Saṃyutta Nikāya
II. Nidāna Vagga
20. Opamma Saṃuttaṃ
Sutta 4
Ukkhā-Sata Suttaṃ aka Okkhā Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][rhyc][than][olds] EVAṂ ME SUTAṂ:|| ||
Ekaṃ samayaṃ Bhagavā Sāvatthiyaṃ viharati.||
Jetavane Anāthapiṇḍikassa ārāme.|| ||
[2] "Yo bhikkhave, pubbaṇha-samayaṃ ukkhāsataṃ dānaṃ dadeyya,||
yo majjhantikaṃ-samayaṃ ukkhāsataṃ dānaṃ dadeyya,||
yo vā sāyaṇha-samayaṃ ukkhāsataṃ dānaṃ dadeyya,||
yo vā pubbaṇha-samayaṃ antamaso gaddūhana-matta pi mettaṃ cittaṃ bhāveyya,||
yo vā majjhantikaṃ-samayaṃ antamaso gaddūhana-matta pi mettaṃ cittaṃ bhāveyya,||
yo vā sāyaṇha-samayaṃ antamaso gaddūhana-matta pi mettaṃ cittaṃ bhāveyya,||
idaṃ tato maha-p-phalataraṃ.|| ||
[3] Tasmātiha bhikkhave,||
evaṃ sikkhitabbaṃ:|| ||
'Mettā no ceto-vimutti bhāvitā bhavissati||
bahulī-katā yānī-katā vatthu-katā anuṭṭhitā paricitā susamāraddhā' ti.|| ||
Evaṃ hi vo bhikkhave sikkhitabban" ti.|| ||
