Aṇguttara Nikāya
10. Dasaka-Nipāta
8: Ākaṇkha-Vagga
Sutta 75
Migasālā Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][than] Evaṃ me sutaṃ:|| ||
Ekaṃ samayaṃ Bhagavā Sāvatthiyaṃ viharati||
Jetavane Anāthapiṇḍikassa ārāme.|| ||
Atha kho āyasmā Ānando pubbaṇha-samayaṃ nivāsetvā patta-cīvaram ādāya yena Migasālāya upāsikāya nivesanaṃ ten'upasaṇkami.|| ||
Upasaṇkamitvā paññatte āsane nisīdi.|| ||
Atha kho Migasālā upāsikā yen'āyasmā Ānando ten'upasaṇkami.|| ||
Upasaṇkamitvā āyasmantaṃ Ānandaṃ abhivādetvā eka-m-antaṃ nisīdi.|| ||
Eka-m-antaṃ nisinnā kho Migasālā upāsikā āyasmantaṃ Ānandaṃ etad avoca:|| ||
2. "Kathaṃ-kathaṃ nāmo ayaṃ bhante Ānanda Bhagavatā [138] dhammo desito aññeyyo,||
yatra hi nāma brahma-cārī ca abrahma-cārī ca ubho sama-sama-gatikā bhavissanti abhisamparāyaṃ?|| ||
Pitā me bhante Purāṇo brahma-cārī ahosi ārā-cārī virato methunā gāma-dhammā.|| ||
So kāla-kato Bhagavatā vyākato||
'Sakad'āgāmī satto Tusitaṃ kāyaṃ upapanno' ti.|| ||
Pettā piyo me bhante Isidatto abrahma-cārī ahosi sadāra-santuṭṭho,||
so pi kāla-kato Bhagavatā vyākato||
'Sakad'āgāmī satto Tusitaṃ kāyaṃ upapanno' ti.|| ||
Kathaṃ-kathaṃ nāmo ayaṃ bhante Ānanda Bhagavatā dhammo desito aññeyyo,||
yatra hi nāma brahma-cārī ca abrahma-cārī ca ubho sama-sama-gatikā bhavissanti abhisamparāyan" ti?|| ||
"Evaṃ kho pan'etaṃ bhagini Bhagavatā vyākatan" ti.|| ||
§
3. Atha kho āyasmā Ānando Migasālāya upāsikāya nivesane piṇḍa-pātaṃ gahetvā uṭṭhāy āsanā pakkāmi.|| ||
Atha kho āyasmā Ānando pacchā-bhattaṃ piṇḍa-pāta-paṭikkanto yena Bhagavā ten'upasaṇkami.|| ||
Upasaṇkamitvā Bhagavantaṃ abhivādetvā eka-m-antaṃ nisīdi.|| ||
Eka-m-antaṃ nisinno kho āyasmā Ānando Bhagavantaṃ etad avoca:|| ||
"Idh'āhaṃ bhante pubbaṇha-samayaṃ nivāsetvā patta-cīvaram ādāya yena Migasālāya upāsikāya nivesanaṃ ten'upasaṇkami.|| ||
Upasaṇkamitvā paññatte āsane nisīdiṃ.|| ||
Atha kho bhante Migasālā upāsikā yenāhaṃ ten'upasaṇkami.|| ||
Upasaṇkamitvā maṃ abhivādetvā eka-m-antaṃ nisidi.|| ||
Eka-m-antaṃ nisinnā kho bhante Migasālā upāsikā maṃ etad avoca:|| ||
'Kathaṃ-kathaṃ nāmo ayaṃ bhante Ānanda Bhagavatā dhammo [139] desito aññeyyo,||
yatra hi nāma brahma-cārī ca abrahma-cārī ca ubho sama-sama-gatikā bhavissanti abhisamparāyaṃ?|| ||
Pitā me bhante Purāṇo brahma-cārī ahosi ārā-cārī virato methunā gāma-dhammā.|| ||
So kāla-kato Bhagavatā vyākato||
'Sakad'āgāmī satto Tusitaṃ kāyaṃ upapanno' ti.|| ||
Pettā piyo me bhante Isidatto abrahma-cārī ahosi sadāra-santuṭṭho,||
