Aṇguttara Nikāya
Pañcaka-Nipāta
XVIII. Upāsaka Vaggo
Sutta 176
Pīti Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][than][pts] Evaṃ me sutaṃ:|| ||
Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Atha kho Anāthapiṇḍiko gahapati pañca-mattehi upāsaka-satehi parivuto yena Bhagavā ten'upasaṇkami.|| ||
Upasaṇkamitvā Bhagavantaṃ abhivādetvā eka-m-antaṃ nisidi.||
Eka-m-antaṃ nisinnaṃ kho Anāthapiṇḍikaṃ gahapatiṃ Bhagavā etad avoca:|| ||
2. Tumhe pi kho gahapati,
bhikkhu-saṇghaṃ pacc'upaṭṭhitā cīvara-piṇḍa-pāta-senā-sanagilāna-paccay-abhesajja-parikkhārena.|| ||
Na kho gahapati,
tāvataken'eva tuṭṭhi karaṇiyā:|| ||
'Mayaṃ bhikkhu-saṇghaṃ pacc'upaṭṭhitā
cīvara-piṇḍa-pāta-senā-sanagilāna-paccay-abhesajja-parikkhārenā' ti.|| ||
Tasmātiha gahapati,
evaṃ sikkhitabbaṃ:|| ||
[207]3."Kinti mayaṃ kālena kālaṃ pavivekaṃ pītiṃ upasampajja vihareyyāmā" ti.|| ||
Evaṃ hi vo gahapati sikkhitabban ti.|| ||
§
4. Evaṃ vutte āyasmā Sāriputto Bhagavantaṃ etad avoca:|| ||
Acchariyaṃ bhante!|| ||
Abbhutaṃ bhante!|| ||
Yāva su-bhāsitatañ c'idaṃ bhante, Bhagavatā:-|| ||
"Tumhe kho gahapati,
bhikkhu-saṇghaṃ pacc'upaṭṭhitā
cīvara-piṇḍa-pāta-senā-sanagilāna-paccay-abhesajja-parikkhārena.|| ||
Na kho gahapati tāvataken'eva tuṭṭhi karaṇiyā:|| ||
'Mayaṃ bhikkhu-saṇghaṃ pacc'upaṭṭhitā
cīvara-piṇḍa-pāta-senā-sanagilāna-paccay-abhesajja-parikkhārenā' ti.|| ||
Tasmātiha gahapati,
evaṃ sikkhitabbaṃ:|| ||
"Kinti mayaṃ kālena kālaṃ pavivekaṃ pītiṃ upasampajja vihareyyāmā' ti.|| ||
Evaṃ hi vo gahapati,
sikkhitabban' ti.|| ||
■
Yasmiṃ bhante,
samaye ariya-sāvako pavivekaṃ pītiṃ upasampajja viharati.|| ||
Pañc'assa ṭhānāni tasmiṃ samaye na honti:|| ||
Yam pi'ssa kām'ūpasaṃhitaṃ dukkhaṃ domanassaṃ,
tam pi'ssa tasmiṃ samaye na hoti.|| ||
■
Yam pi'ssa kām'ūpasaṃhitaṃ sukhaṃ somanassaṃ,
tam pi'ssa tasmiṃ samaye na hoti.|| ||
■
Yam pi'ssa akusalupasaṃhitaṃ dukkhaṃ domanassaṃ,
tam pi'ssa tasmiṃ samaye na hoti.|| ||
■
Yam pi'ssa akusal'ūpasaṃhitaṃ sukhaṃ somanassaṃ,
tam pi'ssa tasmiṃ samaye na hoti.|| ||
■
Yam pi'ssa kusal'ūpasaṃhitaṃ dukkhaṃ domanassaṃ,
tam pi'ssa tasmiṃ samaye na hoti.|| ||
Yasmiṃ bhante,
samaye ariya-sāvako pavivekaṃ pītiṃ upasampajja viharati.
Imāni'ssa pañca ṭhānāni tasmiṃ samaye na hontī ti.|| ||
§
Sādhu! Sādhu! Sāriputta.|| ||
Yasmiṃ Sāriputta, samaye [208] ariya-sāvako pavivekaṃ pītiṃ upasampajja viharati,
pañc'assa ṭhānāni tasmiṃ samaye na honti:|| ||
Yam pi'ssa kām'ūpasaṃhitaṃ dukkhaṃ domansasaṃ,
tam pi'ssa tasmim samaye na hoti.|| ||
■
Yam pi'ssa kām'ūpasaṃhitaṃ sukhaṃ somanassaṃ,
tam pi'ssa tasmiṃ samaye na hoti.|| ||
■
Yam pi'ssa akusal'ūpasaṃhitaṃ dukkhaṃ domanassaṃ,
tam pi'ssa tasmiṃ samaye na hoti.|| ||
■
Yam pi'ssa akusal'ūpasaṃhitaṃ sukhaṃ somanassaṃ,
tam pi'ssa tasmiṃ samaye na hoti.|| ||
■
Yam pi'ssa kusal'ūpasaṃhitaṃ dukkhaṃ domanassaṃ,
tam pi'ssa tasmiṃ samaye na hoti.|| ||
Yasmiṃ Sāriputta samaye ariya-sāvako pavivekaṃ pītiṃ upasampajja viharati,
imāni'ssa pañca ṭhānāni tasmiṃ samaye na hontī ti.|| ||
