Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara-Nikāya
III. Tika Nipāta
IV. Devadūta Vagga

Sutta 35

Devadūta Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[138]

[1][wrrn][pts][bodh][olds] Evaɱ me sutaɱ.|| ||

Ekaɱ samayaɱ Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

Tīṇ'imāni bhikkhave devadutāni.|| ||

Katamāni tīṇi?|| ||

Idha bhikkhave ekacco||
kāyena du-c-caritaɱ carati,||
vācāya du-c-caritaɱ carati,||
manasā du-c-caritaɱ carati.|| ||

So kāyena du-c-caritaɱ caritvā||
vācāya du-c-caritaɱ caritvā||
manasā du-c-caritaɱ caritvā||
kāyassa bhedā param maraṇā apāyaɱ duggatiɱ vinipātaɱ Nirayaɱ uppajjati.|| ||

Tam enaɱ bhikkhave Nirayapālā nānā bāhāsu gahetvā Yamassa rañño dassenti:|| ||

'Ayaɱ deva puriso ametteyyo apetteyyo asāmañño abrahmañño,||
na kule jeṭṭhāpacāyī,||
imassa devo daṇḍaɱ paṇetū ti.|| ||

Tam enaɱ bhikkhave Yamo rājā paṭhamaɱ devadūtaɱ samanuyuñjati,||
samanugāhati, samanubhāsati:|| ||

'Ambho purisa, na tvaɱ addasa manussesu paṭhamaɱ devadūtaɱ pātubhūtan ti?|| ||

So evam āha:|| ||

'Nāddasaɱ bhante' ti.|| ||

Tam enaɱ bhikkhave Yamo rājā evam āha:|| ||

'Ambho purisa, na tvaɱ addasa manussesu itthiɱ vā purisaɱ vā āsītikaɱ vā nāvutikaɱ vā vassasatikaɱ vā jātiyā,||
jiṇṇaɱ gopānasivaŋkaɱ bhoggaɱ daṇḍaparāyanaɱ pavedhamānaɱ gacchantaɱ āturaɱ gatayobbanaɱ khaṇḍadantaɱ palitakesaɱ vilūnaɱ khalitaɱ sirovalitaɱ tilakāhatagattan ti.|| ||

So evam āha:|| ||

'Addasaɱ bhante' ti.|| ||

Tam enaɱ bhikkhave Yamo rājā evam āha:|| ||

'Ambho purisa, tassa te viññussa sato mahallakassa na etad ahosi:||
'Aham pi kho'mhi jarā-dhammo jaraɱ anatīto,||
handāhaɱ kalyāṇaɱ karomi kāyena vācāya manasā' ti?|| ||

[139] 'So evam āha:|| ||

'Nāhaɱ sakkhi'ssaɱ bhante,||
pamādassaɱ bhante' ti.|| ||

Tam enaɱ bhikkhave Yamo rājā evam āha:|| ||

'Ambho purisa, pamādavatāya na kalyāṇam akāsi kāyena vācāya manāsā.|| ||

Taggha tvaɱ, ambho purisa,||
tathā karissanti yathā taɱ pamattaɱ.|| ||

Taɱ kho pan'etaɱ pāpa-kammaɱ n'eva mātarā kataɱ,||
na pitarā kataɱ,||
na bhātarā kataɱ,||
na bhaginiyā kataɱ,||
na mitt-ā-maccehi kataɱ,||
na ñātisālohitehi kataɱ,||
na devatāhi kataɱ,||
na samaṇa-brāhmaṇehi kataɱ.|| ||

Atha kho tayā'vetaɱ pāpa-kammaɱ kataɱ,||
tvaɱ yeva tassa vipākaɱ paṭisaŋvediyasī' ti.|| ||

Tam enaɱ, bhikkhave, Yamo rājā paṭhamaɱ devadūtaɱ samanuyuñjitvā samanugāhitvā samanubhāsitvā dutiyaɱ devadūtaɱ samanuyuñjati,||
samanugāhati,||
samanubhāsati:|| ||

'Ambho purisa,||
na tvaɱ addasa manussesu dutiyaɱ devadūtaɱ pātubhūtan ti?'|| ||

So evam āha:|| ||

'Nāddasaɱ bhante' ti.|| ||

Tam enaɱ bhikkhave Yamo rājā evam āha:|| ||

'Ambho purisa,||
na tvaɱ addasa manussesu itthiɱ vā purisaɱ vā ābādhikaɱ dukkhitaɱ bāḷha-gilānaɱ sake muttakarīse pa'ipannaɱ semānaɱ aññehi ca vuṭṭhāpiyamānaɱ aññehi saɱvesiyamānan ti?|| ||

