Aŋguttara-Nikāya
III. Tika Nipāta
III. Puggala Vagga

Sutta 24

Bahukāra Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[123]

[1][pts][bodh][upal] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati,||
Jetavane Anāthapiṇḍikassa ārāme.|| ||

Tayo'me bhikkhave puggalā puggalassa bahu-kārā.|| ||

Katame tayo?|| ||

Yaɱ bhikkhave puggalaɱ āgamma puggalo Buddhaɱ saraṇaɱ gato hoti,||
dhammaɱ saraṇaɱ gato hoti,||
saŋaghaɱ saraṇaɱ gato hoti.|| ||

Ayaɱ bhikkhave puggalo imassa puggalassa bahukāro.|| ||

Puna ca paraɱ bhikkhave yaɱ puggalaɱ āgamma puggalo idaɱ dukkhan ti yathā-bhūtaɱ pajānāti,||
ayaɱ dukkha-samudayo ti yathā-bhūtaɱ pajānāti,||
ayaɱ dukkha-nirodho ti yathā-bhūtaɱ pajānāti,||
ayaɱ dukkha-nirodha-gāminī paṭipadā ti yathā-bhūtaɱ pajānāti.|| ||

Ayaɱ bhikkhave puggalo imassa puggalassa bahukāro.|| ||

Puna ca paraɱ bhikkhave yaɱ puggalaɱ āgamma puggalo āsavānaɱ khayā anāsavaɱ ceto-vimuttiɱ paññā-vimuttiɱ diṭṭhe'va dhamme sayaɱ abhiññā sacchi-katvā upasampajja viharati.|| ||

Ayaɱ bhikkhave puggalo imassa puggalassa bahukāro.|| ||

Ime kho bhikkhave tayo puggalā puggalassa bahu-kārā.|| ||

Imehi ca pana bhikkhave tīhi puggalehi imassa puggalassa n'atthi añño puggalo bahukārataro ti vadāmi.|| ||

Imesañ ca bhikkhave tiṇṇaɱ puggalānaɱ iminā puggalena na suppatikāraɱ vadāmi ti,||
yad idaɱ abhivādana-pacc'u'ṭ-ṭhāna-añjali-kamma-sāmīci-kamma-cīvara-piṇḍa-pātasen'āsana-gilāna-paccaya-bhesajja-parikkhārānuppadānenā" ti.|| ||