so pi kāla-kato Bhagavatā vyākato||
'Sakad'āgāmī satto Tusitaṃ kāyaṃ upapanno' ti.|| ||
Kathaṃ-kathaṃ nāmo ayaṃ bhante Ānanda Bhagavatā dhammo desito aññeyyo,||
yatra hi nāma brahma-cārī ca abrahma-cārī ca ubho sama-sama-gatikā bhavissanti abhisamparāyan ti?|| ||
Evaṃ vutte ahaṃ bhante Migasālaṃ upāsikaṃ etad avocaṃ:|| ||
'Evaṃ kho pan'etaṃ bhagini Bhagavatā vyākatan'" ti.|| ||
"Kā c'Ānanda Migasālā upāsikā bālā avyattā ambhakā ambhakapaññā?|| ||
Ke ca purisa-puggala-paro-pariye ñāṇe!|| ||
§
Dasa yime Ānanda puggalo santo saṃvijj'amānā lokasmi.|| ||
Katame dasa?|| ||
4. Idh'Ānanda ekacco puggalo du-s-sīlo hoti,||
tañ ca cetovimuttiṃ paññā-vimuttiṃ yathā-bhūtaṃ na-p-pajānāti,||
yatth'assa taṃ du-s-sīlyaṃ aparisesaṃ nirujjhati.|| ||
Tassa savaṇena pi akataṃ hoti,||
bāhu-saccena pi akataṃ hoti,||
diṭṭhiyā pi appaṭi-viddhaṃ hoti,||
sāmayikam pi vimuttiṃ na labhati.|| ||
So kāyassa bhedā param maraṇā hānāya pareti no visesāya,||
hāna-gāmī yeva hoti||
no visesa-gāmī.|| ||
5. Idha pan'Ānanda ekacco puggalo du-s-sīlo hoti,||
tañ ca cetovimuttiṃ paññā-vimuttiṃ yathā-bhūtaṃ pajānāti,||
[140] yatth'assa taṃ du-s-sīlyaṃ aparisesaṃ nirujjhati.|| ||
Tassa savaṇena pi kataṃ hoti,||
bāhu-saccena pi kataṃ hoti,||
diṭṭhiyā pi su-p-paṭividdhaṃ hoti,||
sāmayikam pi vimuttiṃ labhati.|| ||
So kāyassa bhedā param maraṇā visesāya pareti,||
no hānāya,||
visesa-gāmī yeca hoti,||
no hāna-gāmī.|| ||
Tatr'Ānanda pamāṇikā pamiṇanti:|| ||
'Imassā pi te'va dhammā,||
aparassā pi te'va dhammā,||
kasmā n'esaṃ eko hīno,||
eko paṇīto' ti?|| ||
Taṃ hi tesaṃ Ānanda hoti dīgha-rattaṃ ahitāya dukkhāya.|| ||
Tatr'Ānanda yavāyaṃ puggalo du-s-sīlo hoti,||
tañ ca ceto-vimuttiṃ paññā-vimuttiṃ yathā-bhūtaṃ pajānāti,||
yatth'assa taṃ du-s-sīlyaṃ aparisesaṃ nirujjhati.|| ||
Tassa savaṇena pi kataṃ hoti,||
bāhu-saccena pi kataṃ hoti,||
diṭṭhiyā pi su-p-paṭividdhaṃ hoti,||
sāmayikam pi vimuttiṃ labhati.|| ||
Ayaṃ Ānanda puggalo amunā purimena puggalena abhikkantaro ca paṇitataro ca.|| ||
Taṃ kissa hetu?|| ||
Imaṃ hi Ānanda puggalaṃ Dhamma-soto nibbahati.|| ||
Tad antaraṃ ko jāneyya aññatra Tathāgatena?|| ||
Tasmā 'ti h'Ānanda mā puggalesu pamāṇikā ahuvattha,||
mā puggalesu pamāṇaṃ gaṇhattha.|| ||
Khaññati h'Ānanda puggalo puggalesu pamāṇaṃ gaṇhanto,||
ahaṃ c'Ānanda puggalesu pamāṇaṃ gaṇheyyaṃ,||
yo vā pan'assa mādiso.|| ||
§
[141] 6. Idha pan'Ānanda ekacco puggalo sīlavā hoti,||
tañ ca ceto-vimuttiṃ paññā-vimuttiṃ yathā-bhūtaṃ na-p-pajānāti,||
