāriputta-Moggallānesu asuññā me sā bhikkhave, parisā hoti anapekhā tassaŋ disāyaɱ hoti, yassaŋ disāyaɱ Sāriputta-Moggallānā viharanti.|| ||

Ye pi te bhikkhave, ahesuɱ atītam addhānaɱ arahanto Sammā-Sam-Buddhā, tesam pi Bhagavantānaɱ etaparamaɱ yeva sāvakayugaɱ ahosi, seyyathā pi mayhaɱ Sāriputta-Moggallānā.|| ||

CSCD Pali:

"Api myayaɱ, bhikkhave, parisa suñña viya khayati parinibbutesu sariputtaMoggallanesu.|| ||

Asuñña me, bhikkhave, parisa hoti, anapekkha tassaɱ disayaɱ hoti, yassaɱ disayaɱ sariputtaMoggallāna viharanti.|| ||

 


 

Ye hi te bhikkhave, ahesuɱ atītam addhānaɱ arahanto Sammā-Sam-Buddhā,||
tesam pi Bhagavantānaɱ etaparamaɱ yeva sāvakayugaɱ ahosi.|| ||

Seyyathā pi mayhaɱ Sāriputta-Moggallānā.|| ||

Ye pi te bhikkhave, bhavissanti anāgatam addhānaɱ arahanto Sammā-Sam-Buddhā,||
tesam pi Bhagavantānaɱ etaparamaɱ yeva sāvakayugaɱ bhavissati.|| ||

Seyyathā pi mayhaɱ Sāriputta-Moggallānā.|| ||

Acchariyaɱ bhikkhave, sāvakānaɱ abbhutaɱ bhikkhave,||
sāvakānaɱ Satthu cā nāmā ca sāsanakarā bhavissanti ovādapatikarā.|| ||

Catunnañ ca parisānaɱ piyā bhavissanti manāpā garu bhāvanīyā ca.|| ||

Acchariyaɱ bhikkhave, Tathāgatassa, abbhutaɱ bhikkhave, Tathāgatassa.|| ||

Eva-rūpe pi nāma sāvakayuge parinibbute n'atthi Tathāgatassa soko vā paridevo vā.|| ||

Taɱ kut'ettha bhikkhave, labbhā.|| ||

Yaɱ taɱ jātaɱ bhūtaɱ saŋkhataɱ paloka-dhammaɱ,||
'taɱ vata mā palujjī' ti||
n'etaɱ ṭhānaɱ vijjati.|| ||

Seyyathā pi bhikkhave, mahato rukkhassa tiṭṭhato sāravato ye mahantarā khandhā te palujjeyyuɱ.|| ||

Evam eva kho, bhikkhave, mahato bhikkhu-Saŋghassa tiṭṭhato sāravato Sāriputta-Moggallānā parinibbutā.|| ||

Taɱ kutettha bhikkhave labbhā, yaɱ taɱ jātaɱ bhūtaɱ saŋkhataɱ paloka-dhammaɱ,||
'taɱ vata mā palujjī' ti||
n'etaɱ ṭhānaɱ vijjati.|| ||

 


 

Tasmā ti ha bhikkhave, atta-dīpā viharatha||
atta-saraṇā||
anañña-saraṇā||
dhamma-dīpā||
dhamma-saraṇā||
anañña-saraṇā.|| ||

Kathañ bhikkhave, bhikkhu, atta-dīpā viharatha||
atta-saraṇā||
anañña-saraṇā||
dhamma-dīpā||
dhamma-saraṇā||
anañña-saraṇā?|| ||

Idha bhikkhave, bhikkhu kāye kāy'ānupassī viharati,||
ātāpī||
sampajāno||
satimā||
vineyya loke abhijjhā-domanassaɱ.|| ||

Vedanāsu vedan'ānupassī viharati,||
ātāpī||
sampajāno||
satimā||
vineyya loke abhijjhā-domanassaɱ.|| ||

Citte citt'ānupassī viharati,||
ātāpī||
sampajāno||
satimā||
vineyya loke abhijjhā-domanassaɱ.|| ||

Dhammesu Dhamm'ānupassī viharati,||
ātāpī||
sampajāno||
satimā||
vineyya loke abhijjhā-domanassaɱ.|| ||

Evaɱ kho bhikkhave, bhikkhu atta-dīpo viharati||
atta-saraṇo||
anañña-saraṇo||
dhamma-dīpo||
dhamma-saraṇo||
anañña-saraṇo.|| ||

Ye hi keci bhikkhave, etarahi vā mam'accaye vā atta-dīpā viharissantī||
atta-saraṇā||
anañña-saraṇā||
dhamma-dīpā||
dhamma-saraṇā||
anañña-saraṇā.|| ||

Tama-t-agge p'ete bhikkhave, bhikkhu bhavissanti||
ye keci sikkhākāmā" ti.|| ||

 


Contact:
E-mail
Copyright Statement