Saṃyutta Nikāya
5. Mahā-Vagga
56. Sacca Saṃyutta
5. Papāta Vagga
Sutta 45
Paṭhama Chiggaḷa Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh][than] Evam me sutaṃ:|| ||
Ekaṃ samayaṃ Bhagavā Vesāliyaṃ viharati Mahāvane Kūṭāgāra-sālāyaṃ.|| ||
Atha kho āyasmā Ānando pubbaṇha-samayaṃ nivāsetvā patta-cīvaram ādāya Vesāliṃ piṇḍāya pāvisi.|| ||
Addasā kho āyasmā Ānando sambahule Licchavi-kumārake santhāgāre upāsanaṃ karonte||
dūrato va sukhumena tālacchiggalena asanaṃ atipātente poṇkhānupoṇkhaṃ avirādhitaṃ.|| ||
Disvān'assa etad ahosi:|| ||
"Sikkhitā vat'ime Licchavi-kumārakā.|| ||
Susikkhitā vat'ime Licchavi-kumārakā.|| ||
Yatra hi nāma dūrato va sukhumena tālacchiggalena asanaṃ atipātessanti poṇkhānupoṇkhaṃ avirādhitan" ti.|| ||
Atha kho āyasmā Ānando Vesāliyaṃ piṇḍaya caritvā pacchā-bhattaṃ piṇḍa-pāta-paṭikkanto yena Bhagavā ten'upasaṇkami.|| ||
Upasaṃkamitvā Bhagavantaṃ abhivādetvā eka-m-antaṃ nisīdi.|| ||
Eka-m-antaṃ nisinno kho āyasmā Ānando Bhagavantaṃ etad avoca:|| ||
"Idh'āhaṃ bhante, pubbaṇha-samayaṃ nivāsetvā patta-cīvaram ādāya Vesāliṃ piṇḍāya pāvisiṃ.|| ||
Addasaṃ khv'āhaṃ bhante, sambahule Licchavi-kumārake santhāgāre upāsanaṃ karonte||
dūrato va sukhumena tālacchiggalena asanaṃ atipātente poṇkhānupoṇkhaṃ avirādhitaṃ.|| ||
Disvāna me etad ahosi:|| ||
"Sikkhitā vat'ime Licchavi-kumārakā.|| ||
Susikkhitā vatime Licchavi-kumārakā.|| ||
Yatra hi nāma dūrato va sukhumena tālacchiggalena asanaṃ atipātessanti poṇkhānupoṇkhaṃ avirādhitan" ti.|| ||
■
[454] "Taṃ kiṃ maññasi Ānanda?|| ||
Katamaṃ nu kho dukkarataraṃ vā du-r-abhisambhavataraṃ vā,||
yo ca dūrato va sukhumena tālacchiggalena asanaṃ atipāteyya poṇkhānupoṇkhaṃ avirādhitaṃ||
yo vā satadhā bhinnassa vālassa koṭiyā koṭiṃ paṭivijjhayyā" ti?|| ||
"Etad eva bhante,||
dukkarataraṃ c'eva du-r-abhisambhavataraṃ ca||
yo vā satadhā bhinnassa vālassa koṭiyā koṭiṃ paṭivijjhayyā" ti.|| ||
"Atha kho te Ānanda du-p-paṭivijjhataraṃ paṭivijjhanti ye||
'idaṃ dukkhan' ti||
yathā-bhūtaṃ paṭivijjhanti||
'ayaṃ dukkha-samudayo' ti||
yathā-bhūtaṃ paṭivijjhanti||
'ayaṃ dukkha-nirodho' ti||
yathā-bhūtaṃ paṭivijjhanti||
'ayaṃ dukkha-nirodha-gāminī paṭipadā' ti||
yathā-bhūtaṃ paṭivijjhanti.|| ||
Tasmātiha Ānanda,||
'idaṃ dukkhan' ti yogo karaṇīyo||
'ayaṃ dukkha-samudayo' ti yogo karaṇīyo||
'ayaṃ dukkha-nirodho' ti yogo karaṇīyo||
'ayaṃ dukkha-nirodha-gāminī paṭipadā' ti yogo karaṇīyo" ti.|| ||
