Saṃyutta Nikāya
I. Sagātha Vagga
1. Devatā-Saṃyutta
I. Naḷa Vagga
Suttas 1-10
Adapted from the 1995 edition of the digital version of the
Sri Lanka Buddha Jayanti Tripitaka Series.
Namo tassa Bhagavato arahato Sammā Sambuddhassa
Sutta 1
Ogha Suttaṃ
[1.1][pts][bodh][than][upal][olds][alvr] EVAṂ ME SUTAṂ.|| ||
Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Atha kho aññatarā devatā abhikkantāya rattiyā abhikkanta-vaṇṇā kevala-kappaṃ Jetavanaṃ obhāsetvā yena Bhagavā ten'upasaṇkami.|| ||
Upasaṇkamitvā Bhagavantaṃ abhivādetvā ekam-antaṃ aṭṭhāsi.
Eka-m-antaṃ ṭhitā kho sā devatā Bhagavantaṃ etad avoca:|| ||
"Kathaṃ nu tvaṃ mārisa, ogham atarī" ti?|| ||
"Appatiṭṭhaṃ khv'āhaṃ āvuso anāyūhaṃ ogham atarin" ti.|| ||
Yathā kathaṃ pana tvaṃ mārisa appatiṭṭhaṃ anāyūhaṃ ogham atarī ti?|| ||
Yadā svāhaṃ āvuso santiṭṭhāmi,||
tadāssu saṇsīdāmi.||
Yadā svāhaṃ āvuso āyūhāmi||
tadāssu nibbuyhāmi.||
Evaṃ khv'āhaṃ āvuso appatiṭṭhaṃ anāyūhaṃ ogham atarin tī.|| ||
Cirassaṃ vata passāmi||
brāhmaṇaṃ parinibbutaṃ,||
Appatiṭṭhaṃ anāyūhaṃ||
tiṇṇaṃ loke visattikaṃ ti|| ||
Idam avoca sā devatā.||
Samanuñño Satthā ahosi.|| ||
Atha kho sā devatā samanuñño me Satthā' ti Bhagavantaṃ abhivādetvā padakkhiṇaṃ katvā tatth'ev'antara-dhāyī ti.|| ||
Sutta 2
Nimokkha Suttaṃ
[2.1][pts][bodh][upal][than] EVAṂ ME SUTAṂ.|| ||
Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Atha kho aññatarā devatā abhikkantāya rattiyā abhikkanta-vaṇṇā kevala-kappaṃ Jetavanaṃ obhāsetvā yena Bhagavā ten'upasaṇkami.|| ||
Upasaṇkamitvā Bhagavantaṃ abhivādetvā ekam-antaṃ aṭṭhāsi.
Eka-m-antaṃ ṭhitā kho sā devatā Bhagavantaṃ etad avoca:|| ||
Jānāsi no tvaṃ mārisa,||
sattāṇaṃ nimokkhaṃ pamokkhaṃ vivekan ti?|| ||
(Bhagavā:)||
Jānāmi khv'āhaṃ āvuso sattāṇaṃ nimokkhaṃ pamokkhaṃ vivekan ti.|| ||
(Devatā:)||
Yathā katham pana tvaṃ mārisa jānāsi sattāṇaṃ nimokkhaṃ pamokkhaṃ vivekan ti?|| ||
(Bhagavā:)||
Nandī-bhava parikkhayā saññā-viññāṇa-saṇkhayā,||
Vedanānaṃ nirodhā upasamā evaṃ khv'āhaṃ āvuso jānāmi.||
Sattāṇaṃ nimokkhaṃ pamokkhaṃ vivekan ti.
Sutta 3
Upanīyati Suttaṃ
[3.1][pts][bodh][upal] EVAṂ ME SUTAṂ.|| ||
Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Atha kho aññatarā devatā abhikkantāya rattiyā abhikkanta-vaṇṇā kevala-kappaṃ Jetavanaṃ obhāsetvā yena Bhagavā ten'upasaṇkami.|| ||
Upasaṇkamitvā Bhagavantaṃ abhivādetvā ekam-antaṃ aṭṭhāsi.
