Aṇguttara Nikāya
Catukka Nipāta
XII: Kesi Vagga
Sutta 111
Kesi Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][than] Evaṃ me sutaṃ:|| ||
Ekaṃ samayaṃ Bhagavā Sāvatthiyaṃ viharati.|| ||
2. Atha kho Kesi assa-damma-sārathī yena Bhagavā ten'upasaṇkami.|| ||
Upasaṇkamitvā Bhagavantaṃ abhivādetvā eka-m-antaṃ nisīdi.|| ||
Eka-m-antaṃ nisinnaṃ kho Kesiṃ assa-damma-sārathiṃ Bhagavā etad avoca:|| ||
2. "Tvaṃ ca khvāsi, Kesi, saññāto assa-damma-sārathi.|| ||
Kathaṃ ca pana tvaṃ Kesi, assa-dammaṃ vinesī" ti?|| ||
"Ahaṃ kho bhante assa-dammaṃ saṇhena pi vinemi,||
pharusena pi vinemi,||
saṇha-pharusena pi vinemī" ti.|| ||
Sace te Kesi, assa-dammo saṇhena pi vinayaṃ na upeti,||
pharusena pi vinayaṃ na upeti,||
saṇha-pharusena pi vinayaṃ na upeti,||
kinti naṃ karosīti?|| ||
Sace me bhante assa-dammo saṇhena vinayaṃ na upeti,||
pharusena pi vinayaṃ na upeti,||
saṇha-pharusena vinayaṃ na upeti,||
hanāmi naṃ bhante.|| ||
Taṃ kissa hetu?|| ||
Mā me ācariya-kulassa avaṇṇo ahosī ti.|| ||
Bhagavā pana bhante anuttaro purisa-damma-sārathi,||
kathaṃ pana bhante Bhagavā purisa-dammaṃ vinetī ti?|| ||
3. Ahaṃ kho Kesi, purisa-dammaṃ saṇhena pi vinemi,||
pharusena pi vinemi,||
saṇha-pharusena pi vinemi.|| ||
Tatr'idaṃ Kesi, saṇhasmiṃ:|| ||
Iti kāya-su-caritaṃ,||
iti kāya-su-caritassa vipāko.|| ||
Iti vacī-su-caritaṃ,||
iti vacī-su-caritassa vipāko.|| ||
Iti mano-su-caritacaṃ,||
iti mano-su-caritassa vipako.|| ||
Iti devā,||
iti manussā.|| ||
Tatr'idaṃ Kesi, pharusasmiṃ:|| ||
Iti kāya-du-c-caritaṃ,||
iti kāya-du-c-caritassa vipāko.|| ||
Iti vacī-du-c-caritaṃ,||
iti vacī-du-c-caritassa vipāko.|| ||
Iti mano-du-c-caritaṃ||
iti mano-du-c-caritassa vipāko.|| ||
Iti Nirayo,||
iti tiracchāna-yoni,||
iti petti-visayo.|| ||
Tair'idaṃ Kesi, saṇha-pharusasmiṃ:|| ||
Iti kāya-su-caritaṃ,||
iti kāya-su-caritassa vipāko.|| ||
Iti kāya-du-c-caritaṃ,||
iti kāya-du-c-caritassa vipāko.|| ||
Iti vacī-su-caritaṃ,||
iti vacī-su-caritassa vipāko.|| ||
Iti vaci-du-c-caritaṃ,||
iti vacī-du-c-caritassa vipāko.|| ||
Iti mano-su-caritaṃ,||
iti mano-su-caritassa vipāko.|| ||
Iti mano-du-c-caritaṃ,||
iti mano-du-c-caritassa vipāko.|| ||
Iti devā, iti manussā,||
iti Nirayo,||
iti tiracchāna-yoni,||
iti petti-visayo ti.|| ||
Sace te bhante purisa-dammo saṇhena vinayaṃ na upeti,||
[113] pharusena vinayaṃ na upeti,||
saṇha-pharusena vinayaṃ na upeti,||
kinti naṃ Bhagavā karotī ti?|| ||
Sace me Kesi, purisa-dammo saṇhena vinayaṃ na upeti,||
pharusena vinayaṃ na upeti,||
saṇha-pharusena vinayaṃ na upeti,||
hanāmi naṃ Kesi ti.|| ||
4. Na kho bhante Bhagavato pāṇātipāto kappati.|| ||
Atha ca pana Bhagavā evam āha —||
hanāmi naṃ Kesi ti.|| ||
Saccaṃ Kesi, na Tathāgatassa pāṇātipāto kappati.|| ||
Api ca so purisa-dammo saṇhena vinayaṃ na upeti,||
pharusena vinayaṃ na upeti,||
saṇha-pharusena vinayaṃ na upeti,||
na Tathāgato vattabbaṃ anusāsitabbaṃ maññati.|| ||
Na pi viññū sabrahma-cārī vattabbaṃ anusāsitabbaṃ maññanti.|| ||
Vadho hesa Kesi,||
ariyassa vinaye yaṃ na Tathāgato vattabbaṃ anusāsitabbaṃ maññati.|| ||
Na pi viññū sabrahma-cārī vattabbaṃ anusāsitabbaṃ maññantī ti.|| ||
So hi nūna bhante Sugatahato hoti yaṃ na Tathāgato vattabbaṃ anusāsitabbaṃ maññati.|| ||
Na pi viññū sabrahma-cārī vattabbaṃ anusāsitabbaṃ maññantī ti.|| ||
Abhikkantaṃ bhante, abhikkantaṃ bhante!|| ||
Seyyathā pi bhante, nikkujjitaṃ vā ukkujjeyya,||
paṭi-c-channaṃ vā vivareyya,||
mūḷhassa vā Maggaṃ ācikkheyya,||
andha-kāre vā tela-pajjotaṃ dhāreyya,||
cakkhu-manto rūpāni dakkhintī ti.|| ||
Evam evaṃ Bhagavatā aneka-pariyāyena Dhammo pakāsito,||
es'āhaṃ Bhagavantaṃ saraṇaṃ gacchāmi||
dhammaṃ ca||
bhikkhu-saṇghaṃ ca.|| ||
Upāsakaṃ maṃ bhante Bhagavā dhāretu ajja-t-agge pāṇupetaṃ saraṇaṃ gatanti.|| ||
