Aṇguttara Nikāya
X. Dasaka-Nipāta
XIV: Sādhu-Vagga
Sutta 140
Sāvajja Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ Bhagavā Sāvatthiyaṃ viharati.|| ||
Tatra kho Bhagavā bhikkhū āmantesi:|| ||
"Bhikkhavo" ti.|| ||
"Bhadante" ti te bhikkhū Bhagavato paccassosuṃ.|| ||
Bhagavā etad avoca:|| ||
2. "Sāvajjañ ca kho bhikkhave dhammaṃ desissāmi, anavajjañ ca.|| ||
Taṃ suṇātha sādhukaṃ manasi-karotha bhāsissāmī" ti.|| ||
"Evaṃ bhante" ti kho te bhikkhu Bhagavato paccassosuṃ.|| ||
Bhagavā etad avoca:|| ||
"Katamañ ca bhikkhave sāvajjo dhammo?
Micchā-diṭṭhi,||
micchā-saṇkappo,||
micchā-vācā,||
micchā-kammanto,||
micchā-ājīvo,||
micchā-vāyāmo,||
micchā-sati,||
micchā-samādhi,||
micchā-ñāṇaṃ,||
micchā-vimutti.|| ||
Ayaṃ vuccati bhikkhave sāvajjo dhammo.|| ||
§
Katamañ ca bhikkhave anavajjo Dhammo?|| ||
Sammā-diṭṭhi,||
sammā-saṇkappo,||
sammā-vācā,||
sammā-kammanto,||
sammā-ājīvo,||
sammā-vāyāmo,||
sammā-sati,||
sammā-samādhi,||
sammā-ñāṇaṃ,||
sammā-vimutti.|| ||
Ayaṃ vuccati bhikkhave anavajjo Dhammo" ti|| ||
