Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara-Nikāya
III. Tika Nipāta
X. Loṇa-Phala Vagga

Sutta 91

Accāyika Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[239]

[1][pts][than] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Tīn'imāni bhikkhave kassa-kassa gahapatissa accāyikāni karaṇīyāni.|| ||

Katamāni tīṇi?|| ||

Idha, bhikkhave, kassako gahapati||
sīgha-sīghaɱ khettaɱ sukaṭṭhaɱ karoti sumatikataɱ||
sīgha-sīghaɱ khettaɱ sukaṭṭhaɱ karitvā sumatikataɱ||
sīgha-sīghaɱ bījāni patiṭṭhāpeti.|| ||

Sīghasīghaɱ bījāni patiṭṭhāpetvā||
sīgha-sīghaɱ udakaɱ [240] abineti pi||
apaneti pi.|| ||

Imāni kho bhikkhave tīni kassa-kassa gahapatissa accāyikāni karaṇīyāni.|| ||

Tassa kho taɱ bhikkhave kassa-kassa gahapatissa n'atthi sā iddi vā||
ānubhāvo vā:|| ||

'Ajj'eva me dhaññāni jāyantu||
sv'eva gabhiniyo hontu||
uttarass'eva paccantu' ti.|| ||

Atha kho bhikkhave hoti so samayo yaɱ tassa kassa-kassa gahapatissa tāni dhaññāni utu-pariṇāmini jāyanti pi||
gabhīni pi honti||
paccanti pi.|| ||

 

§

 

2. Evam eva kho bhikkhave tīṇ'imāni bhikkhussa accāyikāni karaṇīyānī.|| ||

Katamāni tīṇi?|| ||

Adhisīla-sikkhā-samādānaɱ||
adhicitta-sikkhā-samādānaɱ||
adhipaññā-sikkhā-samādānaɱ.|| ||

Imāni kho bhikkhave tīṇi bhikkhussa accāyikāni karaṇīyāni.|| ||

Tassa kho taɱ bhikkhave bhikkhuno n'atthi sā iddhi vā||
ānubhāvo vā:|| ||

'Ajj'eva me anupādāya āsavehi cittaɱ vimuccatu||
sve vā uttarass'eva' ti.|| ||

Atha kho bhikkhave hoti so samayo,||
yaɱ tassa bhikkhuno adhisīlam pi sikkhato||
adhicittam pi sikkhato||
adhipaññām pi sikkhato||
anupādāya āsavehi cittaɱ vimuccati.|| ||

 

§

 

Tasmā ti ha bhikkhave evaɱ sikkhitabbaɱ:|| ||

'Tibbo no chando bhavissati adhisīla-sikkhā-samādāne.|| ||

Tibbo no chando bhavissati adhicitta-sikkhā-samādāne.|| ||

Tibbo no chando bhavissati adhipaññā-sikkhā-samādāne' ti.|| ||

Evaɱ hi vo bhikkhave sikkhitabban" ti.|| ||

 


Contact:
E-mail
Copyright Statement