Aṇguttara Nikāya
X. Dasaka-Nipāta
V. Akkosa Vagga
Sutta 44
Kusinārā Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ Bhagavā Kusinārāyaṃ viharati baliharaṇe vana-saṇḍe.|| ||
Tatra kho Bhagavā bhikkhu āmantesi:|| ||
"Bhikkhavo" ti.|| ||
"Bhadante" ti te bhikkhu Bhagavato paccassosuṃ.|| ||
Bhagavā etad avoca:|| ||
2. "Codakena bhikkhave bhikkhunā paraṃ codetukāmena pañca dhamme ajjhattaṃ pacc'avekkhitvā pañca dhamme ajjhattaṃ upaṭṭha-petvā paro codetabbo.|| ||
■
Katame pañca dhammā ajjhattaṃ pacc'avekkhitabbā?|| ||
3. Codakena bhikkhave bhikkhunā paraṃ codetukāmena evaṃ pacc'avekkhitabbaṃ:|| ||
'Parisuddha-kāya-samā-cāro nu kho'mhi,||
parisuddhen'amhi kāya-samā-cārena samannāgato acchiddena appaṭimaṃsena,||
saṃvijjati nu kho me eso dhammo,||
udāhu no' ti?|| ||
No ce bhikkhu parisuddha-kāya-samā-cāro hoti||
parisuddhena kāya-samā-cārena samannāgato acchiddena appaṭimaṃsena,||
tassa bhavanti vattāro:|| ||
'Iṇgha tāva āyasmā kāyikaṃ sikkhassū' ti.|| ||
Iti'ssa bhavanti vattāro.|| ||
■
4. Puna ca paraṃ bhikkhave codakena bhikkhunā paraṃ codetukāmena evaṃ pacc'avekkhitabbaṃ:|| ||
'Parisuddha-vacī-samā-cāro nu kho'mhi, parisuddhen'amhi, vacī-samā-cārena samannāgato acchiddena appaṭimaṃsena,||
saṃvijjati nu kho me eso dhammo,||
udāhu no' ti?|| ||
No ce bhikkhave bhikkhu parisuddha vacī-samā-cāro hoti,||
parisuddhena vacī-samā-cārena samannāgato acchiddena appaṭimaṃsena,||
tassa bhavanti vattāro:|| ||
'Iṇgha tāva āyasmā vācasikaṃ sikkhassū' ti.|| ||
Iti'ssa bhavanti vattāro.|| ||
■
[80] 5. Puna ca paraṃ bhikkhave codakena bhikkhunā paraṃ codetukāmena evaṃ pacc'avekkhitabbaṃ:|| ||
'Mettaṃ nu kho me cittaṃ pacc'upatthikaṃ sabrahma-cārīsu anāghātaṃ,||
saṃvijjati nu kho me eso dhammo,||
udāhu no' ti?|| ||
No ce bhikkhave bhikkhuno mettaṃ cittaṃ pacc'upatthikaṃ hoti sabrahma-cārīsu anāghātaṃ,||
tassa bhavanti vattāro:|| ||
'Iṇgha tāva āyasmā sabrahma-cārīsu mettaṃ cittaṃ pacc'upaṭṭhapehī' ti.|| ||
Iti'ssa bhavanti vattāro.|| ||
■
6. Puna ca paraṃ bhikkhave codakena bhikkhunā paraṃ codetukāmena evaṃ pacc'avekkhitabbaṃ:|| ||
'Bahu-s-suto nu kho'mhi suta-dharo suta-sannī-cayo,||
ye te dhammā ādi-kalyāṇā,||
majjhe kalyāṇā,||
pariyosāna-kalyāṇā,||
sātthā sa-vyañjanā kevala-paripuṇṇaṃ parisuddhaṃ Brahma-cariyaṃ,
abhivadanti,||
tathā-rūpā me dhammā bahu-s-sutā honti dhatā vacasā paricitā manas-ā-nupekkhitā diṭṭhiyā suppaṭi-viddhā,||
saṃvijjati nu kho me eso dhammo,||
udāhu no' ti?|| ||
No ce bhikkhave bhikkhu bahu-s-suto hoti suta-dharo suta-sannī-cayo,||
ye te dhammā ādi-kalyāṇā,||
majjhe kalyāṇā,||
pariyosāna-kalyāṇā,||
sātthā sa-vyañjanā kevala-paripuṇṇaṃ parisuddhaṃ Brahma-cariyaṃ,||
abhivadanti,||
tathā-rūpāssa dhammā bahu-s-sutā honti dhatā vacasā paricitā manas-ā-nupekkhitā diṭṭhiyā suppaṭi-viddhā.|| ||
Tassa bhavanti vattāro:|| ||
'Iṇgha tāva āyasmā āgamaṃ pariyāpuṇassū' ti.|| ||
Iti'ssa bhavanti vattāro.|| ||
■
7. Puna ca paraṃ bhikkhave codakena bhikkhunā paraṃ codetukāmena evaṃ pacc'avekkhitabbaṃ:|| ||
'Ubhayāni nu kho me Pātimokkhāni vitthārena svāgatāni honti,||
su-vibhattāni su-p-pavattīni su-vinicchitāni suttaso anubyañjanaso,||
saṃvijjati nu kho me eso dhammo,||
udāhu no' ti?|| ||
No ce bhikkhave bhikkhuno ubhayāni Pātimokkhāni [81] vitthārena svāgatāni honti su-vibhattāni su-p-pavattīni su-vinicchitāni suttaso anubyañjanaso,||
idaṃ pan'āyasmā:|| ||
'Kattha vuttaṃ Bhagavatā' ti?|| ||
Iti puṭṭho na sampāyati,||
tassa bhavanti vattāro:|| ||
'Iṇgha tāva āyasmā vinayaṃ sikkhassū' ti.|| ||
Iti'ssa bhavanti vattāro.|| ||
Ime pañca dhammā ajjhattaṃ pacc'avekkhitabbā.|| ||
§
8. Katame pañca dhammā ajjhattaṃ upaṭṭhapetabbā?|| ||
9. 'Kālena vakkhāmi no akālena,||
■
bhūtena vakkhāmi no abhūtena,||
■
saṇhena vakkhāmi no pharusena,||
■
attha-saṃhitena vakkhāmi no anattha-saṃhitena,||
■
metta-citto vakkhāmi no dos'antaro' ti.|| ||
■
Ime pañca dhammā ajjhattaṃ upaṭṭhapetabbā.|| ||
Codakena bhikkhave bhikkhunā ime pañca dhamme ajjhattaṃ pacc'avekkhitvā|| ||
Ime pañca dhamme ajjhattaṃ upaṭṭha-petvā paro codetabbo" ti.|| ||
