Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara-Nikāya
III. Tika Nipāta
I. Bāla Vagga

Namo tassa Bhagavato arahato Sammā-Sam-Buddhassa

Suttas 1-10

Adapted from the 1995 edition of the digital version of the Sri Lanka Buddha Jayanti Tripitaka Series.

 


[101]

Sutta 1

Bhaya Suttaɱ

[1.1][pts][bodh][upal] Evaɱ me sutaɱ:

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍakassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Yāni kānici bhikkhave bhayāni uppajjanti||
sabbāni tāni bālato uppajjanti,||
no paṇḍitato.|| ||

Ye keci upasaggā uppajjanti,||
sabbe te bālato uppajjanti,||
no paṇḍitato.|| ||

Ye keci upaddavā uppajjanti,||
sabbe te bālato uppajjanti,||
no paṇḍitato.|| ||

Seyyathā pi, bhikkhave, naḷāgāra vā tiṇāgāro vā aggi mukko kūṭāgārāni pi dahati ullittāvalittāni nivātāni phussitaggalāni pihitavātapānāni.|| ||

Evam eva kho bhikkhave yāni kānici bhayāni uppajjanti,||
sabbāni tāni bālato uppajjanti,||
no paṇḍitato.|| ||

Ye keci upasaggā uppajjanti,||
sabbe te bālato uppajjanti,||
no paṇḍitato.|| ||

Ye keci upaddavā uppajjanti,||
sabbe te bālato uppajjanti,||
no paṇḍitato.|| ||

Iti kho bhikkhave sappaṭi-bhayo bālo,||
appaṭibhayo paṇḍito.|| ||

Sa-upasaggo bālo,||
anupasaggo paṇḍito.|| ||

Sa-upaddavo bālo,||
anupaddavo paṇḍito.|| ||

N'atthi bhikkhave paṇḍitato bhayaɱ,||
n'atthi paṇḍitato upasaggo,||
n'atthi paṇḍitato uppaddavo.|| ||

Tasmā ti ha bhikkhave evaɱ sikkhitabbaɱ:

'Yehi tīhi dhammehi samannāgato bālo veditabbo,||
te tayo dhamme abhini-vajchetvā||
yehi tīhi dhammehi samannāgato paṇḍito veditabbo,||
te tayo dhamme samādāya vattissāmā' ti.|| ||

Evaɱ hi vo bhikkhave sikkhitabban" ti.|| ||

 


 

Sutta 2

Lakkhana Suttaɱ

[102] [2.1][pts][than][bodh][upal] "Kammalakkhaṇo bhikkhave bālo,||
kammalakkhaṇo paṇḍito,||
apadāna sobhati paññā.|| ||

Tīhi bhikkhave dhammehi samannāgato bālo veditabbo.|| ||

Katamehi tīhi?|| ||

Kāya-du-c-caritena,||
vacī-du-c-caritena,||
mano-du-c-caritena.|| ||

Imehi kho bhikkhave tīhi dhammehi samannāgato bālo veditabbo.|| ||

 

§

 

Tīhi bhikkhave dhammehi samannāgato paṇḍito veditabbo.|| ||

Katamehi tīhi?|| ||

Kāya-sucaritena,||
vacī-sucaritena,||
mano-sucaritena.|| ||

Imehi kho bhikkhave tīhi dhammehi samannāgato paṇḍito veditabbo.|| ||

Tasmā ti ha bhikkhave evaɱ sikkhitabbaɱ:

'Yehi tīhi dhammehi samannāgato bālo veditabbo,||
te tayo dhamme abhini-vajchetvā||
yehi tīhi dhammehi samannāgato paṇḍito veditabbo,||
te tayo dhamme samādāya vattissāmā' ti.|| ||

Evaɱ hi vo bhikkhave sikkhitabban" ti.|| ||

 


 

Sutta 3

Cintī Suttaɱ

[3.1][pts][bodh][upal] "Tīṇ'imāni bhikkhave bālassa bālalakkhaṇāni bālanimittatāni bālāpadānāni.|| ||

Katamāni tīṇi?|| ||

Idha bhikkhave bālo duccintitacintī ca hoti,||
dubbhāsitabhāsī,||
dukkaṭakammakārī.|| ||