yatth'assa taṃ sīlaṃ aparisesaṃ nirujjhati.|| ||
Tassa savaṇena pi akataṃ hoti,||
bāhu-saccena pi akataṃ hoti,||
diṭṭhiyā pi appaṭi-viddhaṃ hoti,||
sāmayikam pi vimuttiṃ na labhati.|| ||
So kāyassa bhedā param maraṇā hānāya pareti,||
no visesaṃ||
hāna-gāmī yeva hoti,||
no visesa-gāmī.|| ||
7. Idha pan'Ānanda ekacco puggalo sīlavā hoti,||
tañ ca cetovimuttiṃ paññā-vimuttiṃ yathā-bhūtaṃ pajānāti,||
yatth'assa taṃ sīlaṃ aparisesaṃ nirujjhati.|| ||
Tassa savaṇena pi kataṃ hoti,||
bāhu-saccena pi kataṃ hoti,||
diṭṭhiyā pi paṭividdhaṃ hoti,||
sāmayikam pi vimuttiṃ labhati.|| ||
So kāyassa bhedā param maraṇā visesāya pareti,||
no hānāya,||
visesa-gāmī yeca hoti,||
no hāna-gāmī.|| ||
Tatr'Ānanda pamāṇikā pamiṇanti:|| ||
'Imassā pi te'va dhammā,||
aparassā pi te'va dhammā,||
kasmā n'esaṃ eko hīno,||
eko paṇīto' ti?|| ||
Taṃ hi tesaṃ Ānanda hoti dīgha-rattaṃ ahitāya dukkhāya.|| ||
Tatr'Ānanda yavāyaṃ puggalo du-s-sīlo hoti,||
tañ ca ceto-vimuttiṃ paññā-vimuttiṃ yathā-bhūtaṃ pajānāti,||
yatth'assa taṃ du-s-sīlyaṃ aparisesaṃ nirujjhati.|| ||
Tassa savaṇena pi kataṃ hoti,||
bāhu-saccena pi kataṃ hoti,||
diṭṭhiyā pi su-p-paṭividdhaṃ hoti,||
sāmayikam pi vimuttiṃ labhati.|| ||
Ayaṃ Ānanda puggalo amunā purimena puggalena abhikkantaro ca paṇitataro ca.|| ||
Taṃ kissa hetu?|| ||
Imaṃ hi Ānanda puggalaṃ Dhamma-soto nibbahati.|| ||
Tad antaraṃ ko jāneyya aññatra Tathāgatena?|| ||
Tasmā 'ti h'Ānanda mā puggalesu pamāṇikā ahuvattha,||
mā puggalesu pamāṇaṃ gaṇhattha.|| ||
Khaññati h'Ānanda puggalo puggalesu pamāṇaṃ gaṇhanto,||
ahaṃ c'Ānanda puggalesu pamāṇaṃ gaṇheyyaṃ,||
yo vā pan'assa mādiso.|| ||
§
8. Idha pan'Ānanda ekacco puggalo nibbarāgo hoti,||
tañ ca cetovimuttiṃ paññā-vimuttiṃ yathā-bhūtaṃ na-p-pajānāti,||
yatth'assa so rāgo apariseso nirujjhati.|| ||
Tassa savaṇenapitha akataṃ hoti,||
bāhu-saccena pi akataṃ hoti,||
diṭṭhiyāpi apaṭividdhaṃ hoti,||
sāmayikam pi vimuttiṃ na labhati.|| ||
So kāyassa bhedā param maraṇā hānāya pareti,||
no visesaṃ||
hāna-gāmī yeva hoti,||
no visesa-gāmī.|| ||
9. Idha pan'Ānanda ekacco puggalo nibbarāgo hoti,||
tañ ca ceto vimuttiṃ paññā-vimuttiṃ yathā-bhūtaṃ pajānāti,||
yatth'assa so rāgo apariseso nirujjhati.|| ||
Tassa savaṇena pi kataṃ hoti,||
bāhu-saccena pi kataṃ hoti,||
diṭṭhiyā pi paṭividdhaṃ hoti,||
sāmayikam pi vimuttiṃ labhati.|| ||
So [142]
So kāyassa bhedā param maraṇā visesāya pareti,||
no hānāya,||
visesa-gāmī yeca hoti,||
no hāna-gāmī.|| ||
Tatr'Ānanda pamāṇikā pamiṇanti:|| ||
