Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara-Nikāya
III. Tika Nipāta
X. Loṇaphala Vagga

Sutta 94

Paṭhama Ājānīya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[244]

[1][pts][than] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

Tīhi bhikkhave aŋgehi samannāgato rañño bhadro ass-ā-jānīye rājā-raho hoti rāja-bhoggo rañño aŋgan t'veva saŋkhaɱ gacchati.|| ||

Katamehi tīhi?|| ||

Idha, bhikkhave, rañño bhaddo ass-ā-jāniyo vañṇasampanno ca hoti,||
bala-sampanno ca||
java-sampanno ca.|| ||

Imehi kho bhikkhave tīhā aŋgehi samannāgato rañño bhaddo ass-ā-jānīyo rājā-raho hoti rāja-bhoggo rañño aŋgan t'veva saŋkhaɱ gacchati.|| ||

2. Evam eva kho bhikkhave tīhi dhammehi samannāgato bhikkhu āhuneyyo hoti,||
pāhuneyyo,||
dakkhiṇeyyo,||
añjali-karaṇīyo,||
anuttaraɱ puñña-k-khettaɱ lokassā ti.|| ||

Katamehi tīhi?|| ||

Idha, bhikkhave, bhikkhu vanṇasampanno ca hoti||
bala-sampanno ca||
java-sampanno ca.|| ||

3. Kathañ ca bhikkhave bhikkhū vaṇṇa-sampanno hoti?|| ||

Idha, bhikkhave, bhikkhū sīlavā hoti,||
Pātimokkha-saɱvara-saɱvuto viharati||
ācāra-gocara-sampanno aṇumattesu vajjesu bhaya-dassāvī,||
samādāya sikkhati sikkhā-padesu.|| ||

Evaɱ kho bhikkhave bhikkhū vaṇṇa-sampanno hoti.|| ||

4. Kathañ ca bhikkhave bhikkhu bala-sampanno hoti?|| ||

Idha, bhikkhave, bhikkhu āraddha-viriyo viharati akusalānaɱ dhammānaɱ pahāṇāya||
kusalānaɱ dhammānaɱ upasampadāya thāmavā daḷha-parakkamo anikkhitta-dhūro kusalesu dhammesu.|| ||

Evaɱ kho bhikkhave bhikkhu bala-sampanno hoti.|| ||

5. Kathañ ca bhikkhave bhikkhū java-sampanno hoti?|| ||

Idha, bhikkhave, bhikkhū||
idaɱ dukkhan ti yathā-bhūtaɱ pajānāti,||
ayaɱ dukkha samudayo yathā-bhūtaɱ pajānāti,||
[245] ayaɱ dukkha-nirodha-gāminī paṭipadā ti yathā-bhūtaɱ pajānāti.|| ||

Evaɱ kho bhikkhave bhikkhū java-sampanno hoti.|| ||

Imehi kho bhikkhave tīhi dhammehi samannāgato bhikkhū āhuneyyo hoti pāhuneyyo,||
dakkhiṇeyyo,||
añjali-karaṇīyo,||
anuttaraɱ puñña-k-khettaɱ lokassā ti.|| ||

 


Copyright Statement