Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara-Nikāya
III. Tika Nipāta
XII. Āpāyika Vagga

Sutta 118

Paṭhama Soceyya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[271]

[1][pts] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

Tīṇ'imāni bhikkhave soceyyāni.|| ||

Katamāni tīṇi?|| ||

Kāya-soceyyaɱ,||
vacī-soceyyaɱ,||
mano-soceyyaɱ.|| ||

Katamañ ca bhikkhave kāya-soyeyyaɱ?|| ||

Idha, bhikkhave, ekacco pāṇāti-pātā paṭivirato hoti,||
adinn'ādānā paṭivirato hoti,||
kāmesu micchā-cārā paṭivirato hoti.|| ||

Idaɱ vuccati bhikkhave kāya-soceyyaɱ.|| ||

Katamañ ca bhikkhave vaci-soceyyaɱ?|| ||

Idha, bhikkhave, ekacco musā-vādā paṭivirato hoti,||
pisuṇā-vācā paṭivirato hoti,||
pharusā-vācā paṭivirato hoti,||
samphappalāpā paṭivirato hoti.|| ||

Idaɱ vuccati bhikkhave vaci-soceyyaɱ.|| ||

Katamañ ca bhikkhave mano-soceyyaɱ?|| ||

Idha, bhikkhave, ekacco anabhijjhālū hoti,||
avyāpanna-citto [272] hoti,||
sammā-diṭṭhiko hoti.|| ||

Idaɱ vuccati bhikkhave manosoceyyaɱ.|| ||

Imāni kho bhikkhave tīṇi soceyyānīti.|| ||

 


Contact:
E-mail
Copyright Statement