Eka-m-antaṃ ṭhitā kho sā devatā Bhagavato santike imaṃ gātham abhāsi:|| ||
Upanīyati jīvitam appam āyu||
jarūpanītassa na santi tāṇā,||
Etaṃ bhayaṃ maraṇe pekkhamāno||
puññāni kayirātha sukhāvahānī ti.|| ||
(Bhagavā:)||
Upanīyati jīvitam appam āyu||
jarūpanītassa na santi tāṇā||
Etaṃ bhayaṃ maraṇe pekkhamāno||
lokāmisaṃ pajahe santipekkho ti.|| ||
Sutta 4
Accenti Suttaṃ
[4.1][pts][bodh][upal] EVAṂ ME SUTAṂ.|| ||
Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Atha kho aññatarā devatā abhikkantāya rattiyā abhikkanta-vaṇṇā kevala-kappaṃ Jetavanaṃ obhāsetvā yena Bhagavā ten'upasaṇkami.|| ||
Upasaṇkamitvā Bhagavantaṃ abhivādetvā ekam-antaṃ aṭṭhāsi.
Eka-m-antaṃ ṭhitā kho sā devatā Bhagavato santike imaṃ gātham abhāsi:|| ||
Accenti kālā tarayanti rattiyo||
vayoguṇā anupubbaṃ jahanti.||
Etaṃ bhayaṃ maraṇe pekkhamāno||
puññāni kayirātha sukhāvahānī ti.|| ||
(Bhagavā:)||
Accenti kālā tarayanti rattiyo||
vayoguṇā anupubbaṃ jahanti,||
Etaṃ bhayaṃ maraṇe pekkhamāno||
lokāmisaṃ pajahe santipekkhoti.|| ||
Sutta 5
Kati Chinda Suttaṃ
[5.1][pts][bodh][upal] EVAṂ ME SUTAṂ.|| ||
Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Atha kho aññatarā devatā abhikkantāya rattiyā abhikkanta-vaṇṇā kevala-kappaṃ Jetavanaṃ obhāsetvā yena Bhagavā ten'upasaṇkami.|| ||
Upasaṇkamitvā Bhagavantaṃ abhivādetvā ekam-antaṃ aṭṭhāsi.
Eka-m-antaṃ ṭhitā kho sā devatā Bhagavantaṃ gāthāya ajjhabhāsi:|| ||
Kati chinde kati jahe kati cuttari bhāvaye,||
Kati saṇgātigo 'bhikkhu oghatiṇṇo' ti vuccatī ti:|| ||
(Bhagavā:)||
Pañca chinde pañca jahe pañca vuttari bhāvaye,||
Pañca saṇgātigo 'bhikkhu oghatiṇṇo' ti vuccatī ti.|| ||
Sutta 6
Jāgara Suttaṃ
[6.1][pts][bodh][upal] EVAṂ ME SUTAṂ.|| ||
Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Atha kho aññatarā devatā abhikkantāya rattiyā abhikkanta-vaṇṇā kevala-kappaṃ Jetavanaṃ obhāsetvā yena Bhagavā ten'upasaṇkami.|| ||
Upasaṇkamitvā Bhagavantaṃ abhivādetvā ekam-antaṃ aṭṭhāsi.
Eka-m-antaṃ ṭhitā kho sā devatā Bhagavato santike imaṃ gāthaṃ abhāsi:|| ||
Kati jāgarataṃ suttā kati suttesu jāgarā,||
Katīhi rajam ādeti katīhi parisujjhatī ti.|| ||
(Bhagavā:)||
Pañca jāgarataṃ suttā pañca suttesu jāgarā,||
Pañcahi rajam ādeti pañcahi parisujjhatī ti.|| ||
Sutta 7
Appaṭividita Suttaṃ
[7.1][pts][bodh][upal] EVAṂ ME SUTAṂ.|| ||
Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Atha kho aññatarā devatā abhikkantāya rattiyā abhikkanta-vaṇṇā kevala-kappaṃ Jetavanaṃ obhāsetvā yena Bhagavā ten'upasaṇkami.|| ||
Upasaṇkamitvā Bhagavantaṃ abhivādetvā ekam-antaṃ aṭṭhāsi.
