Saṃyutta Nikāya
I. Sagātha Vagga
1. Devatā-Saṃyutta
III. Satti Vagga
Adapted from the 1995 edition of the digital version of the
Sri Lanka Buddha Jayanti Tripitaka Series.
Sutta 21
Satti Suttaṃ
[21.1][pts][bodh] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Eka-m-antaṃ ṭhitā kho sā devatā Bhagavato santike imaṃ gāthaṃ abhāsi:|| ||
"Sattiyā viya omaṭṭho ḍayha-mānova matthake,||
Kāmarāga-p-pahāṇāya sato bhikkhu paribbaje" ti.|| ||
(Bhagavā:)|| ||
"Sattiyā viya omaṭṭho ḍayha-mānova matthake,||
Sakkāya-diṭṭhippahāṇāya sato bhikkhu paribbaje" ti.|| ||
Sutta 22
Phusati Suttaṃ
[22.1][pts][bodh] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Eka-m-antaṃ ṭhitā kho sā devatā Bhagavato santike imaṃ gāthaṃ abhāsi:|| ||
"Nāphusantaṃ phusati ca phusantaṃ ca tato phuse,||
Tasmā phusantaṃ phusati appaduṭṭhappadosinan" ti.|| ||
(Bhagavā:)|| ||
"Yo appaduṭṭhassa narassa dussati,||
Suddhassa posassa an-aṇgaṇassa,||
Tam eva bālaṃ pacceti pāpaṃ,||
Sukhumo rajo paṭivātaṃva khitto" ti.|| ||
Sutta 23
Jaṭā Suttaṃ
[23.1][pts][bodh] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Eka-m-antaṃ ṭhitā kho sā devatā Bhagavantaṃ gāthāya ajjhabhāsi:|| ||
"Anto jaṭā bahi jaṭā jaṭāya jaṭitā pajā,||
Taṃ taṃ Gotama pucchāmi ko imaṃ vijaṭaye jaṭan" ti.|| ||
(Bhagavā:)|| ||
"Sīle patiṭṭhāya naro sapañño cittaṃ paññañ ca bhāvayaṃ,||
Ātāpi nipako bhikkhu so imaṃ vijaṭaye jaṭanti.|| ||
Yesaṃ rāgo ca doso ca avijjā ca virājitā,||
Khīṇ'āsavā Arahanto tesaṃ vijaṭitā jaṭā.|| ||
Yattha nāmañ ca rūpañ ca asesaṃ uparujjhati,||
Paṭighaṃ rūpa-saññā ca etthesā chijjate jaṭā" ti.|| ||
Sutta 24
Manonivāraṇa Suttaṃ
[24.1][pts][bodh] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Eka-m-antaṃ ṭhitā kho sā devatā Bhagavato santike imaṃ gāthaṃ abhāsi:|| ||
[14] "Yato yato mano nivāraye||
Na dukkhameti naṃ tato tato,||
Sa sabbato manonivāraye||
Sa sabbato dukkhā pamuccatī" ti.|| ||
(Bhagavā:)|| ||
"Na sabbato mano nivāraye||
Mano yatattamāgataṃ,||
Yato yato ca pāpakaṃ||
Tato tato mano nivāraye" ti.|| ||
Sutta 25
Arahanta Suttaṃ
[25.1][pts][bodh][than] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Eka-m-antaṃ ṭhitā kho sā devatā Bhagavato santike imaṃ gāthaṃ abhāsi:|| ||
"Yo hoti bhikkhu arahaṃ katāvī||
Khīṇ'āsavo antimadehadhārī||
Ahaṃ vadāmīti pi so vadeyya||
Mamaṃ vadantīti pi so vadeyyā" ti.|| ||
(Bhagavā:)|| ||
"Yo hoti bhikkhu arahaṃ katāvī||
Khīṇ'āsavo antimadehadhārī,||
Ahaṃ vadāmīti pi so vadeyya||
Mamaṃ vadantīti pi so vadeyya||
Loke samaññaṃ kusalo viditvā,||
Vohāramattena so vohareyyā" ti.|| ||
(Devatā:)
"Yo hoti bhikkhu arahaṃ katāvī||