So evam āha:|| ||

'Addasaɱ bhante' ti.|| ||

Tam enaɱ bhikkhave Yamo rājā evam āha:|| ||

'Ambho purisa,||
tassa te viññussa sato mahallakassa na etad ahosi:|| ||

'Aham pi kho'mhī vyādhi-dhammo vyādhiɱ anatīto,||
handāhaɱ kalyāṇaɱ karomi kāyena vācāya manasā' ti?|| ||

So evam āha:|| ||

'Nāhaɱ sakkhissaɱ bhante,||
pamādassaɱ bhante' ti.|| ||

Tam enaɱ bhikkhave Yamo rājā evam āha:|| ||

'Ambho [140] purisa,||
pamādavatāya na kalyāṇam akāsi kāyena vācāya manasā.|| ||

Taggha tvaɱ, ambho purisa,||
tathā karissanti yathā taɱ pamattaɱ.|| ||

Taɱ kho pan'etaɱ pāpa-kammaɱ n'eva mātarā kataɱ,||
na pitarā kataɱ,||
na bhātarā kataɱ,||
na bhaginiyā kataɱ,||
na mitt-ā-maccehi kataɱ,||
na ñātisālohitehi kataɱ,||
na devatāhi kataɱ,||
na samaṇa-brāhmaṇehi kataɱ.|| ||

Atha kho tayā ve taɱ pāpa-kammaɱ kataɱ,||
tvaɱ yeva tassa vipākaɱ paṭisaŋvediyasī' ti.|| ||

3. Tam enaɱ bhikkhave Yamo rājā dutiyaɱ devadūtaɱ samanuyuñjitvā samanugāhitvā samanubhāsitvā tatiyaɱ devadūtaɱ samanuyuñjati,||
samanugāhati,||
samanubhāsati:|| ||

'Ambho purisa,||
na tvaɱ addasa manussesu tatiyaɱ devadūtaɱ pātubhūtanti?'|| ||

So evam āha:|| ||

'Nāddasaɱ bhante' ti.|| ||

Tam enaɱ bhikkhave Yamo rājā evam āha:|| ||

'Ambho purisa,||
na tvaɱ addasa manussesu itthiɱ vā purisaɱ vā ekāhamataɱ vā dvīhamataɱ vā tīhamataɱ vā uddhumātakaɱ vinīlakaɱ vipubbakajātan' ti?|| ||

So evam āha:|| ||

'Addasaɱ bhante' ti.|| ||

Tam enaɱ bhikkhave Yamo rājā evam āha:|| ||

'Ambho purisa,||
tassa te viññussa sato mahallakassa na etad ahosi:|| ||

'Aham pi kho'mhi maraṇa-dhammo,||
maraṇaɱ anatīto,||
handāhaɱ kalyāṇaɱ karomi kāyena vācāya manasā' ti?|| ||

So evam āha:|| ||

'Nāham sakkhissaɱ bhante,||
pamādassaɱ bhante' ti.|| ||

Tam enaɱ bhikkhave Yamo rājā evam āha:|| ||

'Ambho purisa,||
pamādavatāya na kalyāṇam akāsi kāyena vācāya manasā.|| ||

Taggha tvaɱ ambho purisa,||
tathā karissanti yathā taɱ pamattaɱ.|| ||

Taɱ kho pan'etaɱ pāpa-kammaɱ n'eva mātarā kataɱ na pitarā kataɱ na bhātarā kataɱ na bhaginiyā kataɱ na mitt-ā-maccehi kataɱ na ñātisālohitehi kataɱ na devatāhi kataɱ na samaṇa-brāhmaṇehi kataɱ.|| ||

Atha kho tayā ve taɱ pāpa-kammaɱ kataɱ,||
tvaɱ yeva tassa vipākaɱ paṭisaŋvedassasī ti.|| ||

4. Tam enaɱ bhikkhave Yamo rājā tatiyaɱ devadūtaɱ samanuyuñjitvā samanugāhitvā samanubhāsitvā tuṇhī hoti.|| ||

[141] Tam enaɱ bhikkhave Nirayapālā pañcavidhabandhanaɱ nāma kāraṇaɱ karonti,||
tattaɱ ayokhīlaɱ hatthe gamenti,||
tattaɱ ayokhīlaɱ dutiyasmiɱ hatthe gamenti,||
tattaɱ ayokhīlaɱ pāde gamenti,||
tattaɱ ayokhīlaɱ dutiyasmiɱ pāde gamenti,||
tattaɱ ayokhīlaɱ majjhe urasmiɱ gamenti.|| ||

