Aṇguttara Nikāya
X. Dasaka-Nipāta
VIII: Ākaṇkha-Vagga
Sutta 77
Kāka Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ Bhagavā Sāvatthiyaṃ viharati.|| ||
Tatra kho Bhagavā bhikkhū āmantesi:|| ||
"Bhikkhavo" ti.|| ||
"Bhadante" ti te bhikkhū Bhagavato paccassosuṃ.|| ||
Bhagavā etad avoca:|| ||
2. "Dasahi bhikkhave asad'Dhammehi samannāgato kāko.|| ||
Katamehi dasahi?|| ||
Dhaṃsī ca,||
pagabbho ca||
tintino ca||
mahagghaso ca||
luddo ca||
akāruṇiko ca||
dubbalo ca||
oravitā ca||
muṭṭhassatī ca||
necayiko ca.|| ||
Imehi kho bhikkhave dasahi asad'Dhammehi samannāgato kāko.|| ||
§
Evam eva kho bhikkhave dasahi asad'Dhammehi samannāgato pāpa-bhikkhu.|| ||
Katamehi dasahi?|| ||
Dhaṃsī ca,||
pagabbho ca||
tintino ca||
mahagghaso ca||
luddo ca||
akāruṇiko ca||
dubbalo ca||
oravitā ca||
muṭṭhassatī ca||
necayiko ca.|| ||
Imehi kho bhikkhave dasahi asad'Dhammehi samannāgato pāpabhikkhū" ti.|| ||
