Aṇguttara-Nikāya
III. Tika Nipāta
VII. Mahā Vagga
Sutta 63
Venāgapura Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
[1][pts][bodh][than] Evaṃ me sutaṃ.|| ||
Ekaṃ samayaṃ Bhagavā Kosalesu cārikaṃ caramāno mahatā bhikkhu-saṇkhena saddhiṃ yena Venāgapuraṃ nāma Kosalānaṃ brāhmaṇa-gāmo tad avasari.|| ||
Assosuṃ kho Venāgapurikā brāhmaṇa-gahapatikā:|| ||
Samaṇo khalu bho Gotamo Sakya-putto Sakya-kulā pabba-jito Venāgapuraṃ anuppatto.|| ||
Taṃ ko pana Bhavantaṃ Gotamaṃ evaṃ kalyāṇo kitti-saddo abbhūggato:|| ||
"Iti pi so Bhagavā||
arahaṃ||
Sammā Sambuddho||
vijjā-caraṇa-sampanno||
Sugato||
loka-vidū anuttaro||
purisa-damma-sārathi||
Satthā deva-manussānaṃ||
Buddho||
Bhagavā.|| ||
So imaṃ lokaṃ sa-devakaṃ sa-Mārakaṃ sa-brahmakaṃ sa-s-samaṇa-brāhmaṇiṃ pajaṃ sa-deva-manussaṃ sayaṃ abhiññā sacchi-katvā pavedeti.|| ||
So dhammaṃ deseti ādi kalyāṇaṃ majjhe kalyāṇaṃ pariyesāna kalyāṇaṃ sātthaṃ savyañ janaṃ kevala-paripuṇṇaṃ parisuddhaṃ Brahma-cariyaṃ pakāseti.|| ||
Sādhu kho pana tathā-rūpānaṃ arahataṃ dassanaṃ hotī" ti.|| ||
2. Atha kho Venāgapurikā brāhmaṇa-gahapatikā yena Bhagavā ten'upasaṇkamiṃsu.|| ||
Upasaṇkamitvā appekacce Bhagavantaṃ abhivādetvā eka-m-antaṃ nisīdiṃsu.|| ||
Appekacce Bhagavatā saddhiṃ sammodiṃsu.|| ||
Sammodanīyaṃ [181] kathaṃ sārāṇīyaṃ vīti-sāretvā eka-m-antaṃ nisīdiṃsu.|| ||
Appekacce yena Bhagavā ten'añjaliṃ paṇāmetvā eka-m-antaṃ nisīdiṃsu.|| ||
Appekacce nāmagottaṃ sāvetvā eka-m-antaṃ nisīdiṃsu.|| ||
Appekacce tuṇhī-bhūtā eka-m-antaṃ nisīdiṃsu.|| ||
Eka-m-antaṃ nisinno kho Venāgapuriko Vacchagotto brāhmaṇo Bhagavantaṃ etad avoca:|| ||
3. "Acchariyaṃ bho Gotama,||
abbhutaṃ bho Gotama,||
yāvañ c'idaṃ bhoto Gotamassa vi-p-pasannāni indriyāni,||
parisuddho chavivaṇṇo pariyodāto.|| ||
Seyyathā pi bho Gotama sāradaṃ badarapaṇḍuṃ parisuddhi hoti pariyodātaṃ.|| ||
Evam eva bhoto Gotamassa vi-p-pasannāni indriyāni,||
parisuddho chavivaṇṇo pariyodāto.|| ||
Seyyathā pi bho Gotama tālapakkaṃ sampati bandhanā muttaṃ parisuddhaṃ hoti pariyodātaṃ.|| ||
Evam eva bhoto Gotamassa vi-p-pasannāni indriyāni,||
parisuddho chavivaṇṇo pariyodāto.|| ||
"Seyyathā pi bho Gotama nekkhaṃ jambonadaṃ dakkhakammāraputtasuparikammakataṃ ukkāmukhesu kusalasampahaṭṭhaṃ paṇḍukambale nikkhittaṃ bhāsate ca tapate ca virocati ca.|| ||
Evam eva bhoto Gotamassa vi-p-pasannāni indriyāni,||
parisuddho chavivaṇṇo pariyedāto.|| ||
Yāni nūna tāni bho Gotama uccā-sayanamahā-sayanāni, seyyath'īdaṃ:|| ||
