Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara-Nikāya
III. Tika Nipāta
XIII. Kusināra Vagga

Sutta 123

Gotamaka-Cetiya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[276]

[1][pts][than][olds] Evaɱ me sutaɱ:|| ||

Ekaɱ samayaɱ Bhagavā Vesāliyaɱ viharati Gotamake cetiye.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

Abhiññāyāhaɱ bikkave dhammaɱ desemi||
no anabiññāya.||
Sanidān'āhaɱ bhikkhave dhammaɱ desemi||
no anidānaɱ.||
Sappāṭihāriyāhaɱ bhikkhave dhammaɱ desemi||
no appāṭihāriyaɱ.|| ||

Tassa mayhaɱ bikkave abhiññāya dhammaɱ desayato||
no anabhiññāya,||
sanidānaɱ dhammaɱ desayato||
no anidānaɱ,||
sappāṭihāriyaɱ dhammaɱ desayato||
no appāṭihāriyaɱ,||
karaṇiyo ovādo karaṇiyā anusāsanī.|| ||

Alañca pana vo bhikkhave tuṭṭhiyā,||
alaɱ atta-manatāya,||
alaɱ somanassāya"Sammā-Sam-Buddho Bhagavā,||
svākkhāto Bhagavatā dhammo,||
su-paṭipanno saŋgho" ti.|| ||

Idam avoca Bhagavā.|| ||

Attamanā te bhikkhū Bhagavato bhāsitaɱ abhinanduɱ.|| ||

Imasmiñca pana veyyā-kara-ṇasmiɱ bhaññamāne sahassī loka-dhātu akampitthāti.

 


Contact:
E-mail
Copyright Statement