Eka-m-antaṃ ṭhitā kho sā devatā Bhagavato santike imaṃ gāthaṃ abhāsi:|| ||
Yesaṃ dhammā appaṭividitā paravādesu nīyare,||
Suttā te na ppabujjhanti kālo tesaṃ pabujjhitun ti.|| ||
(Bhagavā:)||
Yesaṃ dhammā suppaṭi-viditā paravādesu na nīyare,
Te sambuddhā samma'd'aññāya caranti visame saman ti.|| ||
Sutta 8
Susammuṭṭha Suttaṃ
[8.1][pts][bodh][upal] EVAṂ ME SUTAṂ.|| ||
Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Atha kho aññatarā devatā abhikkantāya rattiyā abhikkanta-vaṇṇā kevala-kappaṃ Jetavanaṃ obhāsetvā yena Bhagavā ten'upasaṇkami.|| ||
Upasaṇkamitvā Bhagavantaṃ abhivādetvā ekam-antaṃ aṭṭhāsi.
Eka-m-antaṃ ṭhitā kho sā devatā Bhagavato santike imaṃ gāthaṃ abhāsi:|| ||
Yesaṃ dhammā susammuṭṭhā paravādesu nīyare,||
Suttā te na ppabujjhanti kālo tesaṃ pabujjhitun ti.|| ||
(Bhagavā:)||
Yesaṃ dhammā asammuṭṭhā paravādesu na nīyare,||
Te sambuddhā samma'd'aññāya caranti visame samaṃ ti.
Sutta 9
Namānakāma Suttaṃ
[9.1][pts][bodh][upal] EVAṂ ME SUTAṂ.|| ||
Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Atha kho aññatarā devatā abhikkantāya rattiyā abhikkanta-vaṇṇā kevala-kappaṃ Jetavanaṃ obhāsetvā yena Bhagavā ten'upasaṇkami.|| ||
Upasaṇkamitvā Bhagavantaṃ abhivādetvā ekam-antaṃ aṭṭhāsi.
Eka-m-antaṃ ṭhitā kho sā devatā Bhagavato santike imaṃ gāthaṃ abhāsi:|| ||
Na mānakāmassa damo idh'atthi||
na monam atthi asamāhitassa,||
Eko araññe viharaṃ pamatto||
na maccudheyyassa tareyya pāran ti.|| ||
(Bhagavā:)||
Mānaṃ pahāya susamāhitatto||
sucetaso sabbadhi vippamutto,||
Eko araññe viharaṃ appamatto||
sa maccudheyyassa tareyya pāran ti.|| ||
Sutta 10
Arañña Suttaṃ
[10.1][pts][than][bodh][upal][alvr] EVAṂ ME SUTAṂ.|| ||
Ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Atha kho aññatarā devatā abhikkantāya rattiyā abhikkanta-vaṇṇā kevala-kappaṃ Jetavanaṃ obhāsetvā yena Bhagavā ten'upasaṇkami.|| ||
Upasaṇkamitvā Bhagavantaṃ abhivādetvā ekam-antaṃ aṭṭhāsi.
Eka-m-antaṃ ṭhitā kho sā devatā Bhagavantaṃ gāthāya ajjhabhāsi:|| ||
Araññe viharantānaṃ santānaṃ brahma-cārinaṃ,||
Ekabhattaṃ bhuñjamānānaṃ kena vaṇṇo pasīdatī ti.|| ||
(Bhagavā:)||
Atītaṃ nānusocanti na ppajappanti'nāgataṃ,||
Paccuppannena yāpenti tena vaṇṇo pasīdati.||
Anāgatappajappāya atītassānusocanā,||
Etena bālā sussanti naḷo va harito luto ti.|| ||
Na'avaggo paṭhamo
