Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara-Nikāya
III. Tika Nipāta
XIII. Kusināra Vagga

Sutta 121

Kusināra Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[274]

[1][pts] Evaɱ me sutaɱ.|| ||

Ekaɱ samayaɱ Bhagavā Kusinārāyaɱ viharati baliharaṇe vana-saṇḍe.|| ||

Tatra ko Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca.|| ||

"Idha, bhikkhave, bhikkhū aññataraɱ gāmaɱ vā nigamaɱ vā upanissāya viharati.|| ||

Tam enaɱ gahapati vā gahapati-putto vā upasankamitvā svātanāya bhattena nimanteti.|| ||

Ākaŋkamāno bhikkhave bhikkhū adhivāseti.|| ||

So tassā rattiya accayena pubbaṇha-samayaɱ nivāsetva patta-cīvaraɱ ādāya yena tassa gahapatissa vā gahapati-puttassa vā nivesanaɱ ten'upasankamati.|| ||

Upasaŋkamitvā paññatte āsane nisīdati.|| ||

Tam enaɱ so gahapati vā gahapati-putto vā paṇītena khādanīyena bhojanīyena sahatthā santappeti sampavāreti.|| ||

Tassa evaɱ hoti:|| ||

'Sādhu vata māyaɱ gahapati vā gahapati-putto vā paṇītena khādanīyena bhojanīyena sahatthā santappeti sampavāretī' ti.|| ||

Evam pi'ssa hoti:|| ||

'Aho vata māyaɱ gahapati vā gahapati-putto vā āyatim pi eva-rūpena paṇītena khādanīyena bhojanīyena sahatthā santappeyya sampavāreyyā' ti.|| ||

So taɱ piṇḍa-pātaɱ gathito mucchito ajjhāpanno anādinavadassāvī anissaraṇa-pañño paribhuñjati.|| ||

So tattha kāma-vitakkam pi vitakketi.|| ||

Vyāpadā-vitakkam pi vitakketi.|| ||

Vihiɱsā-vitakkam pi vitakketi.|| ||

Eva-rūpassāhaɱ bikkhave bhikkhuno dinnaɱ na maha-p-phalan ti vadimi.|| ||

Taɱ kissa hetu?|| ||

Pamatto bikkhave bhikkhū viharati.|| ||

Idha, bhikkhave, bhikkhū aññataraɱ gāmaɱ vā nigamaɱ vā upanissāya viharati.|| ||

Tam enaɱ gahapati vā gahapati-putto vā upasankamitvā svātanāya bhattena nimanteti.|| ||

Ākaŋkamāno bhikkhave bhikkhū adhivāseti.|| ||

So tassā rattiya accayena pubbaṇha-samayaɱ nivāsetva patta-cīvaraɱ ādāya yena tassa gahapatissa vā gahapati-puttassa vā nivesanaɱ ten'upasankamati.|| ||

Upasaŋkamitvā paññatte āsane nisīdati.|| ||

Tam enaɱ so gahapati vā gahapati-putto vā paṇītena khādanīyena bhojanīyena sahatthā santappeti sampavāreti.|| ||

Tassa na evaɱ hoti:|| ||

'Sādhu vata māyaɱ gahapati [275] vā gahapati-putto vā paṇītena khādanīyena bhojanīyena sahatthā santappeti sampavāretī' ti.|| ||

Evam pi'ssa na hoti:|| ||

'Aho vata māyaɱ gahapati vā gahapati-putto vā āyatim pi eva-rūpena paṇītena khādanīyena bhojanīyena sahatthā santappeyya sampavāreyyā' ti.|| ||

So taɱ piṇḍa-pātaɱ agathito amucchito anajjhāpanno ādinavadassāvī nissaraṇa-pañño paribhuñjati.|| ||

So tattha nekkhamma-vitakkam pi vitakketi.|| ||

Avyāpadā-vitakkam pi vitakketi.|| ||

Avihiɱsā-vitakkam pi vitakketi.|| ||

Eva-rūpassāhaɱ bhikkhave bhikkhuno dinnaɱ maha-p-phalan ti vadāmi.|| ||

Taɱ kissa hetu?|| ||

Appamatto hi bhikkhave bhikkhū viharatī" ti.

 


Contact:
E-mail
Copyright Statement