'Imassā pi te'va dhammā,||
aparassā pi te'va dhammā,||
kasmā n'esaṃ eko hīno,||
eko paṇīto' ti?|| ||
Taṃ hi tesaṃ Ānanda hoti dīgha-rattaṃ ahitāya dukkhāya.|| ||
Tatr'Ānanda yavāyaṃ puggalo du-s-sīlo hoti,||
tañ ca ceto-vimuttiṃ paññā-vimuttiṃ yathā-bhūtaṃ pajānāti,||
yatth'assa taṃ du-s-sīlyaṃ aparisesaṃ nirujjhati.|| ||
Tassa savaṇena pi kataṃ hoti,||
bāhu-saccena pi kataṃ hoti,||
diṭṭhiyā pi su-p-paṭividdhaṃ hoti,||
sāmayikam pi vimuttiṃ labhati.|| ||
Ayaṃ Ānanda puggalo amunā purimena puggalena abhikkantaro ca paṇitataro ca.|| ||
Taṃ kissa hetu?|| ||
Imaṃ hi Ānanda puggalaṃ Dhamma-soto nibbahati.|| ||
Tad antaraṃ ko jāneyya aññatra Tathāgatena?|| ||
Tasmā 'ti h'Ānanda mā puggalesu pamāṇikā ahuvattha,||
mā puggalesu pamāṇaṃ gaṇhattha.|| ||
Khaññati h'Ānanda puggalo puggalesu pamāṇaṃ gaṇhanto,||
ahaṃ c'Ānanda puggalesu pamāṇaṃ gaṇheyyaṃ,||
yo vā pan'assa mādiso.|| ||
§
10. Idha pan'Ānanda ekacco puggalo kodhano hoti,||
tañ ca ceto-vimuttiṃ paññā-vimuttiṃ yathā-bhūtaṃ na-p-pajānāti||
yatth'assa so kodho apariseso nirujjhati.|| ||
Tassa savaṇena pi akataṃ hoti,||
bāhu-saccena pi akataṃ hoti,||
diṭṭhiyā pi appaṭi-viddhaṃ hoti,||
sāmayikam pi vimuttiṃ na labhati.|| ||
So kāyassa bhedā param maraṇā hānāya pareti,||
no visesaṃ||
hāna-gāmī yeva hoti,||
no visesa-gāmī.|| ||
11. Idha pan'Ānanda ekacco puggalo kodhano hoti,||
tañ ca ceto-vimuttiṃ paññā-vimuttiṃ yathā-bhūtaṃ pajānāti||
yatth'assa so kodho apariseso nirujjhati.|| ||
Tassa savaṇena pi kataṃ hoti,||
bāhu-saccena pi kataṃ hoti,||
diṭṭhiyā pi paṭividdhaṃ hoti,||
sāmayikam pi vimuttiṃ labhati.|| ||
So kāyassa bhedā param maraṇā visesāya pareti,||
no hānāya,||
visesa-gāmī yeca hoti,||
no hāna-gāmī.|| ||
Tatr'Ānanda pamāṇikā pamiṇanti:|| ||
'Imassā pi te'va dhammā,||
aparassā pi te'va dhammā,||
kasmā n'esaṃ eko hīno,||
eko paṇīto' ti?|| ||
Taṃ hi tesaṃ Ānanda hoti dīgha-rattaṃ ahitāya dukkhāya.|| ||
Tatr'Ānanda yavāyaṃ puggalo du-s-sīlo hoti,||
tañ ca ceto-vimuttiṃ paññā-vimuttiṃ yathā-bhūtaṃ pajānāti,||
yatth'assa taṃ du-s-sīlyaṃ aparisesaṃ nirujjhati.|| ||
Tassa savaṇena pi kataṃ hoti,||
bāhu-saccena pi kataṃ hoti,||
diṭṭhiyā pi su-p-paṭividdhaṃ hoti,||
sāmayikam pi vimuttiṃ labhati.|| ||
Ayaṃ Ānanda puggalo amunā purimena puggalena abhikkantaro ca paṇitataro ca.|| ||
Taṃ kissa hetu?|| ||
Imaṃ hi Ānanda puggalaṃ Dhamma-soto nibbahati.|| ||
Tad antaraṃ ko jāneyya aññatra Tathāgatena?|| ||
Tasmā 'ti h'Ānanda mā puggalesu pamāṇikā ahuvattha,||
mā puggalesu pamāṇaṃ gaṇhattha.|| ||