Āsandi pallaṇko goṇako cittakā paṭikā paṭalikā tulikā vikatikā uddalomi ekantalomī kaṭṭhissaṃ koseyyaṃ kuttakaṃ hatth'attharaṃ ass'attharaṃ rath'attharaṃ ajinappaveṇi kādali-miga-pavara-pacc'attharaṇaṃ sa-uttara-c-chadaṃ ubhato-lohita-kūpadhānaṃ,||
eva-rūpānaṃ nūna bhavaṃ Gotamo uccā-sayana-mahā-sayanānaṃ nikāma-lābhī akiccha-lābhī akasira-lābhī" ti.|| ||
4. "Yāni kho pana tāni brāhmaṇa uccā-sayana-mahā-sayanāni, seyyath'īdaṃ:|| ||
Āsandi pallaṇko goṇako cittakā paṭikā paṭalikā tulikā vikatikā uddalomi ekantalomī kaṭṭhissaṃ koseyyaṃ kuttakaṃ hatth'attharaṃ ass'attharaṃ rath'attharaṃ ajinappaveṇi kādali-miga-pavara-pacc'attharaṇaṃ sa-uttara-c-chadaṃ ubhato-lohita-kūpadhānaṃ,||
dullabhāni tāni pabba-jitāniṃ,||
laddhā ca na kappanti.|| ||
Tīṇi kho imāni brāhmaṇa uccā-sayana-mahā-sayanāni,||
yes'āhaṃ etarahi nikāma-lābhī akicchalibhī akasira-lābhī.|| ||
Katamāni tīṇi?|| ||
[182] Dibbaṃ uccā-sayana-mahā-sayanaṃ brahmaṃ||
uccā-sayana-mahā-sayanaṃ||
ariyaṃ uccā-sayana-mahā-sayanaṃ.|| ||
Imāni kho brāhmaṇa tīṇi uccā-sayana-mahā-sayanāni,||
yes'āhaṃ etarahi nikāma-lābhī akiccha-lābhī akasira-lābhī" ti.|| ||
■
5. "Katamaṃ pana bho Gotama dibbaṃ uccā-sayana-mahā-sayanaṃ,||
yassa bhavaṃ Gotamo etarahi nikāma-lābhī akicchalibhī akasira-lābhī" ti?|| ||
"Idāhaṃ brāhmaṇa yaṃ gāmaṃ vā nigamaṃ vā upanissāya viharāmi,||
so pubbaṇha-samayaṃ nivāsetvā patta-cīvaram ādāya tam eva gāmaṃ vā nigamaṃ vā piṇḍāya pavisāmi.|| ||
So pacchā-bhattaṃ piṇḍa-pāta-paṭikkanto vanantaṃ yeva pavārayāmi.|| ||
So yad eva tattha honti tiṇāni vā paṇṇāni vā tāni ekajjhaṃ saṃharitvā nisīdāmi,||
pallaṇkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭha-petvā.|| ||
So vivicc'eva kāmehi vivicca akusalehi dhammehi sa-vitakkaṃ sa-vicāraṃ viveka-jaṃ pīti-sukhaṃ paṭhama-j-jhānaṃ upasampajja viharāmi.|| ||
Vitakka-vicārānaṃ vūpasamā ajjhattaṃ sampasādanaṃ cetaso ekodi-bhāvaṃ avitakkaṃ avicāraṃ samādhi-jaṃ pīti-sukhaṃ dutiya-j-jhānaṃ upasampajja viharāmi.|| ||
Pītiyā ca virāgā upekkhako ca viharati sato ca sampajāno sukhaṃ ca kāyena paṭisaṃvedeti,||
yaṃ taṃ ariyā ācikkhanti:|| ||
'Upekkhako satimā sukha-vihāri' ti|| ||
tatiyaṃ jhānaṃ upasampajja viharāmi.|| ||
Sukhassa ca pahāṇā dukkhassa ca pahāṇā pubb'eva somanassa-domanassānaṃ atthaṇgamā adukkaṃ asukhaṃ upekkhā-sati-pārisuddhiṃ catutthaṃ jhānaṃ upasampajja viharāmi.|| ||
So ce ahaṃ brāhmaṇa evaṃ bhuto caṇkamāmi,||
dibbo me eso tasmiṃ samaye caṇkamo hoti.|| ||
So ce ahaṃ buhmaṇa, evaṃ bhūto tiṭṭhāmi,||
dibbaṃ me etaṃ tasmiṃ samaye asānaṃ hoti.|| ||
