Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
5. Mahā-Vagga
54. Ānāpāna Saɱyutta
2. Ānanda or Dutiya Vagga

Sutta 12

Kaŋkheyya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1994 Pali Text Society Saɱyutta-Nikaya Part V, edited by M. Leon Feer

 


[327]

[1-2][pts][bodh] Ekaɱ samayaɱ āyasmā Lomasavaŋgīso Sakkesu viharati||
Kapilavatthusmiɱ Nigrodhārāme.|| ||

2. Atha kho Mahānāmo Sakko||
yen'āyasmā Lomasavaŋgīso ten'upasankami.|| ||

Upasaŋkamitvā āyasmantaɱ Lomasavaŋgīsaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Mahānāmo Sakko||
āyasmantaɱ Lomasavaŋgīsaɱ etad avoca:|| ||

3. "So eva nu kho bhante,||
sekho vihāro so Tathāgata-vihāro||
udāhu añño sekho vihāro añño Tathāgata-vihāro" ti?|| ||

Na kho āvuso Mahānāma,||
sv'eva sekho vihāro so Tathāgata-vihāro,||
añño kho āvuso Mahānāma sekho vihāro||
añño Tathāgata-vihāro.|| ||

4. Ye te āvuso Mahānāma bhikkhū||
sekhā appattamānasā anuttaraɱ yoga-k-khemaɱ patthayamānā viharanti.|| ||

Te pañca nīvaraṇe pahāya viharanti.|| ||

Katame pañca?|| ||

Kāma-c-chanda-nīvaraṇaɱ pahāya viharanti.|| ||

Vyāpāda-nīvaraṇaɱ pahāya viharanti.|| ||

Thīna-middha-nīvaraṇaɱ pahāya viharanti.|| ||

Uddhacca-kukkucca-nīvaraṇaɱ pahāya viharanti.|| ||

Vicikicchā-nīvaraṇaɱ pahāya viharanti.|| ||

Ye pi te āvuso Mahānāma, bhikkhū||
sekhā appattamānasā anuttaraɱ yoga-k-khemaɱ patthayamānā viharanti.|| ||

Te ime pañca nīvaraṇe pahāya viharanti.|| ||

5. Ye ca kho te āvuso Mahānāma bhikkhū||
arahanto khīṇ'āsavā vusitavanto||
kata-karaṇīyā ohita-bhārā||
anuppatta-sadatthā parikkhīṇa-bhava-saŋyojanā||
samma'd'aññā vimuttā tesaɱ||
pañca nīvaraṇā pahīnā||
ucchinna-mūlā tālā-vatthu-katā anabhāva-katā||
āyatiɱ anuppāda-dhammā.|| ||

Katame pañca?|| ||

Kāma-c-chanda-nīvaraṇaɱ pahīnaɱ||
ucchinna-mūlaɱ tāla-vatthu-kataɱ anabhāva-kataɱ||
āyatiɱ anuppāda-dhammaɱ.|| ||

Vyāpāda-nīvaraṇaɱ pahīnaɱ||
ucchinna-mūlaɱ tāla-vatthu-kataɱ anabhāva-kataɱ||
āyatiɱ anuppāda-dhammaɱ.|| ||

Thīna-middha-nīvaraṇaɱ pahīnaɱ||
ucchinna-mūlaɱ tāla-vatthu-kataɱ anabhāva-kataɱ||
āyatiɱ anuppāda-dhammaɱ.|| ||

Uddhacca-kukkucca-nīvaraṇaɱ pahīnaɱ||
ucchinna-mūlaɱ tāla-vatthu-kataɱ anabhāva-kataɱ||
āyatiɱ anuppāda-dhammaɱ.|| ||

Vicikicchā-nīvaraṇaɱ pahīnaɱ||
ucchinna-mūlaɱ tāla-vatthu-kataɱ anabhāva-kataɱ [328]||
āyatiɱ anuppāda-dhammaɱ.|| ||

Ye te āvuso Mahānāma,||
bhikkhū arahanto||
khīṇ'āsavā vusitavanto||
kata-karaṇīyā ohita-bhārā||
anuppatta-sadatthā||
parikkhīṇa-bhava-saŋyojanā||
samma'd'aññā vimuttā.|| ||

Tesaɱ ime pañca nīvaraṇā pahīnā||
ucchinna-mūlā tālā-vatthu-katā anabhāva-katā||
āyatiɱ anuppāda-dhammā.|| ||

6. Tad aminā p'etaɱ āvuso Mahānāma||
pariyāyena veditabbaɱ.|| ||

Yathā añño va sekho vihāro,||
añño Tathāgata-vihāro.|| ||

7. Ekam idāhaɱ āvuso Mahānāma||
samayaɱ Bhagavā Icchānaŋgale viharati||
Icchānangalavana-saṇḍe.|| ||

8. Tatra kho āvuso Mahānāma Bhagavā bhikkhū āmantesi:|| ||

'Icchām'ahaɱ bhikkhave,||
temāsaɱ paṭisallīyituɱ.|| ||

Namhi kenaci upasankamitabbo||
aññatra ekena piṇḍa-pātanīhārakenā' ti.|| ||

'Evaɱ bhante' ti kho te bhikkhū Bhagavāto paṭi-s-sutvā||
nāssu koci Bhagavāntaɱ upasankamati||
aññatra ekena piṇḍa-pāta-nīhārakena.|| ||