No cedaɱ, bhikkhave, bālo duccintitacintī ca abhavissa,||
dubbabhāsitabhāsī,||
dukkaṭakammakārī.|| ||

Kena naɱ paṇḍitā jāneyyuɱ||
'bālo ayaɱ bhavaɱ asappuriso' ti.|| ||

Yasmā ca kho bhikkhave bālo duccintitacintī ca hoti,||
dubbhāsitabhāsī,||
dukkaṭakammakārī.|| ||

Tasmā naɱ paṇḍitā jānanti,||
'bālo ayaɱ bhavaɱ asappuriso' ti|| ||

Imāni kho bhikkhave tīṇi bālassa bālalakkhaṇāni bālanimittāni bālāpadānāni.|| ||

 

§

 

"Tīṇ'imāni bhikkhave paṇḍitassa paṇḍitalakkhaṇāni paṇḍitanimittāni paṇḍitāpadānāni.|| ||

Katamāni tīṇi?|| ||

Idha bhikkhave paṇḍito sucintitacintī ca hoti,||
su-bhāsitabhāsī,||
sukata-kammakārī.|| ||

No cedaɱ bhikkhave paṇḍito sucintitacintī ca abhavissa,||
su-bhāsitabhāsī,||
sukata-kammakārī,||
kena naɱ paṇḍitā jāneyyuɱ,||
paṇḍito 'ayaɱ bhavaɱ sappuriso' [103] ti.|| ||

Yasmā ca kho bhikkhave paṇḍito sucintitacintī ca hoti,||
su-bhāsitabhāsī,||
sukata-kammakārī.|| ||

Tasmā naɱ paṇḍitā jānanti,||
paṇḍito 'ayaɱ bhavaɱ sappuriso' ti.|| ||

Imāni kho bhikkhave tīṇi paṇḍitassa paṇḍitalakkhaṇāni paṇḍitanimittāni paṇḍitāpadānāni.|| ||

Tasmā ti ha bhikkhave evaɱ sikkhitabbaɱ:

'Yehi tīhi dhammehi samannāgato bālo veditabbo,||
te tayo dhamme abhini-vajchetvā||
yehi tīhi dhammehi samannāgato paṇḍito veditabbo,||
te tayo dhamme samādāya vattissāmā' ti.|| ||

Evaɱ hi vo bhikkhave sikkhitabban" ti.|| ||

 


 

Sutta 4

Accaya Suttaɱ

[4.1][pts][bodh][upal] "Tīhi bhikkhave dhammehi samannāgato bālo veditabbo.|| ||

Katamehi tīhi?|| ||

Accayaɱ acacayato na passati,||
accayaɱ accayato disvā yathā-dhammaɱ na paṭikaroti,||
parassa kho pana accayaɱ desentassa yathā-dhammaɱ na patigaṇhāti.|| ||

Imehi kho bhikkhave tīhi dhammehi samannāgato bālo veditabbo.|| ||

 

§

 

Tīhi bhikkhave dhammehi samannāgato paṇḍito veditabbo.|| ||

Katamehi tīhi?|| ||

Accayaɱ accayato passati,||
accayaɱ accayato disvā yathā-dhammaɱ paṭikaroti,||
parassa kho pana accayaɱ desentassa yathā-dhammaɱ patigaṇhāti.|| ||

Imehi kho bhikkhave tīhi dhammehi samannāgato paṇḍito veditabbo.|| ||

Tasmā ti ha bhikkhave evaɱ sikkhitabbaɱ:

'Yehi tīhi dhammehi samannāgato bālo veditabbo,||
te tayo dhamme abhini-vajchetvā||
yehi tīhi dhammehi samannāgato paṇḍito veditabbo,||
te tayo dhamme samādāya vattissāmā' ti.|| ||

Evaɱ hi vo bhikkhave sikkhitabban" ti.|| ||

 


 

Sutta 5

Ayoniso Suttaɱ

[5.1][pts][bodh][upal] "Tīhi bhikkhave dhammehi samannāgato bālo veditabbo.|| ||

Katamehi tīhi?|| ||

Ayoniso pañhaɱ kattā hoti,||
ayoniso pañhaɱ vissajjetā hoti,||
parassa kho pana yoniso pañhaɱ vissajjitaɱ parimaṇḍalehi pada-vyañ janehi siliṭṭhehi upagatehi nābbhanumoditā hoti.|| ||

