Aṇguttara Nikāya
VIII. Aṭṭhaka Nipāta
IV. Dāna Vagga
Sutta 34
Khett'Upama Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh] Evaṃ me sutaṃ:|| ||
Ekaṃ samayaṃ Bhagavā Sāvatthiyaṃ viharati
Jetavane Anāthapiṇḍikassa ārāme.|| ||
Tatra kho Bhagavā bhikkhū āmantesi:|| ||
"Bhikkhavo" ti.|| ||
"Bhadante" ti te bhikkhū Bhagavato paccassosuṃ.|| ||
Bhagavā etad avoca:|| ||
Aṭṭh'aṇga-samannāgate bhikkhave, khette bījaṃ vuttaṃ na maha-p-phalaṃ hoti||
na maha-s-sādaṃ||
na phātiyeyyaṃ.|| ||
Kathaṃ aṭṭh'aṇga-samannāgate?|| ||
2. Idha, bhikkhave, khettaṃ unnāmaninnāmī ca hoti,||
pāsāṇa-sakkharillañ ca hoti,||
usarañca hoti,||
na ca gambhīrasītaṃ hoti,||
aa āya-sampannaṃ hoti,||
na apāya-sampannaṃ hoti,||
na mātikā-sampannaṃ hoti,||
na mariyādā-sampannaṃ hoti.|| ||
Evaṃ aṭṭh'aṇga-samannāgate bhikkhave khette bījaṃ vuttaṃ na maha-p-phalaṃ hoti,||
na maha-s-sādaṃ,||
na phātiyeyyaṃ.|| ||
Evam eva kho bhikkhave aṭṭh'aṇga-samannāgatesu samaṇa-brāhmaṇesu dānaṃ dinnaṃ na maha-p-phalaṃ hoti,||
na mahā-nisaṃsaṃ||
na mahā-jutikaṃ||
na mahā-vipphāraṃ.|| ||
Kathaṃ aṭṭh'aṇga-samannāgatesu?|| ||
3. Idha, bhikkhave, samaṇa-brāhmaṇā,||
micchā-diṭṭhikā honti||
micchā-saṇkappā,||
micchā-vācā,||
micchā-kammantā,||
micchā-ājīvā,||
micchā-vāyāmā,||
micchā-satino,||
micchā-samādhino.|| ||
Evaṃ aṭṭh'aṇga-samannāgatesu bhikkhave samaṇa-brāhmaṇesu dānaṃ dinnaṃ na maha-p-phalaṃ hoti,||
na mahā-nisaṃsaṃ,||
na mahā-jutikaṃ,||
na mahā-vipphāraṃ.|| ||
4. Aṭṭh'aṇga-samannāgate bhikkhave, khette bījaṃ vuttaṃ maha-p-phalaṃ hoti,||
maha-s-sādaṃ phātiyeyyaṃ.|| ||
Kathaṃ aṭṭh'aṇga-samannāgate?|| ||
5. Idha, bhikkhave, khettaṃ anunnāmaninnāmī ca hoti,||
apāsāṇa-sakkharillañ ca hoti,||
anusarañ ca hoti,||
gambhī- [238] rasītaṃ hoti,||
āya-sampannaṃ hoti,||
apāya-sampannaṃ hoti,||
mātikā-sampannaṃ hoti,||
mariyādā-sampannaṃ hoti.|| ||
Evaṃ aṭṭh'aṇga-samannāgate bhikkhave, khette bījaṃ vuttaṃ maha-p-phalaṃ hoti,||
maha-s-sādaṃ phātiyeyyaṃ.|| ||
Evam eva kho bhikkhave, aṭṭh'aṇga-samannāgatesu samaṇa-brāhmaṇesu dānaṃ dinnaṃ maha-p-phalaṃ hoti,||
mahā-nisaṃsaṃ,||
mahā-jutikaṃ,||
mahāvipthāraṃ.|| ||
Kathaṃ aṭṭh'aṇga-samannāgatesu?|| ||
6. Idha bhikkhave, samaṇa-brāhmaṇā||
sammā-diṭṭhikā honti,||
sammā-saṇkappā,||
sammā-vācā,||
sammā-kammantā,||
sammā-ājīvā,||
sammā-vāyāmā,||
sammā-satino,||
sammā-samādhino.|| ||
Evaṃ aṭṭh'aṇga-samannāgatesu bhikkhave, samaṇa-brāhmaṇesu dānaṃ dinnaṃ maha-p-phalaṃ hoti,||
mahā-nisaṃsaṃ,||
mahā-jutikaṃ,||
mahā-vipphāranti.|| ||
Yathā pi khette sampanne - pavuttā bījasampadā,||
Deve sampādayantamhi - hoti dhaññassa sampadā|| ||
Anīti sampadā hoti - virūḷhī bhavati sampadā,||
Vepullaṃ sampadā hoti - phalaṃ ve hoti sampadā.|| ||
Evaṃ sampanna-sīlesu - dinnā bhojana-sampadā,||
Sampadānaṃ upaneti - sampannaṃ hi'ssa taṃ kataṃ|| ||
Tasmā sampadam ākaṇkhī - sampann'attho'dha puggalo,||
Sampanna-paññe sevetha - evaṃ ijjhanti sampadā.|| ||
Vijjā-caraṇa-sampanno - laddhā cittassa sampadaṃ,||
Karoti kamma-sampadaṃ - labhati c'attha-sampadaṃ.|| ||
Lokaṃ ñatvā yathā-bhūtaṃ - pappuyya diṭṭhi-sampadaṃ,||
Magga-sampadam āgamma - yāti sampanna-mānaso.|| ||
[239]Odhunitvā malaṃ sabbaṃ - patvā Nibbāna sampadaṃ,||
Muccati sabba-dukkhehi - sā hoti sabba-sampadā.|| ||