So ce ahaṃ brāhmaṇa, evaṃ bhuto nisīdimi,||
dibbaṃ me etaṃ tasmiṃ samaye asānaṃ hoti.|| ||
So ce ahaṃ brāhmaṇa, evaṃ bhuto seyyaṃ kappemi,||
dibbaṃ me etaṃ tasmiṃ samaye uccā-sayana-mahā-sayanaṃ hoti.|| ||
Idaṃ kho taṃ brāhmaṇa [183] dubbaṃ uccā-sayana-mahā-sayanaṃ,||
yassāhaṃ etaraha nikāmālābhī akiccha-lābhī akasira-lābhī" ti.|| ||
■
"Acchariyaṃ bho Gotama,||
abbhutaṃ bho Gotama.|| ||
Ko c'añño eva-rūpassa dibbassa uccā-sayana-mahā-sayanassa nikāma-lābhī bhavissati akiccha-lābhī akasira-lābhī aññata bhotā Gotamona?|| ||
■
6. Katamaṃ pana taṃ bho Gotama brahmaṃ uccā-sayana-mahā-sayanaṃ,||
yassa bhavaṃ Gotamo etarahi nikāma-lābhī akiccha-lābhī akasira-lābhī" ti?|| ||
"Idāhaṃ brāhmaṇa yaṃ gāmaṃ vā nigamaṃ vā upanissāya viharāmi,||
so pubbaṇha-samayaṃ nivāsetvā patta-cīvaram ādāya tam eva gāmaṃ vā nigamaṃ vā piṇḍāya pavisāmi.|| ||
So pacchā-bhattaṃ piṇḍa-pāta-paṭikkanto vanantaṃ yeva pavārayāmi.|| ||
So yad eva tattha honti tiṇāni vā paṇṇāni vā tāni ekajjhaṃ saṃharitvā nisīdāmi,||
pallaṇkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭha-petvā.|| ||
So mettā-saha-gatena cetasā ekaṃ disaṃ pharitvā viharāmi.|| ||
Tathā dutiyaṃ||
tathā tatiyaṃ,||
tathā catutthiṃ.|| ||
Iti uddham-adho tiriyaṃ sabbadhi sabbattatāya sabbā-vantaṃ lokaṃ mettā-saha-gatena cetasā vipulena mahaggatena appamāṇena averena avyāpajjhena pharitvā viharāmi.|| ||
Karuṇā-saha-gatena cetasā ekaṃ disaṃ pharitvā viharāmi.|| ||
Tathā dutiyaṃ||
tathā tatiyaṃ,||
tathā catutthiṃ.|| ||
Iti uddham-adho tiriyaṃ sabbadhi sabbattatāya sabbā-vantaṃ lokaṃ karuṇā-saha-gatena cetasā vipulena mahaggatena appamāṇena averena avyāpajjhena pharitvā viharāmi.|| ||
Muditā-saha-gatena cetasā ekaṃ disaṃ pharitvā viharāmi.|| ||
Tathā dutiyaṃ||
tathā tatiyaṃ,||
tathā catutthiṃ.|| ||
Iti uddham-adho tiriyaṃ sabbadhi sabbattatāya sabbā-vantaṃ lokaṃ muditā-saha-gatena cetasā vipulena mahaggatena appamāṇena averena avyāpajjhena pharitvā viharāmi.|| ||
Upekkhā-saha-gatena cetasā ekaṃ disaṃ pharitvā viharāmi.|| ||
Tathā dutiyaṃ||
tathā tatiyaṃ,||
tathā catutthiṃ.|| ||
Iti uddham-adho tiriyaṃ sabbadhi sabbattatāya sabbā-vantaṃ lokaṃ upekkhā-saha-gatena cetasā vipulena mahaggatena appamāṇena averena avyāpajjhena pharitvā viharāmi.|| ||
So ce ahaṃ brāhmaṇa evaṃ bhūto caṇkamāmi,||
brahmo me eso tasmiṃ samaye caṇkamo hoti.|| ||
So ce ahaṃ brāhmaṇa evaṃ bhūto tiṭṭhāmi,||
brahmo me eso tasmiṃ samaye caṇkamo hoti.|| ||
So ce ahaṃ brāhmaṇa evaṃ bhūto nisīdāmi,||
brahmo me eso tasmiṃ samaye caṇkamo hoti.|| ||
