Saṇgha-Sāmaggi Suttaṃ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts][bodh] Evaṃ me sutaṃ:|| ||

Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||

Atha kho āyasmā Upāli yena Bhagavā ten'upasaṇkami.|| ||

Upasaṃkamitvā Bhagavantaṃ abhivādetvā eka-m-antaṃ nisīdi.|| ||

Eka-m-antaṃ nisinno kho āyasmā Upāli Bhagavantaṃ etad avoca:|| ||

"'Saṇgha-sāmaggi Saṇgha-sāmaggī' ti bhante vuccati.|| ||

Kittāvatā nu kho bhante saṇgho samaggo hotī" ti?|| ||

[1] "Idh'Ūpāli bhikkhu adhammaṃ||
'adhammo' ti dīpenti,||

■

[2] dhammaṃ 'dhammo' ti dīpenti,||

■

[3] avinayaṃ 'avinayo' ti dīpenti,||

■

[4] vinayaṃ 'vinayo' ti dīpenti,||

■

[5] abhāsitaṃ alapitaṃ Tathāgatena 'abhāsitaṃ alapitaṃ Tathāgatenā' ti dīpenti,||

■

[6] bhāsitaṃ lapitaṃ Tathāgatena 'bhāsitaṃ lapitaṃ Tathāgatenā' ti dīpenti,||

■

[7] anāciṇṇaṃ Tathāgatena 'anāciṇṇaṃ Tathāgatenā' ti dīpenti,||

■

[8] āciṇṇaṃ Tathāgatena 'āciṇṇaṃ Tathāgatenā' ti dīpenti,||

■

[9] apaññattaṃ Tathāgatena 'apaññattaṃ Tathāgatenā' ti dīpenti,||

■

[10] paññattaṃ Tathāgatena 'paññattaṃ Tathāgatenā' ti dīpenti.|| ||

Te imehi dasahi vatthūhi na avakassanti,||
na vavakassanti,||
na āvenikammāni karonti,||
na āveniPātimokkhaṃ uddisanti.|| ||

Ettāvatā kho Upāli saṇgho samaggo hotī" ti.|| ||