So tattha dukkhā tibbā kharā kaṭukā vedanā vediyati.|| ||

Na ca tāva kālaɱ karoti,||
yāva na taɱ pāpa-kammaɱ vyantīhoti.|| ||

Tam enaɱ bhikkhave Nirayapālā saɱvesetvā kuṭhārīhi tacchanti.|| ||

So tattha dukkhā tibbā kharā kaṭukā vedanā vediyati.|| ||

Na ca tāva kālaɱ karoti,||
yāva na taɱ pāpa-kammaɱ vyantīhoti.|| ||

Tam enaɱ bhikkhave Nirayapālā uddhaɱ pādaɱ adho siraɱ ṭhapetvā vāsīhi tacchanti.|| ||

So tattha dukkhā tibbā kharā kaṭukā vedanā vediyati.|| ||

Na ca tāva kālaɱ karoti,||
yāva na taɱ pāpa-kammaɱ vyantīhoti.|| ||

Tam enaɱ bhikkhave Nirayapālā rathe yochetvā ādittāya bhūmiyā sampajjalitāya sajoti-bhūtāya sārenti pi,||
paccāsārenti pi so tattha dukkhā tibbā kharā kaṭukā vedanā vediyati.|| ||

Na ca tāva kālaɱ karoti,||
yāva na taɱ pāpa-kammaɱ vyantīhoti.|| ||

Tam enaɱ bhikkhave Nirayapālā mahantaɱ aŋgārapabbataɱ ādittaɱ sampajjalitaɱ sa-joti-bhūtaɱ āropenti pi oropenti pi.|| ||

Na ca tāva kālaɱ karoti,||
yāva na taɱ pāpa-kammaɱ vyantīhoti.|| ||

Tam enaɱ bhikkhave Nirayapālā uddhaɱ pādaɱ adho siraɱ gahetvā tattāya lohakumbhiyā pakkipanti ādittāya sampajjalitāya sajoti-bhūtāya.|| ||

So tattha pheṇuddehakaɱ paccati,||
so tattha pheṇuddehakaɱ paccāmāno sakim pi uddhaɱ gacchati,||
sakim pi adho gacchati,||
sakim pi tiriyaɱ gacchati.|| ||

So tattha dukkhā tibbā kharā kaṭukā vedanā vediyati.|| ||

Na ca tāva kālaɱ karoti,||
yāva na taɱ pāpa-kammaɱ vyantīhoti.|| ||

Tam enaɱ bhikkhave Nirayapālā mahāNiraye pakkhipanti.|| ||

So kho pana bhikkhave mahāNirayo:|| ||

Catukkaṇṇo catudvāro vibhatto bhāgaso mito,||
Ayopākārapariyanto ayasā paṭikujjito||
[142] Tassa ayomayā bhumi jalitā tejasā yutā,||
Samantā yojanasataɱ pharitvā tiṭṭhati sabbadā' ti|| ||

5. Bhūta-pubbaɱ bhikkhave Yamassa rañño etad ahosi:|| ||

'Ye kira bho loke pāpakāni kammāni karonti,||
te eva-rūpā vividhā kamma-kāraṇā karīyanti.|| ||

Aho vatāhaɱ manussattaɱ labheyyaɱ,||
Tathāgato ca loke uppajjeyya arahaɱ Sammā-sambuddho,||
tañ c'āhaɱ Bhagavantaɱ payirupāseyyaɱ,||
so ca me Bhagavā dhammaɱ deseyya,||
tassa c'āhaɱ Bhagavato dhammaɱ ājāneyyan ti.|| ||

Taɱ kho pan'āhaɱ bhikkhave na aññassa samaṇassa vā brāhmaṇassa vā sutvā evaɱ vadāmi.|| ||

Api ca kho bhikkhave yad eva me sāmañ ñātaɱ sāmaɱ diṭṭhaɱ sāmaɱ viditaɱ,||
tad evāhaɱ vadimīti.|| ||

Coditā devadūtehi ye pamajjanti mānavā,||
Te dīgha-rattaɱ socanti hīnakāyūpagā narā.||
Ye ca kho devadūtehi santo sappurisā idha,||
Coditā nappamajjanti Ariya-Dhamme kudācanaɱ.||
Upādāne bhayaɱ disvā jāti-maraṇa-sambhave,||
Anupādā vimuccanti jāti-maraṇasaŋkhaye.||
Te khema-p-pattā sukhitā diṭṭha-dhamm-ā-bhinibbutā||
Sabba-vera-bhayātītā sabba-dukkhaɱ upaccagun ti.|| ||

 


Copyright Statement