Imehi kho bhikkhave tīhi dhammehi samannāgato bālo veditabbo.|| ||

 

§

 

Tīhi bhikkhave dhammehi samannāgatā paṇḍito veditabbo.|| ||

Katamehi tīhi?|| ||

Yoniso pañhaɱ kattā hoti,||
yoniso pañhaɱ vissajjetā hoti,||
parassa kho pana yoniso pañhaɱ vissajjitaɱ parimaṇḍalehi pada-vyañ janehi siliṭṭhehi upagatehi abbhanumoditā hoti.|| ||

Imehi kho bhikkhave tīhi dhammehi samannāgato paṇḍito veditabbo.|| ||

Tasmā ti ha bhikkhave evaɱ sikkhitabbaɱ:

'Yehi tīhi dhammehi samannāgato bālo veditabbo,||
te tayo dhamme abhini-vajchetvā||
yehi tīhi dhammehi samannāgato paṇḍito veditabbo,||
te tayo dhamme samādāya vattissāmā' ti.|| ||

Evaɱ hi vo bhikkhave sikkhitabban" ti.|| ||

 


 

Sutta 6

Akusala Suttaɱ

[6.1][pts][bodh][upal] "Tīhi bhikkhave dhammehi samannāgato bālo veditabbo.|| ||

Katamehi tīhi?|| ||

[104] Akusalena kāya-kammena,||
akusalena vacī-kammena,||
akusalena mano-kammena.|| ||

Imehi kho bhikkhave tīhi dhammehi samannāgato bālo veditabbo.|| ||

 

§

 

Tīhi bhikkhave dhammehi samannāgato paṇḍito veditabbo.|| ||

Katamehi tīhi?|| ||

Kusalane kāya-kammena,||
kusalena vacī-kammena,||
kusalena mano-kammena.|| ||

Imehi kho bhikkhave tīhi dhammehi samannāgato paṇḍito veditabbo.|| ||

Tasmā ti ha bhikkhave evaɱ sikkhitabbaɱ:

'Yehi tīhi dhammehi samannāgato bālo veditabbo,||
te tayo dhamme abhini-vajchetvā||
yehi tīhi dhammehi samannāgato paṇḍito veditabbo,||
te tayo dhamme samādāya vattissāmā' ti.|| ||

Evaɱ hi vo bhikkhave sikkhitabban" ti.|| ||

 


 

Sutta 7

Sāvajja Suttaɱ

[7.1][pts][bodh][upal] "Tīhi bhikkhave dhammehi samannāgato bālo veditabbo.|| ||

Katamehi tīhi?|| ||

Sāvajjena kāya-kammena,||
sāvajjena vacī-kammena,||
sāvajjena mano-kammena.|| ||

Imehi kho bhikkhave tihi dhammehi samannāgato bālo veditabbo.|| ||

 

§

 

Tīhi bhikkhave dhammehi samannāgato paṇḍito veditabbo.|| ||

Katamehi tīhi?|| ||

Anavajjena kāya-kammena,||
anavajjena vacī-kammena,||
anavajjena mano-kammena.|| ||

Imehi kho bhikkhave tihi dhammehi samannāgato paṇḍito veditabbo.|| ||

Tasmā ti ha bhikkhave evaɱ sikkhitabbaɱ:

'Yehi tīhi dhammehi samannāgato bālo veditabbo,||
te tayo dhamme abhini-vajchetvā||
yehi tīhi dhammehi samannāgato paṇḍito veditabbo,||
te tayo dhamme samādāya vattissāmā' ti.|| ||

Evaɱ hi vo bhikkhave sikkhitabban" ti.|| ||

 


 

Sutta 8

Sabyābajjha Suttaɱ

[8.1][pts][bodh][upal] "Tīhi bhikkhave dhammehi samannāgato bālo veditabbo.|| ||

Katamehi tīhi?|| ||

Savyāpajjhena kāya-kammena,||
savyāpajjhena vacī-kammena,||
savyāpajjhena mano-kammena.|| ||

Imehi kho bhikkhave tīhi dhammehi samannāgato bālo veditabbo.|| ||

 

§

 

