Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara-Nikāya
III. Tika Nipāta
III. Puggala Vagga

Sutta 25

Vajirūpama Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[123]

[1][pts][bodh][upal] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati,||
Jetavane Anāthapiṇḍikassa ārāme.|| ||

"Tayo'me bhikkhave puggalā santo saŋvijj'amānā lokas- [124] miɱ.|| ||

Katame tayo?|| ||

Arukūpama-citto puggalo,||
vijjūpama-citto puggalo,||
vajirūpama-citto puggalo.|| ||

 

§

 

Katamo ca bikkhave arukūpama-citto puggalo?|| ||

Idha bhikkhave ekacco puggalo kodhano hoti upāyāsabahulo,||
appam pi vutto samāno abhisajjati,||
kuppati,||
vyāpajjati,||
patitthiyati,||
kopañ ca dosañ ca appaccayañ ca pātu-karoti.|| ||

Seyyathā pi nāma duṭṭhārukā kaṭṭhena vā kaṭhalena vā ghaṭṭitā bhīyosomattāya āsavaɱ deti.|| ||

Evam eva kho bhikkhave idh'ekacco puggalo kodhano hoti upāyāsabahulo,||
appam pi vutto samāno abhisajjati,||
kuppati,||
vyāpajjati,||
patittiyati,||
kopañ ca dosañ ca appaccayañ ca pātu-karoti.|| ||

Ayaɱ vuccati bhikkhave arukūpama-citto puggalo.|| ||

Katamo ca bhikkhave vijjūpama-citto puggalo?|| ||

Idha bhikkhave ekacco puggalo idaɱ dukkhan ti yathā-bhūtaɱ pajānāti,||
ayaɱ dukkha-samudayo ti yathā-bhūtaɱ pajānāti,||
ayaɱ dukkha-nirodho ti yathā-bhūtaɱ pajānāti,||
ayaɱ dukkha-nirodha-gāminī paṭipadā ti yathā-bhūtaɱ pajānāti.|| ||

Seyyathā pi, bhikkhave, cakkhumā puriso ratt-andhakāra-timisāyaɱ vijjantarikāya rūpāni passeyya|| ||

Evam eva kho, bhikkhave, idh'ekacco puggalo idaɱ dukkhan ti yathā-bhūtaɱ pajānāti,||
ayaɱ dukkha-samudayo ti yathā-bhūtaɱ pajānāti,||
ayaɱ dukkha-nirodho ti yathā-bhūtaɱ pajānāti,||
ayaɱ dukkha-nirodha-gāminī paṭipadā ti yathā-bhūtaɱ pajānāti.|| ||

Ayaɱ vuccati bhikkhave vijjūpama-citto puggalo.|| ||

Katamo ca bhikkhave vajirūpamacitto puggalo?|| ||

Idha bhikkhave ekacco puggalo āsavānaɱ khayā anāsavaɱ ceto-vimuttiɱ paññā-vimuttiɱ diṭṭhe'va dhamme sayaɱ abhiññā sacchi-katvā upasampajja viharati.|| ||

Seyyathā pi, bhikkhave, vajirassa n'atthi kiñci abhejjaɱ, maṇi vā pāsāṇo vā.|| ||

Evam eva kho bhikkhave idh'ekacco puggalo āsavānaɱ khayā anāsavaɱ ceto-vimuttiɱ paññā-vimuttiɱ diṭṭhe'va dhamme sayaɱ abhiññā sacchi-katvā upasampajja viharatī.|| ||

Ayaɱ vuccati bhikkhave vajirūpama-citto puggalo.|| ||

Ime kho bhikkhave tayo puggalā santo saŋvijj'amānā lokasmin" ti.|| ||

 


Contact:
E-mail
Copyright Statement