Aṇguttara Nikāya
X. Dasaka-Nipāta
III. Mahā Vagga
Sutta 23
Kāya Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh] Evaṃ me sutaṃ:|| ||
Ekaṃ samayaṃ Bhagavā Sāvatthiyaṃ viharati.|| ||
Tatra kho Bhagavā bhikkhū āmantesi:|| ||
"Bhikkhavo" ti.|| ||
"Bhadante" ti te bhikkhū Bhagavato paccassosuṃ.|| ||
Bhagavā etad avoca:|| ||
2. "Atthi bhikkhave dhammā kāyena pahātabbā||
no vācāya.|| ||
Atthi bhikkhave dhammā vācāya pahātabbā||
no kāyena.|| ||
Atthi bhikkhave dhammā n'eva kāyena pahātabbā||
no vācāya,||
paññāya disvā disvā pahātabbā.|| ||
§
3. Katame ca bhikkhave dhammā kāyena pahātabbā||
no vācāya?|| ||
Idha, bhikkhave, bhikkhu akusalaṃ āpanno hoti kañci-d-eva desaṃ kāyena.|| ||
Tam enaṃ anuvicca viññū sabrahma-cārī evam āhaṃsu:|| ||
'Āyasmā kho akusalaṃ āpanno kañci-d-eva desaṃ kāyena,||
sādhu vatāyasmā kāya-du-c-caritaṃ pahāya kāya-su-caritaṃ bhāvetu' ti.|| ||
So anuvicca viññūhi sabrahma-cārīhi vuccamāno kāya-du-c-caritaṃ pahāya kāya-su-caritaṃ bhāveti.|| ||
Ime vuccanti bhikkhave dhammā kāyena pahātabbā no vācāya.|| ||
§
4. Katame ca bhikkhave dhammā vācāya pahātabbā||
no kāyena?|| ||
Idha, bhikkhave, bhikkhu akusalaṃ āpanno hoti kañci-d-eva desaṃ vācāya.|| ||
Tam enaṃ anuvivacca viññū sabrahma-cārī evam āhaṃsu:|| ||
'Āyasmā kho akusalaṃ āpanno kañci-d-eva desaṃ vācāya,||
sādhu vatāyasmā vacī-du-c-caritaṃ pahāya vacī-su-caritaṃ bhāvetu' ti.|| ||
So anuvicca viññūhi sabrahma-cārīhi vuccamāno vacī-du-c-caritaṃ pahāya vacī-su-caritaṃ bhāveti.|| ||
Ime vuccanti bhikkhave dhammā vācāya pahātabbā,||
no kāyena.|| ||
§
5. Katame ca bhikkhave dhammā n'eva kāyena pahātabbā||
no vācāya,||
paññāya disvā disvā pahātabbā?|| ||
[1] Lobho bhikkhave n'eva kāyena pahātabbo,||
no vācāya,||
paññāya disvā disvā pahātabbo.|| ||
■
[2] Doso bhikkhave n'eva kāyena pahātabbo,||
no vācāya,||
paññāya disvā disvā pahātabbo.|| ||
■
[3] Moho bhikkhave n'eva kāyena pahātabbo,||
no vācāya,||
paññāya disvā disvā pahātabbo.|| ||
■
[4] Kodho bhikkhave n'eva kāyena pahātabbo,||
no vācāya,||
paññāya disvā disvā pahātabbo.|| ||
■
[5] Upanāho bhikkhave n'eva kāyena pahātabbo,||
no vācāya,||
paññāya disvā disvā pahātabbo.|| ||
■
[6] Makkho bhikkhave n'eva kāyena pahātabbo,||
no vācāya,||
paññāya disvā disvā pahātabbo.|| ||
■
[7] Paḷāso [40] bhikkhave n'eva kāyena pahātabbo,||
no vācāya,||
paññāya disvā disvā pahātabbo.|| ||
■
[8] Macchariyaṃ bhikkhave n'eva kāyena pahātabbo,||
no vācāya,||
paññāya disvā disvā pahātabbo.|| ||
■
[9] Pāpikā bhikkhave issā n'eva kāyena pahātabbā,||
no vācāya,||
paññāya disvā disvā pahātabbo.|| ||
§
6. Katamā ca bhikkhave pāpikā issā?|| ||
Idha, bhikkhave, ijjhati gahapatissa vā gahapati-puttassa vā dhanena vā dhaññena vā rajatena vā jātarūpena vā.|| ||
Tatr'aññatatarassa dāsassa vā upavāsassa vā evaṃ hoti.|| ||
'Aho vat'imassa gahapatissa vā gahapati-puttassa vā na ijjheyya dhanena vā dhaññena vā rajatena vā jātarūpena vā' ti.|| ||