Khīṇ'āsavo antimadehadhārī,||
Mānaṃ nu kho so upagamma bhikkhu||
Ahaṃ vadāmīti pi so vadeyya||
Mamaṃ vadantīti pi so vadeyyā" ti.|| ||
(Bhagavā:)|| ||
"Pahīṇamānassa na santi ganthā||
Vidhūpitā mānaganthassa sabbe,||
So vītivatto maññanaṃ1 su medho||
[15] Ahaṃ vadāmīti pi so vadeyya||
Mamaṃ vadantī ti pi so vadeyya,||
Loke samaññaṃ kusalo viditvā||
Vohāramattena so vohareyyā" ti.|| ||
Sutta 26
Pajjota Suttaṃ
[26.1][pts][bodh] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Eka-m-antaṃ ṭhitā kho sā devatā Bhagavato santike imaṃ gāthaṃ abhāsi:|| ||
"Kati lokasmiṃ pajjotā yehi loko pakāsati,||
Bhagavantaṃ puṭṭhumāgamma kathaṃ jānemu taṃ mayaṃ.|| ||
Cattāro loke pajjotā pañcamettha na vijjati,||
Divā tapati ādicco rattiṃ ābhāti candimā,||
Atha aggi divārattiṃ tattha tattha pakāsati,||
SamBuddho tapataṃ seṭṭho esā ābhā anuttarā" ti.|| ||
Sutta 27
Sara Suttaṃ
[27.1][pts][bodh] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Eka-m-antaṃ ṭhitā kho sā devatā Bhagavantaṃ gāthāya ajjhabhāsi.|| ||
"Kuto sarā nivattanti kattha vaṭṭaṃ na vattati,||
Kattha nāmañ ca rūpañ ca asesaṃ uparujjhatī" ti.|| ||
(Bhagavā:)|| ||
"Yattha āpo ca paṭhavī tejo vāyo na gādhati,||
Ato sarā nivattanti ettha vaṭṭaṃ na vattati,||
Ettha nāmañ ca rūpañ ca asesaṃ uparujjhatī" ti.|| ||
Sutta 28
Mahaddhana Suttaṃ
[28.1][pts][bodh] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Eka-m-antaṃ ṭhitā kho sā devatā Bhagavantaṃ gāthāya ajjhabhāsi:|| ||
"Mahaddhanā mahā-bhogā raṭṭhavanto pi khattiyā,||
Aññamaññābhigijjhanti kāmesu analaṇkatā||
Tesu ussukkajātesu bhavasotānusārisu,||
Kedha taṇhaṃ pajahiṃsu ke lokasmiṃ anussukā" ti|| ||
(Bhagavā:)|| ||
"Hitvā agāraṃ pabba-jitā hitvā puttaṃ pasuṃ piyaṃ||
Hitvā rāgañ ca dosañ ca avijjañ ca virājiya||
Khīṇ'āsavā Arahanto te lokasmiṃ anussukā" ti.|| ||
Sutta 29
Catucakka Suttaṃ
[29.1][pts][bodh] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
(Devatā:)|| ||
[16] "Catucakkaṃ navadvāraṃ puṇṇaṃ lobhena saṃyutaṃ,||
Paṇkajātaṃ mahāvīra kathaṃ yātrā bhavissa" ti.|| ||
(Bhagavā:)|| ||
"Chetvā naddhiṃ varattañ ca icchālobhañ ca pāpakaṃ,||
Samūlaṃ taṇhaṃ abbuyha evaṃ yātrā bhavissatī" ti.|| ||
Sutta 30
Eṇijaṇgha Suttaṃ
[30.1][pts][bodh] Evam me sutaṃ ekaṃ samayaṃ Bhagavā Sāvatthiyaṃ viharati Jetavane Anāthapiṇḍikassa ārāme.|| ||
"Eṇijaṇghaṃ kisaṃ vīraṃ appāhāraṃ alolupaṃ,||
Sīhaṃ vekacaraṃ nāgaṃ kāmesu anapekkhinaṃ,||
Upasaṇkamma pucchāma kathaṃ dukkhā pamuccatī" ti.|| ||
(Bhagavā:)|| ||
"Pañcakāma-guṇā loke manochaṭṭhā paveditā,||
Ettha chandaṃ virāchetvā evaṃ dukkhā pamuccatī" ti.|| ||
Satti Vagga Tatiyo
