Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara-Nikāya
III. Tika Nipāto
II. Rathakāra Vagga

Sutta 19

Paṭhama Pāpaṇika Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][bodh][upal] Evaɱ me sutaɱ:

Evaɱ me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍakassa ārāme.|| ||

Tīhi bhikkhave aŋgehi samannāgato pāpaṇiko abhabbo anadhigataɱ vā bhogaɱ adhigantuɱ,||
adhigataɱ vā bhogaɱ phātikatuɱ.|| ||

Katamehi tīhi?|| ||

Idha bhikkhave pāpaṇiko||
pubbaṇha-samayaɱ na sakkaccaɱ kammantaɱ adhiṭṭhāti,||
majjhantikasamayaɱ na sakkaccaɱ kammantaɱ adhiṭṭhāti,||
sāyaṇha-samayaɱ na sakkaccaɱ kammantaɱ adhiṭṭhāti.|| ||

Imehi kho bhikkhave tīhi aŋgehi samannāgato pāpaṇiko abhabbo anadhigataɱ vā bhogaɱ adhigantuɱ,||
adhigataɱ vā bhogaɱ phātikatuɱ.|| ||

Evam eva kho bhikkhave tīhi dhammehi samannāgato bhikkhu abhabbo anadhigataɱ vā kusalaɱ dhammaɱ adhigantuɱ,||
adhigataɱ vā kusalaɱ dhammaɱ phātikatuɱ.|| ||

Katamehi tīhi?|| ||

Idha bhikkhave bhikkhu pubbaṇha-samayaɱ na sakkaccaɱ samādhinimittaɱ adhiṭṭhāti,||
majjhantikasamayaɱ na sakkaccaɱ samādhinimittaɱ adhiṭṭhāti,||
sāyaṇha-samayaɱ na sakkaccaɱ samādhinimittaɱ adhiṭṭhāti.|| ||

Imehi kho bhikkhave tīhi dhammehi samannāgato bhikkhu abhabbo anadhigataɱ vā kusalaɱ dhamamaɱ adhigantuɱ,||
adhigataɱ vā kusalaɱ dhammaɱ phātikatun ti.|| ||

[116] Tīhi bhikkhave aŋgehi samannāgato pāpaṇiko bhabbo anadhigataɱ vā bhogaɱ adhigantuɱ,||
adhigataɱ vā bhogaɱ phātikatuɱ.|| ||

Katamehi tīhi?|| ||

Idha bhikkhave pāpaṇiko pubbaṇha-samayaɱ sakkaccaɱ kammantaɱ adhiṭṭhāti,||
majjhantikasamayaɱ sakkaccaɱ kammantaɱ adhiṭṭhāti,||
sāyaṇha-samayaɱ sakkaccaɱ kammantaɱ adhiṭṭhāti.|| ||

Imehi kho bhikkhave tīhi aŋgehi samannāgato pāpaṇiko bhabbo anadhigataɱ vā bhogaɱ adhigantuɱ,||
adhigataɱ vā bhogaɱ phātikatuɱ.|| ||

Evam eva kho bhikkhave tīhi dhammehi samannāgato bhikkhu bhabbo anadhigataɱ vā kusalaɱ dhammaɱ adhigantuɱ,||
adhigataɱ vā kusalaɱ dhammaɱ phātikatuɱ.|| ||

Katamehi tīhi?|| ||

Idha bhikkhave bhikkhu pubbaṇha-samayaɱ sakkaccaɱ samādhinimittaɱ adhiṭṭhāti,||
majjhantikaɱ samayaɱ sakkaccaɱ samādhinimittaɱ adhiṭṭhāti||
sāyaṇha-samayaɱ sakkaccaɱ samādhinimittaɱ adhiṭṭhāti.|| ||

Imehi kho bhikkhave tīhi dhammehi samannāgato bhikkhu bhabbo anadhigataɱ vā kusalaɱ dhamamaɱ adhigantuɱ,||
adhigataɱ vā kusalaɱ dhammaɱ phātikatuɱ.|| ||

 


Contact:
E-mail
Copyright Statement