Saṃyutta Nikāya
5. Mahā-Vagga
56. Sacca Saṃyutta
5. Papāta Vagga

Sutta 43

Pariḷāha Suttaṃ

 

---

[450]

[1][pts][bodh] Evam me sutaṃ:|| ||

Atthi bhikkhave, mahā-pariḷāho nāma Nirayo tattha yaṃ kiñci cakkhunā rūpaṃ passati,||
aniṭṭha-rūpaṃ yeva [451] passati,||
no iṭṭha-rūpaṃ.|| ||

Akanta-rūpaṃ yeva passati,||
no kanta-rūpaṃ.|| ||

Amanāparūpaṃ yeva passati,||
no manāparūpaṃ.|| ||

Yaṃ kiñci sotena saddaṃ suṇāti aniṭṭhasaddaṃ yeva suṇāti,||
no iṭṭhasaddaṃ.|| ||

Akantasaddaṃ yeva suṇāti,||
no kantasaddaṃ.|| ||

Amanāpasaddaṃ yeva suṇāti,||
no manāpasaddaṃ.|| ||

■

Yaṃ kiñci ghānena gandhaṃ ghāyati,||
aniṭṭhagandaṃ yeva ghāyati,||
no iṭṭhagandhaṃ.|| ||

Akantagandhaṃ yeva ghāyati,||
no kantagandhaṃ.|| ||

Amanāpagandhaṃ yeva ghāyati||
no manāpagandhaṃ.|| ||

Yaṃ kiñci jīvhāya rasaṅ sāyati,||
aniṭṭharasaṅyeva sāyati,||
no iṭṭharasaṃ.|| ||

Akantarasaṅyeva sāyati,||
no kantarasaṃ.|| ||

Amanāparasaṅ yeva sāyati,||
no manāparasaṃ.|| ||

■

Yaṃ kiñci kāyena phoṭṭhabbaṃ phusati,||
aniṭṭhaphoṭṭhabbaṃ yeva phusati,||
no iṭṭhaphoṭṭhabbaṃ.|| ||

Akantaphoṭṭhabbaṃ yeva phusati||
no kantaphoṭṭhabbaṃ.|| ||

Amanāpaphoṭṭhabbaṃ yeva phusati||
no manāpaphoṭṭhabbaṃ.|| ||

■

Yaṃ kiñci manasā dhammaṃ vijānāti||
aniṭṭha-rūpaṃ yeva vijānāti||
no iṭṭha-rūpaṃ.|| ||

Akanta-rūpaṃ yeva vijānāti,||
no kanta-rūpaṃ.|| ||

Amanāparūpaṃ yeva vijānāti||
no manāparūpan" ti.|| ||

 

§

 

Evaṃ vutte aññataro bhikkhu Bhagavantaṃ etad avoca:|| ||

"Mahā vata so bhante, pariḷāho||
sumahā vata so bhante, pariḷāho.|| ||

Atthi nu kho bhante, etamhā pariḷāhā||
añño pariḷāho mahantataro ca bhayānakatarocā" ti?|| ||

"Atthi kho bhikkhu etamhā pariḷāhā||
añño pariḷāho mahantataro ca bhayānakataro cā" ti.|| ||

"Katamo pana bhante, etamhā pariḷāhā||
añño pariḷāho mahantataro ca bhayānakataro cā" ti?|| ||

"Ye hi keci bhikkhu samaṇā vā brāhmaṇā vā||
'idaṃ dukkhan' ti||
yathā-bhūtaṃ na pajānanti.|| ||

'Ayaṃ dukkha-samudayo' ti||
yathā-bhūtaṃ na pajānanti.|| ||

'Ayaṃ dukkha-nirodho' ti||
yathā-bhūtaṃ na pajānanti.|| ||

'Ayaṃ dukkha-nirodha-gāminī paṭipadā' ti||
yathā-bhūtaṃ na pajānanti.|| ||

Te jāti-saṃvaṭṭa-nikesu saṅkhāresu abhiramanti.|| ||

Jarā-saṃvaṭṭa-nikesu saṅkhāresu abhiramanti.|| ||

Maraṇa-saṃvaṭṭa-nikesu saṅkhāresu abhiramanti.|| ||

Soka-parideva-dukkha-domanass'upāyāsa-saṃvaṭṭa-nikesu saṅkhāresu abhiramanti.|| ||

Te jāti-saṃvaṭṭa-nikesu saṅkhāresu abhiratā||
jarā-saṃvaṭṭa-nikesu saṅkhāresu abhiratā||
maraṇa-saṃvaṭṭa-nikesu saṅkhāresu abhiratā||
soka-parideva-dukkha-domanass'upayā-sasaṃvaṭṭa-nikesu saṅkhāresu abhiratā||
jāti-saṃvaṭṭa-nike pi saṅkhāre abhisaṅkhāronti.|| ||