Tīhi bhikkhave dhammehi samannāgato paṇḍito veditabbo.|| ||

Katamehi tīhi?|| ||

Avyāpajjhena kāya-kammena,||
avyāpajjhena vacī-kammena,||
avyāpajjhena mano-kammena.|| ||

Imehi kho bhikkhave tīhi dhammehi samannāgato paṇḍito veditabbo.|| ||

Tasmā ti ha bhikkhave evaɱ sikkhitabbaɱ:

'Yehi tīhi dhammehi samannāgato bālo veditabbo,||
te tayo dhamme abhini-vajchetvā||
yehi tīhi dhammehi samannāgato paṇḍito veditabbo,||
te tayo dhamme samādāya vattissāmā' ti.|| ||

Evaɱ hi vo bhikkhave sikkhitabban" ti.|| ||

 


 

Sutta 9

Khataɱ Suttaɱ

[105] [9.1][pts][bodh][upal] "Tīhi bhikkhave dhammehi samannāgato bālo avyatto asappuriso khataɱ upahataɱ attānaɱ pariharati,||
sāvajjo ca hoti||
sānuvajjo viññūnaɱ,||
bahuñ ca apuññaɱ pasavati.|| ||

Katamehi tīhi?|| ||

Kāya-du-c-caritena,||
vacī-du-c-caritena,||
mano-du-c-caritena.|| ||

Imehi kho bhikkhave tīhi dhammehi samannāgato bālo avyatto asappuriso khataɱ upahataɱ attānaɱ pariharati,||
sāvajjo ca hoti,||
sānuvajjo viññūnaɱ,||
bahuñ ca apuññaɱ pasavati.|| ||

 

§

 

Tīhi bhikkhave dhammehi samannāgato paṇḍito vyatto sappuriso akkhataɱ anupahataɱ attānaɱ pariharati,||
anavajjo ca hoti||
ananuvajjo viññūnaɱ,||
bahuñ ca puññaɱ pasavati.|| ||

Katamehi tīhi?|| ||

Kāya-sucaritena,||
vacī-sucaritena,||
mano-sucaritena.|| ||

Imehi kho bhikkhave tīhi dhammehi samannāgato paṇḍito vyatto sappuriso akkhataɱ anupahataɱ attānaɱ pariharati,||
anavajjo ca hoti,||
ananuvajjo viññūnaɱ,||
bahuñ ca apuññaɱ pasavatī.|| ||

Tasmā ti ha bhikkhave evaɱ sikkhitabbaɱ:

'Yehi tīhi dhammehi samannāgato bālo veditabbo,||
te tayo dhamme abhini-vajchetvā||
yehi tīhi dhammehi samannāgato paṇḍito veditabbo,||
te tayo dhamme samādāya vattissāmā' ti.|| ||

Evaɱ hi vo bhikkhave sikkhitabban" ti.|| ||

 


 

Sutta 10

Mala Suttaɱ

[10.1][pts][bodh][upal] "Tīhi bhikkhave dhammehi samannāgato tayo male a-p-pahāya yath'ābhataɱ nikkhitto evaɱ Niraye.|| ||

Katamehi tīhi?|| ||

Dussīlo ca hoti,||
du-s-sīlyamalañ c'assa appahīnaɱ hoti,||
issukī ca hoti,||
issāmalañ c'assa appahīnaɱ hoti,||
maccharī ca hoti,||
macchera-malañ c'assa appahīnaɱ hoti.|| ||

Imehi kho bhikkhave tīhi dhammehi samannāgato ime tayo male a-p-pahāya yath'ābhataɱ nikkhitto evaɱ Niraye.|| ||

 

§

 

Tīhi bhikkhave dhammehi samannāgato tayo male pahāya yath'ābhataɱ nikkhitto evaɱ sagge.|| ||

Katamehi tīhi?|| ||

Sīlavā ca hoti,||
du-s-sīlyamalañ c'assa pahīnaɱ hoti,||
anissukī ca hoti,||
issāmalañ c'assa pahīnaɱ hoti,||
amaccharī ca hoti,||
macchera-malañ c'assa pahīnaɱ hoti.|| ||

Imehi kho bhikkhave tīhi dhammehi samannāgato ime tayo male pahāya yath'ābhataɱ nikkhitto evaɱ sagge" ti.|| ||

 

Bāla Vagga Paṭhama

 


Contact:
E-mail
Copyright Statement