Khaññati h'Ānanda puggalo puggalesu pamāṇaṃ gaṇhanto,||
ahaṃ c'Ānanda puggalesu pamāṇaṃ gaṇheyyaṃ,||
yo vā pan'assa mādiso.|| ||
§
12. Idha pan'Ānanda ekacco puggalo uddhato hoti,||
tañ ca ceto-vimuttiṃ paññā-vimuttiṃ yathā-bhūtaṃ na-p-pajānāti,||
yatth'assa taṃ uddhaccaṃ aparisesaṃ nirujjhati.|| ||
Tassa savaṇena pi akataṃ hoti,||
bāhu-saccena pi akataṃ hoti,||
diṭṭhiyā pi appaṭi-viddhaṃ hoti,||
sāmayikam pi vimuttiṃ na labhati.|| ||
So kāyassa bhedā param maraṇā hānāya pareti,||
no visesaṃ||
hāna-gāmī yeva hoti,||
no visesa-gāmī.|| ||
13. Idha pan'Ānanda ekacco puggalo uddhato hoti,||
tañ ca ceto-vimuttiṃ paññā-vimuttiṃ yathā-bhūtaṃ pajānāti,||
yatth'assa taṃ uddhaccaṃ aparisesaṃ nirujjhati.|| ||
Tassa savaṇena pi kataṃ hoti,||
bāhu-saccena pi kataṃ hoti,||
diṭṭhiyā pi [143] paṭividdhaṃ hoti,||
sāmayikam pi vimuttiṃ labhati.|| ||
So kāyassa bhedā param maraṇā visesāya pareti,||
no hānāya,||
visesa-gāmī yeca hoti,||
no hāna-gāmī.|| ||
Tatr'Ānanda pamāṇikā pamiṇanti:|| ||
'Imassā pi te'va dhammā,||
aparassā pi te'va dhammā,||
kasmā n'esaṃ eko hīno,||
eko paṇīto' ti?|| ||
Taṃ hi tesaṃ Ānanda hoti dīgha-rattaṃ ahitāya dukkhāya.|| ||
Tatr'Ānanda yavāyaṃ puggalo du-s-sīlo hoti,||
tañ ca ceto-vimuttiṃ paññā-vimuttiṃ yathā-bhūtaṃ pajānāti,||
yatth'assa taṃ du-s-sīlyaṃ aparisesaṃ nirujjhati.|| ||
Tassa savaṇena pi kataṃ hoti,||
bāhu-saccena pi kataṃ hoti,||
diṭṭhiyā pi su-p-paṭividdhaṃ hoti,||
sāmayikam pi vimuttiṃ labhati.|| ||
Ayaṃ Ānanda puggalo amunā purimena puggalena abhikkantaro ca paṇitataro ca.|| ||
Taṃ kissa hetu?|| ||
Imaṃ hi Ānanda puggalaṃ Dhamma-soto nibbahati.|| ||
Tad antaraṃ ko jāneyya aññatra Tathāgatena?|| ||
Tasmā 'ti h'Ānanda mā puggalesu pamāṇikā ahuvattha,||
mā puggalesu pamāṇaṃ gaṇhattha.|| ||
Khaññati h'Ānanda puggalo puggalesu pamāṇaṃ gaṇhanto,||
ahaṃ c'Ānanda puggalesu pamāṇaṃ gaṇheyyaṃ,||
yo vā pan'assa mādiso.|| ||
§
Kā c'Ānanda Migasālā upāsikā bālā avyattā ambhakā ambaka-paññā,||
ke ca purisa-puggala-paro-pariye ñāṇe.|| ||
Ime kho Ānanda dasa puggalā santo saṃvijj'amānā lokasmi.|| ||
14. Yathā-rūpena Ānanda sīlena Purāṇo samannāgato ahosi,||
tathā-rūpena sīlena Isidatto samannāgato abhavissa||
na yidha Purāṇo Isidattassa gatim pi aññassa.|| ||
[144] Yathā-rūpāya ca Ānanda paññāya Isidatto samannāgato ahosi,||
tathā-rūpāya paññāya Purāṇo samannāgate abhavissa,||
na yidha Isidatto Purāṇassa gatim pi aññassa.|| ||
Iti kho Ānanda ime puggalā ubho ek'aṇga-hīnā ti.|| ||