■
Samaṇo vā pana brāhmaṇo vā lābhī hoti cīvara-piṇḍa-pāta-sen'āsana-gilāna-paccaya-bhesajja-parikkhārānaṃ.|| ||
Tatr'aññatarassa samaṇassa vā brāhmaṇassa vā evaṃ hoti:|| ||
'Aho vata ayam āyasmā na lābhī assa cīvara-piṇḍa-pāta-sen'āsana-gilāna-paccaya-bhesajja-parikkhārānan' ti.|| ||
Ayaṃ vuccati bhikkhave pāpikā issā.|| ||
§
7. Pāpikā bhikkhave issā n'eva kāyena pahātabbā||
no vācāya,||
paññāya disvā disvā pahātabbā.|| ||
■
8. Pāpikā bhikkhave icchā n'eva kāyena pahātabbā||
no vācāya,||
paññāya disvā disvā pahātabbā.|| ||
■
9. Katamā ca bhikkhave pāpikā icchā?|| ||
Idha, bhikkhave, ekacco assaddho samāno||
'"saddho" ti maṃ jāneyyun' ti icchati,||
du-s-sīlo samāno||
'"Sīlavā" ti maṃ jāneyyun' ti icchati,||
appassuto samāno||
'"Bahu-s-suto" ti maṃ jāneyyun' ti icchati,||
saṇgaṇ'ik-ā-rāmo samāno||
'"Pavivitto" ti maṃ jāneyyun' ti icchati,||
kusīto samāno||
'"Āraddha-viriyo" ti maṃ jāneyyun' ti icchati,||
muṭṭha-s-sati samāno||
'"Upatthikasatī" ti maṃ jāneyyun' ti icchati,||
asamāhito samāno||
'"Samāhito" ti maṃ jāneyyun' ti icchati,||
duppañño samāno||
'"Paññavā" ti maṃ jāneyyun' ti icchati,||
akhīṇ'āsavo samāno||
'"Khīṇ'āsavo" ti maṃ jāneyyun' ti icchati.|| ||
[41] Ayaṃ vuccati bhikkhave pāpikā icchā.|| ||
Pāpikā bhikkhave icchā n'eva kāyena pahātabbā||
no vācāya,||
paññāya disvā disvā pahātabbā.|| ||
§
9. Taṃ ce bhikkhave bhikkhu, lobho abhibhuyya irīyati.|| ||
So evam assa veditabbo:|| ||
'Na ayam āyasmā tathā pajānāti,||
yathā pajānato lobho na hoti,||
tathā h'imaṃ āyasmantaṃ lobho abhibhuyya irīyati' ti.|| ||
■
Taṃ ce bhikkhave bhikkhu, doso abhibhuyya irīyati,||
so evam assa veditabbo:|| ||
'Na ayam āyasmā tathā pajānāti,||
yathā pajānato doso na hoti,||
tathā h'imaṃ āyasmantaṃ doso abhibhuyya irīyati' ti.|| ||
■
Taṃ ce bhikkhave bhikkhu, moho abhibhuyya irīyati,||
so evam assa veditabbo:|| ||
'Na ayam āyasmā tathā pajānāti,||
yathā pajānato moho na hoti,||
tathā h'imaṃ āyasmantaṃ moho abhibhuyya irīyati' ti.|| ||
■
Taṃ ce bhikkhave bhikkhu, kodho abhibhuyya irīyati,||
so evam assa veditabbo:|| ||
'Na ayam āyasmā tathā pajānāti,||
yathā pajānato kodho na hoti,||
tathā h'imaṃ āyasmantaṃ kodho abhibhuyya irīyati' ti.|| ||
■
Taṃ ce bhikkhave bhikkhu, upanāho abhibhuyya irīyati,||
so evam assa veditabbo:|| ||
'Na ayam āyasmā tathā pajānāti,||
yathā pajānato upanāho na hoti,||
tathā h'imaṃ āyasmantaṃ upanāho abhibhuyya irīyati' ti.|| ||
■
Taṃ ce bhikkhave bhikkhu, makkho abhibhuyya irīyati,||
so evam assa veditabbo:|| ||
'Na ayam āyasmā tathā pajānāti,||
yathā pajānato makkho na hoti,||
tathā h'imaṃ āyasmantaṃ makkho abhibhuyya irīyati' ti.|| ||
■
Taṃ ce bhikkhave bhikkhu, palāso abhibhuyya irīyati,||
so evam assa veditabbo:|| ||
'Na ayam āyasmā tathā pajānāti,||
yathā pajānato palāso na hoti,||
tathā h'imaṃ āyasmantaṃ palāso abhibhuyya irīyati' ti.|| ||
■