So ce ahaṃ brāhmaṇa evaṃ bhūto seyyaṃ kappemi,||
brahmaṃ me etaṃ tasmiṃ samaye uccā-sayana-mahā-sayanaṃ hoti.|| ||
Idaṃ kho taṃ brāhmaṇa brahmaṃ uccā-sayana-mahā-sayanaṃ,||
yassāhaṃ etarahi nikāma-lābhī akiccha-lābhī akasira-lābhī" ti.|| ||
■
[184] "Acchariyaṃ bho Gotama, abbhūtaṃ bho Gotama!|| ||
Ko c'añño eva-rūpassa brahmassa uccā-sayana-mahā-sayanassa nikāma-lābhī bhavissati akacchalābhī akasira-lābhī aññatra bhotā Gotamona?|| ||
7. Katamaṃ pana taṃ bho Gotama ariyaṃ uccā-sayana-mahā-sayanaṃ,||
yassa bhavaṃ Gotamo etarahi nikāma-lābhī akiccha-lābhī akasira-lābhī ti?"|| ||
■
"Idāhaṃ brāhmaṇa yaṃ gāmaṃ vā nigamaṃ vā upanissāya viharāmi,||
so pubbaṇha-samayaṃ nivāsetvā patta-cīvaram ādāya tam eva gāmaṃ vā nigamaṃ vā piṇḍāya pavisāmi.|| ||
So pacchā-bhattaṃ piṇḍa-pāta-paṭikkanto vanantaṃ yeva pavārayāmi.|| ||
So yad eva tattha honti tiṇāni vā paṇṇāni vā tāni ekajjhaṃ saṃharitvā nisīdāmi,||
pallaṇkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭha-petvā.|| ||
So evaṃ pajānāmi:|| ||
Rāgo me pahīṇo ucchinna-mūlo tālā-vatthu-kato anabhāva-kato āyetiṃ anuppāda-dhammo.|| ||
Doso me pahīno ucchinnamulo tālā-vatthu-kato anabhāva-kato āyatiṃ anuppāda-dhammo.|| ||
Moho me pahīno ucchinna-mūlo tālā-vatthu-kato anabhāva-kato āyatiṃ anuppāda-dhammo|| ||
So ce ahaṃ brāmhaṇa evaṃbhūto caṇkamāmi,||
ariyo me eso tasmiṃ samaye caṇkamo hoti.|| ||
So ce ahaṃ brāhmaṇa evaṃbhūto tiṭṭhāmi,||
ariyo me eso tasmiṃ samaye caṇkamo hoti.|| ||
So ce ahaṃ brāhmaṇa evaṃbhūto nisīdāmi,||
ariyo me eso tasmiṃ samaye caṇkamo hoti.|| ||
So ce ahaṃ brāhmaṇa evaṃbhūto seyyaṃ kappemi,||
ariyaṃ me etaṃ tasmiṃ samaye uccā-sayana-mahā-sayanaṃ hoti.|| ||
Idaṃ kho taṃ brāhmaṇa ariyaṃ uccā-sayana-mahā-sayanaṃ,||
yassāhaṃ etarahi nikāma-lābhī akiccha-lābhī akasira-lābhī" ti.|| ||
■
"Acchariyaṃ bho Gotama,||
abbhūtaṃ bho Gotama!|| ||
Ko cañño eva-rūpassa brahmassa uccā-sayana-mahā-sayanassa nikāma-lābhī bhavissati akacchalābhī akasira-lābhī aññatra bhotā Gotamona?|| ||
Abhikkantaṃ bho Gotama,||
abhikkantaṃ bho Gotama!|| ||
Seyyathā pi bho Gotama nikkujjitaṃ vā ukkujjiteṃ vā ukkujjeyya,||
paṭi-c-channaṃ vā vivareyya,||
mūḷhassavā Maggaṃ ācikkheyya,||
andha-kāre vā tela-pajjotaṃ dhāreyya,||
'cakkhu-manto rūpāni dakkhintī' ti.|| ||
Evaṃ evaṃ bhotā Gotamona aneka-pariyāyena dhammo pakāsito.|| ||
Ete mayaṃ bhante bhavantaṃ Gotamaṃ [185] saraṇaṃ gacchāma,||
Dhammañ ca||
bhikkhu-saṇghañ ca.|| ||
Upāsake no bhavaṃ Gotamo dharetu ajja-t-agge pāṇupete saraṇaṃgatan" ti.|| ||