9. Atha kho Bhagavā||
tassa temāsassa accayena paṭisallānā||
vuṭṭhito bhikkhū āmantesi:|| ||

'Sa ce vo bhikkhave, añña-titthiyā paribbājakā evaɱ puccheyyuɱ:|| ||

"Katamena āvuso vihārena Samaṇo Gotamo||
vassāvāsaɱ bahulaɱ vihāsī" ti?|| ||

Evaɱ puṭṭhā tumhe bhikkhave,||
tesaɱ añña-titthiyānaɱ paribbājakānaɱ||
evaɱ vyākareyyātha:|| ||

"Ānāpāna-sati-samādhinā kho āvuso,||
Bhagavā vassāvāsaɱ bahulaɱ vihāsī" ti.|| ||

10. Idh'āhaɱ bhikkhave, sato assasāmī,||
sato passasāmi.|| ||

11. Dīghaɱ vā assasanto "dīghaɱ assasāmī" ti pajānāmi,||
dīghaɱ vā passasanto "dīghaɱ passasāmī" ti pajānāmi.|| ||

Rassaɱ vā assasanto "rassaɱ assasāmī" ti pajānāmi,||
rassaɱ vā passasanto "rassaɱ passasāmī" ti pajānāmi.|| ||

"Sabba-kāya-paṭisaŋvedī assa-sissāmī" ti pajānāmi,||
"sabba-kāya-paṭisaŋvedī passa-sissāmī" ti pajānāmi.|| ||

"Passam-bhayaɱ kāya-sankhāraɱ assa-sissāmī" ti pajānāmī,||
"passam-bhayaɱ kāya-sankhāraɱ passa-sissāmī" ti pajānāmī.|| ||

"Pīti-paṭisaŋvedī assa-sissāmī" ti pajānāmī,||
"pīti-paṭisaŋvedī passa-sissāmī" ti pajānāmī.|| ||

"Sukha-paṭisaŋvedī assa-sissāmī" ti pajānāmī,||
"sukha-paṭisaŋvedī passa-sissāmī" ti pajānāmī.|| ||

"Citta-sankhāra-paṭisaŋvedī assa-sissāmī" ti pajānāmī,||
"citta-sankhāra-paṭisaŋvedī passa-sissāmī" ti pajānāmī.|| ||

"Passam-bhayaɱ citta-sankhāraɱ assa-sissāmī" ti pajānāmī,||
"passam-bhayaɱ citta-sankhāraɱ passasimī" ti pajānāmi.|| ||

"Citta-paṭisaŋvedī assa-sissāmī" ti pajānāmi,||
"Citta-paṭisaŋvedī passa-sissāmī" ti pajānāmi.|| ||

"Abhi-p-pamodayaɱ cittaɱ assa-sissāmī" ti pajānāmi,||
"abhippamodayaɱ cittaɱ passa-sissāmī" ti pajānāmi.|| ||

"Samādahaɱ cittaɱ assa-sissāmī" ti pajānāmi,||
"samādahaɱ cittaɱ passa-sissāmī" ti pajānāmi.|| ||

"Vimocayaɱ cittaɱ assa-sissāmī" ti pajānāmi,||
"vimocayaɱ cittaɱ passa-sissāmī" ti pajānāmi.|| ||

"Paṭinissagg-ā-nupassī assa-sissāmī" ti pajānāmi,||
"paṭinissagg-ā-nupassī passa-sissāmī" ti pajānāmi.|| ||

17. Yaɱ hi taɱ bhikkhave, sammā vadamāno vadeyya:|| ||

"Ariya-vihāro iti pi||
brahma-vihāro iti pi||
Tathāgata-vihāro iti pi" ti.|| ||

Ānāpāna-sati-samādhiɱ sammā vadamāno vadeyya:|| ||

"Ariya-vihāro iti pi||
brahma-vihāro iti pi||
Tathāgata-vihāro iti pi" ti.|| ||

18. Ye te bhikkhave, bhikkhū sekhā appattamānasā anuttaraɱ yoga-k-khemaɱ patthayamānā viharanti,||
tesaɱ ānāpāna-sati-samādhi bhāvito bahulī-kato āsavānaɱ khayāya saŋvaṭṭati.|| ||

Ye ca kho te bhikkhave, bhikkhū arahanto khīṇ'āsavā vusitavanto kata-karaṇīyā ohita-bhārā anuppatta-sadatthā parikkhīṇa-bhavasaɱ yojanā||
samma-daññā vimuttā,||
tesaɱ ānāpāna-sati-samādhi||
bhāvito||
bahulī-kato||
diṭṭhe'va dhamme sukha-vihārāya||
c'eva saŋvaṭṭati sati-sampajaññāya ca.|| ||

19. Yaɱ hi taɱ bhikkhave, sammā vadamāno vadeyya:|| ||

"Ariya-vihāro iti pi||
brahma-vihāro iti pi||
Tathāgata-vihāro iti pi" ti.|| ||

Ānāpāna-sati-samādhiɱ sammā vadamāno vadeyya:|| ||

"Ariya-vihāro iti pi||
brahma-vihāro iti pi||
Tathāgata-vihāro iti pi"' ti.|| ||

20. Iminā kho etaɱ āvuso Mahānāma,||
pariyāyena veditabbaɱ||
yathā aññova sekho vihāro||
añño Tathāgata-vihāro" ti.|| ||

 


Contact:
E-mail
Copyright Statement