Taṃ ce bhikkhave bhikkhu, macchariyaṃ pāpikā issā abhibhuyya irīyati,||
so evam assa veditabbo:|| ||
'Na ayam āyasmā tathā pajānāti,||
yathā pajānato macchariyaṃ na hoti,||
tathā h'imaṃ āyasmantaṃ macchariyaṃ abhibhuyya irīyati' ti.|| ||
■
Taṃ ce bhikkhave bhikkhu, pāpikā issā abhibhuyya irīyati,||
so evam assa veditabbo:|| ||
'Na ayam āyasmā tathā pajānāti,||
yathā pajānato pāpikā issā na hoti,||
tathā h'imaṃ āyasmantaṃ pāpikā issā abhibhuyya irīyati' ti.|| ||
■
Taṃ ce bhikkhave bhikkhu, pāpikā icchā abhibhuyya irīyati,||
so evam assa veditabbo:|| ||
'Na ayam āyasmā tathā pajānāti,||
yathā pajānato pāpikā icchā na hoti,||
tathā h'imaṃ āyasmantaṃ pāpikā icchā abhibhuyya irīyati' ti.|| ||
§
10. Tañ ce bhikkhave bhikkhuṃ lobho nābhibhuyya irīyati,||
so evam assa veditabbo:|| ||
'Tathā ayam āyasmā pajānāti,||
yathā pajānato lobho na hoti,||
tathā h'imaṃ āyasmantaṃ lobho nābhibhuyya irīyati' ti.|| ||
Tañ ce bhikkhave bhikkhuṃ doso nābhibhuyya irīyati,||
so evam assa veditabbo:|| ||
'Tathā ayam āyasmā pajānāti,||
yathā pajānato doso na hoti,||
tathā h'imaṃ āyasmantaṃ doso nābhibhuyya irīyati' ti.|| ||
■
Tañ ce bhikkhave bhikkhuṃ moho nābhibhuyya irīyati,||
so evam assa veditabbo:|| ||
'Tathā ayam āyasmā pajānāti,||
yathā pajānato moho na hoti,||
tathā h'imaṃ āyasmantaṃ moho nābhibhuyya irīyati' ti.|| ||
■
Tañ ce bhikkhave bhikkhuṃ kodho nābhibhuyya irīyati,||
so evam assa veditabbo:|| ||
'Tathā ayam āyasmā pajānāti,||
yathā pajānato kodho na hoti,||
tathā h'imaṃ āyasmantaṃ kodho nābhibhuyya irīyati' ti.|| ||
■
Tañ ce bhikkhave bhikkhuṃ upanāho nābhibhuyya irīyati,||
so evam assa veditabbo:|| ||
'Tathā ayam āyasmā pajānāti,||
yathā pajānato upanāho na hoti,||
tathā h'imaṃ āyasmantaṃ upanāho nābhibhuyya irīyati' ti.|| ||
■
Tañ ce bhikkhave bhikkhuṃ makkho nābhibhuyya irīyati,||
so evam assa veditabbo:|| ||
'Tathā ayam āyasmā pajānāti,||
yathā pajānato makkho na hoti,||
tathā h'imaṃ āyasmantaṃ makkho nābhibhuyya irīyati' ti.|| ||
■
Tañ ce bhikkhave bhikkhuṃ palāso nābhibhuyya irīyati,||
so evam assa veditabbo:|| ||
'Tathā ayam āyasmā pajānāti,||
yathā pajānato palāso na hoti,||
tathā h'imaṃ āyasmantaṃ palāso nābhibhuyya irīyati' ti.|| ||
■
Tañ ce bhikkhave bhikkhuṃ macchariyaṃ nābhibhuyya irīyati,||
so evam assa veditabbo:|| ||
'Tathā ayam āyasmā pajānāti,||
yathā pajānato macchariyaṃ na hoti,||
tathā h'imaṃ āyasmantaṃ macchariyaṃ nābhibhuyya irīyati' ti.|| ||
■
Tañ ce bhikkhave bhikkhuṃ pāpikā issā nābhibhuyya irīyati,||
so evam assa veditabbo:|| ||
'Tathā ayam āyasmā pajānāti,||
yathā pajānato pāpikā issā na hoti,||
tathā h'imaṃ āyasmantaṃ pāpikā issā nābhibhuyya irīyati' ti.|| ||
■
Tañ ce bhikkhave bhikkhuṃ pāpikā icchā nābhibhuyya irīyati,||
so evam assa veditabbo:|| ||
'Tathā ayam āyasmā pajānāti,||
yathā pajānato pāpikā icchā na hoti,||
tathā h'imaṃ āyasmantaṃ pāpikā icchā nābhibhuyya irīyatī'" ti.|| ||