Jarā-saṃvaṭṭa-nike pi saṅkhāre abhisaṅkhāroti.|| ||

Maraṇa-saṃvaṭṭa-nike pi saṅkhāre abhisaṅkhāronti.|| ||

Soka-parideva-dukkha-domanass'upāyāsa-saṃvaṭṭa-nike pi saṅkhāre abhisaṅkhāronti.|| ||

Te jāti-saṃvaṭṭa-nike pi saṅkhāre abhisaṅkhāritvā jarā-saṃvaṭṭa-nike pi saṅkhāre abhisaṅkhāritvā||
maraṇa-saṃvaṭṭa-nike pi saṅkhāre abhisaṅkhāritvā||
soka-parideva-dukkha-domanass'upāyāsa-saṃvaṭṭa-nike pi saṅkhāre abhisaṅkhāritvā||
jāti-pariḷāhena pi pariḍayhanti||
jarā-pariḷāhena pi pariḍayhanti||
maraṇa-pariḷāhena pi pariḍayhanti||
soka-parideva-dukkha-domanass'upāyāsa-pariḷāhena pi pariḍayhanti.|| ||

Te na parimuccanti||
jātiyā jarāya maraṇena sokehi paridevehi dukkhehi domanassehi upāyāsehi,||
na parimuccanti dukkhasmā ti vadāmi.|| ||

 

§

 

Ye ca kho keci bhikkhu samaṇā vā brāhmaṇā vā||
'idaṃ dukkhan' ti||
yathā-bhūtaṃ pajānanti||
'ayaṃ dukkha-samudayo' ti||
yathā-bhūtaṃ pajānanti||
'ayaṃ dukkha-nirodho' ti||
yathā-bhūtaṃ pajānanti||
'ayaṃ dukkha-nirodha-gāminī paṭipadā' ti||
yathā-bhūtaṃ pajānanti.|| ||

Te jāti-saṃvaṭṭa-nikesu saṅkhāresu nābhiramanti.|| ||

Jarā-saṃvaṭṭa-nikesu saṅkhāresu nābhiramanti.|| ||

Maraṇa-saṃvaṭṭa-nikesu saṅkhāresu nābhiramanti.|| ||

Soka-parideva-dukkha-domanass'upāyāsa-saṃvaṭṭa-nikesu saṅkhāresu nābhiramanti.|| ||

Te jāti-saṃvaṭṭa-nikesu saṅkhāresu anabhiratā||
jarā-saṃvaṭṭa-nikesu saṅkhāresu anabhiratā||
maraṇa-saṃvaṭṭa-nikesu saṅkhāresu anabhiratā||
soka-parideva-dukkha-domanass'upāyāsa-saṃvaṭṭa-nikesu saṅkhāresu anabhiratā||
jāti-saṃvaṭṭa-nike pi saṅkhāre nābhisaṅkhāronti.|| ||

Jarā-saṃvaṭṭa-nike pi saṅkhāre nābhisaṅkhāronti.|| ||

Maraṇa-saṃvaṭṭa-nike pi saṅkhāre nābhisaṅkhāronti.|| ||

Soka-parideva-dukkha-domanass'upāyāsa-saṃvaṭṭa-nike pi saṅkhāre nābhisaṅkhāronti.|| ||

Te jāti-saṃvaṭṭa-nike pi saṅkhāre anabhisaṅkhāritvā||
jarā-saṃvaṭṭa-nike pi saṅkhāre anabhisaṅkhāritvā||
maraṇa-saṃvaṭṭa-nike pi saṅkhāre anabhisaṅkhāritvā||
soka-parideva-dukkha-domanass'upāyāsa saṃvaṭṭa-nike pi saṅkhāre anabhisaṅkhāritvā||
jāti-pariḷāhena pi na pariḍayhanti,||
jarā-pariḷāhena pi na pariḍayhanti,||
maraṇa-pariḷāhena pi na pariḍayhanti,||
soka-parideva-dukkha-domanass'upāyāsapariḷāhena pi na pariḍayhanti.|| ||

Te parimuccanti jātiyā [452] jarāya maraṇena sokehi paridevehi dukkhehi domanassehi upāyāsehi,||
parimuccanti dukkhasmā ti vadāmi.|| ||

Tasmātiha bhikkhu,||
'idaṃ dukkhan' ti yogo karaṇīyo||
'ayaṃ dukkha-samudayo' ti yogo karaṇīyo||
'ayaṃ dukkha-nirodho' ti yogo karaṇīyo||
'ayaṃ dukkha-nirodha-gāminī paṭipadā' ti yogo karaṇīyo" ti.|| ||