Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara-Nikāya
III. Tika Nipāta
XII. Āpāyika Vagga

Sutta 115

Vipattisampadā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[268]

[1][pts] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

Tisso imā bhikkhave vipattiyo.|| ||

Katamā tisso?|| ||

Silavipatti,||
cittavipatti,||
diṭṭhivipatti.|| ||

Katamā ca bhikkhave sīla-vipatti?|| ||

Idha, bhikkhave, ekacco pāṇāti-pātī hoti,||
adinn'ādāyī hoti,||
kāmesumucchācārī hoti,||
musā-vādī hoti.|| ||

Pisuṇāvāco hoti,||
pharusā-vāco hoti,||
samphappalāpī hoti.|| ||

Ayaɱ vuccati bhikkhave sīla-vipatti.|| ||

Katamā ca bhikkhave cittavipatti?|| ||

Idha, bhikkhave, ekacco abhijjhālū hoti:||
vyāpanna-citto hoti,||
ayaɱ vuccati bhikkhave citta vipatti.|| ||

Katamā ca bhikkhave diṭṭhivipatti?|| ||

Idha, bhikkhave, ekacco micchā-diṭṭhiko hoti.|| ||

Viparītadassano n'atthi dinnaɱ,||
n'atthi yiṭṭhaɱ,||
n'atthi hutaɱ,||
n'atthi [269] sukaṭa-dukkaṭānaɱ kammānaɱ phalaɱ vipāko,||
n'atthi ayaɱ loko,||
n'atthi paroloko,||
natti mātā,||
n'atthi pitā,||
natti sattā opapātikā,||
natti loke samaṇa-brāhmaṇā sammaggatā sammāpaṭipannā,||
ye imañ ca lokaɱ parañca lokaɱ sayaɱ abhiññā sacchi-katvā pavedentī ti.|| ||

Ayaɱ vuccati bhikkave diṭṭhivipatti.|| ||

Sīlavipattihetu vā bhikkhave sattā kāyassa bhedā param maraṇā apāyaɱ duggatiɱ vinipātaɱ Nirayaɱ upapajjanti.|| ||

Cittavipattihetu vā bhikkhave sattā kāyassa bhedā param maraṇā apāyaɱ duggatiɱ vinipātaɱ Nirayaɱ upapajjanti.|| ||

Diṭṭhipittihetu vā bhikkhave sattā kāyassa bhedāparam maraṇā apāyaɱ duggatiɱ vinipātaɱ Nirayaɱ upapajjanti.|| ||

Imā ko bhikkhave tisso vipattiyoti.|| ||

Tisso imā bhikkave sampadā.|| ||

Katamā tisso? sīla-sampadā cittasampadā diṭṭhi-sampadā.|| ||

Katamā ca bhikkhave sūlasampadā?|| ||

Idha, bhikkhave, ekacco pāṇāti-pātā paṭivirato hoti,||
adinn'ādānā paṭivirato hoti,||
kāmesu micchā-cārā paṭivirato hoti,||
musā-vādā paṭivirato hoti,||
pusuṇāvācā paṭivirato hoti,||
pharusā-vācā paṭivarato hoti,||
samphappalāpā paṭivirato hoti.|| ||

Ayaɱ vuccati bhikkave sīla-sampadā.|| ||

Katamā ca bhikkhave cittasampadā?|| ||

Idha, bhikkhave, ekacco anabhijjhalū hoti,||
avyāpanna-citto hoti.|| ||

Ayaɱ vuccati bhikkhave cittasampadā.|| ||

Katamā ca bhikkhave diṭṭhi-sampadā?|| ||

Idha, bhikkhave, ekacco sammā-diṭṭhiko hoti aviparitadassano: atthi dinnaɱ,||
atthi yiṭṭhaɱ,||
atthi hutaɱ,||
atthi sukamadukkamānaɱ kammānaɱ phalaɱ vipāko,||
atthi ayaɱ loko,||
atthi paro loko,||
atthi mātā,||
atthi pitā,||
atti sattā opapātikā,||
atthi loke samaṇa-brāhmaṇā sammaggatā sammāpaṭipannā ye imañ ca lokaɱ parañca lokaɱ sayaɱ abhiññā sacchi-katvā pavedentī ti.|| ||

Ayaɱ vuccati bhikkhave diṭṭhi-sampadā.|| ||

[270] Sīla-sampadahetu vā bhikkhave sattā kāyassa bhedā param maraṇā sugatiɱ saggaɱ lokaɱ upapajjanti.|| ||

Cittasampadā-hetu vā bhikkhave sattā kāyassa bhedā param maraṇā sugatiɱ saggaɱlokaɱ upapajjanti.|| ||

Diṭṭhisampadā-hetu vā bhikkhave sattā kāyassa bhedā param maraṇā sugatiɱ saggaɱ lokaɱ upapajjantī ti.|| ||

Imā kho bhikkhave tisso sampadāti.|| ||

 


Copyright Statement